¿Maqanakuy allinchu?

MAQANAKUYLLATA munaj wawasta, ¿rejsinkichu?... ¿Paykunawanchu puriyta munanki? Chayri, ¿kʼacha wawaswanchu?... Jesús nerqa: “Kusikuyniyojmin kanku allinyachejkunaqa, imaraykuchus paykunaqa Diospa wawasnin nisqa kanqanku”, nispa (Mateo 5:9).

Wakin kutis wajkunaj ruwasqanku rabiachiwanchej, ¿icharí?... Ichá chay kutispi pagachikuyta munasunman. Uj kuti, Jesuspa yachachisqasninpis Jerusalenman Jesuswan rishaspa chayta ruwayta munarqanku. Astawan chaymanta willarisqayki.

Rishajtinku, Jesusqa wakin yachachisqasninta Samariaj ujnin ranchonman ñauparicherqa. Paykunaqa alojamientota maskʼaj rerqanku. Chay ranchopitajrí, waj religionniyoj kasqankurayku mana alojayta munarqankuchu. Chantapis samaritanosqa, Jerusalenpi Diosta yupaychamoj runasta chejnikoj kanku.

Jesuspa ujnin yachachisqan kawaj karqa chay, ¿imatá ruwawaj karqa? ¿Phiñakuwajchu karqa? ¿Vengakuytachu munawaj karqa?... Santiagowan Juanwanqa vengakuyta munarqanku. Chayrayku Jesusman nerqanku: “Munawajchu kamachinaykuta janaj pachamanta nina uraykʼamuspa paykunata qʼolananta?”, nispa. ¡Chayraykuchá Jesusqa Juantawan Santiagotawan “Qhon Qhompa Churisnin” nispa nerqa! Jesusqa vengakuyta munasqankumanta paykunata kʼamerqa (Lucas 9:51-56; Marcos 3:16-19).

Wakin runasqa sajras kanku. Ichapis wakin wawasqa mana qanwan pujllayta munankumanchu. Ichapis nisunkuman: “Mana qanwan pujllayta munaykuchu, ripuy”, nispa. Pipis ajinata niwajtinchejqa phiñakusunman, ¿icharí? Ichapis chay rato maqarqoyta munasunman. ¿Allinchu kanman chayta ruwana?...

Bibliaykipi Proverbios 24:29 versiculota maskʼariy. Chaypi yuyaychawanchej: “Ama niychu: Imaynatachus ruwawarqa, kikillantataj ruwasaj; ruwawasqanman jina kutichisaj, nispaqa”.

¿Imatá kay versiculomanta yachakunki?... Kay versículo yachachiwanchej mana pimanpis sajramanta sajrallawantaj kutichinata. Chayrayku mana ima sajratapis ruwanachu tiyan, wajkuna noqanchejpaj sajrata ruwasqankuraykoqa. Chantá, ¿imatá ruwawaj pillapis qanwan maqanakuyta munaspa toreyasojtin? Ichapis phiñachisunanpaj alqochakusunkiman, asipayasunkiman chayri “manchachikuwanki” nisunkiman. Manaqa “qʼewa” nisunkiman. ¿Kasuspa maqanakunaykichu kanman?...

Bibliata leerinallataj. Mateo 5:39 versiculota maskʼariy. Chaypi Jesús nerqa: “Sajra runamanqa ama kutichikuychejchu; pillapis paña uyaykipi laqʼasojtenqa, lloqʼe uyaykitawan rikuchiy”, nispa. ¿Imatataj Jesús niyta munasharqa? ¿Nisharqachu pipis ujnin uyaykipi sajmasojtin, ujninpiwan sajmachikunaykita?...

Mana, Jesusqa mana chaytachu nisharqa. Laqʼaywan, sajmaywanqa mana kikinchu. Laqʼayqa tanqarpariywan ninakunman. Laqʼasoj chayri tanqarparisojqa, qanwan maqanakuyta munashan. Phiñarikunaykita munan. Rabiarikuspa payta tanqarparillawajtaj chay, ¿imataj kanman?... Maqanaykukuwajchej.

Jesusqa mana munarqachu yachachisqasnin maqanakunankuta. Chayrayku nerqa, pipis laqʼarpawajtinchej mana kutichikunachu kasqanta. Arí, mana phiñakunanchejchu tiyan, nitaj maqanakunanchejchu tiyan. Sichus phiñakuspa maqanakusun chayqa, maqanakuta maskʼaj runaman rijchʼakusun.

Pipis maqanakuyta munaspa toreyasojtin, ¿imatá ruwawaj?... Ripunayki tiyan. Ichapis payqa ujtawan tanqarparisonqa. Mana kasojtiykitaj, ichá saykʼuponqa. Ripuspaqa mana qʼewachu kanki, astawanpis wapu. Imaraykuchus sajra kajta atipanapajqa wapu kana tiyan.

Maqanaykukuspa atipawaj chay, ¿imataj kanman?... Ichá atipachikojqa masisninta pusarikamunman. Paykunataj kʼaspiwan wajtarpasunkuman chayri cuchillowan tʼojsirpasunkuman. ¿Reparankichu imajtinchus Jesús mana maqanakunata munasqanta?...

Wajkunata maqanakushajta rikusparí, ¿imatá ruwananchej kanman? ¿Mayqenninkumanpis kutikunachu kanman?... Bibliaqa imatachus ruwanata yuyaychawanchej. Proverbios 26:17 versiculota leerina. Chaypi nin: ‘Waj runaspa quejasninkuman satʼikoyqa alqota ninrisninmanta japʼiy jina’, nispa.

¿Phiña alqota ninrisninmanta japʼiykullawajchu? Mana, ¿icharí? Japʼiykojtiykeqa phiñakuspa khanisuyta munanman. Kacharichikuyta munajtintaj, aswan kallpawan japʼinayki kanman. Alqotajrí astawan phiñarikunman. Kacharejtiykitaj khanirpasunkiman. ¿Manacharí ninrisninmanta wiñaypaj japʼiyta atiwajchu?...

Uj maqanakuman satʼikoyqa, alqota ninrisninmanta japʼiyman rijchʼakun. Ichá imamantachus maqanakushasqankuta, pichus qallarisqantapis, mana yachanchejchu. Maqachikojqa ichapis suwakorqa. Payman kutikuspaqa, ichá suwata yanapashasunman. Chaytaj mana allinchu kanman, ¿icharí?

Chayrayku wajkunata maqanakojta rikuspa, ¿imatá ruwanayki tiyan?... Escuelapi maqanakushanku chayqa, uj profesorman willamuwaj. Callepi maqanakushanku chaytaj, tatasniykita chayri policiata wajyawaj. Wajkuna maqanakuyta munajtinkupis, noqanchejqa tukuywan allinpi kausakunanchej tiyan.

Jesuspa yachachisqasnenqa, mana maqanakusta maskʼanapaj kallpachakunchej. Ajinamanta rikuchinchej, sajra kajta atipanapaj wapu kasqanchejta. Biblia nisqanman jina, Jesuspa kamachenqa “mana churanakojchu kanan tiyan, manachayqa tukuypaj kʼacha” (2 Timoteo 2:24).