Cieguito nacekorqa chay runata Jesús sanoyachin

Jesusqa Samarikuna Pʼunchaypi yachachisqasninwan khuska Jerusalenpi puriykachasharqa. Chaypitaj rikorqa nacekusqanmantapacha cieguito kasqa chay runata. Yachachisqasnintaj Jesusta taporqanku: “Yachachejníy, ¿pitaj juchallikorqa kay runa ciego nacekunanpaj? ¿Paychu? ¿Tatasninchu?”, nispa (Juan 9:2).

Yachachisqasnenqa ichapis yachayta munarqanku, uj runa mamanpa wijsanpi kashaspa juchayojñachus kasqanta chayri manachus. Jesustaj paykunata nerqa: “Mana paychu, nitaj tatasninchu juchallikorqanku, payqa ajina nacekorqa Diospa ruwasqasninta runas rikunankupaj”, nispa (Juan 9:3). Chay runaqa mana juchallikusqanraykuchu, nitaj tatamaman juchallikusqanraykuchu cieguito nacekorqa, manachayqa Adán juchallikusqanrayku. Tukuy runastaj Adanpa juchanrayku juchayoj nacekunchej. Jucharaykutaj onqonchej, ñawinchejpis pisiyapun. Jinapis Jesusqa Diospa atiyninwan imaymana onqosqasta sanoyacherqa. Chay cieguitotapis yanapariyta aterqa.

Jesusqa milagrosta ruwaytapuni munarqa. Pay nerqa: “Pʼunchayllaraj kashajtin Kachamuwajniypa munayninta ruwananchej tiyan, tutaqa chayamushanña, chaypachataj ni pi runapis llankʼayta atenqañachu. Kay mundopi kanaykamaqa kay mundopaj kʼanchay kani”, nispa (Juan 9:4, 5). Jesusqa chayta nispa, tumpamantawan wañuchisqa kananta nisharqa. Wañuchisqa kaspataj niña imatapis ruwayta atinmanchu karqa. Jinapis chaykamaqa “kay mundopaj kʼanchay” karqa.

Jesusqa Jerusalenpi uj cieguitota sanoyachinanpaj, jallpʼaman thoqaspa tʼuruta ruwarqa, chay tʼuruwantaj cieguitoj ñawisninta jawiykorqa. Nerqataj: “Siloam nisqa estanquepi mayllakamuy”, nispa (Juan 9:7). Cieguitotaj rispa mayllakamorqa, sanoyaporqataj. Payqa maytapunichá kusikorqa rikuyta atisqanmanta.

Chantá vecinosnin, jinallataj payta rikoj kanku chay runaspis tʼukulla kasharqanku. Paykunapurataj ninakorqanku: “Kay runaqa tiyakuspa qolqeta mañakoj, ¿icharí?”, nispa. Wakin runastaj nerqanku: “Paypuni chay runaqa”, nispa. Wajkunataj mana creerqankuchu, nerqankutaj: “Mana paychu, rijchʼakullan”, nispa. Cieguito karqa chay runataj nerqa: “Noqapuni kani chay runaqa”, nispa (Juan 9:8, 9).

Chaymanta taporqanku: “¿Imaynamantataj qhawarerqankiri?”, nispa. Paytaj kuticherqa: “Chay Jesús sutiyoj runaqa, tʼuruta ruwaspa ñawisniyman jawiykuwarqa, chantá ‘Siloamman rispa mayllakamuy’ niwarqa. Noqataj rispa mayllakamorqani, rikorqanitaj”, nispa. Chantá tapullarqankutaj: “¿Maypitaj chay runa kashanri?”, nispa. Paytaj kuticherqa: “Mana yachanichu”, nispa (Juan 9:10-12).

Runastajrí, chay runata fariseosman pusarqanku. Fariseospis yachayta munarqanku imaynamantachus sanoyapusqanta. Paytaj nerqa: “Tʼuruwan ñawisniyta jawiykuwarqa, chantá mayllakorqani, rikorqanitaj”, nispa. Fariseostajrí, chayta yachaspa mana kusikorqankuchu. Astawanpis paykunamanta wakenqa Jesusta juchacharqanku: “Chay runaqa mana Diospa kachamusqanchu, nitaj Samarikuna Pʼunchaytapis ruwanchu”, nispa. Wajkunataj nerqanku: “¿Imaynatataj uj juchasapa runa chay jina milagrosta ruwanmanri?”, nispa (Juan 9:15, 16). Ajinamantataj fariseos ukhupi tʼaqanakuy karqa.

Chayrayku ujtawan chay runata taporqanku: “Qanrí, ¿ima ninkitaj qhawarichisorqa chay runamanta?”, nispa. Paytaj mana iskayrayaspa nerqa: “Payqa profeta”, nispa (Juan 9:17).

Fariseostajrí mana creerqankuchu. Imajtinchus yuyarqanku Jesuswan chay runawan yachachinakusqankuta. Chayrayku nerqanku: “Kay runa ciegopunichus manachus nacekusqanta yachanapaj tatasninta tapumuna”, nispa.