Jesusqa fariseosta kʼamin

Leymanta yachachejkunawan fariseoswanqa, nerqanku Jesús mana Diospa atiyninwanchu supaykunata qharqosqanta. Ajinamanta Diospa atiyninpa contranpi juchallikunankupaj jina kasharqanku. Paykunaqa ajllananku karqa Diostachus chayri Supaytachus sirviyta. Jesús nerqa: “Qankunachus sumaj sachʼa kankichej chayqa, poqoyniykichejqa sumajllataj kanqa. Mana allin sachʼa kankichej chayrí, poqoyniykichejqa manallataj allinchu kanqa. Chayrayku sachʼataqa poqoyninnejta rejsinchej”, nispa (Mateo 12:33).

Supaykunata qharqoyqa sumaj sachʼaj poqoynin jina karqa. Leymanta yachachejkunawan fariseoswantajrí, Jesusmanta nerqanku: “Kay runaqa supaykunata qharqon supaykunaj kurajninku Satanaspa atiyninwan”, nispa. Chayta nispa paykunaqa pantasharqanku. Jesusllataj orqopi yachachishaspa nerqa, sumaj poqoyqa allin sachʼamanta kasqanta. Fariseosqa Jesuspa contranta parlaspa, mana allin sachʼa jina karqanku. Chayrayku Jesús paykunata kʼamerqa: “Katari uñas, ¿imaynatataj allin imasta parlawajchej sajras kashaspari? Sonqopi imachus juntʼa kashan, chaymanta simeqa parlan”, nispa (Mateo 7:16, 17; 12:34).

Arí, imachus sonqonchejpi kasqanqa parlasqanchejpi yachakun, parlasqanchejnejtataj juzgasqa kasunchej. Chayrayku Jesús nerqa: “Noqatajrí niykichej: Runasqa Juicio Pʼunchaypi cuentata qonqanku, tukuy qhasi manakajta parlasqankumanta. Qanpis parlasqaykinejta cheqanpaj qhawasqa kanki, parlasqaykinejllatataj juchachasqa kanki”, nispa (Mateo 12:36, 37).

Jesusqa ashkha milagrostaña ruwarqa. Jinapis fariseoswan leymanta yachachejkunawanqa, nerqanku: “Yachachejníy, uj señalta qanmanta rikuyta munayku”, nispa. Paykuna Jesuspa milagrosninta mana rikorqankuchu chaypis, yacharqanku waj runas chayta rikusqankuta. Chayrayku Jesusqa paykunaman nerqa: “Kay tiempomanta sajra runas, Diosta wasanchajkuna, uj señalta mañakushallankupuni. Manataj ima señaltapis rikonqankuchu, manachayqa profeta Jonaspa señalnillanta”, nispa (Mateo 12:38, 39).

Chantá Jesusqa Jonaspa señalninmanta nerqa: “Imaynatachus Jonás jatun pescadoj wijsanpi kinsa pʼunchayta, kinsa tutatawan karqa, ajinallatataj noqapis jallpʼaj sonqonpi kinsa pʼunchayta, kinsa tutatawan kasaj”, nispa. Jonastaqa uj jatun pescado oqoykorqa, kinsa dianmantaj kausashajta lanzarparimorqa. Chayqa kausarimuy jina karqa. Chantá Jesusqa nerqa wañupunanta, kinsa dianmantaj kausarimunanta. Jesuspa nisqan juntʼakojtin, leymanta yachachejkunawan fariseoswanqa, ‘Jonaspa señalninta’ mana kasorqankuchu, nitaj pesachikorqankuchu (Mateo 27:63-66; 28:12-15). ‘Ninivemanta runastajrí’, Jonaspa willasqanta uyariytawan pesachikorqanku. Chayrayku paykunaqa Jesuspa tiemponmanta runasta juzganqanku. Chantá Jesús nillarqataj: “Sebamanta reinapis, kay tiempomanta runasta juchachanqa”, nispa. Chay reinaqa karumanta rerqa Salomonpa yachayninta uyarej. Chayta uyarispataj mayta tʼukorqa. Jesustajrí, “Salomonmanta nisqaqa, aswan kuraj” karqa (Mateo 12:40-42).

Chantá Jesusqa nerqa uj runamanta supay llojsisqanta. Tiemponmanta runastataj chay runawan kikincharqa (Mateo 12:45). Chay runaqa paymanta supay llojsejtin, uj wasi jina chʼusajlla qhepakorqa, nitaj chayman allin imaswan juntʼacherqachu. Chayrayku chay supayqa, chay runaman watejmanta yaykorqa aswan sajra qanchis supaykunawan. Chay runa jinallataj Israel nacionpis llulla dioskunata yupaychaymanta llimphuchasqa karqa. Jinapis israelitasqa Jehová Diospa profetasninta qhesacharqanku. Chantapis Jesusta qhesachallarqankutaj, Diospa atiyninwan kashasqan sutʼi rikukojtinpis. Ajinamanta Israel nacionqa qallariypi kasqanmanta, aswan mana allinman tukorqa.

Jesús yachachishajtin, mamanwan hermanosninwan chayarqanku, jawallapitaj qhepakorqanku. Jesuspa ladonpi kajkunataj nerqanku: “Mamaykiwan hermanosniykiwan jawapi sayashanku, qanwan tinkukuyta munaspa”, nispa. Jesustajrí yachachisqasninta makinwan señalaspa nerqa: “Mamaywan hermanosniywanqa kanku, pikunachus Diospa palabranta uyarinku, kasunkutaj, chaykuna”, nispa (Lucas 8:20, 21). Jesusqa chayta nispa yachachisqasninta astawan munakusqanta nisharqa. Noqanchejtapis mayta kallpachawanchej hermanosninchejwan ujchasqa kasqanchej. Astawanraj runas qhawarawajtinchej.