Rey jina Jerusalenman uj maltón burropi yaykun

Jesuswan yachachisqasninwanqa, domingo 9 de nisanpi Betaniamanta Jerusalenman purirerqanku. Betfagueman qayllaykushaspataj, Jesusqa Olivos orqo chaynejpi iskay yachachisqasninwan parlarqa.

Paykunata nerqa: “Jaqay ranchoman riychej. Chaypitaj uj china burrota, maltón uñantawan watasqata tarinkichej, phaskaraspataj qhatimunkichej. Sichus pipis imata nisonqachej chayqa, ‘Señor kay burrosta necesitan’ ninkichej. Chay ratopachataj qhatichimusonqachej”, nispa (Mateo 21:2, 3).

Chay kutipi Jesuspa yachachisqasnenqa, mana repararqankuchu Jesuspa nisqan profetaspa nisqankuman jina kasqanta. Jinapis aswan qhepamanraj repararqanku profeta Zacariaspa nisqan juntʼakusqanta. Zacariasqa Diospa ajllakusqan reymanta nerqa: “Llampʼu sonqo kaspa, burropi lloqʼasqa jamusonqa, china burroj uñan malton burritupi”, nispa (Zacarías 9:9).

Jesuspa yachachisqasnenqa Betfagueman chayarqanku. Chaypitaj china burrota, maltón burrotawan phashkararqanku. Ajinata phaskarashajtinkutaj, chaypi kajkunamanta wakin taporqanku: “¿Imapajtaj chay maltón burrota phaskarashankichej?”, nispa (Marcos 11:5). Paykuna Señorpaj kasqanta nejtinkutaj, qhatichillarqanku. Chantá ropasninkuta iskaynin burrosman karonaykorqanku, Jesustaj chay maltón burroman lloqʼaykorqa.

Jesús Jerusalenman yaykushajtin astawan runas tantakamorqanku. Paykunaqa “ropasninkuta ñanman mastʼararqanku, wakintaj ñan kantumanta sachʼa ramasta kʼuturamuspa mastʼallarqankutaj”. Paykunataj qhaparisharqanku: “Diosníy, payta salvanaykita mañakuyku. Jehová Diospa sutinpi jamojqa bendecisqa kachun. Bendecisqa kachun tatayku Davidpa jamoj Gobiernon”, nispa (Marcos 11:8-10). Fariseosqa chay qhaparisqankuta uyarispa manchayta phiñakorqanku. Jesustataj nerqanku: “Yachachejníy, chʼinyachiy chay yachachisqasniykita”, nispa. Jesustajrí kuticherqa: “Noqa niykichej: Paykunachus chʼin kankuman chayqa, rumisñataj qhaparinkuman”, nispa (Lucas 19:39, 40).

Jerusalenman qayllaykushaspa, Jesusqa llajtata qhawarispa waqarikorqa, nerqataj: “Noqa munarqani reparanaykita imaschus allin kausayta qosunanta, kunantaj chay imasqa qanmanta pakasqa kashan”, nispa. Jerusalenpi tiyakojkunaqa kʼullukusqanrayku chinkachisqa kananku karqa. Chayrayku Jesús nerqa: “Enemigosniyki jatuchaj filochasqa estacaswan muyuykuchisonqanku, wisqʼaykusonqankutaj. Pampamantaj wijchʼusonqanku qanta tukuy wawasniykitawan. Qanpeqa mana uj rumillatapis rumi patapi saqenqankuchu”, nispa (Lucas 19:42-44). Chaytaj 70 watapi juntʼakorqa, Jerusalén chinkachisqa kashajtin.

Jerusalenman Jesús chayajtenqa, llajtantin chʼajwaspa nerqanku: “¿Pitaj kayri?”, nispa. Jesuswan kaj runastaj nishallarqankupuni: “Kayqa profeta Jesús, Galileapi kaj Nazaretmanta”, nispa (Mateo 21:10, 11). Chaypi kajkunamanta wakenqa Jesusta rikorqanku Lazarota kausarichimojta. Chayrayku rikusqankuta willashallarqankupuni. Fariseosrí ni imanayta atispa ninakorqanku: “¡Qhawaychej! Tukuy runas payman kʼaskakapushanku”, nispa (Juan 12:18, 19).

Jesusqa yachasqa kasqanman jina temploman yachachej rerqa. Chaypitaj ciegosta, cojosta ima sanoyacherqa. Kuraj sacerdoteswan leymanta yachachejkunawanqa, rikorqanku Jesús milagrosta ruwasqanta. Wawastapis rikullarqankutaj templopi qhaparejta: “¡Diosníy, Davidpa Wawanta salvanaykita mañakuyku!”, nispa. Chayrayku paykunaqa mayta phiñakorqanku. Jesustataj nerqanku: “¿Uyarinkichu imatachus kaykuna nishasqankuta?”, nispa. Jesustaj kuticherqa: “Arí, uyarini. Qankunarí, ¿manachu jaykʼajpis leerqankichej: ‘Qanqa wawaswan, uña wawitaswanpis jatunchachikunki’, nispa nisqanta?” (Mateo 21:15, 16).

Jesusqa temploman yaykuspa muyuyninpi tukuy imata qhawarerqa. Tardeña kajtintaj apostolesninwan Betania ranchoman kutiporqa, manaraj 10 de nisán qallarishajtin. Chay domingo tutataj chaypi qhepakorqa.