Jesusqa yachachisqasninta ajllayta qallarin

Jesusqa 40 diasta chʼin lugarpi kaytawan, Juan Bautistajman kuterqa. Juantajrí Jesusta qayllamushajta rikuspa qhaparerqa: “¡Kaymin Diospa Corderonqa! Payqa kay mundomanta juchata chinkachenqa. Paymantamin nerqani: ‘Qhepayta jamojqa ñaupariwarqa, payqa noqamanta ñaupajtaña karqa’, nispa” (Juan 1:29, 30). Juan Bautistaqa Jesuspa kurajnin kaspapis, yacharqa Jesús paymanta ñaupajtaña kasqanta, cielopitaj tiyakusqanta.

Jesús bautizachikoj rerqa chay kutipeqa, Juan Bautistaqa manaraj yacharqachu Jesús Mesiaspunichus manachus kasqanta. Chayraykuchá Juan Bautistaqa, payta uyarejkunaman nerqa: “Noqaqa mana payta rejsillarqanipischu, astawanqa israelitasman payta rejsichinayrayku runasta yakupi bautizashani”, nispa (Juan 1:31).

Chantá Juanqa Jesusta bautizasqantawan imachus kasqanmanta parlarqa. Pay nerqa: “Diospa atiyninta rikorqani palomata jina paypa patanman cielomanta uraykamojta, chay atiytaj paypi qhepakorqa. Noqaqa payta mana rejsillarqanipischu, Diostajrí runasta yakupi bautizanaypaj kachamuwarqa, niwarqataj: ‘Pejpa patanmanchus rikunki atiyniyta uraykamojta, paypitaj qhepakojta chayqa, paymin atiyniywan runasta bautizanqa’, nispa. Noqataj chayta rikorqani, sutʼincharqanitaj payqa Diospa Wawanpuni kasqanta” (Juan 1:32-34).

Qʼayantin, Juan Bautistaqa iskay yachachisqasninwan kasharqa. Chayllapi Jesús rikhurimorqa. Paytaj Jesusta rikuspa nerqa: “¡Kaymin Diospa Corderonqa!”, nispa (Juan 1:36). Juanpa chay iskay yachachisqasnintaj, Jesuspa qhepanta rerqanku. Ujnenqa Andrés karqa. Chay ujnintaj Juanchá karqa, pichus Juan librota qhelqarqa, chay. Imajtinchus paylla imaschus chay kutipi kasqanta willawanchej. Juanqa ichapis Jesuspa primon karqa. Imajtinchus tatanqa Zebedeo karqa, mamantaj Salomé. Salometaj ichá Mariaj hermanan karqa.

Jesusqa Andrestawan Juantawan qhepanta jamushasqankuta rikuspa, paykunata taporqa: “¿Imatataj maskʼashankichej?”, nispa.

Paykunataj nerqanku: “Rabí, ¿maypitaj alojasqa kashankiri?”, nispa.

Jesustaj paykunata nerqa: “Jaku, rikuchimusqaykichej”, nispa (Juan 1:37-39).

Las cuatro de la tarde jinaña kasqanraykutaj, paykunaqa Jesuswan qhepakorqanku. Andresqa may kusisqapuni kasharqa. Chayrayku hermanon Simonta maskʼamorqa. Tarispataj “Mesiasta tariyku” nispa nerqa. Chantá Jesusta rejsimunanpaj payta pusarqa. Simonpa ujnin sutenqa Pedro karqa (Juan 1:41). Ichá Juanpis hermanon Santiagota maskʼamuspa Jesusta rejsichimorqa. Juan mana chayta libronpi willajtinpis, ajina kasqanta ninchej, chaymanta qhepaman imatachus paykunamanta willakusqanrayku.

Qʼayantintaj Jesusqa Betsaida llajtayoj Felipewanñataj tinkorqa. Betsaidataj Galilea qochaj pata ladonpi kasharqa. Andreswan Pedrowanpis chayllamantataj karqanku. Jesusqa Felipeman nerqa: “Qhepayta jamuy”, nispa (Juan 1:43).

Chantá Felipeqa Natanaelta maskʼamorqa, pichus Bartolomé sutiwan rejsisqa karqa, chayta. Paytataj nerqa: “Jesuswan tinkukuyku, payqa Nazaretmanta Josejpa wawan. Paymanta willanku Moisespa Leynin, jinallataj Profetaspa qhelqasqankupis”, nispa. Natanaeltajrí nerqa: “¿Atinmanchu Nazaretmanta ima allinpis rikhurimuyta?”, nispa.

Felipetaj nerqa: “Jaku, rejsichimusqayki”, nispa. Jesusqa Natanaelta payman jamushajta rikuspa, nerqa: “Kaymá israelitaqa, paypeqa manapuni ima llullakuypis kanchu”, nispa.

Natanaeltaj Jesusta taporqa: “¿Imaynapitaj rejsiwankiri?”, nispa.

Jesustaj kuticherqa: “Manaraj Felipe wajyashasojtin, higo sachʼa urapi kashajtiyki rikorqayki”, nispa.

Natanaeltajrí chayta uyarispa tʼukorqa, nerqataj: “Yachachejníy, qanqa Diospa Wawan kanki, Israelpa Reynin”, nispa.

Jesustaj kuticherqa: “¿Higo sachʼa urapi rikususqayta nisojtiychu creenki? Chaymantaqa aswan tʼukuna imastaraj rikunki”, nispa. Chantá chaypi kajkunaman nerqa: “Cheqamantapuni niykichej: Cielota kicharisqata rikunkichej, Diospa angelesnintataj noqaman uraykamushajta, wicharipushajtataj”, nispa (Juan 1:45-51).

Jesusqa ajinata runasta wajyarerqa, yachachisqasnin kanankupaj. Chantataj paykunawan khuska Jordán vallemanta Galileaman riporqanku.