Uj milagrota ruwaspa ashkha runasman mikhuchin

Apostolesqa Galileapi willamuytawan may kusisqa kutimorqanku. Chantá “Jesusman willarqanku tukuy ima ruwasqankuta, yachachisqankutapis”. Jesustaj paykunata nerqa: “Jakuchej chʼinnejman, uj chhikallantapis samarikunaykichejpaj”, nispa. Paykunaqa saykʼusqa kasharqanku, mana mikhunallankupajpis tiempoyojchu karqanku, jamojkunapis ripojkunapis ashkha kasqankurayku (Marcos 6:30, 31).

Paykunaqa ichapis Capernaum qayllapi kasharqanku. Uj canoaman wichariytawantaj, Jordán mayu chimpaman rerqanku, Betsaida llajtamanta aswan jaqaynejman. Ashkha runastaj ripushasqankuta rikuspa, wakintaj chayta yachaspa, qocha kantunta correspa rerqanku. Jesusmanta ñaupajtataj chayarqanku.

Jesusqa canoamanta uraykushaspa, ashkha runasta rikorqa. Paykunatataj khuyakorqa mana michejniyoj ovejas jina kasqankurayku, Diospa Gobiernonmantataj “tukuy imata yachacherqa” (Marcos 6:34). “Onqosqastapis sanoyacherqa” (Lucas 9:11). Tardeyaykushajtintaj, yachachisqasnenqa Jesusta nerqanku: “Kaynejqa chʼinpacha, tardeyaykushanñataj. Runasta kachapullayña mikhunata ranchosmanta rantikamunankupaj”, nispa (Mateo 14:15).

Jesustajrí nerqa: “Mana ripunankuchu tiyan, qankuna mikhunata qoychej”, nispa (Mateo 14:16). Apostolesqa runasman mikhuchinankupaj mana tʼantata rantiyta atinkumanchu karqa. Imajtinchus qharislla 5.000 karqanku. Warmispiwan, wawaspiwanqa ichapis 10.000 kuraj karqanku. Jesustajrí yacharqaña imatachus ruwananta. Chayrayku Betsaida llajtayoj Felipeta taporqa: “¿Maymantataj tʼantata rantimusunchej kay runas mikhunankupajri?”, nispa. Felipetaj nerqa: “Iskay pachaj denario qolqewan tʼantata rantimusunman chaypis, nichá sapa ujninkuman uj chhikallantapis qoyta atisunmanchu”, nispa (Juan 6:5-7). Denarioqa romanospa qolqenku karqa, uj día trabajomantataj uj denariota pagaj kanku.

Andresqa ichapis yuyarqa: “Mana mikhuna kanchu kay chhika runasman qonapajqa”, nispa. Chayrayku nerqa: “Kaypi kashan uj lloqallitu, paypata tiyapun phishqa cebada tʼantas, iskay pescaditos ima. Chayqa nichá alcanzanmanchu kay chhika runaspajqa”, nispa (Juan 6:9).

Chaypachaqa 32 watamanta marzo chayri abril killa karqa. Pascua fiestataj qayllitapiña kasharqa. Chay tiempoqa tukuy imapis qʼomersitu kasharqa. Chayrayku Jesusqa, yachachisqasninta nerqa runasta pasto patapi, tʼaqa tʼaqallata tiyarachinankuta. Chantapis nillarqataj, sapa tʼaqapi 50 chayri 100 runas kanankuta. Chantá phishqa tʼantasta, iskay pescadostawan oqharerqa, cielota qhawarispataj Diosman graciasta qorqa. Tʼantasta partiraytawantaj yachachisqasninman jaywarqa, paykunataj runasman jaywarqanku. Chay iskay pescadostapis tukuyman jaywallarqataj, tukuyninkutaj sajsakunankukama mikhorqanku.

Chantá Jesusqa yachachisqasninta nerqa: “Puchoj parti tʼantasta tantaychej ama usunanpaj”, nispa (Juan 6:12). Yachachisqasnintaj 12 canastas juntʼata tantarqanku.