Jesuswan Dioswan, ¿ujllachu kanku?

Jesusqa Temploj pʼunchaynin fiestapaj Jerusalenman rerqa. Chaytataj ruwaj kanku, templota watejmanta Diosman jaywapusqankuta yuyarinankupaj. 100 watasmanta aswan ñaupajtaqa, Siriamanta kajkuna Jerusalenta japʼikaporqanku. Chantá rey Antíoco IV Epifanesqa, temploj jatun kaj altarnin patapi waj altarta ruwacherqa llulla dioskunata yupaychanankupaj. Chaymanta qhepamantaj, Judeamanta uj sacerdotej wawasnin Jerusalenta siriosmanta qhechukapuytawan templota watejmanta Diosman jaywaporqanku. Chaymantapacha, chayta yuyarikuspa 25 de kislev diapi sapa wata fiestata ruwarqanku. Chay fiestaqa karqa noviembre killa tukukuyta chayri diciembre killa qallariyta.

Chay killasqa Jerusalenpi manchay chiri kaj. Jesusqa chay fiesta diapi Salomonpa corredorninpi purisharqa. Chaypitaj, judiosqa payta muyuykuspa nerqanku: “¿Maykʼajtaj niwasqayku Cristochus manachus kasqaykita? Sichus Cristopuni kanki chayqa sutʼita willawayku”, nispa (Juan 10:22-24). Jesustaj nerqa: “Willarqaykichejña, qankunatajrí mana creenkichejchu”, nispa. Jesusqa mana Samaritana warmiman jinachu nerqa “noqa chay Cristo kani” nispa (Juan 4:25, 26). Jinapis paykunaman nerqa: “Niraj Abrahán nacekushajtin, noqaqa karqaniña”, nispa (Juan 8:58). Chayta nispaqa, pay Cristo kasqanta nisharqa.

Jesusqa chayta runas paykuna kikinkumanta reparanankuta munarqa. Chaypajtaj paypa ruwasqanta, imastachus profetas Mesiasmanta nisqankuwan kikinchananku karqa. Chayrayku Jesusqa yachachisqasninman nerqa, ama pimanpis pay Mesías kasqanta willanankuta. Jinapis temploj pʼunchaynin fiestapi, mana entiendej judiosman sutʼinta nerqa: “Tataypa sutinpi ruwasqasneyqa noqamanta willanku. Qankunatajrí mana creenkichejchu”, nispa (Juan 10:25, 26).

¿Imajtintaj judíos mana creerqankuchu Jesús Cristo kasqanpi? Jesús nerqa: “Qankunatajrí mana creenkichejchu, imaraykuchus mana ovejasniychu kankichej. Noqaqa ovejasniyta rejsini, paykunataj parlasqayta uyarinku, qhepaytataj jamunku. Noqaqa paykunaman wiñay kausayta qoni, paykunataj ni jaykʼaj tukuchisqachu kanqanku, nitaj pipis paykunata qhechuwanqachu. Tataypa qowasqan ovejasqa tukuy waj imasmanta aswan valorniyoj kanku [...]. Noqawan Tataywanqa ujchasqa kayku”, nispa (Juan 10:26-30). Chayta nispaqa Dioswan uj yuyaylla kasqankuta, uj imallatataj ruwayta munasqankuta nisharqa. Manataj nisharqachu payllataj Dios kasqanta, imajtinchus Diosqa cielopi kasharqa, paytaj kay jallpʼapi.

Judiostajrí, Jesusta uyariytawan rumista oqharikorqanku, payta chʼanqaykunankupaj. Jesustajrí mana manchachikorqachu, nerqataj: “Tataypa ashkha sumaj ruwasqasninta rikucherqaykichej. Chay ruwasqasniymanta, ¿mayqenmantataj rumiwan chʼanqayta munawankichejri?”, nispa. Judiostaj nerqanku: “Mana sumaj ruwayta ruwasqaykimantachu rumiwan chʼanqayta munayku, manachayqa Diospa contranta parlasqaykimanta, qanqa [...] Dios jina kasqaykita ninki”, nispa (Juan 10:31-33). Jesusqa mana nerqachu dios kasqanta. Chanta, ¿imajtintaj judíos phiñakorqanku?

Imajtinchus yuyasqankuman jinaqa, Dioslla atiyniyoj karqa. Jesustajrí atiyniyoj kasqanta nerqa. Uj kuti, Jesusqa ovejasninman “wiñay kausayta” qoyta atisqanta nerqa (Juan 10:28). Payqa aswan ñaupajtaña nerqa Dios payman atiyta qosqanta. Judiostaj chayta qonqaporqanku.

Jesusqa qhasillamanta paypaj phiñakusqankurayku nerqa: “Leyniykichejpi qhelqasqa kashan: ‘Dios nerqa: “Qankuna dioskuna kankichej”, nispa’. Payqa ‘dioskuna’ nispa suticharqa pikunatachus palabranpi juchacharqa chaykunata [...]. Noqatarí Tata Dios ajllawaspa kay mundoman kachamuwarqa, qankunataj ‘Diospa Wawan kani’ nisqayrayku, ‘Diospa contranta parlashanki’ niwankichej”, nispa (Salmo 82:6; Juan 10:34-36).

Bibliaqa juezkunatapis “dioskuna” nillantaj. Chanta, ¿imajtintaj Jesusta juchacharqanku? Jesusqa paypuni Diospa Wawan kasqanta reparanankupaj nerqa: “Manachus Tataypa munayninta ruwani chayqa, ama creewaychejchu. Sichus munayninta ruwashani chayqa, amapis noqataqa creewaychejchu, chay ruwasqasnillaytapis creeychej. Ajinamanta yachanaykichejpaj, sutʼitataj entiendenaykichejpaj Tatayqa noqawan ujchasqa kashasqanta, noqataj Tataywan ujchasqa kashasqayta”, nispa (Juan 10:37, 38).

Judiostajrí, chayta uyariytawankama Jesusta japʼiyta munarqanku. Jesustajrí ayqekullarqataj. Payqa Jordán mayuta chimparqa. Chantá maypichus Juan tawa wata ñaupajta bautizayta qallarerqa, chay lugarman chayarqa. Chaytaj ichapis Galilea qochaj sur ladonpi kasharqa.

Chaypeqa ashkha runas ninakorqanku: “Juanqa mana ima milagrotapis ruwarqachu. Chaywanpis Juan imastachus kay runamanta nisqanqa tukuynin cheqapuni kasqa”, nispa (Juan 10:41). Ajinamanta ashkha judíos Jesuspi creerqanku.