Jesusqa Galilea jallpʼapi willan

Yachakorqanchej jina, Jesusqa Samarikuna Pʼunchaypi diantinta mana tiempoyoj karqa. Chʼisintaj runasqa onqosqasta Jesusman pusamorqanku. Manapuni uj ratollatapis samarikojta saqerqankuchu.

Chayrayku qʼayantenqa, tutamanta jatarispa chʼinnejman rerqa, sapallanpi Diosmanta mañakoj. Jinapis uj ratolla sapitan karqa. Imajtinchus Pedroqa Jesús mana wasipichu kasqanta reparaytawan, ‘waj yachachisqaswan khuska Jesusta maskʼamorqa’. Ichapis Pedroqa chayta ruwarqa Jesús wasinpi alojasqa kasqanrayku (Marcos 1:36; Lucas 4:38).

Jesusta tarisqankutawan, Pedroqa payman nerqa: “Tukuy maskʼashasunku”, nispa (Marcos 1:37). Capernaum llajtamanta runasqa, munarqanku Jesús paykunawan qhepakunanta. Paykunaqa sumajpaj qhawarqanku Jesuspa ruwasqanta, chayrayku “ama ripunanpaj” jarkʼayta munarqanku (Lucas 4:42). Jinapis Jesusqa mana onqosqasta sanoyachejllachu kay jallpʼaman jamorqa, nitaj uj llajtallapi yachachinanpajchu. Chanta, ¿imapajtaj jamorqa?

Jesusllataj nerqa: “Waj llajtaspipis Diospa Gobiernonmanta sumaj willaykunata willamunallaytaj tiyan, chaypajmin Diosqa kachamuwan”, nispa. Chayrayku yachachisqasninman nerqa: “Jakuchej qaylla ranchosman, chaypipis willamunallaytaj tiyan. Chaypajmin jamuni”, nispa (Marcos 1:38; Lucas 4:43).

Arí, Jesusqa Diospa Gobiernonmanta willananpaj kay jallpʼaman jamorqa. Chay Gobiernoqa Diospa sutinta jatunchanqa, tukuy onqoykunatataj wiñaypaj chinkachenqa. Chanta, ¿imapajtaj Jesús onqosqasta sanoyacherqa? Diosninchej payta kachamusqanta rikuchinanpaj. Ashkha watas ñaupajta, Moisespis ajinallatataj milagrosta ruwarqa Diospuni payta kachamusqanta rikuchinanpaj (Éxodo 4:1-9, 30, 31).

Jesusqa imapajchus jallpʼaman jamusqanta niytawan, Capernaummanta riporqa waj llajtasman willaj rinanpaj. Paywan khuskataj rerqanku Pedro, hermanon Andrés, chantá Juan, hermanon Santiago ima. Jesusqa paykunata uj semana ñaupajllataraj qhepanta rinankupaj wajyarerqa.

Chantá Jesuswan yachachisqasninwanqa, tukuynin Galilea jallpʼapi willarqanku, may allintaj paykunata rerqa. Jesusmantaqa tukuynejpi parlasharqanku: Decápolis nisqamanta chunka llajtasninpi, Jordán mayoj chimpanpi, “tukuynin Siria jallpʼapipis” (Mateo 4:24, 25). Chayrayku chay lugaresmanta, Judeamantawan may chhika runas Jesuspa qhepanta rerqanku. Paykunamanta ashkhastaj onqosqasta, supayniyoj runasta ima Jesusman pusamorqanku. Jesustajrí tukuynin onqosqasta sanoyacherqa, supaykunatataj qharqorqa.