¿Jesuspa yachachisqasnin ayunajchu kanku?

Jesús 30 watapi Pascuapaj Jerusalenman risqanmanta pisi tiemponman, Juan Bautistata carcelman wisqʼaykorqanku. Chaymantapachataj casi watataña carcelpi kasharqa, 31 watamanta Pascua fiestapis qayllapiña kasharqa. Chaykamataj Juan Bautistaj wakin yachachisqasnillan payta kasukuspa Jesuspa qhepanta rerqanku.

Juan Bautistaj wakin yachachisqasnintajrí, Jesusta tapumorqanku: “Noqaykupis fariseospis ayunayku, ¿imaraykutaj chanta yachachisqasniyki mana ayunankuchuri?”, nispa (Mateo 9:14). Fariseos ukhupeqa ayunota ruwana costumbre kaj. Ichapis chayrayku Jesusqa, chay costumbrenkumanta parlaspa yachacherqa. Payqa uj jatunchakoj fariseo ajinata mañakusqanta nerqa: ‘Diosníy, agradecekuyki noqaqa mana wajkuna jinachu kasqaymanta. Semanapipis iskay kutita ayunani’, nispa (Lucas 18:11, 12). Juanpa yachachisqasninpis, ichá fariseos jinallataj costumbreraykulla ayunaj kanku. Manachayrí ichá Juan Bautista preso kasqanmanta llakikusqankurayku ayunarqanku. Ichapis chayrayku munarqanku Jesuspa yachachisqasnin ayunanankuta.

Jesustajrí paykunaman nerqa: “Novioj amigosnenqa ni imamanta llakikunankuchu tiyan paykunawan novio kashajtenqa, ¿icharí? Chaywanpis pʼunchaykuna jamonqa, maypachachus novio paykunamanta qhechusqa kanqa, chaypachamá ayunanqanku”, nispa (Mateo 9:15).

Juan Bautistallataj nerqa chay novioqa Jesús kasqanta (Juan 3:28, 29). Chayrayku Jesús yachachisqasninwan kashajtenqa, paykunaqa mana ayunanankuchu karqa. Astawanpis Jesús wañuchisqa kajtinraj llakikusqankurayku ayunananku karqa. Jesús kausarichisqa kajtinrí, manaña ayunanankuchu karqa. Astawanpis kusikunanku karqa.

Chantá Jesusqa iskay kikinchaykunata willarqa Juan Bautistaj yachachisqasninman. Pay nerqa: “Mana pipis maukʼa ropata mosoj telawan remiendanchu. Mosoj telaqa qʼentirpakuspa maukʼa ropata astawan llikʼirparinman. Manallataj pipis mosoj vinota maukʼa qara botasman jallchʼanchu, jallchʼanman chayqa, qara botasqa phatanman vinotaj jichʼakunman, qara botaspis usunman. Astawanpis mosoj vinotaqa, mosoj qara botasman jallchʼakun, ajinaqa ni mayqen imanakunchu”, nispa (Mateo 9:16, 17). ¿Imatá Jesús chaywan yachachisharqa?

Jesusqa judiospa yupaychayninkuta, ayunana costumbrenkutapis maukʼa ropawan kikincharqa. Payqa mana chayta allinchajchu jamorqa, yacharqataj judiosqa qhesachasqa kanankuta. Chantapis judiosqa runaj yuyayninman jinalla Diosta yupaychaj kanku. Chayrayku Jesusqa mana munarqachu yachachisqasnin paykunaj costumbresninkuta ruwanankuta. Arí, payqa mana maukʼa ropata mosoj telawan remiendajchu jamorqa, nitaj mosoj vinota maukʼa qara botasman jallchʼajchu. Jesusqa chayta Juanpa yachachisqasninman entiendecherqa.