Fariseosqa ciego karqa chay runata kʼaminku

Jesusqa nacekusqanmantapacha cieguito karqa chay runata sanoyacherqa. Fariseostajrí manapuni creerqankuchu Jesús chay runata sanoyachisqanta. Chayrayku chay runaj tatasninta wajyacherqanku. Tatasnintaj yacharqanku mana yuyaychakuspalla parlajtinku, ichá fariseoswan sinagogamanta qharqochikunankuta (Juan 9:22). Qharqosqa kajtinkutaj manaña judíos paykunata parlapankumanchu karqa. Niñataj judíos ukhupi trabajayta atinkumanchu karqa.

Fariseosqa ciego karqa chay runaj tatasninta taporqanku: “¿Kay runa wawaykichejchu? ¿Ciegopunichu nacekorqa? ¿Imaynamantataj kunan qhawashanri?”, nispa. Tatasnintaj kuticherqanku: “Arí, wawaykupuni, ciegopunitaj nacekorqa. Mana yachaykuchu imaynamantachus kunan rikuyta atisqanta, nitaj yachaykuchu pichus qhawarichisqantapis”, nispa. Paykunamanqa ichapis wawanku willarerqa imaynapichus sanoyapusqanta. Jinapis manchachikusqankurayku nerqanku: “Payqa manaña wawachu. Payta tapuychej, pay kikin willasunaykichej tiyan”, nispa (Juan 9:19-21).

Chayrayku fariseosqa ciego karqa chay runata ujtawan nerqanku: “Diosta jatunchaspa maychus kajta parlay. Noqayku yachayku chay runaqa juchasapa kasqanta”, nispa. Chayta Jesusmanta nishajtinkupis, ciego karqa chay runaqa nerqa: “Mana yachanichu juchasapachus manachus kasqantaqa. Jinapis kayllata yachani: Noqaqa ciegopuni karqani, kunantaj rikuyta atini”, nispa (Juan 9:24, 25).

Chantá fariseosqa ujtawan tapullarqankutaj: “¿Imanasorqataj? ¿Imaynamantataj qhawarichisorqari?”, nispa. Paytaj mana manchachikuspa nerqa: “Willarqaykichejña, qankunataj mana uyariwarqankichejchu. ¿Imapajtaj ujtawan willanayta munankichejri? ¿Qankunapis paypa yachachisqasnillantajchu kayta munashankichej?” nispa. Fariseostajrí phiñakuspa nerqanku: “Qanmin chay runaj yachachisqanqa kanki, noqaykoqa Moisespa yachachisqasnin kayku. Noqayku yachayku Moisesman Dios parlasqanta. Chay runataqa pichus kachamunpis mana yachaykuchu”, nispa (Juan 9:26-29).

Ciego karqa chay runataj nerqa: “Chayqa tʼukunapaj jina. Qankunaqa mana yachasqankichejchu maymantachus pay kasqanta, chaywanpis payqa qhawarichiwan. Yachanchej Diosqa juchasapaspa mañakuyninkuta mana uyarisqanta, pichus Diosta manchachikun, munaynintataj ruwan, chay runatamin uyarin. Unaymantapacha ni jaykʼaj uyarikorqachu, ciego nacekoj runata pillapis qhawarichisqanta. Sichus chay runa mana Diospa kachamusqanchu kanman chayqa, mana imatapis ruwayta atinmanchu”, nispa (Juan 9:30-33).

Fariseostajrí ni imata niyta atispa kʼamerqanku: “¿Qanchu noqaykuta yachachiwasqayku? Qanqa juchasapa nacekorqanki”, nispa. Chantá sinagogamanta qharqorqanku (Juan 9:34).

Jesustaj chayta yachaspa ciego karqa chay runata maskʼaj rerqa. Paywan tinkuspataj nerqa: “¿Runaj Wawanpi creenkichu?”, nispa. Chay runataj nerqa: “Wiraqochíy, willariway pichus kasqanta paypi creenaypaj”, nispa. Jesustaj nerqa: “Ñapis paytaqa rikunkiña. Noqa kani, piwanchus parlashanki chay”, nispa (Juan 9:35-37).

Chay runataj nerqa: “Señor, qanpi creeni”, nispa. Chantá qonqoriykukuspa kʼumuykukorqa. Jesustaj nerqa: “Noqaqa kay mundoman jamuni runas juzgasqa kanankupaj, ajinamanta mana rikojkuna rikunankupaj, rikojkunataj ciegoyapunankupaj”, nispa (Juan 9:38, 39).

Fariseosqa yacharqanku mana ciegoschu kasqankuta. Chayrayku reparakorqanku Jesús paykunata ciego runawan kikinchashasqanta, mana allintachu runasta yanapashasqankutataj nishasqanta. Chayrayku Jesusta nerqanku: “Chantá, ¿noqaykupis ciegosllatajchu kayku?”, nispa. Jesustaj kuticherqa: “Ciegoschus kawajchej chayqa, mana juchayojchu kawajchej. ‘Rikuyku’ nisqaykichejraykutaj juchayoj kankichej”, nispa (Juan 9:40, 41). Fariseosqa Israelpi Leymanta yachachej kanku, chay Leytataj sumajta rejsej kanku. Jinapis Leyta rejsishaspa Mesiasta qhesacharqanku. Ajinamantataj jatun juchata ruwarqanku.