Jehovaqa bendecin payta maskʼajkunata

1, 2. 1) ¿Imaynatá Diosta munakuy paypi creenapaj yanapawanchej? 2) ¿Imá tapuykunamantaj kutichisunchej?

JEHOVAQA cheqa sonqo kamachisninta bendecinanta nin. Ajinamanta munakuwasqanchejta rikuchin. Noqanchejtaj “Diosta munakunchej, imaraykuchus payqa ñawpajta munakuwarqanchej” (1 Juan 4:19). Jehovata astawan munakojtinchej, creeyninchejqa sinchʼiyanqa, nitaj iskayrayasunchu Payta munakojkunata tʼinkananmanta (Hebreos 11:6).

² Jehovaqa tʼinkata qoyta yachanpuni. Paypi creeyninchej sinchʼi kananpajtaj, creenanchej tiyan Diosqa payta tukuy sonqo maskʼajkunaman tʼinkata qonanta. Imaraykuchus “creespaqa yachanchej, imapichus suyakushanchej, chayta japʼinanchejtapuni” (Heb. 11:1). Nitaj iskayrayanchejchu Jehová cheqa sonqo kajkunata bendecinanmanta. Jinapis, ¿imaynatá yanapawanchej tʼinkata japʼinanchejta yachay? ¿Imaynatá Jehová ñaupa tiempopi, kay tiempopipis kamachisninta bendecin? Chayta yachakuna.

 3. ¿Imatataj Jehová Malaquías 3:10 niwanchej?

³ Jehová Diosqa cheqa sonqo kamachisninta tʼinkananta nin. Payqa niwanchej, tukuy atisqanchejta paypaj ruwajtinchej, bendecinawanchejta. Jehová nin: “Allinta qhawariychej, chantá rikunkichej, imaynatachus noqa janaj pacha ventanasta kicharispa, may chhika bendicioneswan juntʼachimusqaykichej, chayta”, nispa (Mal. 3:10). Chay niwasqanchejman jina ruwaspaqa, payman agradecekunchej.

 4. ¿Imaraykú atienekusunman Mateo 6:33 nisqanpi?

⁴ Jesusqa yachachisqasninman nerqa, Diospa Gobiernonta ñaupajman churajtinku Dios paykunata yanapananta (Mateo 6:33 leey). Jesusqa chayta nerqa, imajtinchus yacharqa Jehovaj nisqasnin juntʼakusqantapuni (Isa. 55:11). Noqanchejpis Jehovapi tukuy sonqo creesun chayqa, Pay imatachus niwasqanchejta juntʼananpi atienekusun. Pay niwanchej: “Mana wijchʼurparisqaykichu, nitaj saqerparisqaykichu”, nispa (Heb. 13:5). Chay nisqanqa, yanapawanchej Mateo 6:33 nisqanpi atienekunapaj.

 5. ¿Imaraykú kallpachawanchej Jesús imatachus Pedroman kutichisqan?

⁵ Uj kuti, apóstol Pedroqa Jesusta taporqa: “Noqaykoqa tukuy kapuyniykuta saqerparispa, qanwan purishayku. Imataj noqaykupaj kanqari?”, nispa (Mat. 19:27). Jesusqa Pedrota chayta tapusqanmanta mana rimarqachu. Astawanpis Jesusqa yachachisqasninman nerqa, Diospa Gobiernonrayku imastachus ruwasqankumanta tʼinkata japʼinankuta. Apóstoles, wakin cheqa sonqo cristianos ima, Jesuswan cielopi kamachenqanku. Chaywanpis Jesusqa nillarqataj, Diospa kamachisnin kay tiempopipis bendecisqa kanankuta. Pay nerqa: “Pillapis wasisninta, wawqesninta, panasninta, chayrí tatanta, mamanta, warminta, chayrí wawasninta, jallpʼasninta ima noqaj sutiyrayku saqejqa, tukuy imamanta pachaj kutitawan japʼikaponqa, wiñay kawsaymantaj yaykonqa”, nispa (Mat. 19:29). Kay tiempopi Jesuspa yachachisqasnenqa, congregacionpi tatasta, mamasta, hermanosta, hermanasta, wawasta ima tarinkuman. Chaytaj Diospa Gobiernonrayku imallatapis saqesqanchejmanta nisqaqa, aswan sumajraj.

 6. ¿Imaynatá Jehová kamachisninta tʼinkananta nisqan yanapawanchej?

⁶ Kay tiempopi sumaj bendicionesta japʼispapis, qhepaman aswan sumaj bendicionestaraj japʼisunchej (1 Tim. 4:8). Jehovaqa cheqa sonqo kamachisninta tʼinkananta nin. Chayta yachaytaj llakiykunata aguantanapaj yanapawanchej. Jehová payta “tukuy sonqo maskʼanku, chaykunaman sumaj tʼinkata qonanta” yachaspaqa, Paypi astawan atienekusunchej (Heb. 11:6).

 7. ¿Imaraykutaj suyakuyninchej uj ancla jina?

⁷ Jesusqa orqopi yachachishaspa nerqa: “Kusikuychej jatun kusiywan, imaraykuchus jatunmin janaj pachapi tʼinkaykichejqa. Ajinallatataj qankunamanta ñawpajta jamoj profetastapis chejnispa ñakʼaricherqanku”, nispa (Mat. 5:12). Diospa kamachisninmanta wakenqa, cielopi kausayta tʼinkata jina japʼenqanku. Wakintaj kay Jallpʼapi wiñay kausayta japʼenqanku. Chayrayku “jatun kusiywan” kusikunchej (Sal. 37:11; Luc. 18:30). Tukuyninchejpaj “chay suyakoyqa kashan ancla nisqa barco sayachina gancho jina”, “creesqanchejpi mana iskayrayachisqa sinchʼita sayananchejpaj” (Heb. 6:17-20). Imaynatachus uj ancla barcota para, wayra kajtin sumajta sayachin, ajinallatataj suyakuyninchejqa sinchʼita sayanapaj yanapawasun. Chantapis llakiykunasninchejta aguantanapaj kallpachawasun.

 8. ¿Imaynatá suyakuyninchej mana anchata llakikunapaj yanapawanchej?

⁸ Suyakuyninchejqa mana anchata llakikunapaj yanapawasunman. Imaynatachus uj jampi nanayninchejta pisiyachin, ajinallatataj imatachus Dios qonawanchejta nisqanqa, llakisqa sonqonchejta tiyaykuchin. Jehovaman llakiyninchejta saqejtinchej, payqa yanapawasun. Chaytaj mayta sonqochawanchej (Sal. 55:22). Diosqa mañakojtinchej, “yuyasqanchejmantapis aswan ashkhataraj” qowasun (Efe. 3:20). Arí, Jehovaqa mana ashkhallatachu qowasunchej, manaqa “aswan ashkhataraj”.

 9. ¿Imaraykú Jehová bendecinawanchejpi atienekusunman?

⁹ Jehovaj bendicionesninta japʼinapajqa, paypi tukuy sonqo creenanchej tiyan, kamachiwasqanchejtataj kasukunanchej tiyan. Moisesqa Israel llajtata nerqa: “Señorniykichej Tata Diostaj sumajta bendecisonqachej, ima jallpʼatachus herenciata jina japʼikapunaykichejpaj qosunkichej, chaypi. Ajina kanqa sichus qankuna Señorniykichej Tata Diospa nisqasninta uyarinkichej, juntʼankichejtaj kay kamachisqasninta kunan qoshaykichej, chaykunata chayqa. Arí, Señorniykichej Tata Dios bendecisonqachej nisusqaykichejman jina”, nispa (Deu. 15:4-6). Jehovaqa cheqa sonqowan sirvillajtinchejpuni bendecinawanchejta niwanchej. ¿Chaypi atienekunchejchu? Ajina kananpi, ashkha imasrayku atienekusunman.

10, 11. ¿Imaynatá Jehová Joseta bendicerqa?

¹⁰ Bibliaqa yanapanawanchejpaj qhelqasqa kashan. Chaypeqa yachakunchej, imaynatachus Dios ñaupa tiempopi cheqa sonqo kamachisninta bendecisqanta (Rom. 15:4). Chaytataj Josej kausayninpi sutʼita reparasunman. Paytaqa hermanosnin esclavota jina venderparqanku. Chantá Egiptopi patronninpa warmin qhasimanta tumpaspa carcelman wisqʼaykucherqa. ¿Jehová Joseta saqerparerqachu? Mana. Biblia nin: “Diosqa paywampuni karqa, tukuy imapi payta khuyaspa”, chantapis “Tata Dios paywan kasharqa tukuy ima ruwasqasnimpi allin rinampaj”, nispa (Gén. 39:20, 21, 23). Chay jina llakiypi tarikuspa, Joseqa Jehovapi pacienciawan suyakorqa.

¹¹ Chaymanta qhepaman, Faraonqa Joseta carcelmanta kacharicherqa. Chantá Joseta churarqa “tukuy Egipto jallpʼapi” kamachej kananpaj (Gén. 41:1, 37-43). Josewan warminwanqa, iskay wawasniyoj karqanku. Joseqa “kuraj kajta suticharqa Manasés sutiwan, imaraykuchus nerqa: Dios qonqachiwan tukuy llakiyniyta, ayllusniytawan, nispa. Sullkʼa kajtataj suticharqa Efraín sutiwan, imaraykuchus nerqa: Dios niwan wawasniyoj kanayta runaj llajtampi may llakisqa ñakʼarispa purisqaypi”, nispa (Gén. 41:51, 52). Jehovaqa Joseta cheqa sonqo kasqanrayku bendicerqa. Paytaj Jacobpa familianta, egipciosta ima yarqhaywan mana wañunankupaj yanaparqa. Joseqa Jehová bendecisqanta yacharqa (Gén. 45:5-9).

12. ¿Imaynatataj Jesús ñakʼarispapis cheqa sonqollapuni karqa?

¹² Jesusqa ashkha ñakʼariykunapi kaspapis Jehovata kasukorqa, paytaj tʼinkarqa. ¿Imataj Jesusta yanaparqa cheqa sonqollapuni kananpaj? Biblia nisqanman jina, “Diospa churasqan kusiyta aswan qhepaman taripananta yachasqanrayku”, payqa kʼaspipi ñakʼarerqa pʼenqaypi rikhuriyta mana manchachikuspa (Heb. 12:2). Jesusqa Diospa sutinta jatunchasqanrayku, may kusisqa kasharqa. Tatantaj Jesuspa ruwasqanwan may kusisqa kasharqa, waj ruwaykunatawantaj qorqa. Bibliaqa Jesusmanta nin: “Diospa pañanmantaj tiyaykukorqa”, nispa. Chantá nillantaj: “Diosqa payta maytapuni jatuncharqa tukuy kaj chhika patapi kanampaj, uj sutitataj qorqa, tukuy sutismanta aswan sumaj sutita”, nispa (Fili. 2:9).

13, 14. ¿Imaynatá Jehová paypaj imastachus ruwasqanchejta qhawan?

¹³ Jehovaqa paypaj tukuy imata ruwasqanchejta, may allinpaj qhawan. Payqa iskayrayajtinchej entiendewanchej. Chantapis qolqerayku chayri familianchejpaj llankʼananchejrayku llakikojtinchej, yanapayta munawanchej. Payqa allinta yachan, onqoyrayku chayri sinchʼi llakisqa kasqanchejrayku, manaña Paypaj ñaupajta jinachu ruwayta atisqanchejta. Chantapis Jehovaqa may sumajpaj qhawan, chʼampaykunasniyoj kaspapis cheqa sonqo kanapaj kallpachakusqanchejta. Chaymanta ama iskayrayanachu (Hebreos 6:10, 11 leey).

¹⁴ Chantapis yuyarikuna, Jehovaqa tukuy mañakuykunata uyarisqanta. Chayrayku Paymanta mañakojtinchejqa uyariwasunpuni (Sal. 65:2). “Khuyakoj Tata, tukuy imapi sonqochaj Dios[qa]”, paypa qayllallanpipuni kanapaj tukuy imata qowasunchej. Wakin kuteqa ichá hermanosninchejwan yanapachiwasun (2 Cor. 1:3). Jehovaqa wajkunamanta khuyakojtinchej kusikun. “Wajcha runaman jaywarejqa Tata Diosman manurin, Tata Dios kikintaj chay manuta juntʼanqa” (Pro. 19:17; Mat. 6:3, 4). Chayrayku kʼachas kajtinchej, hermanosninchejta yanapajtinchej ima, Jehovaqa chay ruwasqanchejta paypajpis ruwasunman jinata qhawan. Chayta ruwasqanchejmantataj bendecinawanchejta niwanchej.

15. ¿Ima bendiciontataj japʼiyta suyakushanki? (24 paginapi dibujota qhawariy).

¹⁵ Ajllasqa cristianosqa, Jesús jinallataj “cheqan kawsaymanta pillu[ta]” japʼiyta suyakushanku (2 Tim. 4:7, 8). Noqanchej waj jina suyakuyniyoj kajtinchejpis, Jehovapaj may valorniyoj kanchej. May chhika runas, pikunachus Jesuspa “waj ovejas[nin]” kanku, kay Jallpʼapi wiñaypaj kausakuyta suyakushanku, “allin kawsaypitaj kusisqa kanqanku” (Juan 10:16; Sal. 37:11).

16. ¿Imaynatá 1 Juan 3:19, 20 sonqochawanchej?

¹⁶ Wakin kuteqa ichapis yuyasunman, Jehovapaj mana ashkhatachu llankʼashasqanchejta, chayri ruwasqanchejwan Jehová mana kusisqachu kashasqanta. Manachayqa yuyasunman, mana ima tʼinkata japʼinapaj jinachu kasqanchejta. Chaywanpis kayta ama qonqanachu: “Diosqa sonqonchejmanta kurajmin, tukuy imatataj yachan” (1 Juan 3:19, 20 leey). Jehovata munakusqanchejrayku, creesqanchejrayku ima tukuy atisqanchejta sirvinachej. Chayta ruwajtinchej Payqa cheqamantapuni bendeciwasun, yuyasqanchejman jina pisillata ruwajtinchejpis (Mar. 12:41-44).

17. ¿Ima bendicionestataj kay tiempopi japʼishanchej?

¹⁷ Satanaspa sajra pachan tukukuyninpiña kashajtinpis, Jehovaqa llajtanta bendecishan. Llajtanpi kasqanchejrayku ashkhata yachachishawanchej, kʼachata kausakunapajtaj yanapashawanchej (Isa. 54:13). Arí, Jesús nerqa jina, Jehovaqa bendecishawanchej Jallpʼantinmanta hermanoswan uj familia jina kanapaj (Mar. 10:29, 30). Chantapis Diosta tukuy sonqo maskʼajkunaqa, sonqo tiyasqas, kusisqas, sonqo juntʼasqas ima kausakushanku (Fili. 4:4-7).

18, 19. ¿Imatá iskay hermanas ninku Jehovaj bendicionesninta japʼisqankumanta?

¹⁸ Jallpʼantinmanta Jehovaj kamachisnenqa, may chhika bendicionestaña japʼinku. Alemania suyumanta hermana Bianca nin: “Jehovaman mayta agradecekuni, agradecekullasajpunitaj. Imajtinchus payqa llakiykunasniyta atipanaypaj yanapawan, sapa pʼunchaytaj noqawan kashan. Kay mundoqa chʼampaykunamanta juntʼa kashan, astawantaj sajrayashan. Jinapis Jehovawan khuska llankʼaspaqa, paypa makinpi kashasqayta yachani. Imallatapis paypaj ruwajteyqa, Jehovaqa pachaj jinastawanraj bendeciwan”, nispa.

¹⁹ Paulaqa Canadá suyumanta, 70 watasniyojtaj. Payqa ñañu wasanmanta onqosqa kashan. Chay onqoyninrayku ashkha imasta mana ruwayta atinchu. Pay nin: “Ñakʼayllata kuyurikuspapis, tukuy atisqayta Jehovapaj llankʼani. Telefononejta chayri mayllapipis kashaspa paymanta willarinipuni. Kallpachakunaypajqa uj cuaderno tiyapuwan. Chay cuadernopitaj Bibliamanta textosta, publicacionesmanta wakin yachachiykunatawan qhelqani. Chaytataj sapa kuti leerinipuni. Chay cuadernoyta sutichani, ‘Kallpachakunaypaj cuadernoy’ nispa. Jehovaj nisqasninpi tʼukurinchej chayqa, llakiyninchej pisiyan. Payqa ima llakiyniyoj kashajtinchejpis, chay rato yanapanawanchejpaj chaypi kashan”, nispa. Ichapis kausayninchejqa, mana Biancajta chayri Paulajta jinachu. Jinapis yuyarikuna imaynatachus Jehová bendeciwasqanchejta, imaynatachus rejsisqasninchejta bendecisqantapis. Jehovaqa kay tiempopi bendecishawanchejña, qhepamanpis bendecillawasuntaj. Chaypi tʼukureyqa, mayta yanapawasun.

20. ¿Imatá japʼisunchej Jehovapaj tukuy atisqanchejta llankʼallajtinchejpuni?

²⁰ Ama jaykʼaj qonqanachu, Diosmanta mañakojtinchej payqa “may sumaj tʼinkata” qowasun. “Diospa munayninta ruwaspa” kausasun chayqa, cheqamantapuni “Diospa qosaj nisqasninta” japʼisunchej (Heb. 10:35, 36). Chayrayku creeyninchejta kallpachanallapuni, tukuy atisqanchejtataj Jehovapaj llankʼana. Imaraykuchus Jehovaqa cheqamantapuni tʼinkawasunchej (Colosenses 3:23, 24 leey).