Allinta qhawakuna Satanás oqoykuyta munawanchej

 1. ¿Imaynatataj Satanasman uj ángel tukorqa?

UJ ÁNGEL uj tiempopi Jehovawan allinpi karqa. Chaywanpis uj pʼunchay runaswan yupaychachikuyta munarqa. Chay munayninta wiñachisqanraykutaj juchallikorqa (Sant. 1:14, 15). Mana yachanchejchu niraj Jehovaj contranpi oqharikushaspa imachus chay ángel sutikusqanta, kunanqa Satanás sutiwan rejsinchej. Nitaj ‘jaykʼajpis cheqa kajpi sayarqachu’, Jehovaj contranpitaj oqharikorqa, “llullakuypa tatan[mantaj]” tukorqa (Juan 8:44).

2, 3. ¿Imaraykutaj Diospa enemigonta “Satanás” “Kuraj Supay” “ñaupa katari” “jatun sierpe” nispa nikun?

² Satanasqa churanakuyta qallarisqanmantapacha, Jehovaj enemigonman tukorqa, jinallataj runaspa enemigonmanpis. Imatachus Biblia paymanta niwasqanchejrayku, imayna sajrachus kasqanta yachanchej. Satanás suteqa “churanakoj” niyta munan, chaytaj rikuchin Diospa kamachiyninta qhesachasqanta, tukuy atiyninwantaj churanakusqanta. Payqa mana munanchu Jehová kamachinanta.

³ Apocalipsis 12:9 versiculoqa rikuchin, Satanaspa ujnin sutin Kuraj Supay kasqanta, chay suteqa “llullakuspa tumpaj” niyta munan. Kaytaj yuyarichiwanchej, Jehová Diosta llullamanta tumpasqanta. “Ñawpa katari” palabrataj yuyarichiwanchej Edén huertapi uj katarinejta Evata chʼaukiyasqanta. Chantapis Satanastaqa “jatun sierpe” nikullantaj, manchay phiña animal jina kasqanrayku. Payqa Diospa llajtanta chinkachiyta munan, nitaj Jehovaj munaynin juntʼakunanta munanchu.

 4. ¿Imatataj kay yachaqanapi yachakusunchej?

⁴ Sutʼi rikukun Satanás, Jehová Diosman cheqa sonqo kananchejta mana munasqanta. Chayrayku Biblia yuyaychawanchej: “Allinta qhawaychej, imaraykuchus enemigoykichej Kuraj Supayqa, phiña león jina qhaparirispa muyuykachasunkichej, mayqellantapis oqoykunampaj”, nispa (1 Ped. 5:8). Chayrayku kay yachaqanapi Satanasmanta jarkʼakunapaj kinsa imasta yachakusunchej.

5, 6. 1) ¿Imastaj rikuchiwanchej ángeles atiyniyoj kasqankuta? 2) ¿Imaraykutaj Biblia nin Satanás “wañuypa atiyninta” japʼishasqanta?

⁵ Angelesqa may ‘kallpayoj’ kanku (Sal. 103:20). Runamanta nisqaqa astawan yuyayniyoj, astawan atiyniyoj ima kanku. Cheqa sonqo angelesqa atiyninkuwan allin imasta ruwanku. Sutʼincharinapaj, uj kuti uj angellla, Diospa llajtanpa enemigosninmanta 185.000 asirio soldadosta wañucherqa, chaytaqa uj runalla mana ruwayta atinmanchu karqa, nitaj ashkha soldadospis (2 Rey. 19:35). Waj kutipitaj uj ángel, Jesuspa apostolesninta carcelmanta orqhorqa. Carcelta qhawajkuna mana reparanallankuta, chay ángel uj imata jinalla carcelpa punkunta kicharerqa, apostolesta orqhomorqa, watejmantataj punkusta wisqʼaykorqa (Hech. 5:18-23).

⁶ Cheqa sonqo angelesqa allin imasta atiyninkuwan ruwanku, Satanastajrí sajra imasta ruwan. ¿Imastataj ruwan? Bibliaqa “kay pachata kamachej[...]”, “kay pachaj diosn[in]” kasqanta nin (Juan 12:31; 2 Cor. 4:3, 4). Chantapis payqa “wañuypa atiyninta” japʼishan (Heb. 2:14). Kayqa mana ninayanchu runasta wañuchisqanta. Chantá, ¿imaraykutaj Biblia nin “wañuypa atiyninta” japʼishasqanta? Imaraykuchus Satanás runasta tanqan chejninakunankupaj, wañuchinakunankupaj ima. Chantapis tukuy runas juchallikunchej, wañunchej ima, Supaywan Eva chʼaukiyachikusqanrayku, Diosta Adán mana kasukusqanrayku ima (Rom. 5:12). Chayrayku ninchej Kuraj Supay wañuypa atiyninta japʼishasqanta. Chayrayku Jesusqa, Satanás “runa wañuchi[...]” kasqanta nerqa (Juan 8:44). Arí, Satanasqa may atiyniyoj enemigonchej.

 7. ¿Imaynatataj supaykuna atiyniyoj kasqankuta rikuchinku?

⁷ Satanasman churanakuspaqa, paywan kajkunamanpis churanakullanchejtaj, imaraykuchus paykunaqa Diospa kamachiyninman churanakunku. Satanaswan kajkunamanta wakenqa ángeles kanku, paykunatataj supaykuna sutiwan rejsikun (Apo. 12:3, 4). Chay supaykunaqa, unaymantaña runasmanta astawan atiyniyoj kasqankuta rikuchinku runasta mayta ñakʼarichispa (Mat. 8:28-32; Mar. 5:1-5). Ni jaykʼaj qonqanachu Satanás, supaykuna ima atiyniyoj kasqankuta (Mat. 9:34). Jehovaj yanapaynillanwan Satanasta atipayta atisun.

 8. 1) ¿Imatataj Satanás ruwayta munan? (9 paginapi dibujota qhawariy.) 2) Qhawasqaykiman jina, ¿imaraykutaj kay pachamanta runas Satanás jina sajra imasta ruwanku?

⁸ Apóstol Pedroqa, Satanás phiña león jina qhaparirispa mayqellantapis oqoykunawanchejpaj jina muyuykachashawasqanchejta nerqa. Chaytaj Satanás manchay sajrapuni kasqanta rikuchin. Kay pachamanta runas atiyninpiña kajtinpis, uj león jina yarqhasqallapuni kashan (1 Juan 5:19). Kay Jallpʼapi kaj ajllasqa cristianosta, waj ovejasmanta kajkunata imataj chinkachiyta munan (Juan 10:16; Apo. 12:17). Satanasqa Jehovaj llajtanta chinkachiytapuni munan. Ñaupa tiempomantapacha kunankama cristianosta qhatiykachasqanqa, manchay sajrapuni kasqanta rikuchin.

9, 10. 1) ¿Imaynatataj Satanás Israel llajtata Diosmanta karunchayta munarqa? 2) ¿Imaraykutaj Satanás Israel llajtata Diosmanta karunchayta munarqa? 3) ¿Imatataj Satanás ruwan Diospa ujnin kamachin jatun juchapi urmajtin?

⁹ Satanasqa waj jinamanta mana khuyakuyniyoj kasqanta rikuchillantaj. Imaynatachus uj yarqhasqa león mana khuyakuspa uj animalta mikhuykunanpaj wañuchin, ajinallatataj Satanaspis mana khuyakunchu ñakʼarichishan chay runasmanta. Imaynatachus Israel llajtata Diosmanta karunchayta munasqanpi tʼukurina. Zimritaqa, waj israelitasta ima khuchichakuy juchapi urmacherqa. Giezita, waj israelitasta imataj munapayaypi urmacherqa. Chaytaj tukuy israelitasta mayta ñakʼaricherqa. Satanasqa maytachá kusikorqa chayta ruwasqanmanta (Núm. 25:6-8, 14, 15; 2 Rey. 5:20-27).

¹⁰ ¿Imaraykutaj Satanás Israel llajtata Diosmanta karunchayta munarqa? Imaraykuchus yacharqa chay llajtamanta Mesías jamunanta. Yachallarqataj Mesías payta chinkachinanta, Jehovalla Kamachej kasqanta rikuchinanta ima (Gén. 3:15). Satanasqa mana munarqachu israelitas Jehovawan allinpi kanankuta, chayrayku tukuy imata ruwarqa juchapi urmanankupaj. Payqa David qhenchachakuy juchapi urmajtin kusikorqa. Moisés Sumaj Jallpʼaman mana yaykusqanmantapis kusikullarqataj. Kusikuntaj Diospa ujnin kamachin jatun juchapi urmajtin. Chay kutispitaj Jehová Diosta asipayan (Pro. 27:11).

11. ¿Imaraykutaj Satanás munarqa reyespa kapuyninkuta Sara munapayananta?

¹¹ Satanasqa pinejtachus Mesías jamunan karqa chay familiata chejnikorqa. Tʼukurinataj, Abrahamman Jehová “uj jatun nacion[man]” tukunanta nisqantawan imachus kasqanpi (Gén. 12:1-3). Abrahamwan Sarawan Egiptopi kashajtinku, chay suyumanta reyqa Sarata wasinman pusarqa paywan casarakunanpaj. Chaywanpis Jehová Sarata jarkʼarqa (Génesis 12:14-20 leey). Gerarmanta reypis, Isaac niraj nacekushajtin Sarata pusallarqataj paywan casarakunanpaj (Gén. 20:1-7). ¿Satanaschu tanqarqa chay reyesta Sarata qhawakunankupaj? Bibliaqa mana imatapis chaymanta ninchu. Chaywanpis yuyarikuna Sara toldospi tiyakoj ripunanpaj Ur llajtapi kapuyninta saqesqanta. Ichapis Satanás munarqa Egiptoj reyninpa kapuyninta, rey Abimelecpa kapuyninta ima Sara munapayananta, ajinamanta qosanta, Jehovata ima wasanchananpaj. Satanasqa maytachá kusikunman karqa, Saranejta Mesías mana jamojtin. Chantapis kusikullanmantajchá karqa qhariwarmi kausayninpi chʼampaykunata rikhurichispa, pʼenqaypi rikhurichispa, Dioswan allinpi kasqanta chinkachispa ima. Arí, Satanasqa may sajrapuni.

12, 13. 1) ¿Imatataj Satanás ruwarqa Jesús nacekusqantawan? 2) Yuyasqaykiman jina, ¿imaynatá Satanás Jehovata sirvej wawasta, waynasta ima qhawan?

¹² Jesusqa Abraham kausasqanmanta ashkha watasninmanraj nacekorqa. Satanastajrí mana kusikorqachu Jesús nacekusqanmanta, imaraykuchus yacharqa Abrahampa familianmanta jamusqanta, Mesías kananta ima. Chantapis Jesusqa Kuraj Supaypa ruwasqasninta phirinan karqa (1 Juan 3:8). Satanaspajqa uj wawitata wañuchiy mana sajrachu karqa. Imaraykuchus paypajqa allin kajta ruway, mana allin kajta ruway ima kikillan. Chayrayku Jesusta wawita kashajtin wañuchiyta munarqa. ¿Imaynamantá?

¹³ Rey Herodesqa “judiospa reynin” nacekusqanta yachaytawan mayta phiñakorqa, wañuchiytataj munarqa (Mat. 2:1-3, 13). Chayrayku kamacherqa Belén llajtapi, muyuynimpi ima tukuy qhari wawasta wañurachinankuta iskay watayojmanta uraman (Mateo 2:13-18 leey). Jesustatajrí, mana wañucherqankuchu. Satanás wawitasta wañuchichisqanqa, runaspa kausaynin, wawitaspa kausaynin ima, mana valorniyojchu paypaj kasqanta rikuchin. Arí, Satanasqa uj “phiña león jina[puni]”. Chayrayku ni jaykʼaj qonqanachu Satanás manchay sajrapuni kasqanta.

14, 15. ¿Imaynatá Satanás runasta chʼaukiyan?

¹⁴ Satanasqa runasta Jehová Diospa contranpi churakunankupaj chʼaukiyan (1 Juan 4:8). ¿Imaynatá chayta ruwan? Runasta “sonkoncupi Diosmanta pisiskas caskancuta”, nisunman Diosman qayllaykuyta necesitasqankuta mana reparanankupaj tanqaspa (Mat. 5:3, Dios Parlapawanchej). Payqa, “mana creejkunaj yuyayninkuta laqhayachin” Diosmanta cheqa kajta mana yachanankupaj (2 Cor. 4:3, 4).

¹⁵ Satanasqa yachan, Jehová payllata yupaychananchejta munasqanta (Éxo. 20:5). Chayrayku llulla religionesnejta runasta chʼaukiyan. Payqa mayta kusikun, runas Jehovata yupaychanankumanta nisqaqa ñaupa tatasninkuta, animalesta, Diospa ruwasqasninta, waj imasta ima yupaychasqankumanta. Chay imasta yupaychaj runasqa, ruwasqankuta Dios allinpaj qhawasqanta yuyanku, chaywanpis chay ruwasqanku, creesqanku ima qhasi mana kajlla. Profeta Isaiaspa tiemponpipis israelitasqa kikillantataj ruwaj kanku. Jehovaqa israelitasta yanapayta munaspa llulla religionta mana allin mikhunawan kikincharqa, nerqataj: “Imaraykutaj qolqeykichejta tukunkichej mana mikhuna kajllapi? Imaraykutaj ganakusqaykichejta tukunkichej mana sajsachej imaspiri? Uyariwaychej allinta, allin kaj imastataj mikhunkichej”, nispa (Isa. 55:2).

16, 17. 1) ¿Imaraykutaj Jesús, Pedrota “qhepayman churakuy, Satanás”, nispa nerqa? 2) ¿Imaynatá Satanás chʼaukiyayta munawanchej?

¹⁶ Satanasqa Diospa cheqa sonqo kamachisnintapis chʼaukiyayta atillantaj. Sutʼincharinapaj, Jesús yachachisqasninman wañunanta nishajtin imapichus rikukusqanpi tʼukurina. Apóstol Pedroqa Jesusta mayta munakoj, chayrayku qan kikiykiwan kʼacha kay nerqa. Jesustajrí “qhepayman churakuy, Satanás”, nispa nerqa (Mat. 16:22, 23, NM). ¿Imaraykutaj chayta nerqa? Imaraykuchus Jesusqa yacharqa runasta salvananpaj, Satanás llulla kasqanta rikuchinanpaj ima wañunan kasqanta. Chayrayku Jesuspajqa mana pay kikinwan kʼacha kanan tiempochu karqa. Jesús mana wakichisqachu kajtenqa, Satanás mayta kusikunman karqa.

¹⁷ Kay sajra pachaqa tumpamantawan chinkachisqa kanqa. Chayrayku Satanasqa munan noqanchej kikinchejwan kʼachas kananchejta, kay pachaj imasninwan kusikunanchejta ima. Chantapis payqa munan yuyananchejta kay pachaj tukukuynin niraj chayamushasqanta, ni jaykʼaj chayamunanta ima. Chaywanpis chayqa llulla. Chayrayku wakichisqallapuni kana, qhepa pʼunchaykunapi kausakushasqanchejta mana qonqanachu (Mat. 24:42).

18, 19. 1) ¿Imatataj Satanás yuyachiyta munawanchej? 2) ¿Imaynatá Jehová yanapawanchej?

¹⁸ Satanasqa waj jinamanta chʼaukiyayta munallawanchejtaj. Munantaj Jehová mana munakuwasqanchejta yuyananchejta, juchanchejta ni jaykʼaj perdonanawanchejta ima. Chaywanpis chayqa mana cheqachu. Biblia nin: “Diosqa cheqan kaspa, mana qonqaponqachu ruwasqasniykichejmanta, jinallataj Diospa sutinta munakusqaykichejmantapis”, nispa (Heb. 6:10). Rikunchej jina, Jehovaqa tukuy ima ruwasqanchejta may sumajpaj qhawan (1 Corintios 15:58 leey). Astawanpis Jehovaqa, Satanasta mana munakunchu, nitaj ni jaykʼaj perdonanqachu. Chayrayku Satanaspa llulleriosninwan ama chʼaukiyachikunachu.

¹⁹ Kay yachaqanapi yachakunchej Satanás atiyniyoj kasqanta, sajra kasqanta, chʼaukiyayta munawasqanchejta ima. Jehová yanapawasqanchejraykutaj Satanasta atipayta atisun. Bibliaqa Satanaspa tojllasninmanta jarkʼakunapaj, mayqenkunachus tojllasnin kasqanta willawanchej (2 Cor. 2:11). Chaywanpis mana mayqenkunachus tojllasnin kasqallantachu yachananchej tiyan, manaqa tojllasninpi mana urmanapaj wakichisqas kananchej tiyan. Chayrayku Biblia nin: “Kuraj Supaypa contranta sinchʼita sayaychej, paytaj qankunamanta ayqenqa”, nispa (Sant. 4:7). Qhepan yachaqanapi yachakusunchej Satanaspa kinsa tojllasninpi mana urmanapaj imatachus ruwanata.