Jehová Diosta munakoyqa bautizakunaykipaj yanapasonqa

1, 2. Hechos 8:27-31, 35-38 nisqanman jina, ¿imaraykutaj Etiopiamanta runa bautizakorqa?

ASHKHA runasqa Jehová Diosta munakusqankurayku, agradecekusqankurayku ima bautizakunku. Ajinamantataj Jesuspa discipulosninman tukunku. Qanrí, ¿paykuna jina ruwayta munawajchu? Etiopía llajtayoj runamanta parlarina. Payqa Etiopiamanta reinaj kamachiyninpi autoridad karqa.

² Chay runaqa, Diospa Palabranta estudiaspa entienderqa bautizakunan kasqanta. Chayta entiendesqantawantaj bautizakorqa (Hechos 8:27-31, 35-38 leey). Payqa Jehová Diosta munakusqanrayku bautizakorqa, Jesuspa discipulonmantaj tukorqa (Mat. 28:19). ¿Imaraykutaj chayta ninchej? Etiopía llajtayoj runaqa, carretanpi rishaspa profeta Isaiaspa qhelqasqanta leesharqa. Chaytaj rikuchiwanchej, Diospa Palabranta jatunpaj qhawasqanta. Imatachus leeshasqanta Felipe entiendechejtintaj, chay runaqa imatachus Jesús payrayku ruwasqanmanta agradecekorqa. Chantapis payqa, Jerusalenman rerqa Jehová Diosta yupaychaj. Chayta ruwananpajtaj, ñaupa religionninta saqepunmanñachá karqa, Diospa llajtanmantaj ujchaykukorqa. Chaytaj rikuchiwanchej, Jehová Diosta munakusqantaña.

 3. ¿Imastaj mana bautizakojta saqesunkimanchu? (“¿Imayna jallpʼamantaj sonqoyki rijchʼakun?” nisqa recuadrota leeriy).

³ Jehová Diosta munakoyqa, bautizakunaykipaj yanapasunkiman. Waj imasta munakuyrí, mana bautizakojta saqesunkimanchu. Ichapis qanqa familiaykita, amigosniykitawan mayta munakunki. Chayraykutaj bautizakojtiyki paykuna chejnikusunankuta manchachikunki (Mat. 10:37). Chayrí ichá Jehová Diospa chejnisqan ruwaykunata mana saqeyta atishankichu (Sal. 97:10). Manachayrí ichá wakin costumbresta chayri fiestasta mana qonqayta atishankichu. Imaraykuchus wawamantapacha chaykunata ruwarqanki, maytataj gustasunki. Jinapis yachanki Jehová Dios chay costumbresta chejnisqanta (1 Cor. 10:20, 21). Kunantaj ajllanayki tiyan, Jehová Diosta munakuychus chayri waj imasta munakuychus aswan allin kasqanta.

 4. ¿Imataj yanapasonqa Jehová Diosman kausayniykita qopunaykipaj?

⁴ Ichapis Jehovaj testigosninwan niraj estudiashaspa, Bibliata jatunpajña qhawarqanki. Chantá ichá Jesustapis munakorqankiña. Jehovaj testigosninwan Bibliata estudiasqaykimantapachataj, ichá paykunawan kaspa kusikunki. Chay tukuy imastataj jatunpaj qhawanki. Jinapis bautizakunaykipajqa, mana chayllatachu ruwanayki tiyan. Jehová Diosman kausayniykita qopunaykipajqa, payta munakunayki tiyan. Jehovata tukuy imamanta astawan munakunki chayqa, mana saqenkichu ni pipis, nitaj imapis payta sirvejta jarkʼasunanta. Chayrayku bautizakunaykipaj, bautizakuytawan payta sirvinallaykipajpuni ima, Jehová Diosta munakunayki tiyan.

 5. ¿Imatá kay yachaqanapi yachakusun?

⁵ Jesusqa niwanchej: “Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwan, tukuy kallpaykiwantaj”, nispa (Mar. 12:30). ¿Imatá ruwawaj Jehová Diosta ajinata munakunaykipaj? Jehová Dios mashkhatachus munakususqanpi piensariy. Chaypi piensarispaqa, qanpis payta munakullankitaj (1 Juan 4:19). Chayrayku kay yachaqanapeqa yachakunki, imastachus ruwanaykita Jehová Diosta munakunaykipaj, bautizakunaykipajtaj.

 6. Romanos 1:20 nisqanman jina, ¿imaynatá Jehová Diosta rejsisunman?

⁶ Jehová Diosta rejsinaykipajqa, ruwasqasninpi tʼukuriy (Romanos 1:20 leey; Apo. 4:11). Plantaswan animaleswan, imayna ruwasqachus kasqankuta qhawariy. Chantá piensariy cuerponchej may sumaj ruwasqa kasqanpi. Chay tukuy imasqa, Jehová Dios may yachayniyoj kasqanta rikuchinku (Sal. 139:14). Intipiñataj piensariy. Cielopi may chhika estrellasmanta ujnillan kajtinpis, intej kʼajaynenqa may jina atiyniyoj. Chaytaj rikuchiwanchej, Jehová Dios may atiyniyoj kasqanta (Isa. 40:26).b Jehová Diospa ruwasqasninpi tʼukurispaqa, payta astawan jatunpaj qhawanki. Diosninchej yachayniyoj, atiyniyojtaj kasqanta yachanaykeqa, may allinpuni. Jinapis mana chayllatachu yachanayki tiyan. Jehová Diosta tukuy sonqo munakunaykipajqa, payta astawan rejsinayki tiyan.

 7. Jehová Diosta tukuy sonqo munakunaykipaj, ¿imataj yanapasunkiman?

⁷ Jehová Diosqa mayta munakusunki. Ama chaymanta iskayrayaychu. Ichapis ninki: “Cielotawan jallpʼatawan ruwaj Dios, ¿rejsiwanmanchu? ¿Noqamanta llakikunmanchu?”, nispa. Ajinata yuyanki chayqa, kayta yuyarikuy: “Payqa mana karupichu kashan sapa ujninchejmanta” (Hech. 17:26-28). Chantapis “tukuypa sonqonkuta rejsin”. Jehová Diosqa nisunki, ‘payta maskʼajtiyki tarichikusunanta’ (1 Cró. 28:9). Chantapis manachus Jehová Dios payman pusamusunkiman karqa chayqa, mana Bibliata estudiashawajchu karqa (Juan 6:44). Imastachus Jehová Dios qanrayku ruwasqanta astawan yachaspaqa, payta astawan munakunki.

 8. ¿Imaynatá Jehová Diosman agradecekuwaj?

⁸ Jehová Dios munakususqanmanta agradecekunaykipajqa, paywan tukuy sonqo parlariy. Jehová Diosman llakiyniykita willakuy, qanrayku imastachus ruwasqanmantapis agradecekuy. Chayta ruwaspaqa, payta astawan munakunki. Mañakusqaykita uyarisqanta reparaspataj, Jehová Diosman astawan kʼaskaykunki (Sal. 116:1). Chantapis reparanki, payqa imaynachus kashasqaykita sumajta yachasqanta. Jinapis Jehová Diosman astawan qayllaykunaykipajqa, paypa yuyayninta, imatachus ruwanaykita munasqantawan entiendenayki tiyan. Chaytataj Bibliata estudiaspalla yachawaj.

 9. ¿Imasta ruwaspataj Bibliata jatunpaj qhawasqaykita rikuchiwaj?

⁹ Jehová Diospa Palabranta jatunpaj qhaway. Bibliallapi Jehová Diosmanta cheqa kajta yachakunchej, jinallataj imatachus noqanchejpaj munasqantapis. Chayrayku Bibliata sapa día leey, yachachej jamusunku chay diapaj wakichikuy, yachakusqaykiman jinataj kausakuy. Chay imasta ruwaspaqa, Bibliata jatunpaj qhawasqaykita rikuchinki (Sal. 119:97, 99; Juan 17:17). Bibliata leenaykipaj, ¿uj horario kapusunkiñachu? Jina kajtin, chayman jina leenaykipaj kallpachakuy.

10. ¿Imapitaj ni mayqen libropis Bibliaman rijchʼakunchu?

¹⁰ Jesuspa kausayninmanta parlaspaqa, ni mayqen libropis Bibliaman rijchʼakunchu. Imaraykuchus Bibliapeqa, Jesusta rikojkunapuni paymanta qhelqarqanku. Chayrayku Biblialla sutʼita willan, imatachus Jesús sapa ujninchejrayku ruwasqanta. Jesuspa nisqasninta, ruwasqasnintawan yachaspaqa, payta astawan munakunki.

11. ¿Imatá ruwawaj Jehová Diosta astawan munakunaykipaj?

¹¹ Jehová Diosta astawan munakunaykipaj, Jesusta munakuy. Jesusqa tukuy imapi Tatanman rijchʼakorqa (Juan 14:9). Chayrayku Jesusmanta astawan yachakuspaqa, Jehová Diosta astawan rejsinki, astawantaj munakunki. Kaypi piensariy: Jesuspa tiemponpi wakin runasqa, pobresta, onqosqasta, pisi kallpayojkunatapis, mana khuyakojchu kanku. Jesustajrí paykunata khuyakoj. Chantapis Jesuspa sumaj yuyaychaykunasninpi piensariy. Chay yuyaychaykunata kasukuy, ¿yanapasorqachu? (Mat. 5:1-11; 7:24-27).

12. Jesús sapa ujninchejrayku wañusqanta entiendespa, ¿imatataj ruwayta munanki?

¹² Jesusqa juchasninchej perdonasqa kananpaj kausayninta qorqa. Chaypi piensarispaqa, payta astawan munakunki (Mat. 20:28). Jesús sapa ujninchejrayku wañusqanta entiendespaqa, juchasniykimanta pesachikunki, Jehová Diospa perdonnintataj maskʼanki (Hech. 3:19, 20; 1 Juan 1:9). Jehová Diosta, Jesustawan astawan munakuspaqa, paykunata munakojkunawan kayta munanki.

13. ¿Imatataj Jehová Dios qosonqa?

¹³ Jehová Diosta munakojkunata munakuy. Ichapis familiayki chayri amigosniyki, mana entiendenqankuchu imaraykuchus Jehová Diosman kausayniykita qopuyta munasqaykita. Chayraykutaj ichapis chejnikusonqanku. Jinapis Jehová Diosqa, uj mosoj familiata qosonqa. Congregacionmanta hermanosman, hermanasman astawan kʼaskakunki chayqa, paykunaqa munakusonqanku, yanapasonqankutaj (Mar. 10:29, 30; Heb. 10:24, 25). Aswan qhepamantaj, ichá familiaykipis qanwan khuska Jehová Diosta yupaychanqanku (1 Ped. 2:12).

14. Kay 1 Juan 5:3 versiculota leespa, ¿imatataj Jehová Diospa kamachiykunasninmanta niwaj?

¹⁴ Jehová Diospa kamachiykunasninta jatunpaj qhaway. Ichapis Jehová Diosta niraj rejsishaspaqa, munasqaykiman jina kausaj kanki. Jinapis Jehová Diosmanta yachakuspaqa, paypa kamachiykunasnin aswan sumaj kasqanta reparanki (Sal. 1:1-3; 1 Juan 5:3 leey). Bibliapeqa qosaspaj, warmispaj, tataspaj, wawaspaj ima kamachiykuna tiyan (Efe. 5:22–6:4). Chay kamachiykunata kasukuy, ¿familiaykipi yanapasorqachu? Chantapis Jehová Diosqa, imayna amigostachus ajllakunata yachachiwanchej. Chayta kasukuy, ¿yanapasorqachu? Diosta kasukuspa, ¿reparankichu aswan kusisqa kasqaykita? (Pro. 13:20; 1 Cor. 15:33). Ichapis “arí” nishanki.

15. Bibliaj nisqanta mana entiendespa, ¿imatataj ruwawaj?

¹⁵ Wakin kutisqa Bibliapi imatapis leeshaspa, ichá ninki: “¿Imaynatá kaypi nisqanman jina ruwayman?”, nispa. Jehová Diosqa Bibliaj nisqanta entiendenapaj, llajtannejta publicacionesta qowanchej. Chay publicacionesqa, imachus allin, imatajchus mana allin kasqanta reparanaykipaj yanapasonqa (Heb. 5:13, 14). Chay publicacionesta leeriy, estudiaytaj. Chayta ruwaspaqa, publicaciones tukuy imapi yanapasusqanta reparanki. Chayta reparaspataj, Jehová Diospa llajtanman yaykuyta munanki.

16. ¿Imayna wakichisqataj Jehová Diospa llajtan kashan?

¹⁶ Jehová Diospa llajtanta kasukunaykipaj kallpachakuy. Jehová Diosqa kay jallpʼapi llajtanta congregacionespi tʼaqan. Wawan Jesustaj chay congregacionespa uman (Efe. 1:22; 5:23). Jesusqa Diospa llajtanta ñaupajman apananpaj, uj juchʼuy grupo ajllasqa cristianosta churan. Paykunataqa “allin kamachi yuyayniyoj” nispa suticharqa. Chay grupo cristianosqa, cheqa yachachiyta mikhunata jina wakichinku. Ajinamanta Jehová Diospa qayllallanpipuni kananchejpaj (Mat. 24:45-47). Paykunaqa sumaj wakichisqa ancianosnejta congregacionespi cuidawanchej (Isa. 32:1, 2; Heb. 13:17; 1 Ped. 5:2, 3). Ancianosqa tukuy sonqo qanpaj llankʼanku. Paykunaqa sonqochasonqanku, yanapasonqankutaj Jehová Diosman astawan qayllaykunaykipaj. Jinapis astawanqa Jehová Diosmanta wajkunaman yachachinaykipaj yanapasonqanku (Efe. 4:11-13).

17. Romanos 10:10, 13, 14 nisqanman jina, ¿imajtintaj Jehová Diosmanta runasman yachachinchej?

¹⁷ Wajkunaman Jehová Diosmanta yachachiy. Jesusqa yachachisqasninman kamacherqa, Jehová Diosmanta wajkunaman yachachinankuta (Mat. 28:19, 20). Chay kamachiytaqa obligasqa jinalla kasukuyta atisunman. Jinapis Jehová Diosta tukuy sonqo munakuspaqa, Jesuspa apostolesnin jina ninki. Apóstol Juanwan Pedrowan nerqanku: “Noqaykoqa mana chʼinlla kayta atiykumanchu, willanaykupuni tiyan imastachus rikusqaykuta, uyarisqaykutapis”, nispa (Hech. 4:20). Uj runata Jehová Diosta munakunanpaj yanapareyqa, mayta kusichiwanchej. Felipepis maytachá kusikorqa, Etiopiamanta runata Diospa Palabranta entiendechispa, bautizakunanpajtaj yanapaspa. Qanpis Felipe jina ruway, Jesús kamachisqanman jinataj runasman yachachiy. Chay imasta ruwaspaqa, Jehovaj testigon kayta munasqaykita rikuchinki (Romanos 10:10, 13, 14 leey). Chaymantataj ichá qanpis Etiopiamanta runa jina ninki: “¿Imajtintaj mana bautizakuymanchuri?”, nispa (Hech. 8:36).

18. ¿Ima tapuykunamantaj qhepan yachaqanapi kutichisun?

¹⁸ Bautizakoyqa mana pujllakuy jinachu. Chayrayku bautizakuyta munaspaqa, imachus bautismo kasqanta sutʼita entiendenayki tiyan. ¿Imatataj bautizakuymanta yachanayki tiyan? ¿Imatataj ruwanayki tiyan niraj bautizakushaspa, chanta bautizakuytawan? Chay tapuykunaman qhepan yachaqanapi kutichisun.