Bibliaqa ashkhata Diospa Reinonmanta parlan. Jehová Diosqa chay Reinonejta imastachus ñaupajmantaña runaspaj munarqa chayta juntʼanqa. Kay leccionpi, qhepan iskay leccionespipis kay tapuykunaman kutichisun: ¿Imataj Diospa Reinon? ¿Imaynapí yachanchej kamachishasqantaña? ¿Imatataj kunankama ruwanña? ¿Imatataj aswan qhepaman ruwanqa?

1. ¿Imataj Diospa Reinon, chanta pitaj chay Reinopi Rey kanqa?

Diospa Reinonqa uj Gobierno, chay Gobiernotaqa kikin Jehovallataj sayaricherqa. Chay Gobiernopeqa Jesucristo Rey kanqa, cielomantapachataj kamachimonqa (Mateo 4:17; Juan 18:36). Paymanta parlaspa Biblia nin: “Wiñaypaj rey jina kamachenqa”, nispa (Lucas 1:32, 33). Jesusqa Diospa Gobiernonmanta Rey kasqanrayku kay jallpʼapi tukuy runasta kamachenqa.

2. ¿Pikunataj Jesuswan khuska kamachimonqanku?

Jesusqa mana sapallanchu kamachimonqa, manaqa 144.000 runaswan khuska. Chay runasqa kanku “tukuy ayllusmanta, tukuy parlaykunamanta, tukuy laya runasmanta, tukuy nacionesmantawan” (Apocalipsis 5:9, 10). Jesús kay jallpʼapi kashajtin, ashkha runas Jesusmanta yachakorqanku, cristianosmantaj tukorqanku. Jinapis 144.000 runaslla cieloman ripunku Jesuswan khuska kamachimunankupaj (Apocalipsis 14:1-4 leey). Chantá tukuy cristianos kay jallpʼapi kausakonqanku Diospa Gobiernonpa kamachiyninpi (Salmo 37:29).

3. ¿Imaraykutaj Diospa Gobiernollan aswan sumaj?

Wakin gobiernosqa allin kajta ruwayta munaspapis, mana chayta ruwayta atillankuchu. Chantapis paykunaj cuentankumanta waj gobierno yaykojtenqa niña runasmanta llakikunchu. Diospa Gobiernonwantajrí mana jinachu. Chay Gobiernoj cuentanmantaqa, mana waj gobierno yaykonqachu. Diospa Gobiernonqa “ni jaykʼaj chinkachisqachu kanqa” (Daniel 2:44). Jesús kay jallpʼata kamachimushaspaqa, mana wakillanmanchu sayasqa kanqa, manaqa tukuy runasta yanapanqa pay jina kʼachas, munakuyniyoj kanankupaj, cheqan kajtataj ruwanankupaj (Isaías 11:9 leey).

4. Diospa Gobiernon jallpʼantinta kamachimonqa

Waj gobiernosmanta nisqa, Jesucristolla kamachinanpaj sumaj wakichisqa, aswan atiyniyojtaj. Mateo 28:18 leeriychej, chantá yachakojta tapuriy:

• ¿Imaraykutaj Jesuslla sumaj kamachej kanqa?

Kay jallpʼamanta gobiernosqa uj suyullata kamachinku, kamachiyninkutaj mana wiñaypajchu. Diospa Gobiernonwantajrí mana jinachu kanqa. Daniel 7:14 leeriychej, chantá yachakojta tapuriy:

• ¿Imaraykutaj Diospa Gobiernon “mana chinkachisqachu” kanan may allin?

• ¿Imaraykutaj Diospa Gobiernon jallpʼantinta kamachinan may allin?

5. Gobiernospa kamachiyninku tukukonqa

Tukuy gobiernospa cuentankumantaqa, Diospa Gobiernollanña kamachenqa. VIDEOTA qhawariychej, chantá yachakojta tapuriy.

VIDEO: ¿Imastataj Diospa Gobiernon ruwanqa? (uj chhikan) (1:41)

• ¿Imaynataj kay tiempomanta gobiernospa kamachiyninku?

Eclesiastés 8:9 leeriychej, chantá yachakojta tapuriy:

• ¿Kay tiempopi gobiernospa cuentankumanta Diospa Gobiernon kamachinan allinchu kanman? ¿Imaraykú chayta ninki?

6. Diospa Gobiernonpi kamachejkunaqa entiendewanchej

Reyninchej Jesusqa kay jallpʼapi tiyakorqa. Payqa “pantaj runas kasqanchejta yachan, chayrayku khuyakuwanchej” (Hebreos 4:15). Jehová Diosqa 144.000 qharista, warmista ajllarqa Jesuswan khuska kamachimunankupaj. Paykunaqa kanku “tukuy ayllusmanta, tukuy parlaykunamanta, tukuy laya runasmanta, tukuy nacionesmantawan” (Apocalipsis 5:9). Tukuy imapitaj Diosta kasukunku.

• ¿Jesuswan 144.000 ajllasqaswan entiendewajchu kasqanchej? ¿Imaraykú chayta ninki?

7. Diospa Gobiernonpa leyesnenqa runaspa allinninkupaj

Kay tiempomanta gobiernosqa leyesta orqhonku runasta yanapanankupaj, wakin imasmanta jarkʼanankupaj ima. Diospa Gobiernonpis leyesta orqhollantaj kamachiyninpi kajkuna juntʼanankupaj. 1 Corintios 6:9-11 leeriychej, chantá yachakojta tapuriy:

• ¿Imaynataj kausay kanman tukuyninchej Diospa leyesninta kasukojtinchej?a

• ¿Jehová munanchu Gobiernonpi kajkuna kamachiykunasninta juntʼanankuta? ¿Imajtintaj chayta nisunman?

• ¿Diosta mana kasukojkunapis cambiayta atinkumanchu, ima niwajtaj? (11 versiculota qhawariy).

¿IMASTÁ YACHAKUNCHEJ?

Kaypi yachakunchej Diospa Gobiernonqa cielopi kashasqanta, tukuy jallpʼantintataj kamachimunanta.

Yuyarikunapaj

• ¿Pikunataj Diospa Gobiernonpi kamachimonqanku?

• ¿Imaraykutaj Diospa Gobiernollan aswan sumaj?

• Diospa Gobiernonpa kamachiyninpi kajkuna, ¿imata ruwanankutataj Jehová munan?

ASTAWAN YACHAKUNAYKIPAJ

¿Maypitaj Diospa Gobiernon kashan? Chayta yachanaykipaj kayta leeriy.

“¿Diospa Gobiernon sonqonchejpichu kashan?” (Chaytaqa Internetpi jw.org nisqapi tarinki)

¿Imaraykutaj Jehovaj testigosnin Diospa Gobiernontapuni kasukunku? Chayta yachanaykipaj kay videota qhawariy.

Diospa Gobiernollanta apoyanchej (1:43)

Jesuswan khuska 144.000 runas kamachimonqanku. Paykunamanta astawan yachanaykipaj kayta leeriy.

“¿Pikunataj cieloman renqanku?” (Chaytaqa Internetpi jw.org nisqapi tarinki)

Uj presochasqa warmita Jehová Dios justiciata ruwananta yachay yanaparqa. Paymanta astawan yachanaykipaj kayta leeriy.

“Maykʼajchus justicia kananta yachakorqani” (¡Despertad!, noviembre de 2011)

Jesusqa discipulosninman nerqa: “Qankunaqa mana kay mundomanta runas jinachu kankichej”, nispa (Juan 15:19). Chaywan nisharqa mana kay mundomanta runas jinachu politicaman chhapukusqankuta, nitaj guerrasmanpis risqankuta. Chaykunaman mana chhapukunapajqa mayta kallpachakuna tiyan. Chay imasman mana chhapukusqanchejrayku wajkunaqa burlakuwanchej. Jinapis, ¿imatá ruwasunman mana chay imasman chhapukunapaj, nitaj Jehovatapis wasanchanapaj? Chayta kaypi yachakusun.

1. ¿Imaynatá cristianos gobiernosta qhawanchej?

Cristianosqa gobiernosta respetanchej. Chantapis Jesuspa nisqanta kasukunchej. Pay nerqa: “Cesarpata kajtaqa Cesarman qopuychej”, nispa. Chaytataj ruwanchej suyunchejpi kaj leyesta kasukuspa. Chay leyesmanta ujtaj kashan, impuestota paganata kamachiwasqanchej (Marcos 12:17). Gobiernosqa kay jallpʼapi kamachishanku Jehová Dios saqesqanrayku (Romanos 13:1). Jinapis Jehová Dioslla tukuy gobiernosmanta aswan atiyniyoj. Chayrayku payqa Gobiernonnejta kay jallpʼamanta tukuy llakiykunata chinkachenqa.

2. ¿Imaynatá rikuchinchej mana politicaman satʼikusqanchejta?

Jesús jinallataj cristianospis mana politicaman chhapukunchejchu. Uj kuti, Jesustaqa uj milagrota ruwasqanta rikuspa reyta jina churayta munarqanku, paytaj mana munarqachu (Juan 6:15). Astawanpis nerqa: “Gobiernoyqa mana kay mundomantachu”, nispa (Juan 18:36). Noqanchejpis Jesús jinallataj mana politicaman chhapukunchejchu, nitaj guerramanpis rinchejchu (Miqueas 4:3 leey). Banderata, chayman rijchʼakoj imasta jatunpaj qhawaspapis, mana chaykunata napaykunchejchu. Chayta ruwayqa chay imasta yupaychay jina kanman (1 Juan 5:21). Nillataj ni mayqen partidota apoyanchejchu, nitaj mayqen partidoj contranpipis kanchejchu. Astawanpis Diospa churasqan Gobiernollata apoyanchej.

ASTAWAN YACHAKUNA

3. Ama politicaman chhapukunachu, nitaj guerraman rinachu

Jesús jina, discipulosnin jinataj ruwana. Romanos 13:1, 5-7; 1 Pedro 2:13, 14 leeriychej, chantá VIDEOTA qhawariychej. Chaymantataj yachakojta tapuriy:

VIDEO: Cristianosqa mana politicaman satʼikunchejchu (1 kaj) (4:28)

• ¿Imaraykutaj autoridadesta respetananchej tiyan?

• ¿Imaynasmantá rikuchinchej autoridadesta kasukusqanchejta?

Iskay suyus maqanakupi kashanku chayqa waj suyusmanta gobiernosqa ninku mana chay guerraman chhapukusqankuta, jinapis imaynallamantapis chay maqanakojkunata yanapanku. Chayta ruwaspataj chay guerraman chhapukushanku. Juan 17:16 leeriychej, chantá VIDEOTA qhawariychej. Chaymantataj yachakojta tapuriy:

VIDEO: Cristianosqa mana politicaman satʼikunchejchu (2 kaj) (3:11)

• ¿Ima niyta munan mana politicaman chhapukuy, nitaj guerraman riy?

Wakin kutis autoridadesqa Diospa kamachisqanta pʼakichiyta munawasunman. Chay kutispi imatachus ruwanata qhawarina. Hechos 5:28, 29 leeriychej, chantá VIDEOTA qhawariychej. Chaymantataj yachakojta tapuriy:

VIDEO: Cristianosqa mana politicaman satʼikunchejchu (3 kaj) (1:18)

• Autoridades imatachus ruwananchejta kamachiwasqanchej mana Jehová Diospa kamachisqanman jinachu kajtin, ¿pitataj kasukunanchej tiyan?

• ¿Ima niwajtaj, ima kutispitaj cristianos mana autoridadesta kasukunkumanchu?

4. Ni yuyasqanchejwan ni ruwasqanchejwan politicaman chhapukunachu

1 Juan 5:21 leeriychej, chantá VIDEOTA qhawariychej. Chaymantataj yachakojta tapuriy:

VIDEO: Cristianosqa mana manchachikoj kananku tiyan: Mana politicaman nitaj chʼajwasmanpis satʼikunankupaj (2:49)

• Videopi rikorqanchej chay hermano, ¿imaraykutaj mana politicaman chhapukorqachu, nitaj banderatapis napaykorqachu?

• ¿Chay ruwasqan allinchu karqa?

¿Ima kutispiwantaj mana politicaman chhapukunachu kanman? VIDEOTA qhawariychej, chantá yachakojta tapuriy:

VIDEO: Torremanta Qhawaj revistamanta yachakuna: Kay pachaj imasninman mana satʼikunachu (5:16)

• Ashkha suyus atipanakupi pujllashasqankuta qhawashaspa, ¿imasta ruwaytaj mana allinchu kasqa?

• Uj partido imatachus ajllasqan allinninchejpaj kajtin chayri mana allinninchejpaj kajtin, ¿imatataj mana ruwanachu kasqa?

• ¿Imataj kanman politicamanta noticiasta qhawajtinchej chayri chayllamanta parlaj runaswan masichakojtinchej?

¿IMASTÁ YACHAKUNCHEJ?

Kaypi yachakunchej cristianosqa mayta kallpachakusqankuta mana politicaman chhapukunankupaj ni parlayninkuwan, ni yuyayninkuwan, ni ruwayninkuwan ima.

Yuyarikunapaj

• ¿Imaynatá gobiernosta qhawanchej?

• ¿Imaraykutaj mana politicaman chhapukunchejchu?

• ¿Ima kutispitaj mayta kallpachakunanchej tiyan mana politicaman chhapukunapaj?

ASTAWAN YACHAKUNAYKIPAJ

¿Politicaman mana chhapukusqanchejrayku imaspitaj rikukusunman? Chayta yachanaykipaj kay videota qhawariy.

Jehovaqa ni jaykʼaj saqerpawarqaykuchu (3:14)

¿Imaynatá tukuy familia wakichikunkuman mana kay mundomanta runas jina ruwanankupaj? Chayta yachanaykipaj kay videota qhawariy.

Banderata jatunchaypi, himno nacionalta takiypi ima ama satʼikunachu (4:25)

¿Imaraykutaj uj runa presidenteta sirvinanmanta nisqa, Jehovallata sirviyta ajllarqa? Chayta yachanaykipaj kay videota qhawariy.

“Diospajrí tukuy ima atikun” (5:19)

Imapichus llankʼanata ajllashaspa, ¿imapitaj piensarina tiyan? Chayta yachanaykipaj kayta leeriy.

“Sapa uj ruwananta juntʼanan tiyan” (La Atalaya, 15 de marzo de 2006)