¿Abrahanchu tatanku karqa chayri Diablochu?

Jesusqa Jerusalenpi Chʼujllas fiestapi Diosmanta yachachillarqapuni. Chaypitaj wakin judíos nerqanku: “Abrahanpa mirayninmanta kayku, manataj jaykʼajpis ni pejpa esclavosninchu karqayku”, nispa. Jesustaj nerqa: “Yachani Abrahanpa mirayninmanta kasqaykichejta, chaywanpis wañuchiyta munashawankichej nisqasniyta sonqoykichejpi mana japʼikusqaykichejrayku. Noqaqa Tataywan kashaspa imastachus rikusqayta parlani, qankunatajrí ruwankichej imastachus tataykichejmanta uyarisqallaykichejta”, nispa (Juan 8:33, 37, 38).

Jesús nerqa jinapuni, paywan judioswanqa mana uj tatayojllachu karqanku. Jinapis judiosqa, chayta mana entiendespa ujtawan nillarqankutaj: “Noqaykoj tataykoqa Abrahán”, nispa (Juan 8:39; Isaías 41:8). Judiosqa Abrahanpa mirayninmantapuni karqanku. Chayrayku paykunaqa yuyarqanku, Diospa amigon Abrahán jina creeyniyoj kasqankuta.

Jesustajrí paykunata nerqa: “Abrahanpa wawasnin kaspaqa, Abrahán jinachá ruwashawajchej”, nispa. Chaytaj ajinapuni, imajtinchus uj wawaqa tatan jina imatapis ruwan. Judiostajrí mana Abrahán jinachu ruwasharqanku. Chayrayku Jesús nerqa: “Qankunaqa wañuchiyta munashawankichej cheqa kajta qankunaman willashajtiy, mayqentachus Diosmanta uyarerqani, chayta. Abrahanqa ni jaykʼaj chayta ruwanmanchu karqa”, nispa. Chantá Jesús nillarqataj: “Qankunaqa tataykichejpa ruwasqasninta ruwashankichej”, nispa (Juan 8:39-41).

Judiosqa manapuni entienderqankuchu Jesuspa nisqanta. Chayrayku nerqanku: “Noqaykoqa uj Tatayojlla kayku, chaytaj Dios, manataj kʼipa wawaschu kayku”, nispa. Jesustajrí nerqa: “Dioschus Tataykichej kanman chayqa, noqata munakuwankichejman. Noqaqa Diosmanta kayman jamuni, Pay kachamuwasqanrayku, manataj sapallaymantachu jamuni. Qankunaqa mana yachachisqayta japʼikuyta munankichejchu, chayrayku parlasqayta mana entiendeyta atinkichejchu”, nispa (Juan 8:41-43).

Jesusqa judiosman entiendechiyta munarqa, paypi mana creejkunaqa Diabloj wawasnin kasqankuta. Judíos mana entiendejtinkutaj nerqa: “Qankunaj tataykichejqa Kuraj Supay, chay tataykichejpa munaynintataj ruwayta munankichej. Payqa qallariymantapacha runa wañuchi karqa, manataj cheqa kajpi sinchʼita sayarqachu”, nispa. Chantá nillarqataj: “Diospa wawasnenqa, Diospa nisqasninta uyarinku. Qankunatajrí mana uyariyta munankichejchu, imaraykuchus mana Diospa wawasninchu kankichej”, nispa (Juan 8:44, 47).

Judiostajrí chayta uyarispa mayta phiñarikorqanku, nerqankutaj: “Allillanta nishayku, ‘qanqa samaritano, supayniyojtaj kanki’ nispaqa”. Paykunaqa Jesusta “samaritano” nispa, chejnikusqankuta rikuchisharqanku. Jesustaj chayta mana kasuspa nerqa: “Mana supayniyojchu kani, noqaqa Tatayta jatunchani, qankunatajrí pisipaj qhawawankichej”, nispa. Chantá Jesusqa judiosman nerqa imatachus nisqanku chayri ruwasqanku, allinpaj chayri mana allinpaj kayta atisqanta. Pay nerqa: “Cheqatapuni niykichej: Pichus nisqayta kasojqa, ni jaykʼaj wañonqachu”, nispa. Jesús chayta nispaqa, mana nisharqachu apostolesnin, waj yachachisqasninpis ni jaykʼaj wañunankuta. Manachayqa nisharqa “iskay kaj wañuypi” mana wiñaypaj chinkachisqa kanankuta. Iskay kaj wañuymantataj manaña kausarimuy kanchu (Juan 8:48-51; Apocalipsis 21:8).

Judiostaj mana entienderqankuchu. Chayrayku nerqanku: “Kunanqa yachayku supayniyojpuni kasqaykita. Abrahanqa wañorqa, jinallataj profetaspis, qantajrí nishanki: ‘Pichus nisqayta kasojqa, ni jaykʼaj wañonqachu’, nispa. Qanqa tatayku Abrahanmanta mana kurajchu kanki. Payqa wañuporqa [...]. ¿Pi kasqaykitataj yuyakunkiri?”, nispa (Juan 8:52, 53).

Jesustajrí Mesías kasqanmanta parlasharqa. Nitaj “Mesías kani”  nerqachu.  Astawanpis nerqa: “Noqachus jatunchakuyman chayqa, jatunchakusqayqa qhasilla kanman. Noqataqa Tatay jatunchawan, pitachus Diosniykichej kasqanta ninkichej, chay. Qankunaqa mana payta rejsinkichejchu. Noqatajrí payta rejsini. Mana payta rejsisqayta niyman chayqa, qankuna jinallataj llulla kayman”, nispa (Juan 8:54, 55).

Chantá Jesusqa ñaupa tatan Abrahanmanta nerqa: “Tataykichej Abrahanqa rikuytapuni munarqa imastachus ruwanay karqa chayta, rikuspataj maytapuni kusikorqa”, nispa. Ajinapuni, Abrahanqa Diospa nisqan juntʼakunanpi creerqa, Mesías chayamunantataj suyakorqa. Judiostajrí Jesusta nerqanku: “Manaraj 50 watayojpischu kanki, ¿imaynatataj Abrahanta rejsiwaj karqari?”, nispa. Jesustaj nerqa: “Cheqatapuni niykichej: Niraj Abrahán nacekushajtin, noqaqa karqaniña”, nispa. Jesusqa chayta nispa niraj jallpʼaman jamushaspa, cielopi atiyniyoj ángel kasqanmanta parlasharqa (Juan 8:56-58).

Chantá judiosqa maytapuni phiñarikuspa Jesusta rumiwan chʼanqaykuyta munarqanku. Jesustajrí paykunamanta pakaykukorqa.