¿Bautizakunaykipaj wakichisqachu kashanki?

1, 2. 1) ¿Imamantataj mayta kusikunchej? 2) ¿Imaynatá cristiano tatas, ancianos ima jovenesta yanapankuman imachus bautizakuy ninayasqanta entiendenankupaj?

CHRISTOPHERQA 12 watitayojllaraj karqa, bautizakuytañataj munarqa. Uj ancianotaj nerqa: “Nacekusqaykimantapacha rejsiyki. Mayta kusikuni bautizakuyta munashasqaykimanta, chaywanpis tapurisuyta munani: ¿Imaraykutaj bautizakuyta munanki?”, nispa. Chay ancianoqa yacharqa imaraykuchus chayta tapurishasqanta. Noqanchejqa mayta kusikunchej sapa wata may chhika jóvenes bautizakusqankumanta (Ecl. 12:1). Chaywanpis cristiano tatas, ancianos ima, qhawarinanku tiyan jóvenes Jehovata sirviyta munasqankuraykupuni bautizakuyta munasqankuta, bautizakuy imachus ninayasqanta entiendesqankuta ima.

² Biblia nin jina Diosman kausayninchejta qospa, bautizakuspa ima, Diospa kamachin jina kausakuyta qallarinchej. Chayta ruwasqanchejraykutaj Jehová mayta bendeciwanchej, Supaytaj ashkha tojllasta churawanchej (Pro. 10:22; 1 Ped. 5:8). Chayrayku cristiano tatasqa tiempochakunanku tiyan wawasninkuman yachachinankupaj Cristoj yachachisqasnin kay imachus niyta munasqanta entiendenankupaj. Uj jovenpa tatasnin mana cristianoschu kajtinkutaj, ancianos chay joventa yanapankuman imaynatachus Diosman kausayninchejta qosqanchejta, imapajchus bautizakusqanchejta entiendenanpaj (Lucas 14:28-30 leey). Pillapis uj jatun wasita ruwayta munan chayqa sumajta wakichikunan tiyan. Ajinallatataj uj jovenpis bautizakuyta munan chayqa sumajta wakichikunan tiyan. Ajinamanta Jehovata “tukukuykama” cheqa sonqollapuni sirvinanpaj (Mat. 24:13). ¿Imataj jovenesta yanapanman Jehovata wiñaypaj sirvinankupaj? Chayta qhawarina.

 3. 1) ¿Imatá Jesús, Pedro ima bautizakuymanta nerqanku? (Mat. 28:19, 20; 1 Ped. 3:21.) 2) ¿Ima tapuykunamantaj kutichisun, imaraykutaj?

³ Jovenllaraj kanki, bautizakuytataj munanki chayqa, may sumaj chayta ruwayta munasqaykeqa. Bautizakuy, Jehovaj testigon kay imaqa, ¡may sumaj! Jesusqa yachacherqa yachachisqasnin kanapaj bautizakuna kasqanta. Apóstol Pedropis chayta ruway may sumaj kasqanta nerqa manchay ñakʼariy tiempopi mana wañunapaj (Mat. 28:19, 20; 1 Ped. 3:21). Kay yachaqanapeqa kay kinsa tapuykunaman kutichisunchej: “¿Sumajta tʼukurispachu bautizakuyta munani? ¿Imaraykutaj bautizakuyta munani? ¿Imaynatá Diosman kausayniyta qoyman?”. Kay tapuykunaqa yanapasonqa bautizakunaykipaj wakichisqachus manachus kashasqaykita reparanaykipaj. Chantapis kay tapuykunata tapurikunaykeqa may sumaj. Imaraykuchus bautizakojtiykeqa Jehovaman “wiñaypaj sirviyta munayki” nisqaykita rikuchishanki. Chantapis kay tapuykunaqa Jehovaman imatachus nisqaykita juntʼanaykipaj yanapasonqa.

4, 5. 1) ¿Imaraykutaj bautizakunapaj mana wiñarqonarajchu tiyan? 2) ¿Imaynatá reparanchej uj runa sumajta tʼukuriyta yachasqanta?

⁴ Bibliaqa, mana niwanchejchu mashkha watayojchus bautizakunata, nillataj niwanchejchu bautizakunapaj wiñarqonaraj kasqanta. Proverbios 20:11 versículo nin: “Uj wawapis ruwasqasnimpi allinta rejsichikun, sichus llimphuta, cheqantataj kawsan chayqa”, nispa. Chayrayku uj jovencitopis imachus allin, imatajchus mana allinchu kasqanta reparayta atinman, imaynatachus Diosman kausayninchejta qonatapis entiendeyta atinman. Chayrayku uj joven, sumajta tʼukuriyta yachanña, Diosmanpis kausayninta qonña chayqa, may sumaj kanman bautizakunan (Pro. 20:7).

⁵ ¿Imaynatá reparanchej uj runa sumajta tʼukuriyta yachasqanta? Sumajta tʼukurej runaqa “imachus allin, imatajchus mana allin” kasqanta sutʼita reparan, nitaj ashkha watasniyojpunichu kanan tiyan (Heb. 5:14). Sumajta tʼukurej runaqa imachus allin kajta sutʼita reparaytawan, chayta tukuy sonqo ruwan. Chantapis sajra imasta mana ruwananpaj kallpachakun, nitaj necesitanchu pillapis allin kajta ruway ninanta. Qan bautizakunki chayqa, allin kajta ruwanaykipaj kallpachakunayki tiyan, mana tatasniykiwan chayri waj runaswan kashaspapis (Filipenses 2:12 kikinchay).

6, 7. 1) ¿Imaspitaj Daniel Babiloniapi kashaspa rikukorqa? 2) ¿Imaynatá Daniel sumajta tʼukuriyta yachasqanta rikucherqa?

⁶ ¿Uj joven sumajta tʼukuriyta yachanmanchu? Diospa cheqa sonqo kamachin Danielpa ruwasqanpi tʼukurina. Ichapis Danielqa waynuchitullaraj karqa Babiloniaman mana tatasnillanwan apasqa kashajtin. Babiloniapeqa ashkha imas Diosmanta karunchayta atinman karqa. Payqa, Diospa kamachiykunasninta mana kasukoj runaspa chaupinpi kausakorqa. Chantapis chay runasqa sumajpaj qhawayta qallarerqanku. Reypa kamachina wasinpi sirvinanpajpis ajllasqa karqa (Dan. 1:3-5, 13). Danielqa Babilonia llajtapisina aswan sumajta kausakunman karqa Israel llajtamanta nisqaqa.

⁷ ¿Imaynatataj Daniel tukuy chaykunata qhawarqa? ¿Saqerqachu babilonios kausayninta tijrachinankuta chayri creeyninta llauchʼiyachinankuta? Mana. Astawanpis Bibliaqa nin Babiloniapi kashaspa Danielqa “sonqompi nerqa reypa mikhunanwan, ujyananwantaj mana chʼichichakunanta”, llulla yupaychaywan mana chhapukunanta ima (Dan. 1:8). Ajinamanta sumajta tʼukuriyta yachasqanta rikucherqa.

 8. ¿Imatataj Danielpa kausayninmanta yachakuwaj?

⁸ ¿Imatataj Danielpa kausayninmanta yachakuwaj? Pay jina sumajta tʼukuriyta yachanki chayqa, Jehovata kasukunayki tiyan wakin kuti mana atinaykipaj jinalla kajtinpis. Mana camaleón jina kanachu tiyan, chay animalitoqa maypichus kashasqanman jina tukuy colorman tukun. Chayrayku tantakuykunapi, colegiopi ima kashaspa Diospa amigon jina imatapis ruwanayki tiyan. Juchaman urmanaykipaj tanqasqa kashaspapis Diosman cheqa sonqollapuni kanayki tiyan (Efesios 4:14, 15 leey).

9, 10. 1) ¿Imaraykutaj tʼukurinayki tiyan sajra ruwayman kunallanraj tanqasqa kashaspa imatachus ruwasqaykipi? 2) ¿Imatataj bautizakuspa rikuchinchej?

⁹ Jóvenes chayri machitus kaspapis tukuy pantanchej (Ecl. 7:20). Chaywanpis bautizakuyta munanki chayqa, tapurikunayki tiyan Jehová Diospa munaynintapunichus ruwayta munasqaykita chayri manachus. ¿Unaytañachu Jehovata kasukushanki? Sajra ruwayman kunallanraj tanqasqa kashaspa imatachus ruwasqaykipi tʼukuriy. ¿Atillarqankichu cheqan kajta reparayta? Chayrí, ¿Danielta jinachu ashkha imas Diosmanta karunchasuyta munarqa? Ichá pillapis nisunki: “Joven kashaspa estudianayki tiyan, sumaj profesionniyoj kanaykipaj allintataj kausanaykipaj”, nispa. Ajinapi rikukuspa, ¿imatachus Jehová ruwanaykita munasqanta reparayta atillankichu? (Efe. 5:17.)

¹⁰ Kayta tapukunaykeqa may sumajpuni, imaraykuchus bautizakuy mana pujllakuy jinallachu kasqanta reparanaykipaj yanapasonqa. Bautizakuspaqa Jehová Diosman tukuy sonqo munakusqayki, wiñaypaj sirvisqayki nisqanchejta wajkunaman rikuchinchej (Mar. 12:30). Tukuy bautizakojkunaqa imatachus Jehovaman nisqanchejta juntʼananchejpuni tiyan (Eclesiastés 5:4, 5 leey).

11, 12. 1) Bautizakuyta yuyashanki chay, ¿imapitaj tʼukurinayki tiyan? 2) ¿Imataj yanapasonqa Jehová jina bautizakuyta qhawanaykipaj?

¹¹ Bibliaqa Diospa tukuy kamachisnin nisunman machitus, jóvenes ima, tukuy sonqo payta sirvinankuta nin (Sal. 110:3). Chayrayku bautizakuyta yuyashanki chayqa, sumajta qhawarikunayki tiyan qan ajllasqaykiraykupunichus manachus bautizakuyta munasqaykita. Astawanraj cristiano familiapi uywasqa karqanki chayqa.

¹² Ichapis wiñasqaykiman jina wajkunata bautizakojta rikunki. Ichapis hermanosniyki chayri amigosniyki bautizakunkuña. Chaywanpis sumajta qhawarikunayki tiyan. Amataj yuyaychu bautizakunaykipaj edadniyojña kasqaykirayku chayri wajkuna bautizakusqankurayku bautizakunayki kasqanta. ¿Imataj yanapasonqa Jehová jina bautizakuyta qhawanaykipaj? Allin kanman tiempochakunayki, imaraykuchus bautizakuy may allin kasqanpi tʼukurinaykipaj. Kay yachaqana, qhepan yachaqana ima yanapasonqa imasraykuchus bautizakunayki kasqanta yachanaykipaj.

13. ¿Imaynatataj yachawaj imaraykuchus bautizakuyta munasqaykita?

¹³ Imaraykuchus bautizakuyta munasqaykita yachanaykipajqa, imaynatachus Diosmanta mañakushasqaykipi tʼukuriwaj. Tapurikuytaj: “¿Jehovamanta sapa kutichu mañakuni chayri manachu? ¿Imapichus yanapanawanta sutʼitachu mañakuni chayri manachu?”, nispa. Kay tapuykunaqa Diospa sumaj amigonchus manachus kasqaykita yachanaykipaj yanapasonqa (Sal. 25:4). Jehovaqa wakin kutis Biblianejta mañakuykunasninchejman kutichiwanchej. Chayrayku imaraykuchus bautizakuyta munashasqaykita, tukuy sonqochus Jehovata sirviyta munashasqaykita ima yachallawajtaj Bibliata sumajta estudiaspa (Jos. 1:8). Tapurikuytaj: “¿Sapa semanachu Bibliata ukhunchani? Tatasniy familiapi Diosta yupaychanapaj tantakuyta ruwajtinku, ¿tukuy sonqochu chaypi kani?”, nispa. Kay tapuykunaqa, Jehovata tukuy sonqo sirviyta munasqaykiraykupunichus manachus bautizakuyta munasqaykita yachanaykipaj yanapasonqa.

14. ¿Kikillanchu Jehovaman kausayninchejta qoy, bautizakuy ima? Sutʼinchay.

¹⁴ Wakin jovenesqa Jehovaman kausayninchejta qoy, bautizakuy ima kikillan kasqanta yuyanku. Chayrayku wakin jovenesqa Jehovaman kausayninkuta qosqankutaña nispapis, bautizakunankupaj manaraj wakichisqachu kashasqankuta ninku. Chayta nispaqa pantasqata yuyashanku. Imaraykuchus Jehovaman kausayninchejta qospaqa, payman wiñaypaj sirvinanchejta ninchej. Bautizakuspataj, Jehovaman wiñaypaj sirvisqayki nisqanchejta wajkunaman rikuchinchej. Chayrayku niraj bautizakushaspa imaynatachus Diosman kausayniykita qonayki kasqanta sumajta entiendenayki tiyan.

15. ¿Imaraykú Diosman kausayniykita qoy mana pujllakuy jinallachu kasqanta nisunman?

¹⁵ Jehovaman kausayniykita qospaqa, chay kutimantapacha payllapajña kausanki. Ninkitaj Payta sirviy qanpaj ni imawan kikinchakusqanta (Mat. 16:24). Chayrayku Diosman kausayninchejta qoyqa mana pujllakuy jinallachu (Mat. 5:33). ¿Imaynatá rikuchiwaj Jehovallapajña kausasqaykita? (Rom. 14:8.)

16, 17. 1) ¿Imaynatataj rikuchiwaj manaña qanllapajchu kausasqaykita? Uj kikinchaywan sutʼinchay. 2) Diosman kausayninchejta qospa, ¿imatá ninchej?

¹⁶ ¿Imaynatá rikuchiwaj manaña qanllapajchu kausashasqaykita? Uj amigoyki uj autota regalasusqanpi tʼukuriy. Chay amigoykeqa autoj papelesninta jaywasunki, nisunkitaj qanpata kasqanta. Chaywanpis autoj llavesninta mana qosunanta, paylla chay autota manejananta ima nillasunkitaj. Jina kajtin, ¿nisunmanchu cheqamantapuni chay autota regalasusqanta? Chayrí, ¿chay auto amigoykejllatapunichu?

¹⁷ Diosman kausayninchejta qospaqa “qanllapajña kausani” nispa, ninchej. Jehovataj suyan imatachus nisqanchejta juntʼananchejta. Chaywanpis, ¿imaynataj kanman pakayllamanta Diosta mana yupaychaj runawan rejsinakunapaj llojsejtinchej? Chayrí, ¿imaynataj kanman tantakuykunaman, willayman ima mana riyta atinanchejpaj jina uj llankʼayta japʼikojtinchej? Chayta ruwaspaqa imatachus Jehovaman nisqanchejta mana juntʼashasunmanchu. Rijchʼakusunmantaj autota regalaj runaman, pichus autoj llavesninwan qhepakun. Chayrayku Jehovaman qanllapajña kausani ninchej chayqa, imatachus pay munasqanta ruwananchej tiyan, mana ruwayta munashaspapis. Jesús jinataj ruwana, pay nerqa: “Mana munayniyta ruwanaypajchu janaj pachamanta uraykʼamorqani, astawanqa Kachamuwajniypa munayninta ruwanaypaj jamuni”, nispa (Juan 6:38).

18, 19. 1) ¿Imatataj Rose, Christopher ima bautizakuymanta ninku? 2) ¿Imatá qan yuyanki bautizakuymanta?

¹⁸ Sutʼita rikunchej bautizakoyqa mana pujllakuy jinallachu kasqanta. Chantapis Jehovaman kausayninchejta qoy, bautizakuy imaqa may sumajpuni. Chayrayku Jehovata munakunki, imaynatachus Diosman kausayninchejta qona kasqanta entiendenki ima chayqa, mana iskayrayaspa bautizakunki. Nitaj chayta ruwasqaykimanta pesachikunkichu. Uj sipas Rose sutiyoj nin: “Jehovata mayta munakuni, payta sirvispataj mayta kusikuni. Bautizakuyta ajllashaspa, yacharqani kausayniypi chayta ruway may sumajpuni kasqanta”, nispa.

¹⁹ Qallariypi parlarqanchej Christophermanta. Payqa 12 watitasniyoj kashaspa bautizakorqa. ¿Imaynataj kasharqa bautizakuyta ajllasqanmanta? Christopher nin: “May kusisqa kashani”, nispa. Payqa 17 watasniyoj kashaspa precursor regular jina llankʼayta qallarerqa, 18 watasniyoj kashaspataj siervo ministerial jina llankʼayta qallarerqa, kunantaj Betelpi llankʼashan. Pay nillantaj: “Bautizakuyta ajllaspaqa may sumajta ruwasqayta niyman. Imaraykuchus Jehovapaj, llajtanpaj ima llankʼaspa may kusisqa, sonqo juntʼasqa kashani”, nispa. Bautizakuyta munashanki chayqa, ¿imaynatataj bautizakunaykipaj wakichikuwaj? Qhepan yachaqanapi chaymanta yachakusun.