Jesuspa yachachisqanta uyarina

 1. ¿Imajtintaj Jesús nerqa discipulosnin ovejas jina kasqankuta?

JESUSQA discipulosninwan ujchasqa kasqanta rikuchinanpaj, uj michejmanta ovejasninmantawan parlarqa (Juan 10:14). Chaymanta parlasqanqa may sumajpuni. Imajtinchus ovejasqa michejninkuta rejsinku, parlasqantataj uyarinku. Uj runa ajinapuni kasqanta repararqa. Pay nin: “Wakin ovejasta fotota orqhoyta munarqayku. Wajyajtiykutaj mana rejsiwasqaykurayku mana qayllaykamuwarqaykuchu. Jinallapi uj lloqallitu rikhurimorqa. Payqa chay ovejaspa michejkuninku karqa. Pay wajyajtinkamataj ovejasqa kasorqankupacha”, nispa.

2, 3. 1) ¿Imaynatataj Jesuspa discipulosnin payta uyarisunman? 2) ¿Imastá kay yachaqanapi qhepan yachaqanapiwan ukhuncharisun?

² Chay runaj rikusqanqa yuyarichiwanchej imatachus Jesuspa ovejasnin, nisunman discipulosnin ruwanankuta. Jesús nerqa: “Ovejasneyqa parlasqayta uyarenqanku”, nispa (Juan 10:16). Jinapis Jesusqa cielopi kashan. Chanta, ¿imaynatá payta uyarisunman? Paytaqa uyarisunman yachachiwasqanchejman jina ruwaspa (Mat. 7:24, 25).

³ Kay yachaqanapi jinallataj qhepan yachaqanapi, Jesuspa wakin yachachiykunasninta ukhuncharisun. Sumaj michej Jesusqa yachachiwarqanchej imastachus mana ruwanata, imastatajchus ruwanata. Chayrayku kay yachaqanapeqa iskay imasta mana ruwananchejchu kasqanta yachakusun.

 4. Lucas 12:29 nisqanman jina, ¿imataj anchata phutichiwasunman?

⁴ (Lucas 12:29 leey). Jesusqa discipulosninman nerqa kausanankupaj imastachus necesitasqankumanta ama anchata phutikunankuta. Jesús chayta yuyaychasqanqa may sumajpuni, maytataj yanapawanchej. Chayta kasukuyta munajtinchejpis, imajtinchus wakin kutis mana atillasqanchejta qhawarina.

 5. ¿Imamantataj wakin hermanos mayta phutikunku?

⁵ Wakin hermanosqa mikhunamanta, ropamanta, wasimanta ima mayta phutikunku. Ichapis suyunkupeqa wajchaslla kanku, nitaj trabajopis kanchu, familiankuta uywanankupajpis mana ganakuyta atillankuchu. Chayri pichus familiapaj trabajaj chay ichá wañupun, ajinamantataj manaña qolqenku kanchu necesitasqanku imaspaj. Kay jatun onqoy COVID-19 kasqanraykutaj ashkhas mana trabajoyoj, mana qolqeyoj ima rikhurinku (Ecl. 9:11). Noqanchejpis chay jina problemaspi chayri waj problemaspi rikukorqanchej chay, ¿imatá ruwasunman Jesús ama anchata phutikuychejchu nisqanta kasukunapaj?

 6. ¿Imataj uj pacha apóstol Pedrota pasarqa?

⁶ Uj pacha apóstol Pedrowan waj apostoleswan ima uj canoapi Galilea mar qochapi kasharqanku. Chaypachaqa sinchʼita wayrasharqa. Jinallapitaj Jesusta yaku patanta purishajta rikorqanku. Pedrotaj nerqa: “Señor, qanchus kanki chayqa, kamachiway kay yaku patanta qanman jamunayta”, nispa. Jesustaj nerqa: “¡Jamuy!”, nispa. “Pedrotaj canoamanta uraykuytawan, yaku patanta Jesusman rerqa. Chaywanpis sinchʼi wayrata qhawarispa mancharikorqa, yakuman chinkaykushaspataj qhaparerqa: ‘¡Señor, salvaway!’”, nispa. Jesustaj Pedrota makinmanta aysarispa salvarqa. Pedroqa qhollchoqeyashaj yaku patanta puriyta aterqa Jesusllata qhawashasqanrayku. Chaywanpis sinchʼi wayrata qhawarispaqa mancharikorqa, yakumantaj chinkaykusharqa (Mat. 14:24-31).

 7. ¿Imatataj apóstol Pedromanta yachakunchej?

⁷ Imachus Pedrota pasasqanmantaqa mayta yachakusunman. Payqa canoamanta uraykuytawan yaku patanta purishaspa mana yuyarqachu sinchʼi wayrata qhawarinanpi, nitaj yakuman chinkaykunanpipis. Payqa Jesuskama chayayta munarqa. Jinapis mana aterqachu sinchʼi wayrata qhawarisqanrayku. Kay tiempopi problemasta aguantananchejpajqa, sinchʼi creeyniyoj kananchej tiyan. Imaynatachus apóstol Pedro yaku patanta purinanpaj sinchʼi creeyniyoj kanan karqa ajinata. Jehovapi, niwasqanchejpipis mana confiasunmanchu chayqa creeyninchej pisiyanman, llakiykunasninchejtaj atipawasunman. Ima llakiykunapi kaspapis Jehovapi, pay yanapanawanchejpi ima atienekunallapuni. Qhepan parrafospi imaynatachus chayta ruwanata qhawarisun.

 8. ¿Imataj yanapawasun necesitasqanchej imasmanta mana anchata phutikunapaj?

⁸ Llakikunanchejmantaqa munakuyniyoj Tatanchej Jehovapi atienekuna. Jehovaqa niwanchej payta kausayninchejpi ñaupajman churajtinchej, necesitasqanchej imasta qonawanchejta (Mat. 6:32, 33). Paytaj chayta nisqanta juntʼanpuni (Deu. 8:4, 15, 16; Sal. 37:25). Jehovaqa pʼisqetustapis tʼikitastapis cuidan. Chayrayku ama llakikunachu imatachus mikhunanchejmanta chayri imatachus churakunanchejmanta (Mat. 6:26-30; Fili. 4:6, 7). Kʼacha tatasqa wawasninkuta munakusqankurayku, paykunaman necesitasqanku imasta qonku. Ajinallatataj Tatanchej Jehovapis, kamachisninman necesitasqanchej imasta qowanchej. Arí, Jehovaqa cuidawasunpuni.

 9. ¿Imatataj uj qhariwarmimanta yachakusunman?

⁹ Jehová Diosqa imastachus necesitasqanchejta qoyta atiwanchejpuni. Chayta sutʼita reparanapaj uj qhariwarmej experienciankumanta parlarina. Paykunaqa precursores jina sirvishanku. Paykunaj autonkoqa maukʼaña karqa. Chaypitaj uj hora kurajta rerqanku hermanasta reunionman pusanankupaj. Chay hermanasqa campo de refugiados nisqapi tiyakorqanku. Hermano nin: “Reunión pasayta hermanasta nerqayku wasiykuman rispa imallatapis mikhurimunaykuta. Jinallapi yuyarikorqayku paykunaman qorinaykupaj ni ima kapuwasqaykuta”, nispa. Chanta, ¿imatá paykuna ruwarqanku? Hermano nillanpuni: “Wasiykuman chayajtiykutaj punkupi iskay jatuchaj bolsas juntʼa mikhuna kashasqa. Mana yacharqaykuchu pichus saqesqanta. Jehovapuni yanapawarqayku”, nispa. Tiemponmantaj chay qhariwarmej autonkoqa fregarpakorqa. Paykunaqa predicacionman rinankupaj autota necesitarqanku. Nitaj qolqenku karqachu arreglachinankupaj. Jinapis mecanicoman aparqanku mashkhamantachus arreglapunankuta yachanankupaj. Chaypi autota qhawaykushajtinkutaj uj runa chayamuspa, “¿pitaj kay autoj dueñon?” nispa nerqa. Hermanotaj nerqa: “Noqaj autoy, arreglachinay kashan”, nispa. Chay runataj kuticherqa: “Mana importanchu, señoray chay jina autota, chay jina colorcitotataj munashan. ¿Mashkhatá mañashanki?”, nispa. Hermanoqa waj autota rantikunanpaj qolqeyojña karqa. Hermano nin: “Chay tardeqa may kusisqapuni kasharqayku. Imajtinchus yacharqayku, Jehová Diospuni yanapawasqaykuta”, nispa.

10. ¿Imaynatá Salmo 37:5 yanapawanchej necesitasqanchej imasmanta mana phutikunapaj?

¹⁰ Jesusta uyarisunchej chay, nitaj necesitasqanchej imasmanta anchata phutikusunchu chayqa, Jehová Dios cuidawasunpuni (Salmo 37:5 leey; 1 Ped. 5:7). Párrafo cincopi wakin problemasmanta parlarerqanchej. Ichapis kunankama Jehovaqa familiamanta tatanejta chayri trabajonchejmanta patronninchejnejta necesitasqanchej imasta qowanchej. Jinapis tata manaña wasiman mikhunata apayta atejtin chayri mana trabajoyoj qhepakojtinchejqa, Jehová Diosqa imaynamantapis necesitasqanchej imasta qowasunpuni. Qhepan parrafospi yachakusun, Jesús imatawanchus mana ruwananchejta niwasqanchejta.

11. Mateo 7:1, 2 nisqanman jina, ¿imata manaña ruwananchejtataj Jesús nerqa, chanta imaraykutaj chayta ruwayta mana atillanchejchu?

¹¹ (Mateo 7:1, 2 leey). Jesusqa yacharqa pantaj runas kasqanchejta, wajkunata qhawaraymantaj yachasqa kasqanchejta. Chayrayku nerqa: “Amaña wajkunata juzgaychejchu”, nispa. Hermanosninchejta mana juzganapaj kallpachakojtinchejpis wakin kutis juzgarqonchejpuni. Chayta reparakuspa, ¿imatá ruwasunman? Jesusta uyarina, amaña wajkunata juzganapajtaj kallpachakuna.

12, 13. ¿Imatataj Jehová astawan qhawan, chanta imatá paymanta yachakusunman?

¹² Jehovamantaqa mayta yachakusunman. Payqa runaspa allin ruwasqasninkuta astawan qhawan. Chayta allinta entiendenapaj rey Davidmanta parlarina. Pay jatun juchaspi urmajtinpis, Jehovaqa allin imasta ruwasqanta qhawarqa. Rey Davidqa Bat-Sebawan puñuykuspa juchallikorqa, qosantapis wañuchicherqa (2 Sam. 11:2-4, 14, 15, 24). Jinamanta mana payllachu llakiypi rikhurerqa, manaqa familianta, warmisnintapis llakiypi rikhurichillarqataj (2 Sam. 12:10, 11). Waj kutipitaj Davidqa mana Jehovapi atienekusqanrayku, Israelpi mashkha soldadoschus kasqanta yachananpaj yupacherqa. Jehovataj kamacherqaña mana chayta ruwananta. Ichapis Davidqa chayta ruwarqa ashkha soldadosninmanta jatunchakusqanrayku, paykuna jarkʼanankupitaj atienekusqanrayku. David chayta ruwasqanrayku 70.000 israelitas wañuchej onqoywan wañorqanku (2 Sam. 24:1-4, 10-15).

¹³ Chay tiempopi kausakusunman karqa chayqa, ichapis Davidta mana allinpaj qhawaspa juzgasunman karqa. Ichá yuyasunman karqa payqa mana Dios khuyakunanpaj jinachu kasqanta. Jehovatajrí mana ajinatachu Davidmanta yuyarqa. Astawanpis payqa qhawarqa tukuy kausayninpi payta kasukusqanta, sonqomantapachataj arrepientekusqanta. Chayrayku mayta juchallikojtinpis perdonarqa. Jehovaqa yacharqa David mayta munakusqanta, allin kajtapunitaj ruwayta munasqanta. Mayta agradecekunchej Jehová allin imasta ruwasqanchejta astawan qhawasqanmanta (1 Rey. 9:4; 1 Cró. 29:10, 17).

14. ¿Imataj wakin hermanosta yanapan mana wajkunata juzganankupaj?

¹⁴ Jehovaqa pantaj runas kajtinchejpis khuyakuwanchej. Noqanchejpis wajkunata pantajtinku khuyakunallataj, allin imasta ruwasqankutataj qhawana. Wajkuna pantajtinkoqa chay rato qhawaranchej, juzgarpanchejtaj. Jinapis Jehová jina ruwajqa tukuywan allinta kausakun imaspichus pantasqankuta yachaspapis. Diamante nisqa valorniyoj rumeqa niraj llosqʼochasqa kashaspa mana kʼachituchu. Jinapis chay diamanteta rejsej runaqa mana ajinatachu qhawan. Astawanpis yachan sumaj llosqʼochasqeta kajtin may kʼachitu kananta. Jehovawan Jesuswanqa runaspa allin ruwasqasninkuta qhawanku. Noqanchejpis paykuna jina wajkunata qhawananchej tiyan.

15. ¿Imaraykutaj wajkunaj kausayninkupi piensariy mana paykunata juzganapaj yanapawanchej?

¹⁵ Wajkunaj allin ruwasqasninkuta qhawaspapis, wakin kutisqa ichá mana khuyarikuspa juzgarpasunman. ¿Imataj yanapawasunman mana chayta ruwanapaj? Piensarisunman imaynatachus kausakusqankupi. Chayta entiendenapajqa Jesusmanta, wajcha viudamanta ima parlarina. Uj pacha Jesusqa templopi kasharqa, rikorqataj uj wajcha viuda iskay pisi valorniyoj qolqesitusta, qolqe churana cajaman churaykusqanta. Jesusqa mana nerqachu: “¿Imajtintaj chay jina pisillata churanri?”, nispa. Astawanpis piensarerqa imajtinchus chay viuda chayllata churasqanpi, imaynachus kausaynin kasqanpipis. Nerqataj tukuy runasmanta astawanraj churasqanta (Luc. 21:1-4).

16. ¿Imatá hermana Veronicamanta yachakunchej?

¹⁶ Hermana Veronicamanta parlarina. Paypa congregacionninpeqa uj hermana sapallan wawanta uywaj. Hermana Verónica nin: “Qhawasqayman jina chay hermanawan wawanwanqa reunionesman, predicacionmanpis faltakullajpuni kanku. Chayrayku paykunamanta mana allintachu yuyarqani. Jinapis uj kuti hermanawan predicaj llojserqani. Paytaj niwarqa wawan umitanmanta malcito kasqanrayku ashkha problemasniyoj kasqanta. Payqa mayta kallpachakorqa wawanman necesitasqan imasta qonanpaj, Jehovamantataj yachachinallanpajpuni. Wakin kutisqa wawan mal churakusqanrayku waj horariopi kaj reunionesman rej. Mana reparajchu kani chay jina llakiypi kasqanta. Kunanqa chay hermanata mayta munakuni, Jehovata sirvinanpaj tukuy atisqanta ruwasqantapis allinpaj qhawani”, nispa. Hermana Veronicaj experiencianqa reparachiwanchej, wajkunaj kausayninku imaynachus kasqanpi piensarinanchej kasqanta.

17. ¿Imatá kamachiwanchej Santiago 2:8 chanta imaynatá chayta kasukusunman?

¹⁷ Uj hermanota juzgashasqanchejta reparakunchej chayqa, yuyarikuna hermanosninchejta munakunanchej kasqanta (Santiago 2:8 leey). Chantapis Jehovamanta mañakushaspa rogakunanchej tiyan mana wajkunata juzganapaj chayri mana qhawaranapaj yanapanawanchejta. Mañakusqanchejman jinataj ruwasunman, noqanchejpuni chay hermanowan ñaupajta parlanapaj kallpachakuspa. Ichapis ajinamanta payta sumajta rejsisun. Chantapis paywan predicaj llojsiyta munasqanchejta nisunman, wasinchejmantaj mikhurinanchejpaj wajyarisunman. Hermanota aswan allinta rejsisqanchejman jinataj, Jehovawan Jesuswan jina, allin ruwasqasninta qhawanapaj kallpachakusunman. Chayta ruwaspaqa Jesús “amaña wajkunata juzgaychejchu” nisqanta kasukushanchej.

18. ¿Imaynamantataj sumaj michejta uyarisqanchejta rikuchinchej?

¹⁸ Ovejasqa michejninkoj parlasqanta uyarinku. Ajinallatataj Jesuspa discipulosninpis payta uyarinchej. Necesitasqanchej imasmanta mana phutikunapaj, nitaj wajkunata juzganapaj kallpachakusun chayqa, Jehovawan Jesuswan bendeciwasun. ‘Juchʼuy tropa ovejasmanta’ chayri ‘waj ovejasmanta’ kajtinchejpis, sumaj michejta uyarinallapuni, kasukunallapunitaj (Luc. 12:32; Juan 10:11, 14, 16). Qhepan yachaqanapeqa ukhuncharisun Jesús iskay imasta ruwananchejta kamachiwasqanchejta.