Jesusqa 12 apostolesninta ajllan

Juan Bautista Jesusta ‘Diospa Corderon’ nisqanmantaqa, wata khuskanniyojña pasarqa. Diosmanta Jesús willayta qallarishajtintaj, wakin llampʼu sonqo runas yachachisqasninman tukorqanku. Paykuna karqanku: Andrés, Simón Pedro, Juan, ichá hermanon Santiago, Felipe, Natanaelpiwan. Natanaelpa ujnin sutintaj Bartolomé karqa. Chaymanta qhepamantaj, ashkha runaspiwan Jesuspa qhepanta rerqanku (Juan 1:45-47).

Jinapis Jesusqa wakin runasta ajllarqa uj sumaj llankʼaypaj wakichiyta munaspa. Chayta ruwananpajtaj, ñaupajta uj lomaman rerqa. Ichapis chayqa Capernaum qayllapi kasharqa, Galilea qocha chaynejpi. Jesusqa chay lomaman wichariytawan, tukuy tuta orakorqa ichapis yanapata, yachayta ima mañakunanpaj. Qʼayantintaj yachachisqasninta wajyaspa, paykunamanta 12 runasta ajllarqa apostolesnin kanankupaj. Apóstol palabraqa “kachasqa” niyta munan.

Jesusqa ajllarqa Andresta, Simón Pedrota, Juanta, Santiagota, Felipeta, Natanaeltawan. Chantá ajllarqa impuestota cobraj Mateota, Santiagoj wawan Judasta ima. Paypa ujnin sutenqa Tadeo karqa. Chantá ajllallarqataj Simonta. Paytaqa nej kanku: “Imatapis tukuy sonqo ruwarqon”, nispa. Chantá ajllallarqataj Alfeoj wawan Santiagota, Judas Iscariotetawan (Mateo 10:2-4; Lucas 6:16).

Chay 12 runasqa unaytaña Jesuswan khuska purerqanku, Jesustaj paykunata sumajta rejserqa. Imajtinchus Santiagowan Juanwanqa primosnin karqanku. Wakintaj ninku, Alfeo sutiyoj runaqa Josej hermanon kasqanta. Jina kajtintaj, Alfeoj wawan Santiagopis Jesuspa primollantaj karqa.

Jesusqa apostolesninpa sutisninkuta yacharqa. Noqanchejpis yachakusunman. Iskay apostolesqa Simón sutiyoj karqanku, iskaytaj Judas sutiyoj karqanku, iskaytaj Santiago sutikorqanku. Ujnin Santiagoj hermanonqa Juan karqa. Ujnin Simonpa hermanontaj Andrés karqa. Chaywanqa pusaj sutistaña yachanchej, jinapis tawaraj faltawanchej. Ujqa impuestota cobraj Mateo karqa, ujtaj Tomás, pichus Jesús kausarimusqanmanta iskayrayarqa, chay. Ujninkutataj Jesusqa sachʼa uramanta wajyarqa, paytaj Natanael sutikorqa. Paypa amigontajrí Felipe karqa.

Apostolesmantaqa Judas Iscariotella Judeamanta karqa, pichus aswan qhepaman Jesusta japʼicherqa, chay. Chunka ujniyoj apostolestaj Galileamanta karqanku, maypichus Jesús wiñakorqa, chaymanta. Natanaelqa Caná ranchomanta karqa. Felipewan, Pedrowan, Andreswantaj, Betsaida llajtamanta karqanku. Jinapis Pedrowan Andreswanqa, Capernaumman riporqanku. Mateotaj ichá chay lugarmanta karqa. Santiagowan Juanwanpis ichá Capernaumpi tiyakorqanku chayri chay qayllallapi. Trabajonkupis chay lugarllapi kasharqa.