Saludaspaqa wajkunata kallpachanchej

“¿IMAYNALLA? ¿Walejllachu?”

Ichá noqanchejpis ajinata runa masinchejta saludarispa qʼapirinchej chayri abrazarinchej. Jinapis wakin lugarespeqa waj jinasmanta saludanakunku. Ajina kajtinpis mana saludakoj runastaqa, casi tukuy mana allinpajchu qhawanku.

Chaywanpis wakin runasqa manchachikusqankurayku mana wajkunata napaykuyta atillankuchu. Wakintaj waj lugarmanta runasta mana saludayta atillankuchu. Wakinrí qhapaj runasta, wajcha runasta chayri waj culturayoj runasta mana saludayta atillankuchu. Chaywanpis ashkha runasqa saludaspalla wajkunata kallpacharqanku.

Kunantaj yachakusunchej imajtinchus saludanapuni kasqanta. Yachakullasuntaj imatachus Biblia saludanamanta nisqanta.

Apóstol Pedroqa, Cornelio cristianoman tukushajtin, jinata nerqa: “Kunanqa allinta reparani, Diosqa tukuy runasta uj rejllata qhawasqanta”, nispa (Hech. 10:34). Aswan qhepamantaj Pedro nerqa: ‘Jehová Diosqa munan tukuy runas pesachikunankuta’, nispa (2 Ped. 3:9). Kay versiculostaqa astawan oqharinchej estudiosninchejmanta parlanapaj. Jinapis Pedroqa cristianosman nillarqataj: “Tukuy laya runasta jatunpaj qhawaychej. Tukuy hermanosta munakuychej”, nispa (1 Ped. 2:17). Kay versiculoqa reparachiwanchej waj llajtayoj runasta, waj culturayoj runastapis saludanapuni kasqanta. Imajtinchus saludaspaqa runa masinchejta munakusqanchejta, jatunpaj qhawasqanchejtataj rikuchinchej.

Chayrayku apóstol Pabloqa cristianosman nerqa: “Imaynatachus Cristo japʼikuwarqanchej, ajinallatataj ujkuna ujkunata tukuy sonqo japʼikuychej”, nispa (Rom. 15:7). Chantapis Pabloqa nillarqataj hermanos ‘mayta sonqochasqankuta’. Kay tiempopeqa astawanraj hermanosninchejta sonqochananchej tiyan. Imajtinchus Kuraj Supayqa Diospa llajtanta chinkachiyta munashan (Col. 4:11; Apo. 12:12, 17).

Bibliaqa niwanchej wajkunata tukuy sonqo japʼikunapaj saludanapuni kasqanta. Chantapis nillawanchejtaj wajkunata saludaspaqa, kallpachayta atisqanchejta.

María, Jesusmanta niraj onqoj rikhurishajtin, Jehová Diosqa uj angelta kacharqa Mariawan parlamunanpaj. Chay angelqa Mariata nerqa: “Imaynalla María, Jehová Diosqa sonqo juntʼasqa qanwan kashan, bendecisunkitaj”, nispa. Mariataj chay angelpa nisqanta uyarispa mayta tʼukorqa. Angeltaj chayta reparaspa nerqa: ‘Ama manchachikuychu María. Qantaqa Dios allinpaj qhawasunki. Qanqa onqoj rikhurispa Jesusta nacechikunki’, nispa. Mariataj chayta uyarispa nerqa: “Jehová Diospa kamachin kani, nisqaykiman jina noqapi ruwakuchun”, nispa (Luc. 1:26-38).

Chay angelqa mana yuyarqachu uj juchasapa runawan parlaspa pisipaj qhawasqa kananta. Astawanpis Mariawan parlananpaj napaykorqa. Chay angelmanta noqanchejpis yachakusunman, wajkunata saludanapuni kasqanta, yanapanapajtaj wakichisqapuni kana kasqanta. Arí, saludaspaqa hermanosninchejta kallpachanchej, mayta munakusqanchejtataj rikuchinchej.

Apóstol Pabloqa ashkha lugaresmanta hermanosta rejserqa. Chayrayku payqa cartasta qhelqashaspa wakin hermanosta sutisninkuta oqharispa napaykorqa. Por ejemplo Romanos 16 capitulopi jinata nerqa: ‘Febe sutiyoj hermananchejta kachamushaykichej. Tukuy sonqo payta japʼikuychej, imaynatachus Diospaj tʼaqasqa kajkunata japʼikuna tiyan, ajinata. Imamanta pisichikojtinpis yanapariychej’, nispa. Chantapis Pabloqa nillarqataj: ‘Napaykapuwaychej Priscata Aquilatawan. Paykunamanqa mana noqallachu graciasta qoni, manachayqa mana judío kajkuna ukhupi tukuy congregacionespis’, nispa. Chantá Pablo nillarqataj: ‘Napaykapullawaychejtaj munasqa Epenetoyta, jinallataj Trifenata, Trifosatawan. Paykunaqa Señorpaj mayta llankʼashanku’, nispa. Reparanchej jina Pabloqa tukuy hermanosman hermanasmanwan saludosta apacherqa (Rom. 16:1-16).

Chay cristianosqa Pablo saludosta apachisqanmanta maytachá kusikorqanku. Chantapis Pablota hermanostapis astawanchá munakorqanku. Waj hermanospis astawanchá Diospi atienekorqanku. Reparanchej jina hermanosta napaykuy, allinta ruwasqankuta niy imaqa, ujchasqa kanapaj, amigos kanapaj ima yanapawanchej.

Pablo Puteoli puertomanta Romaman viajashajtin, hermanosqa Pablota taripaj risqanku. “Pablotaj paykunata rikuspa Diosman graciasta qorqa, kallpachakorqataj” (Hech. 28:13-15). Reparanchej jina asirispa chayri makisninchejwan señasta ruwaspa saludaspaqa, wajkunata kallpachasunman, astawanraj llakiypi rikukojkunata.

Discípulo Santiagomanta parlarina. Payqa wakin hermanosta cartanejta kʼamerqa, kay sajra mundoj imasninta ruwasqankurayku (Sant. 4:4). Kunantaj qhawarina imatachus Santiago nisqanta cartanta qhelqayta qallarishajtin.

Pay nerqa: “Noqa Santiagoqa Diospa kamachin kani, jinallataj Señor Jesucristojtapis. Napaykamuykichej qankuna 12 ayllusman, pikunachus tukuynejpi chʼeqerasqa kashankichej, chaykunaman”, nispa (Sant. 1:1). Chayta nispaqa hermanospa sonqonkuta wakicherqa kʼamisqanta kasukunankupaj. Reparanchej jina saludarispaqa wajkunawan imamantapis parlariyta atillasunman.

Noqanchejqa wajkunata mana tanqasqa jinallachu saludananchej tiyan, manaqa munakusqanchejrayku (Mat. 22:39). Uj hermanamanta parlarina. Payqa Irlanda suyupi tiyakun. Uj pacha payqa reunionman manchay apurasqa qallarishajtinña chayasqa. Jinapi uj hermano kusisqa nisqa: “Imaynalla, walejtapuni jamunki”, nispa. Hermanataj chʼinllamanta tiyakamusqa.

Semanasninmantaj chay hermanaqa, chay hermanoman nisqa: “Saludariwarqanki chay diaqa may llakisqa kasharqani, familiaypi problemas kasqanrayku. Ni reunionmanpis jamuyta munarqanichu. Mana yuyakunichu imamantachus chay reunionpi parlakusqanta, saludarillawasqaykita yuyakuni. Saludawaspaqa sonqoyta tiyaykucherqanki. Walejtapuni saludariwarqanki”, nispa.

Chay hermanoqa mana reparallasqapischu saludaspa chay hermanata kallpachasqanta. Chay hermano nin: “Chay hermanita, saludaspa sonqoyta tiyaykuchiwarqanki niwajtin kusikorqani”, nispa.

Rey Salomón nerqa: “Tʼantaykita yaku pataman churay, uj mashkha pʼunchaymantataj tarikapullankitaj”, nispa (Ecl. 11:1). Rey Salomón chayta nispaqa, nisharqa hermanosninchejta saludarispa paykunata kallpachasqanchejta. Noqanchejpis kallpachasqas kananchejta. Chayrayku tukuypis saludanakunapuni.