¿Imataj uj runata chʼichichan?

Jesusqa 32 watamanta Pascua fiesta ñaupajta, Galileapi mayta willasharqa. Chantá Pascuapaj Jerusalenmanchá rerqa. Imajtinchus Ley nisqanman jinaqa tukuy chayman rinanku karqa. Jerusalenpitaj, Jesusqa judiosmanta sumajtachá cuidakorqa. Imajtinchus payta wañuchiyta munasharqanku (Juan 7:1). Chantá Jesusqa Galileaman kutiporqa.

Payqa ichapis Capernaumman chayarqa. Chaypi kashajtintaj Jerusalenmanta fariseoswan leymanta yachachejkunawan chayarqanku. Paykunaqa Jesusta maskʼaj risqanku, “Leyta mana juntʼashanchu” nispa juchachanankupaj. Chantá Jesusta taporqanku: “¿Imaraykutaj yachachisqasniyki ñaupa tataspa costumbresninkuta pʼakinkuri? Paykunaqa mikhunankupaj mana allintachu makisninkuta mayllakunku”, nispa (Mateo 15:2). Chayta nispaqa Jesuspa yachachisqasninta qhasillamanta juchachasharqanku. Imajtinchus Diosqa ni jaykʼaj llajtanman kamacherqachu “makisninkuta codosninkukama” mayllakunankuta (Marcos 7:3).

Jesustajrí mana imatapis kuticherqachu. Astawanpis Diospa Leyninta rejsishaspa pʼakisqankumanta nerqa: “¿Imaraykutaj qankunapis costumbresniykichejrayku Diospa kamachisqanta pʼakinkichejri? ¿Manachu Diosqa nin: ‘Tataykita, mamaykitawan jatunpaj qhaway’, nispa? ¿Manachu nillantaj: ‘Pichus tatanta chayri mamanta maldecejqa wañuchisqa kachun’, nispa? Qankunatajrí ninkichej: ‘Pillapis tatanta chayri mamanta niyta atillan: “Yanapasunaypaj imasniychus kapuwasqanqa Diospajña tʼaqasqa kashan”, nispa. Jinapeqa manaña tatanta chayri mamanta yanapananchu tiyan’, nispa” (Mateo 15:3-6; Éxodo 20:12; 21:17).

Fariseosqa nej kanku qolqenkuta, wasisninkuta chayri imallankutapis Diosman jaywapuspaqa, manaña imapajpis chaykunata apaykachanankuchu kasqanta. Jinapis chay imastaqa apaykachallajpuni kanku. Yuyasqankuman jinaqa, uj runaqa tatanta chayri mamanta niyta atillaj kapuynin “corbanña” kasqanta. Corbanqa niyta munan Diospaj tʼaqasqa. Chayrayku fariseosqa, tatasninkuta edadniyojña kajtinku mana yanaparejchu kanku. Paykunaqa tatasninkutaraj aswan ñaupajman churananku karqa templomanta nisqaqa. Paykunatajrí tatasninku viejitusña kajtinku saqerparillaj kanku, ajinamantataj Diospa Leyninta pʼakisharqanku (Marcos 7:11).

Jesusqa fariseos Diospa Leyninta munayninkuman jina qʼewisqankumanta phiñakorqa. Chayrayku nerqa: “Qankunaqa costumbresniykichejrayku Diospa palabranta mana valechinkichejchu. Puraj uyas, profeta Isaiasqa allinta qankunamanta nerqa: ‘Kay runasqa simillankuwan yupaychawanku, sonqonkutajrí noqamanta may karunchasqa kashan. Qhasillata yupaychawanku. Paykunaqa runaspa kamachisqallanta yachachinku Diospa yachachiyninpis kanman jina’, nispa”. Fariseostajrí chʼinllaña karqanku. Chantá Jesusqa runasta wajyaspa nerqa: “Uyariychej, entiendeychejtaj kayta: Mana mikhusqanchu runataqa chʼichichan, siminmanta llojsimojmá runataqa chʼichichan”, nispa (Mateo 15:6-11; Isaías 29:13).

Chantá uj wasipi kashajtinku, Jesusta yachachisqasnin nerqanku: “¿Reparankichu fariseosqa nisqaykita uyarispa phiñarikusqankuta?”, nispa. Jesustaj nerqa: “Ima yurallapis, cielopi kaj Tataypa mana plantasqanqa, tʼirasqa kanqa. Paykunata saqeychej. Imaraykuchus ciegos kaspapis, wajkunata pusaykachanku. Sichus uj ciego waj ciegota pusaykachan chayqa, iskayninku tʼoqoman urmaykonqanku”, nispa (Mateo 15:12-14).

Chantá Pedroqa Jesusta nerqa: “Chay kikinchayta sutʼinchawayku”, nispa. Jesustaj nerqa: “¿Nichu yachankichej uj runa imatachus mikhusqanqa, wijsanman yaykusqanta, chaymantataj llojsimusqanta? Chaywanpis, simimanta llojsej imasqa sonqomanta llojsimun, chaykunamá runataqa chʼichichan. Runaspa sonqonmantaqa llojsimun sajra yuyaykuna. Chayrayku runata wañuchinku, qhenchachakunku, khuchichakuspa juchachakunku, suwakunku, llullakunku, sajratataj rimanku. Chaykunamá runataqa chʼichichan. Mana allin mayllasqa makiswan mikhuytajrí mana runataqa chʼichichanchu”, nispa (Mateo 15:17-20).

Jesús chayta nispa mana nisharqachu waykʼunapaj chayri mikhunapaj makista mana mayllakunata. Astawanpis payqa, fariseoswan leymanta yachachejkunawan puraj uyas kasqankuta nisharqa. Paykunaqa costumbresninkuta velechispa Diospa leyesninta pisipaj qhawaj kanku. Chayrayku Jesusqa nerqa, runaj sonqonmanta llojsimoj sajra imas runata chʼichichasqanta.