¿Yacharqankichu?

MATEO libro nin: “Jesusqa temploman yaykuspa, templopi tukuy vendejkunata, rantejkunatawan jawaman qharqorqa. Qolqeta cambiajkunaj mesasninkuta, palomasta vendejkunaj tiyanasninkutapis tijrararqa. Paykunatataj nerqa: ‘Qhelqasqa kashan: “Waseyqa Diosmanta mañakuna wasi nisqa kanqa”. Qankunatajrí suwa thapaman tukuchishankichej’”, nispa (Mat. 21:12, 13).

Templopi vendejkunaqa, runasmanta mayta aprovechakoj kanku, may valesqapi vendespa. Judiospa unay qhelqasninkuman jina, ñaupa tiempopi uj runaqa 25 diasta trabajanan karqa, iskay palomitasllata templopi rantikunanpaj. Moisespa leyninman jinaqa, wajchasqa palomitasta Diosman jaywayta atej kanku. Jinapis may valesqa kasqanrayku mana rantiyta atejchu kanku (Lev. 1:14; 5:7; 12:6-8). Yachachej judío Simeón ben Gamalielqa chayta yachaspa vendejkunapaj phiñakorqa. Chayrayku runas maskhatachus Diosman jaywananku kasqanta pisiyacherqa. Chayta ruwasqanraykutaj runasqa 3 diallataña trabajananku karqa, iskay palomitasta rantinankupaj.

Arí, Jesusqa mana pantarqachu templopi vendejkuna ‘suwaspuni’ kasqankuta nispa. Imaraykuchus wajchasmanta aprovechakoj kanku, qolqemantataj wañusqas karqanku.