Aswan valorniyoj imasta maskʼana

1, 2. ¿Imaraykutaj kay mundopi wajchas kanqapuni?

KAY mundopi kausakunapaj qolqeta ganakoyqa mana facilchu. Jovenesqa trabajota mana tarillankuchu. Ashkha runastaj kausayninkuta wañuy pataman churaspa qhapaj suyusman ripunku. Chay qhapaj suyuspipis wajchayayqa kallanpuni. Qhapaj runasqa astawan qhapajyanku, wajcha runastaj astawan wajchayanku. Chantapis wakin runas nisqankuman jina, pachaj runasmantaqa uj runalla aswan qhapaj, chay ujkuna kapuyninkuta tantajtinkupis, mana chay runata atipankumanchu. Ajinapunichus manachus kasqanta mana sutʼita yachanchejchu. Jinapis may chhika runas wajchaspuni kanku, wakin runastajrí may qhapaj kasqankurayku, allchisninkojpa allchisninkoj wawasninkuta uywanankupaj qolqenku alcansanmanraj. Jesustaj chaymanta llakikorqa, chayrayku nerqa: “Wajchasqa qankunallawanpuni kanqanku”, nispa (Mar. 14:7). ¿Imaraykutaj wakin wajchasllapuni kanku wakintaj qhapaj?

² Jesús yacharqa Diospa Gobiernollanpi ni pipis wajcha kananta. Bibliapi ‘ranqherosmanta’ parlaspa kay mundopi kaj negociosmanta parlashan (Apo. 18:3). Kay mundopi kaj jatuchaj negocios, políticos, llulla religionpis Kuraj Supaypa mundonmanta kanku. Diospa kamachisnenqa mana politicaman satʼikunkuchu, nitaj llulla religionmanpis satʼikunkuchu. Jinapis ashkhasqa jatuchaj negociosmanta mana tʼaqakuyta atillankuchu.

 3. ¿Ima tapuykunamantaj kutichisunchej?

³ Noqanchejqa qhawarikunanchej tiyan, ama negociosta ruwaspa musphaykachanapaj. Chayrayku tapurikuna: “¿Imaynatá kapuyniyta apaykachayman Jehová Diosman astawan qayllaykunaypaj? ¿Imatataj ruwayman mana negocioswan musphaykachanaypaj? ¿Pikunamantá yachakuyman Jehová Diosllapipuni atienekunaypaj?”, nispa.

4, 5. 1) ¿Ima llakiypitaj uj mayordomo rikukorqa? 2) ¿Imatataj Jesús yachachisqasninman yuyaycharqa?

⁴ (Lucas 16:1-9 leey). Uj kuti Jesusqa mana allin mayordomomanta parlarqa. Chay mayordomoqa trabajonmanta wijchʼuchikunanpajña kasharqa, patronninpa qolqenta usuchisqanmanta chʼataykusqankurayku.a Chayrayku chay mayordomoqa sumajta yuyaychakuspa, amigosta ruwakorqa trabajonmanta wijchʼuchikojtin pikunachus payta yanapayta atinkuman karqa, chaykunawan. Jesús chay mayordomomanta parlaspa, mana yachachisqasninman nisharqachu kausakunankupaj pitapis chʼaukiyanankuta. Astawanpis nerqa “kay mundomanta” runaslla mana allin kajta ruwasqankuta. Jesuspa rijchʼanachinanmanta mayta yachakusunman.

⁵ Chay mayordomoqa llakiypi rikukorqa. Jesustaj yacharqa paypa yachachisqasninpis ajina llakiypi rikukunankuta, kay mundopi mana qolqeta ganakuyta atikusqanrayku. Chayraykutaj kayta yuyaycharerqa: “Amigosta maskʼakuychej kay mundoj qhapaj kapuyninwan”, nispa. Ajinamanta chay kapuyninku tukukapojtin Jehovawan Jesuswanqa “wiñay tiyakuna cheqasman” paykunata wajyarinman karqa. Qhawarina imatachus Jesuspa nisqanmanta yachakusqanchejta.

 6. Astawan ganayta munaspa negociosta ruway, ¿Diospa munayninman jinachu?

⁶ Biblia sutʼinchasqanman jina, runas astawan ganayta munaspalla negociosta ruwanankoqa, mana Diospa munayninman jinachu. Chayrayku Jehovaqa Edén huertapi Adanman Evamanwan mana michʼakuspa tukuy imata qorqa (Gén. 2:15, 16). Chantapis Jehová Dios ñaupa cristianosman atiyninta qoshajtin, mana “mayqenninkupis nejchu kapuynenqa paypallata kasqanta, mana chayqa tukuy imasninku tukuyninkupaj karqa” (Hech. 4:32). Chantapis profeta Isaías nerqa, aswan qhepaman tukuypis jallpʼaj poqoyninta mikhunanchejta (Isa. 25:6-9; 65:21, 22). Chay tiempo chayamunankamaqa, Jesuspa yachachisqasnenqa Jehová Diosta kusichinanpaj jina, “sumaj yuyaywan” kay mundopi ima trabajotapis maskʼakunanku kanqa.

 7. ¿Imatataj Lucas 16:10-13 versiculosmanta yachakunchej?

⁷ (Lucas 16:10-13 leey). Jesús rijchʼanachinanpi nisqanman jina, chay mayordomoqa allinninta munaspalla amigosta maskʼarqa. Chaywanpis Jesusqa yachachisqasninman nerqa, paywan Tatanwanpis tukuy sonqo amigosta ruwakunankuta, manataj allinnillankuta maskʼaspachu. Chantapis sutʼincharqa “kay mundoj qhapaj” kapuyninta imaynatachus apaykachasqanchejqa, Diosta sirviyta munasqanchejtachus manachus rikuchisqanta.

8, 9. ¿Imaynatá wakin hermanos kapuyninkuta apaykachanku?

⁸ Jesusqa Diospa Gobiernonmanta jallpʼantinpi predicakunanta nerqa. Kapuwasqanchejmanta qospataj chaypaj yanapakunchej, Jehovata sirviyta munasqanchejtataj rikuchinchej (Mat. 24:14). Ashkha hermanosninchej chayta ruwanku. India suyumanta uj imillita, uj cajitapi qolqesitunta waqaycharqa. Chayta ruwananpaj juguetestapis manaña rantikorqachu. Cajitan juntʼaykojtintaj, astawan predicakunallanpajpuni chay qolqesitunwan yanapakorqa. Chay suyullamantataj uj hermano coco plantasniyoj. Malayálam parlayman tijrachej oficinasmantaj ashkha cocosta apan. Ajinamanta manaña rantinankupaj. Chaytaj rikuchin, kapuyninta sumaj yuyaywan apaykachasqanta. Ajinallatataj Grecia suyumanta hermanos, olivomanta aceiteta, quesota, waj imastawan Betelpi trabajajkunapaj apanku.

⁹ Sri Lanka suyumanta uj hermano, waj ladoman tiyakoj riporqa. Suyunpi wasiyoj, jallpʼasniyoj ima kasqanrayku, hermanos chaypi tantakunankuta, precursorespis alojakunankuta saqellan. Ajinamanta wajcha hermanosta yanapan, wasinta allinta japʼinanpaj qolqenta gastanan kajtinpis. Wakin lugarespitaj, maykunapichus gobiernos mana predicajta saqewanchejchu chaykunapi, wakin hermanos wasisninkuta mañanku chaypi tantakuykuna ruwakunanpaj. Ajinamanta pisi qolqeyoj precursores, publicadores ima alquilerta mana pagaspalla tantakunku.

10. ¿Imaynatá kapuyninchejmanta qoy yanapawanchej?

¹⁰ Chay hermanosqa kapuyninkuta allinta apaykachaspa pisi imaspi allinta ruwanku (Luc. 16:10). Paykunaqa kapuyninkuwan wajkunata yanapanku. Chayta ruwaspaqa may kusisqa kanku, imaraykuchus yachanku kapuyninkumanta qospa cheqamanta Diospa ñaupaqenpi qhapaj kasqankuta (Luc. 16:11). Uj hermanaqa Diospa Gobiernonmanta willay ñaupajllamanpuni rinanpaj qolqesitunwan yanapakunpuni. Chay ruwasqantaj payta ashkha imaspi yanapan. Pay nin: “Kapuyniymanta astawan qosqayrayku, astawan perdonayta atini, astawan pacienciakuyta atini, yuyaychaykunatapis japʼikuyta atillani”, nispa. Wakin hermanospis ninku kapuyninkumanta qosqanku, paykunata mayta yanapasqanta (Sal. 112:5; Pro. 22:9).

11. 1) ¿Imaynatá kapuyninchejta sumaj yuyaywan apaykachasunman? 2) ¿Imaynatá mundontinmanta hermanosninchej yanapakushanku? (7 paginapi dibujota qhawariy).

¹¹ Kapuyninchejwan wajkunata yanapaspaqa, sumaj yuyayniyoj kasqanchejta rikuchinchej. Wakin hermanosqa qhapaj kanku, jinapis mana atinkuchu precursores jina llankʼayta, chayri waj llajtaman predicaj ripuyta. Ajinapis paykunaqa sonqo juntʼasqa kanku wajkunata qolqenkuwan yanaparikuspa (Pro. 19:17). Qolqesitunchejmanta churaspaqa, publicacionesta ruwakunallanpajpuni, tukuy lugaresmantaj apachikunallanpajpuni yanapakunchej. Chantá yanapakullanchejtaj wajcha lugarespi runas Diosmanta yachakunankupaj. Congo, Madagascar, Ruanda suyuspeqa, hermanos Bibliata rantikunankupaj, uj semanata chayri uj killata llankʼananku karqa. Chayrayku wakin kuteqa ganasqankuwan mikhunata rantinankutachus chayri Bibliata rantinankutachus ajllananku karqa. Paykunaqa watasta ajina kasharqanku. Jinapis mundontinpi hermanosninchej qolqenkuwan yanapakusqankurayku, Diospa llajtanqa chay lugarespi tiyakoj hermanospaj, familiasninkupaj, Bibliamanta yachakojkunapajpis parlayninkupi Bibliata orqhorqa, ‘paykunaman mana pisinanpaj’ (2 Corintios 8:13-15 leey). Ajinamanta, kapuyninkuwan yanapakojkuna, yanapachikojkunapis Jehovaman astawan qayllaykuyta atinku.

12. ¿Imatataj Abrahán Jehovapi atienekusqanrayku ruwarqa?

¹² Jehovawan amigosllapuni kanapaj, ama qhapajyayta munaspa negocioswan musphaykachanachu. Astawanqa tukuy atisqanchejta ruwana, Diospa ñaupaqenpi aswan valorniyoj imasta tarinapaj. Chaytataj Abrahán ruwarqa, payqa unay tiempopi Diospa kamachin karqa. Jehová Diospa amigon kayta munasqanraykutaj, payta kasukuspa qhapaj Ur llajtamanta llojsiporqa, toldospi tiyakunanpaj (Heb. 11:8-10). Abrahanqa Jehovapi astawan atienekorqa, manataj kapuyninpichu (Gén. 14:22, 23). Tiemponmantaj Jesusqa uj qhapaj jovenman, Abrahán jina Diospi atienekunanpaj kayta nerqa: “Sichus Diosta allintapuni yupaychayta munanki chayqa, tukuy kapuyniykita vendemuspa, wajchasman chay qolqeta qopuy. Ajinamanta cielopi may kapuyniyoj kanki, chantá qhepayta jamuy”, nispa (Mat. 19:21). Chay jovenqa mana Abrahán jinachu Diospi atienekorqa. Jinapis wakin runasqa Jehová Diospi tukuy sonqo atienekorqanku.

13. 1) ¿Imatataj apóstol Pablo Timoteoman yuyaycharqa? 2) ¿Imaynatá apóstol Pabloj yuyaychasqanta kasukusunman?

¹³ Timoteopis Jehová Diospi atienekuspa creeyninta rikucherqa. Apóstol Pabloqa Timoteomanta nerqa “Cristo Jesuspa sumaj soldadon” kasqanta. Chantá nillarqataj: “Ni mayqen runapis, soldado kashaspa waj ruwanasman satʼikunchu. Imaraykuchus payqa, pichus soldado kananpaj churarqa, chayta kusichiyta munan”, nispa (2 Tim. 2:3, 4). Kay tiempomanta Diospa kamachisninpis, chay versículos nisqanman jinallataj ruwanku. Chaykunamanta uj millonmanta astawan precursores jina sirvishanku. Cristianosqa propagandaswan, kay sajra mundoj imasninwanpis mana aysachikunankupaj kallpachakunku. Paykunaqa yachanku “pichus manukojqa manojpa wata runan” kasqanta (Pro. 22:7). Diabloqa munan qhapajyayta munaspa negocioswan musphaykachananchejta. Wakinkunaqa chaypi urmaspa, qolqeta manukunku wasita chayrí autota rantikunankupaj, wakintaj universidadpi estudianankupaj, chayrí casarakuypi jatun fiestata ruwanankupaj. Mana allinta yuyaycharikuspa manuchaykukullasun chayqa, watasta manullapuni kasun. Sumaj yuyayniyoj kasun chayrí, pisi imasllawan kausakuyta atisunchej, mana manuchakusunchu, nitaj qolqetapis wayrachisunchu. Ajinamanta Jehová Diosta sirviypi tukuy tiemponchejta churasun, nitaj qolqeta maskʼaypichu (1 Tim. 6:10).

14. ¿Imatataj Diospa Gobiernonrayku wakin hermanos ruwarqanku?

¹⁴ Pisi imasllawan kausakuyta munanchej chayqa, aswan allin kajta ñaupajman churananchej tiyan. Uj qhariwarmeqa negocionkupi sumajta ganasharqanku. Jinapis paykunaqa watejmanta precursores jina llankʼayta munarqanku. Chayrayku negocionkuta, waj imasninkutawan vendeporqanku. Chantá Estados Unidospi Warwick llajtapi centralninchejta ruwaysikoj rerqanku. Chaypitaj qharej tatasninwan ashkha semanasta trabajarqanku, jinallataj warmi wawanwan tolqanwanpis. Chaymantataj may kusisqa kasharqanku. Estados Unidospi Colorado llajtapi uj precursoraqa, khuskan diallapaj bancopi uj trabajota tarikorqa. Patronesninkutaj trabajonwan may kusisqa kasharqanku, chayraykutaj diantinta trabajananpaj, astawantaj ganananpaj, aswan sumaj trabajota qonankuta nerqanku. Jinapis chay hermanitaqa mana chay trabajota japʼikorqachu. Imaraykuchus japʼikunman karqa chayqa, manaña predicananpaj tiempon kanmanchu karqa. Mundontinpi ashkha hermanosninchej paykuna jinallataj ruwanku. Diospa Gobiernonta ñaupajllamanpuni churaspaqa, Jehová Dioswan amigosllapuni kayta munasqanchejta rikuchinchej, manataj kay mundopi qhapajyayta munasqanchejtachu.

15. ¿Imata ruwaytaj astawan kusichiwanchej?

¹⁵ Ashkha kapuyniyoj kayqa mana yanapawanchejchu Dios allin ñawiwan qhawanawanchejpaj. Imaraykuchus Jehová Diosqa ‘allin ruwanaspi qhapaj kajkunata’ bendecin (1 Timoteo 6:17-19 leey). Lucia hermanamanta parlarina, payqa Italiamanta.b Payqa uyarisqa, Albaniamanta hermanos predicacionpi yanapata necesitasqankuta. Chayrayku 1993 watapi Albaniaman yanapaysikoj riporqa. Kausakunanpaj mana qolqeyoj kajtinpis Jehová Diospi atienekorqa. Payqa albanés parlayta yachakorqa, sojta chunkamanta astawan runasta bautizakunankupaj yanaparqa. Ichapis noqanchejqa mana chay hermanita jina ashkha runasta yanapashanchejchu. Jinapis runas cheqan ñanta tarinankupaj imaynamantapis yanapakusqanchejqa, may valorniyoj paykunapaj, noqanchejpajpis (Mat. 6:20).

16. 1) ¿Imataj kanqa tukuy laya negociosmanta? 2) Kay mundoj kapuynin tukukapunanta yachaspa, ¿imaynatá kapuyninchejta apaykachana tiyan?

¹⁶ Jesusqa mana nerqachu kay mundoj qhapaj kapuynin ichapis tukukapunanta, manaqa tukukapunantapuni nerqa (Luc. 16:9). Kay watasllapi wakin bancosqa quiebraman yaykunku, wakin suyuspitaj qolqeqa manaña imapajpis alcansanchu. Pisimantawanqa kay sajra mundopi, tukuy laya negocios, política, llulla religionpis chinkachisqa kanqa. Chantá runaspa qolqenku, qorinkupis manaña valenqachu, watastaña chayta negociosta ruwanankupaj apaykachajtinkupis. Chaykunatataj profeta Ezequiel, Sofonías ima ñaupajmantaña willarqanku (Eze. 7:19; Sof. 1:18). Tukuy kausayninchejpi Dioswan amigos kayta maskʼananchejmanta, qhapajyayllata maskʼasunman chayqa, wañuy patapi kashaspa mayta pesachikusunchej, tukuy ima ruwasqanchej qhasi manakajlla kasqanta reparaspa. Chaytaj kanman tukuy kausayninchejpi jumpʼi suruyta trabajasqanchejmanta, falso qolqeta japʼiy jina (Pro. 18:11). Kay sajra mundoj kapuynenqa tukukaponqapuni. Chayrayku kapuwasqanchej imasta allinta apaykachana, Jehovawan Jesuswanpis sumaj amigos kananchejpaj. Diospa Gobiernonrayku imata ruwasqanchejpis, Jehovawan amigosllapuni kanapaj yanapawasunchej.

17, 18. ¿Ima suyakuytaj kan Diospa amigosninpaj?

¹⁷ Diospa Gobiernon kay jallpʼata kamachishajtin manaña alquileresta paganachu kanqa, nitaj manuyojchu kasunchej. Chantapis manaña doctores kanqachu, ni jampistapis necesitasunchu. Tukuypaj sumaj mikhunas kanqa. Manaña pipis qorita, qolqeta, ni waj valorniyoj rumistapis rantispa tantanqachu. Chaykunataqa apaykachasunchej kʼachanchakunallapaj, manataj qhapajyanapajchu. Sapa uj kʼachitu wasista ruwakusunchej, sumaj maderamanta, sumaj rumimanta, sumaj fierromantawan. Amigosninchejtaj tukuy sonqo yanapawasunchej, manataj pagoraykuchu. Kay jallpʼaj poqoynintataj tukuyninchej mikhusunchej.

¹⁸ Jehovawan Jesuswanpis amigos kasunchej chayqa, tʼukuna imastapuni japʼisunchej. Jehová Diospa kamachisnenqa may kusiywan Jesusta uyarenqanku, kayta nimojta: “Jamuychej, Tataypa bendecisqasnin, herenciata jina japʼiychej kay mundoj qallariyninmantapacha qankunapaj wakichisqa Gobiernota”, nispa (Mat. 25:34).