Arimateamanta José, Jesuspa yachachisqan jina rejsichikun

KAMACHEJ Poncio Pilatoqa manchay liso karqa, kʼullu runataj. Arimateamanta Josetaj, mana manchachikuspa Pilatomanta Jesuspa ayanta mañamorqa. Chayta ruwarqa Jesús sumaj pʼampasqa kananpaj. Pilatotajrí soldadospa capitanninta wajyachispa taporqa, Jesús wañupusqantañachus manachus. Soldadospa capitannin Jesús wañupusqantaña nejtintaj, Pilatoqa Joseman nerqa, ayata apakapunanta. Chantá Joseqa Jesusta wañuchisqankumanta may llakisqa kaspapis, Jesús warkhusqa kasharqa chayman usqhayta kuterqa (Mar. 15:42-45).

• ¿Pitaj Arimateamanta José karqa?

• José, ¿pinintaj Jesuspata karqa?

• ¿Imaraykutaj Josemanta yachakunanchej kanman?

Bibliaqa Marcos libropi nin, José “Juntapi sumaj runapaj qhawasqa” kasqanta. Chay jatun juntapi kajkunaqa, karqanku kuraj sacerdotes, kurajkuna, leymanta yachachejkuna ima (Mar. 15:1, 43). Joseqa Jerusalenmanta ujnin dirigente kasqa. Chayraykuchá Pilatowan parlarimuyta atillarqa. Chantapis Joseqa qhapaj karqa (Mat. 27:57).

Jatun juntamanta kajkunaqa, Jesusta wañuchinankupaj yachachinakorqanku. Jinapis Joseqa mana chaypi chhapukorqachu. Imaraykuchus payqa “kʼacha” runa karqa cheqanta ruwajtaj (Luc. 23:50). Chantapis Joseqa maychus kajta imatapis ruwaj, Diospa kamachiykunasninta juntʼananpajtaj mayta kallpachakoj. Chantapis ‘Diospa Gobiernonta suyakusharqa’. Chayraykuchá Jesuspa yachachisqanman tukorqa (Mar. 15:43; Mat. 27:57). Ichapis Joseqa Jesuspa yachachisqanman tukorqa cheqan kajta, Bibliaj nisqanman jinataj kausakuyta munasqanrayku.

Juan 19:38 versiculoqa nin, José “judiosta manchachikuspataj mana pimanpis willarqachu Jesuspi creesqanta”. ¿Imaraykutaj judiosta manchachikoj? Imaraykuchus Jesusta chejnikoj kanku. Chantá pillapis Jesuspi creesqanta nejtaqa, sinagogamanta qharqoj kanku (Juan 7:45-49; 9:22). Judiosqa sinagogamanta qharqosqa kajkunata, pisipaj qhawaj kanku, chejnikojtaj kanku. Chayraykuchá Joseqa mana Jesuspa yachachisqan jinachu rejsichikorqa. Jesuspa yachachisqan jina rejsichikunman karqa chayqa, cargonmanta wijchʼuchikunman karqa, pisipajtaj qhawasqa kanman karqa.

Mana Josellachu ajinapi rikukorqa. Juan 12:42 nisqanman jina “kamachejkunamanta” ashkhaspis “Jesuspi creerqanku, fariseosta manchachikuspataj mana willakojchu kanku paypi creesqankuta sinagogamanta mana qharqochikunankupaj”. Paykunamanta ujnenqa Nicodemo karqa. Payqa jatun juntamanta ujnin karqa (Juan 3:1-10; 7:50-52).

Joseqa Jesuspa yachachisqanpuni karqa. Jinapis mana runasman nerqachu Jesuspi creesqanta. Chaytaj mana allinchu karqa. Imaraykuchus Jesús nerqa: “Sichus pipis runaspa ñaupaqenpi noqata rejsiwasqanta nin chayqa, noqapis payta rejsisqayta nillasajtaj cielopi kashaj Tataypa ñaupaqenpi. Chantá sichus pipis runaspa ñaupaqenpi mana rejsiwasqanta nin chayqa, noqapis payta mana rejsisqayta nillasajtaj cielopi kashaj Tataypa ñaupaqenpi”, nispa (Mat. 10:32, 33). Joseqa mana nejchu Jesusta mana rejsisqanta. Astawanqa runata manchachikusqanrayku mana Jesuspa yachachisqan jina rejsichikorqachu. Noqanchejmantarí, ¿imatataj nisunman?

Biblia nisqanman jina, jatun juntamanta kajkuna Jesusta wañuchinankupaj yachachinakushajtinku, Joseqa mana chaypi chhapukorqachu (Luc. 23:51). Jesusta juchachashajtinkupis Joseqa nisina chaypichu kasharqa. Imayna kajtinpis, Joseqa maytachá llakikorqa Jesusta qhasimanta juchachasqankurayku. Jinapis Joseqa ni imata ruwayta aterqachu.

Jesús wañupunanpajqa, Joseqa manaña manchachikorqachu. Jesuspa yachachisqan jinataj rejsichikorqa. Chaytataj yachanchej Marcos nisqanrayku. Pay nerqa: “Joseqa mana manchachikuspa Pilatomanta Jesuspa ayanta mañamorqa”, nispa (Mar. 15:43).

Joseqa Jesusta wañuchishasqankuta rikorqasina. Imaraykuchus Pilatowan parlashajtin Jesús wañupusqanta yacharqaña, Pilatotaj mana. Chayrayku Pilatoqa, “yachayta munarqa Jesús wañupusqantañachus manachus” José, Jesuspa ayanta apakapunanpaj (Mar. 15:44). Ichapis Joseqa, jatun kʼaspipi Jesusta mayta ñakʼarishajta rikorqa. Ichapis chayrayku yuyayninman churakuspa Jesuspa yachachisqan jina rejsichikorqa. Chaymantapachataj tukuy yacharqanku Joseqa Jesuspaj yachachisqan kasqanta.

Judiospa leyninman jina, warkhusqa wañoj runataqa, niraj inti yaykupushajtin pʼampananku karqa (Deu. 21:22, 23). Romanostajrí, sajra runasta jatun kʼaspipi warkhuspa wañuchejtinku, khuruykunankama warkhusqata saqej kanku, chayri uj juskʼuman choqaykoj kanku. Chayrayku Joseqa Jesusta pʼampaykorqa. Jesusta wañucherqanku chaynejpitaj, Josejta uj sepultura qaqapi ruwasqa karqa. Chay sepulturamanqa manaraj ima ayatapis churasqankuchu. Imajtinchus Joseqa chaypachallaraj Arimateamanta Jerusalenman jampusqa.a Chay sepulturapitaj familian pʼampakunanta munarqa (Luc. 23:53; Juan 19:41). José pʼampakunan karqa chaypi Jesusta pʼampaykusqanqa, may allinpuni karqa. Imaraykuchus ajinamanta Bibliaj nisqan juntʼakorqa. Bibliaqa unaymantaña nerqa: ‘Pʼampasqataj kanqa qhapajkunawan’ nispa (Isa. 53:5, 8, 9).

Mateowan, Marcoswan, Lucaswan, Juanwan ima nerqanku, Jesusta wañusqata apaqashajtinku, Joseqa sumaj lino telawan maytʼuykuspa, pʼampaykusqanta (Mat. 27:59-61; Mar. 15:46, 47; Luc. 23:53, 55; Juan 19:38-40). Biblia nisqanman jina, Nicodemolla Joseta yanaparqa Jesusta pʼampaysiyta. Imajtinchus Nicodemoqa, sumaj qʼapayniyoj qhorasta aparqa Jesuspa cuerponta jawinankupaj. Josewan, Nicodemowan qhapaj kasqankurayku ichapis kamachisninwan Jesuspa cuerponta apanankupaj, pʼampanankupajwan yanapachikorqanku. Yanapachikojtinkupis manapis, paykunapuni Jesusta pʼamparqanku. Chantá judiospa leyninman jina, pillapis uj ayata llankhaykojqa qanchis pʼunchayta chʼichipaj qhawasqa kanan karqa, jinallataj imata llankhasqanpis (Núm. 19:11; Hag. 2:13). Chayrayku Josewan Nicodemowanqa, Pascua fiestata mana ruwayta atinkumanchu karqa (Núm. 9:6). José, Jesusta pʼampaspaqa yacharqa runas chejnikunankuta. Jinapis ni manchachikorqachu, chayrayku Jesusta sumajta pʼamparqa Jesuspa yachachisqan jinataj rejsichikorqa.

Bibliaqa Josemanta parlan Jesusta pʼampasqankamalla. Chantá, ¿imataj Josemanta karqa? Imachus paywan kasqanta mana yachanchejchu. Kay yachaqanapi qhawarerqanchej jina, ichapis Jesuspa yachachisqan jina rejsichikorqa. Imajtinchus creeynin pisiyananmantaqa sinchʼiyasharqa, nitaj manchachikorqañachu.

Josejpa kausayninmanta yachakoyqa reparachiwanchej, allinta qhawarikuna kasqanta imatachus kausayninchejpi ñaupajman churasqanchejta. Ichapis noqanchejqa ñaupajman churashanchej familianchejta, kapuyniyoj kayta, sumaj trabajoyoj kayta, qhapajyayta chayri allinnillanchejta. Jinapis aswan allin Jehová Diosman qayllaykunapaj kallpachakunanchej.