Jesusqa sinchʼi wayrata thañichin

Jesusqa Capernaum llajtapi diantinta yachachisqanrayku saykʼusqa kasharqa. Jinapis payqa, chʼisiyaykuyta jinaña yachachisqasninman nerqa: “Qocha chimpaman rinachej”, nispa (Marcos 4:35).

Galilea qocha chimpapeqa, gerasenospa jallpʼanku kasharqa. Chaytaj Decapolispa japʼiyninpi kasharqa. Decapolispeqa ashkha llajtas kaj. Chay llajtaspi tiyakojkunataj, griegospa costumbresninkuman jina kausakoj kanku. Jinapis chay llajtaspi ashkha judíos tiyakoj kanku.

Jesuswan yachachisqasninwanqa, Capernaummanta uj canoapi purirerqanku. Runastaj waj canoaspi puririllarqankutaj (Marcos 4:36). Galilea qochata chimpanankupajqa mana karutachu rinanku karqa. Imajtinchus chay qochaqa anchonman 12 kilometrosnillayoj karqa, saytʼunmantaj 21 kilometrosniyoj.

Jesusqa diantinta yachachisqanrayku saykʼusqa kasharqa. Chayrayku canoapi puririsqankutawan, canoaj qhepanejninman riporqa. Chaypitaj almohadaman umanta atiykuspa puñurparerqa.

Galilea qochaqa lomas chaupipi kasqanrayku qʼoñisitu. Jinapis wakin kutisqa muyuyninpi kaj lomasmanta chiri wayra qochaman phukumojtin, ujllata sinchʼi wayra oqharikun. Jesuswan apostolesninwan chay qochata chimpashajtinkutaj, “manchay sinchʼi wayra oqharikorqa, canoataj yakuman chinkaykoj jinaña kasharqa yaku juntʼaykusqanrayku” (Lucas 8:23). Jinapis Jesusqa puñushallarqapuni.

Apostolesqa canoasta apaykachayta sumajta yachaj kanku. Jinapis chay kutipeqa, sinchʼi wayra kasqanrayku canoanku mana chinkaykunanpaj mayta kallpachakusharqanku. Paykunaqa yakuman chinkaykuspa wañunankuta yuyaspa, manchay mancharisqa kasharqanku. Chayrayku Jesusta rijchʼarichispa nerqanku: “Señor, ¡salvawayku ari! ¡Chinkaykushanchejña!”, nispa (Mateo 8:25).

Jesustaj rijchʼariytawan paykunaman nerqa: “Pisi creeyniyoj runas, ¿imaraykutaj kay jinatapuni manchachikunkichejri?”, nispa (Mateo 8:26). Chantá Jesusqa wayrata kʼamerqa, qochatapis nerqa: “¡Chʼin kay! ¡Ama qhollchoqeyaychu!”, nispa (Marcos 4:39). Chantá wayra thañirarqa, qochataj tiyaykorqa. Marcos, Lucas librosqa, chay milagromanta parlaspa Jesuspa yachachisqasnin pisi creeyniyoj kasqankuta willawanchej.

Jesuspa yachachisqasnenqa wayrata thañirajta, qochatapis tiyaykojta rikorqanku. Chayrayku mancharisqa, tʼukullataj kasharqanku, ninakorqankutaj: “¿Pipunitaj kayri? Wayrapis qochapis paytaqa kasunku”, nispa. Chantá paykunaqa qocha chimpaman chayarqanku (Marcos 4:41–5:1). Jesuswan khuska waj canoaspi risharqanku chay runastaj, ichapis khuskan qochamanta kutiriporqanku.

Jesusqa Diospa Wawan kasqanrayku, sinchʼi wayrata thañichinanpaj, qochapi yakuta tiyaykuchinanpaj atiyniyoj. Chayta yachayqa mayta kallpachawanchej. Imajtinchus Jesús gobernamushajtenqa, allinta kausakusunchej. Manañataj manchachikusunchu sinchʼi wayras chayri sinchʼi paras kananmanta.