Jesuspa yachachisqanta uyarispa phiñakunku

Jesusqa tʼantawan milagrota ruwaspa ashkha runasman mikhucherqa. Capernaum llajtapitaj, paykunaman willarqa cielomanta uraykamoj tʼanta kasqanta. Capernaummanta sinagogapipis, chayllatataj yachacherqa.

Jesús nerqa: “Ñaupa tatasniykichejqa chʼinnejpi maná nisqata mikhorqanku, chaywanpis wañorqanku. Cielomanta uraykamoj tʼantata mikhojrí, mana wañonqachu. Noqaqa cielomanta uraykamoj kausayta qoj tʼanta kani, kay tʼantamanta mikhojrí wiñaypaj kausanqa. Chay tʼantaqa aychay, chaytataj qosaj kay mundomanta runas kausanankupaj”, nispa (Juan 6:48-51).

Jesusqa 30 watamanta Pascua fiestapi Nicodemoman nerqa, Diosqa maytapuni runasta munakusqanrayku, kʼata Wawanta paykunata salvananpaj kachamusqanta. Capernaummanta sinagogapitaj, Jesusqa nerqa aychanta mikhunankuta, yawarnintapis ujyanankuta. Chayta nispaqa wañuyninpi creena kasqanmanta parlasharqa.

Runastajrí chayta uyarispa phiñakorqanku, ninakorqankutaj: “¿Imaynatataj kay runa aychanta qowasunman mikhunanchejpajri?”, nispa (Juan 6:52). Jesusqa munarqa entiendenankuta mana aychanmantapunichu, nitaj yawarninmantapunichu parlashasqanta. Chayrayku chayta astawan sutʼincharqa.

Pay nerqa: “Manachus noqaj aychayta mikhunkichej, nitaj yawarniytapis ujyankichej chayqa, mana kausayta japʼinkichejchu. Pichus aychayta mikhun, yawarniytataj ujyan chayqa, wiñay kausayta japʼenqa [...]. Aychaymin aswan sumaj mikhuna, waj mikhunamanta nisqaqa, yawarniypis aswan sumaj ujyana, waj ujyanamanta nisqaqa. Sichus pipis aychayta mikhun, yawarniytataj ujyan chayqa, noqawan uj yuyaylla kashan”, nispa (Juan 6:53-56).

Judiostajrí chayta uyarispa maytachá phiñakorqanku. Ichá yuyarqanku Jesús aychantapuni mikhunankuta, yawarnintapuni tomanankuta nishasqanta. Diospa Leynintaj yawarta tomayta, mikhuyta ima juchachaj (Génesis 9:4; Levítico 17:10, 11). Jinapis Jesusqa mana chaymantapunichu parlasharqa. Astawanpis pay nisharqa, pillapis wiñay kausayta japʼinanpajqa wañuyninpi creenan kasqanta. Payqa mana juchayoj cuerponta tukuy runasrayku qonan karqa. Jinapis mana tukuy yachachisqasninchu chayta entienderqanku. Chayrayku wakenqa nerqanku: “¡Imatataj parlashanri! ¿Pitaj chayta uyarinmanri?”, nispa (Juan 6:60).

Jesustajrí chayta reparaspa nerqa: “¿Chay nisqaychu phiñachishasunkichej? Maypichus noqa ñaupajta kasharqani chayman wicharishajta rikuwankichejman chayqa, imanakuwajchejchus. [...] Qankunaman parlarqaykichej chay nisqasneyqa Diospa atiyninman jina kashan, kausaytataj qon. Qankunamanta wakintajrí mana creenkichejchu”, nispa. Ashkha yachachisqasnintaj, chayta uyarispa riporqanku (Juan 6:61-64).

Chayrayku Jesusqa 12 apostolesninta taporqa: “¿Qankunapis ripullaytatajchu munankichej?”, nispa. Pedrotaj kuticherqa: “Señor, ¿pimantaj ripusqaykuri? Qanpa nisqasnillayki wiñay kausayman pusan. Noqaykoqa creeyku, yachaykutaj qanqa Diospa kachamusqanpuni kasqaykita”, nispa (Juan 6:67-69). Pedrowan, waj apostoleswanqa, Jesuspa yachachisqanta mana allintarajchu entiendespapis, mana saqerparerqankuchu.

Jesusqa Pedrota uyariytawan kusikuspa nerqa: “Noqa ajllarqaykichej chunka iskayniyojta, ¿icharí? Ujniykichejtajrí supay kashan”, nispa (Juan 6:70). Jesusqa “supay” nispa Judas Iscariotemanta parlasharqa. Payqa ichapis repararqaña Judas sonqonpi sajra imasta munapayashasqanta.

Jinapis Jesusqa kusisqa kasharqa Pedrowan waj apostoleswan mana saqerparisqankumanta. Paykunaqa mana iskayrayaspa Jesuswan khuska yachachillarqankupuni.