Jesusqa kapuyniyoj kaymanta parlan

Jesús uj fariseoj wasinpi mikhushajtenqa, Galileapi jinallataj ashkha runas payta jawapi suyasharqanku (Marcos 1:33; 2:2; 3:9). Jesusta suyasharqanku chay runasqa, mana fariseos jinachu karqanku. Paykunaqa Jesuspa yachachisqanta uyariyta munarqanku.

Jesusqa fariseoj wasinpi mikhuytawan, yachachisqasninman nerqa: “Allinta qhawakuychej fariseospa levadurankumanta. Chayqa puraj uya kayninku”, nispa. Jesusqa chaymanta aswan ñaupajta parlarqaña. Jinapis watejmanta chayta nillarqataj, fariseoswan kashaspa puraj uya kayninkuta rikusqanrayku (Lucas 12:1; Marcos 8:15). Fariseosqa kʼacha runasman rijchʼakuspapis sajras karqanku. Chayta runas reparanankupajtaj Jesús nerqa: “Manamin imapis sumaj pakasqa kanchu mana sutʼinchakojqa, nillataj pakaypi kajpis mana yachakojqa”, nispa (Lucas 12:2).

Jesús kasharqa chayman rej judiosmanta ashkhasqa, ichapis mana Galileaman rerqankuchu Jesuspa yachachisqanta uyarej. Chayrayku Jesusqa watejmanta wakin imasta paykunaman yachacherqa. Pay nerqa: “Qankunata wañuchiyta atejkunataqa ama manchachikuychejchu, chaymanta astawanqa manaña imatapis ruwayta atisunkichejmanchu”, nispa (Lucas 12:4). Jesusqa Galileapi jinallataj yachacherqa, Jehová paykunata cuidananpi confiakunankuta. Chantapis yachachillarqataj payta Diospa Wawanta jina qhawanankuta, Dios paykunata yanapananmanta mana iskayrayanankuta ima (Mateo 10:19, 20, 26-33; 12:31, 32).

Chantá runas ukhumanta uj runa nimorqa: “Yachachejníy, hermanoyta niripuway herenciata partinakunaykuta”, nispa (Lucas 12:13). Diospa Leynin nisqanman jinaqa, kuraj kaj qhari wawa tatanpa tukuy kapuyninmanta iskay tʼaqata japʼinan karqa. Chayrayku mana necesitarqankuchu pipis paykunaman herenciata partinanta (Deuteronomio 21:17). Jinapis chay runaqa, ichapis astawan herenciata japʼiyta munarqa. Jesustajrí sumaj yachayniyoj kasqanrayku nerqa: “¿Pitaj churawarqa juezniykichejpaj chayri herenciaykichejta qankunaman partinaypajri?”, nispa (Lucas 12:14).

Chantá Jesusqa runasta yuyaycharerqa: “Allinta qhawarikuychej, tukuy imata munapayaymantataj jarkʼakuychej. Runaqa ashkha kapuyniyojpis kachun, mana chaychu kausayta qonqa”, nispa (Lucas 12:15). Runaqa may chhika kapuyniyoj kaspapis wañuspa mana chayta apanchu. Chayta runas aswan sutʼita entiendenankupaj, Jesús paykunaman uj cuentitota cuentarerqa. Chaywantaj entiendecherqa Diospa ñaupaqenpi allinpaj qhawasqa kay aswan sumaj kasqanta.

Jesús nerqa: “Uj qhapaj runajta chajrasnin ashkhata poqosqa. Chayrayku payqa sonqonpi nisqa: ‘¿Imanasajtajri? Manaña maymanpis waqaychayta atinichu cosechasniyta’, nispa. Chantá nisqa: ‘Kayta ruwasaj. Pirwasniyta phaskaraspa aswan jatuchajta ruwasaj, chaykunamantaj tantasaj tukuynin cosechasniyta, tukuy kapuyniytawan. Nisajtaj: “Ashkha allin imasniy waqaychasqa kapuwan ashkha wataspaj. Ni imamanta llakikusajchu, mikhusaj, ujyasaj, kusikusajtaj”’, nispa. Diostajrí payta nisqa: ‘Mana yuyayniyoj runa, kunan chʼisi wañuchisonqanku. Chantá, ¿pipajtaj chay tantasqayki kanqari?’, nispa. Ajinamin qhatirin payllapaj tantaj runataqa, pichus Diospa ñaupaqenpi mana qhapajchu, chaytaqa”, nispa (Lucas 12:16-21).

Jesusqa chayta nerqa, yachachisqasnin, payta uyarejkuna ima, mana kapuyniyoj kayllaman qokunankupaj. Paykunaqa imastachus necesitasqankumanta anchata llakikuspa Diosta sirviyta saqepunkuman karqa. Chaypachaqa Jesús orqopi yachachisqanmanta wata partiyojña kasharqa. Jinapis Jesusqa watejmanta orqopi yachacherqa chay imasta yachachillarqataj.

Pay nerqa: “Amaña kausayniykichejmanta llakikuychejchu, imatachus mikhunaykichejmanta, imatachus churakunaykichejmantapis. [...] Qhawariychej qharqañasta: Mana tarpunkuchu, nitaj ruthunkuchu, nillataj jallchʼananku kanchu, nitaj pirwankupis. Diostajrí paykunata mikhuchin. ¿Manachu qankunaqa aswan valorniyoj kankichej pʼisqosmanta nisqaqa? [...] Qhawariychej tʼikasta imaynatachus wiñasqankuta, mana llankʼankuchu, nitaj phushkankuchu. Cheqatapuni niykichej: Ni Salomonpis tukuy qhapaj kayninpi, ujnin tʼika jinallapis ropata churakorqachu. [...] Chayrayku amaña llakikuychejchu imatachus mikhunaykichejmanta, imatachus ujyanaykichejmantapis. Ama ari chayraykoqa phutisqallapuni kaychejchu. [...] Tataykichejqa yachanña chay tukuy imasmanta pisichikusqaykichejta. Astawanpis paypa Gobiernonta maskʼallaychejpuni, chay imastataj yapata jina qosonqachej”, nispa (Lucas 12:22-31; Mateo 6:25-33).

Diospa Gobiernontaqa “juchʼuy tropa” ovejasmanta kajkuna maskʼarqanku. Paykunaqa pisilla karqanku. Tiempo pasasqanman jinataj, 144.000 kasqankuta yachakorqa. ¿Imatataj paykunaman Dios qonqa? Jesús nerqa: “Tataykichejqa Gobiernonta qosunkichejña”, nispa. Paykunaqa mana kay jallpʼapichu kapuyninkuta tantarqanku. Imajtinchus kay jallpʼapeqa suwas kapuyninkuta suwakapunkuman. Astawanpis paykunaqa “cielopi mana jaykʼaj tukukoj valorniyoj imasta” tantarqanku. Cielomantapachataj Cristowan khuska kamachimonqanku (Lucas 12:32-34).