Qhapaj kamachej jovenpa tapuyninman kutichin

Jesús Perea jallpʼanta Jerusalenman rishajtin, uj qhapaj joven usqhayllata jamuspa ñaupaqenman qonqoriykukorqa. Chay jovenqa “kamachej” karqa, ichapis sinagogapi kamachejkunamanta ujnin karqa, chayri Jatun Juntamanta ujninchus. Pay Jesusta taporqa: “Kʼacha Yachachej, ¿imatataj ruwanay tiyan wiñay kausayta japʼinaypajri?”, nispa (Lucas 8:41; 18:18; 24:20).

Jesustaj kuticherqa: “¿Imaraykutaj kʼacha niwankiri? Dioslla kʼachaqa”, nispa (Lucas 18:19). Ichapis chay jovenqa “Kʼacha Yachachej” nerqa, yachachejkuna ukhupi ajinata ninakusqankurayku. Jesusqa sumaj yachachej kaspapis, mana saqerqachu “Kʼacha Yachachej”, ninanta. Astawanpis Dioslla “Kʼacha” kasqanta nerqa.

Chantá Jesusqa chay joventa nerqa: “Wiñay kausayta japʼiyta munanki chayqa, Diospa kamachisqasninta juntʼallaypuni”, nispa. Chay joventaj taporqa: “¿Mayqenkunataj chay kamachisqasri?”, nispa. Jesustaj Chunka Kamachiykunamanta phishqa kamachiykunata juntʼananta yuyaycharqa. Pay nerqa: “Ama runata wañuchinkichu, ama qhenchachakunkichu, ama suwakunkichu, ama llulla testigomanta sayankichu. Tataykita, mamaykitawan jatunpaj qhawanayki tiyan, runa masiykitapis munakunayki tiyan, qan kikiykita jina”, nispa (Mateo 19:17-19).

Chay joventaj nerqa: “Tukuy chaykunataqa juntʼaniña. ¿Imatawantaj ruwanay tiyan?”, nispa (Mateo 19:20). Ichapis payqa, wiñay kausayta japʼinanpaj astawanraj ruwanan kasqanta yuyarqa. Jesustaj chayta repararqa, ‘munakuywantaj qhawarerqa’ (Marcos 10:21).

Jinapis chay jovenqa kapuyninta aswan sumajpaj qhawarqa. Chayrayku Jesús payta nerqa: “Uj imatawanraj ruwanayki tiyan: Tukuy imasniykita vendemuspa, wajchasman chay qolqeta qopuy, ajinamanta cielopi may kapuyniyoj kanki, chantá qhepayta jamuy”, nispa. Chay jovenqa qolqenta wajchasman qopuyta aterqa. Payqa chayta ruwaspalla Jesuspa yachachisqanman tukuyta aterqa. Jinapis Jesuspa nisqanta uyarispa llakikorqa, may phutisqataj riporqa, “may jina qhapaj” kasqanrayku. Payqa mana repararqachu imachus aswan sumaj kasqanta. Jesustaj payta ripojta rikuspa llakikorqachá (Marcos 10:21, 22). Chantá Jesús nerqa: “Qhapajkunaqa mana Diospa Gobiernonman yaykuyta atillanqankuchu”, nispa (Lucas 18:24).

Chantá nillarqataj: “Uj camelloraj agujaj ninrinta pasayta atinman, uj qhapaj runa Diospa Gobiernonman yaykunanmantaqa”, nispa. Yachachisqasnintaj tʼukuspa nerqanku: “Ajina kajtin, ¿pitaj salvakuyta atinmanri?”, nispa. Paykunaqa yuyarqanku mana pipis salvakuyta atinanta. Jesustajrí nerqa: “Runaspaj mana atikoj imasqa, Diospajqa atikullan”, nispa (Lucas 18:25-27).

Chantá Pedro nerqa: “Yachanki jina, noqaykoqa tukuy imata saqespa qhepaykita jamuyku”, nispa. Chayta nispaqa mana chay qhapaj joven jinachu ruwasqankuta nisharqa. Jesustataj nerqa: “¿Imataj noqaykupaj kanqari?”, nispa. Jesustaj paykunata nerqa: “Noqa jatun kamachina tiyanaypi tiyaykukojtiy, Diosqa tukuy imata mosojyachenqa. Chaypacha qankunapis, qhepayta jamusqaykichejrayku kamachina tiyanaspi tiyaykukullankichejtaj, Israelpa 12 ayllusninta juzganaykichejpaj”, nispa (Mateo 19:27, 28).

Jesusqa chayta nispa, jallpʼa entero Edén huerta jina kanqa chay tiempomanta parlasharqa. Chaypacha Pedrowan waj yachachisqaswanqa, Jesuswan khuska cielomanta kamachimonqanku. Chaytaj ni imawan kikinchakunchu.

Jesuspa yachachisqasnenqa mana aswan qhepallamanchu sumaj bendicionesta japʼinanku karqa. Astawanpis Jesuspa tiemponpiña ashkha bendicionesta japʼerqanku. Chayrayku Jesús paykunaman nerqa: “Pichus Diospa Gobiernonrayku wasinta, warminta, hermanosninta, tatanta, mamanta, wawasnintapis saqen chayqa, kay tiempopi aswan ashkhataraj japʼenqa, jamoj tiempopitaj wiñay kausayta”, nispa (Lucas 18:29, 30).

Arí, Jesuspa yachachisqasnenqa, mayman rispapis hermanosninchejwan khuska kayta atinchej. Chantapis familianchejmanta nisqa, paykunawan aswan ujchasqa kanchej. Jinapis qhapaj kamachej jovenqa, ichapis mana kay jina kausayta japʼerqachu. Chantapis manasina Jesuswan khuska cielomanta kamachimonqachu.

Jesús nillarqapuni: “Ñaupajpi kajkunamanta ashkhasqa qhepapi kanqanku, qhepapi kajkunamanta ashkhastaj ñaupajpi kanqanku”, nispa (Mateo 19:30). Imatachus Jesús niyta munashasqanta qhawarina.

Chay qhapaj jovenqa “ñaupajpi” kajkunamanta karqa. Imaraykuchus kamachejkunamanta ujnin karqa. Chantapis Diospa leyesninta kasukorqa. Chayrayku payqa Jesuspa yachachisqan kaspa ashkha imasta ruwayta aterqa. Jinapis kapuyninta astawan munakusqanrayku chayta ñaupajman churarqa. Llampʼu sonqo runastajrí, repararqanku Jesuspa yachachisqanqa cheqa kaj kasqanta, kausayman pusaj ñantaj. Chay llampʼu sonqo runasqa “qhepapi” kasharqanku. Jinapis Jesuspa yachachisqanta japʼikusqankurayku “ñaupajpi” karqanku. Paykunaqa suyakuyta aterqanku, aswan qhepaman Jesuswan khuska cielomanta kamachimuyta. Chaypachaqa jallpʼa entero may kʼachitu kanqa.