Jerusalenman rishaspa yachachin

Jesuspa willasqantaqa, Judeamanta ashkha runas mana japʼikorqankuchu. Astawanpis, Samarikuna Pʼunchaypi milagrota ruwasqanrayku ‘Jesusta wañuchiyta munarqanku’ (Juan 5:18; 7:1). Galileamanta runastajrí, Jesuspa willasqanta japʼikorqanku. Chayrayku Jesusqa chaypi astawan willarqa.

Jesús Galileapi willashajtenqa 32 watamanta septiembre, octubre killa karqa, Chʼujllas fiestataj qayllapiña kasharqa. Chay fiestataqa qanchis diasta ruwaj kanku, pusaj kaj diapitaj tukuyninku Diosta yupaychanankupaj tantakoj kanku. Chaytataj ruwaj kanku sapa wata cosechata oqharina tiempo tukukuyta. Chay fiestapitaj judiosqa cosechata oqharisqankumanta Diosman agradecekoj kanku.

Chay fiesta qayllata, Jesuspa hermanosnin Santiago, Simón, José, Judas ima payta nerqanku: “Judeaman riy. [...] Pillapis tukuywan rejsichikuyta munaspaqa, mana imatapis pakaypi ruwanchu. Chay imasta ruwanki chayqa, tukuy runaj rikunanta ruwamuy ari”, nispa (Juan 7:3, 4). Jerusalenpeqa ashkha runas rikunkuman karqa milagrosta ruwasqanta. Imajtinchus chaypeqa watapi kinsa kutita fiestata ruwaj kanku.

Jesuspa hermanosnenqa mana creerqankuchu pay Mesías kasqanpi. Jinapis munarqanku fiestaman rej runas, milagrosninta rikunankuta. Jesusqa yacharqa chay mana allinchu kasqanta. Chayrayku hermanosninman nerqa: “Kay mundomanta runasqa ni imamanta chejnisunkichejmanchu, noqatataj chejniwanku paykunaj ruwasqasninku sajra kasqanta sutʼinchasqayrayku. Qankuna chay fiestaman riychej, noqaqa manaraj chay fiestaman risajchu, imaraykuchus horayqa manaraj chayamunchu”, nispa (Juan 7:5-8).

Chantá hermanosnenqa ashkha runaswan Jordán mayunta Jerusalenman rerqanku. Jesuspis yachachisqasninwan pakayllamanta Samarianta rerqa. Chaypitaj alojakuyta munarqa. Chayrayku wakin yachachisqasninta ñauparicherqa, Samariaj ujnin ranchonman yaykuspa alojamientota maskʼamunankupaj. Chaypitaj mana Jesusta wajyarikuyta munarqankuchu, Jerusalenman rinantapuni yachasqankurayku. Chayrayku Santiago, Juan ima Jesusta nerqanku: “Señor, ¿munawajchu cielomanta ninata mañakunaykuta uraykamuspa paykunata qʼolarparinanpaj?”, nispa (Lucas 9:54). Jesustaj paykunata kʼamerqa, Jerusalenmantaj rillarqankupuni.

Ñanpitaj leymanta yachachej runa Jesusta nerqa: “Yachachejníy, qhepaykita risaj maymanchá rinki, chayman”, nispa. Jesustajrí nerqa: “Atojkunaqa juskʼuspi wasiyoj kanku, pʼisqospis thapayoj kanku, noqajtarí ni imay kanchu samarikunallaypajpis”, nispa (Mateo 8:19, 20). Jesusqa chaywan nisharqa, yachachisqan kayqa mana atikullasqanta. Chay runatajrí, ichapis jatunchakusqanrayku mana Jesuspa qhepanta rerqachu. Noqanchejrí mana chay runa jina kayta munanchejchu, manachayqa ima kajtinpis tukuy sonqo Jesuspa qhepanta riyta munanchej.

Chantá Jesusqa ñanpi waj runamanñataj nerqa: “Qhepayta jamuy”, nispa. Chay runataj nerqa: “Señor, ñaupajtaqa tataytaraj pʼampaykamusaj ari”, nispa. Jesustaj yacharqa chay runaj kausayninmanta. Chayrayku nerqa: “Saqey wañusqas wañusqasninkuta pʼampanankuta, qantajrí rispa tukuynejpi Diospa Gobiernonmanta willamuy”, nispa (Lucas 9:59, 60). Arí, chay runaj tatanqa kausashallarqaraj. Wañupunmanñachus karqa chayqa, nichá chay runa Jesuswan parlashanmanchu karqa. Chay runaqa Diospa Gobiernonta ñaupajman churananpaj mana wakichisqachu kasharqa.

Jerusalenman rishajtinku, waj runañataj Jesusta nerqa: “Señor, qhepaykita risaj. Ñaupajtaqa wasiypi kajkunamanraj ripushasqayta willamusaj”, nispa. Jesustaj nerqa: “Pillapis llankʼay patapi aradoj manceranta japʼispaña qhepata qhawajqa, mana Diospa Gobiernonpaj jinachu”, nispa (Lucas 9:61, 62).

Jesús nerqa jinapuni, wakawan llankʼajqa cheqanta surkʼananpaj mana qhepata qhawananchu tiyan. Qhepata qhawaytapuni munan chaytaj, wakasta sayachinan tiyan. Chayta ruwaspataj mana llankʼayta tukonqachu. Diosta sirviypis ajinallataj. Saqesqanchej imasllapi yuyasun chayqa, qhepatapis qhawashasunman jina kanqa, manataj Diosta yupaychaypi ñauparisunchu. Chantapis Diosmanta karunchakusunman. Chayrayku Jesuspa yachachisqan kanapajqa, Diospa Gobiernontaraj ñaupajman churana tiyan.