LEEJKUNAJ TAPUYNINKU

Familianchejmanta pillapis chayri uj amigonchej wañupojtenqa waqarikunchejpuni, imaraykuchus mayta faltachasunchej. Jesustajrí, Lazarota mayta munakojtinpis mana wañupusqanraykuchu waqarikorqa. Manaqa Lazaroj familianta, amigosninta ima waqajta rikusqanrayku waqarikorqa, imaynatachus Juan libroj ujnin versiculosnin sutʼinchan jina (Juan 11:36).

Jesusqa “Lázaro onqosqa kasqanta yachaspa”, mana usqhayllatachu jampej rerqa. Astawanqa “iskay pʼunchaytawanraj Jesús qhepakullarqa, maypichus kasharqa, chaypi” (Juan 11:6). ¿Imaraykutaj Jesús qheparikorqa? Pay sutʼincharqa: “Chay onqoyqa mana wañunampajchu, astawanqa, Dios jatunchasqa kanampaj, chay onqoynejta Diospa Churimpis jatunchasqallataj kanampaj”, nispa (Juan 11:4). Arí, Jesusqa Lazaroj wañuynin “Dios jatunchasqa kanampaj” kasqanta rikuchiyta munarqa. Chaypajtaj amigonta wañuymanta kausarichinman karqa.

Jesusqa yachachisqasninwan chay kutipi parlashaspa, wañuyta puñuywan kikincharqa. Chayrayku paykunaman nerqa: “Kunan risaj [Lazarota] rijchʼarichimoj”, nispa (Juan 11:11). Jesusqa imaynatachus uj tata wawitanta puñuymanta rijchʼarichin, ajinata Lazarota kausarichiyta atinman karqa. Chayrayku payqa Lázaro wañupusqanmanta mana phutikunanchu karqa.

Chantá, ¿imaraykutaj Jesús waqarikorqa? Biblia nin: “Jesusqa Mariata waqajta rikuspa, paywan jamoj judiostapis waqajllatataj rikuspa, payqa sinchʼita phutikorqa, sonqontaj wawayarqa”, nispa. Arí, paykunata sinchʼi llakisqa kashasqankuta rikuspa, paypis llakikullarqataj, chayraykutaj “waqarikorqa” (Juan 11:33, 35).

¿Imatá chaymanta yachakunchej? Jesús mosoj pachapi wañusqasta kausarichinanpaj, onqosqasta jampinanpaj ima atiyniyoj kasqanta. Chantapis, familianchejmanta pillapis wañupojtin Jesuspis llakikullasqantataj rikuchiwanchej. Chantá yachakullanchejtaj, pejpa familianpis wañupojtin noqanchejpis paykunamanta khuyakuna kasqanta.

Jesusqa Lazarota kausarichinanta yacharqa. Jinapis, amigosninta mayta munakusqanrayku, khuyakusqanrayku ima waqarikorqa. Jinallatataj noqanchejpis wajkunaman khuyakuyninchejta rikuchina, “waqajkunawantaj” waqarikuna (Rom. 12:15). Waqarikuspaqa mana pisi creeyniyoj kasqanchejtachu rikuchishanchej. Jesusqa Lazarota kausarichinanta yachajtinpis waqarikorqa. Noqanchejpis, Jesús jinallataj wajkunaman khuyakuyninchejta rikuchina.