Juan Bautista ñanta allinchan

Jesús 12 watasniyoj kashaspa yachachejkunata templopi tapurisqanmanta, 17 watasña pasarqa. Chaypachaqa 29 watamanta abril killa tukukuyña kasharqa. Juanqa Diospa nisqasninta willarasharqa, Jordán mayoj inti yaykuy ladonpi tukuy llajtasman. Payqa Jesuspa familian karqa. Runasrí Juanmanta mayta parlasharqanku.

Juanpa parlasqanqa runasta tʼukuchej, rijchʼayninpis uj jina karqa. Payqa camello millmamanta ropayoj karqa, qara chumpiwan chumpiykusqataj purej. Chantapis langostasta mikhoj, lachiwana miskʼita ima. Payqa runasman nisharqa: “Juchasniykichejmanta pesachikuychej, imaraykuchus cielopi kaj Gobiernoqa qayllapiña kashan”, nispa (Mateo 3:2).

Juanpa willasqanqa runaspa sonqonkuman chayarqa. Paykunaqa Juanman rerqanku “Jerusalenmanta, tukuy Judeamanta, Jordán mayoj tukuy muyuyninmantawan” (Mateo 3:5). Ashkhas reparakorqanku Diospa Leyninta mana kasukusqankuta, juchasninkumantataj pesachikunanku kasqanta. Chaytarí sajra ruwasqasninkuta saqepuspa rikuchinanku karqa. Ajinata pesachikojkunata, Juanqa Jordán mayupi bautizarqa. Ajinamanta sutʼi karqa, chay runas juchasninkumanta pesachikusqanku (Hechos 19:4).

Jinapis Juanqa mana tukuytachu bautizarqa. Ashkha fariseosta, saduceostawan bautizachikunankupaj jamojta rikuspa, paykunata “katari uñas” nispa nerqa. Chantá paykunaman nillarqataj: “Juchasniykichejmanta pesachikusqaykichejta, sutʼita rikuchiychej ruwasqaykichejwan. Amataj sonqoykichejpi nillaychejpischu ‘tataykoqa Abrahán’ nispaqa. Sutʼita niykichej, Diosqa kay rumismanta Abrahanpaj wawasta rikhurichiyta atin. Hachaqa wakichisqaña kashan sachʼasta saphinmanta kʼutunanpaj, chayrayku mana allinta poqoj sachʼaqa kʼutusqa kanqa, ninamantaj wijchʼuykusqa” (Mateo 3:7-10).

Runasqa Juanmanta mayta parlasharqanku. Willasqanqa runasta tʼukuchej, ashkhastaj paywan bautizachikusharqanku. Chayrayku judiosqa, sacerdotesta, levitastawan Juanta tapumunankupaj kacharqanku. Chay kachastaj Juanta taporqanku: “¿Pitaj qan kanki?”, nispa.

Juantaj nerqa: “Mana Cristochu kani”, nispa.

Paykunaqa ujtawan tapullarqankutaj: “Chantá, ¿pitaj kanki? ¿Eliaschu?”, nispa.

Juantaj “mana Eliaschu kani” nerqa.

Ujtawanpis tapullarqankutaj: “¿Jamunan karqa chay Profetachu kanki?”, nispa. Paykunaqa parlasharqanku, Moisés parlarqa chay profetamanta (Deuteronomio 18:15, 18).

Juantaj “mana” nispa nerqa.

Chantá tapullarqankutaj: “¿Pitaj kankiri? Niwayku ari, kachamuwayku chaykunaman willanaykupaj. ¿Imatataj ninki qanmanta?”, nispa. Juantaj profeta Isaiaspa nisqanman jina kuticherqa: “Noqa kani chʼinnejpi qhaparej: ‘Jehová Diospa ñanninta cheqanyachiychej’, nispa” (Juan 1:19-23).

Chay kachasqa, Juanta tapullarqankutaj: “Sichus mana Cristochu kanki, nitaj Eliaschu, nillataj jamunan karqa chay Profetachu chayqa, ¿imaraykutaj chanta bautizankiri?”, nispa. Juantaj kuticherqa: “Noqaqa yakupi bautizani. Qankuna ukhupitajrí uj runa kashan, paytaqa mana rejsinkichejchu. Payqa qhepayta jamushan”, nispa (Juan 1:25-27).

Juanqa ñanta allinchananpaj kachamusqa kasqanta nerqa. ¿Imaynatá chayta ruwarqa? Payqa runaspa sonqonkuta wakicherqa, Mesiasta tukuy sonqo japʼikunankupaj, pichus Rey kanan karqa, chayta. Juanqa Mesiasmanta nerqa: “Qhepayta jamojrí noqamanta aswan atiyniyoj, manataj jukʼutasnillantapis lluchʼunaypaj jinachu kani”, nispa (Mateo 3:11). Chantá sutʼincharqa: “Qhepayta jamojqa ñaupariwarqa, payqa noqamanta ñaupajtaña karqa”, nispa (Juan 1:15).

Chayrayku Juanqa runasman nisharqa: “Juchasniykichejmanta pesachikuychej, imaraykuchus cielopi kaj Gobiernoqa qayllapiña kashan”, nispa (Mateo 3:2). Ajinata willaspa, Juanqa runasta reparachisharqa Jehová Diospa ajllakusqan Reyqa chayamushasqantaña. Chay Reytajrí Jesucristo.