Maychus kajta yachachina

 1. ¿Imataj Jesuspaj aswan importante kasqa?

SEÑORNINCHEJ Jesucristoqa sumaj carpintero karqa, Diosmantapis sumajta willarqa (Mar. 6:3; Rom. 15:8). Payqa carpintero kashaspa sumajta herramientasta apaykachayta yacharqa. Chay herramientaswanqa mesasta, sillasta waj imastawan ruwaj. Jesusqa 30 watasniyoj kashaspa manaña carpintero jinachu trabajarqa. Imajtinchus Diospa Gobiernonmanta willayta qallarerqa. Diospa Palabranta sumajta rejserqa. Chayrayku tukuy runasman Diospa Palabranta sumajta entiendechej (Mat. 7:28; Luc. 24:32, 45). Jesuspajqa Diosmanta willay aswan importante karqa. Imaraykuchus nerqa: ‘Diosqa kachamuwan Gobiernonmanta sumaj willaykunata willamunaypaj’, nispa (Mat. 20:28; Luc. 3:23; 4:43). Jesusqa tukuy tiempo Diosmanta yachacherqa, munarqataj runaspis pay kikin ruwanankuta (Mat. 9:35-38).

 2. ¿Imastataj sumajta rejsinanchej kasqa maychus kajta yachachimunapaj?

² Mana tukuychu carpinteros kanchej. Jinapis tukuyninchej sumaj willaykunata yachachinchej. Sumaj willaykunata yachachimuy may importante kasqanrayku Diosninchej yanapashawanchej. Chayrayku Biblia niwanchej ‘Dioswan khuska llankʼashasqanchejta’ (1 Cor. 3:9; 2 Cor. 6:4). Noqanchejqa yachanchej Diospa ‘Palabranpi kaj chhikaqa cheqapuni’ kasqanta (Sal. 119:159, 160). Chayrayku tukuy atisqanchejta ruwana ‘cheqa kaj palabrata maychus kajta yachachinapaj’ (2 Timoteo 2:15 leey). Chaypajqa Bibliata sumajta rejsinanchej tiyan. Ajinamanta runasman maychus kajta Jehová Diosmanta, Jesusmanta, Diospa Gobiernonmanta ima yachachinapaj. Maychus kajta yachachimunapajtaj Diospa llajtanta ñaupajman apajkunaqa, ashkha yanapasta qowanchej. Chayrayku chay yanapastapis sumajta rejsinanchej tiyan.

 3. 1) ¿Imapajtaj ni jaykʼaj jina kallpachakunanchej kashan? 2) ¿Pikunatataj maskʼamunanchej kashan Bibliata estudiachinapaj?

³ Chay yanapasqa sumaj wakichisqa kashanku runaswan Bibliata estudianapaj. Runaswan Bibliata estudiashaspaqa, Bibliaj nisqasninta sutʼinchanchej chayman jina kausakunankupaj. Kunantaj ni jaykʼaj jina kallpachakunanchej kashan estudiosta tarinapaj. Ajinamanta Jesuspa yachachisqasninman tukunankupaj. Imaraykuchus tumpitamantawan sajra runas chinkachisqas kanqanku. Chayrayku maytapuni kallpachakunanchej kashan “wiñay kausayta japʼinankupaj allin sonqoyoj” kajkunata maskʼamunapaj. Ajinamanta Jehová Diosta sirviyta qallarinankupaj (Hechos 13:44-48 leey).

 4. ¿Imatataj ruwananchej kasqa allin sonqoyojkunata tarinapaj?

⁴ “Wiñay kausayta japʼinankupaj allin sonqoyoj” kajkunata tarinapajqa, predicamunanchej tiyan, imaynatachus ñaupa tiempopi cristianos predicamorqanku, ajinata. Jesusqa discipulosninman nerqa: “Ima llajtallamanpis chayri ima ranchollamanpis yaykuspaqa, chaypi maskʼaychej pichus uyariyta munajta”, nispa (Mat. 10:11). Noqanchejqa yachanchej mana allin sonqoyojkuna mana Diosmanta yachakuyta munasqankuta, ni uyarillaytapis munasqankuta. Llampʼu sonqoyojkunatajrí Diosmanta yachakuyta munanku. Noqanchejtaj paykunata maskʼashanchej. Chayta astawan entiendenapaj Jesusmanta parlarina. Jesusqa carpintero kashaspa ñaupajta sumaj maderastachá maskʼaj. Chantarajchá herramientasninta oqharispa punkusta, mesasta, sillasta chayri yugosta ruwaj. Noqanchejpis ñaupajtaqa uyariyta munajkunata maskʼamunanchej tiyan. Chaymantataj Diospa llajtan qowasqanchej yanapaswan Bibliata estudiachinanchej tiyan (Mat. 28:19, 20).

 5. 1) ¿Imaspajtaj Jesús herramientasta necesitasqa? 2) ¿Imatataj qhepan parrafospi yachakusunchej? (11 paginapi kaj fotosta qhawariy).

⁵ Tukuy imapaj herramientas necesitakun. Por ejemplo, Señorninchej Jesusqa carpintero kashaspa ashkha herramientasniyojchá karqa.a Imajtinchus payqa herramientasta necesitarqa: midinanpaj, marcananpaj, khuchunanpaj, juskʼunanpaj, llajllananpaj, nivelananpaj, kʼaskachinanpaj ima. Noqanchejpatapis runasman Bibliata estudiachinapaj ashkha yanapas tiyapuwanchej. Chayrayku qhepan parrafospi yachakusunchej imaspajchus chay yanapas wakichisqas kasqankuta.

 6. ¿Maykʼajllapis tarjetitaswan predicarqankichu?

⁶ JW.ORG nisqapaj tarjetitas. Kaykunaqa juchʼuy tarjetitas kanku. Wakichisqataj kashanku runas Internetpi jw.org nisqaman yaykunankupaj. Ajinamanta runas noqanchejta astawan rejsinawanchejpaj chayri “Bibliata estudiachinawaykichejta munani” nispa escribimunawanchejpaj. Kunankamaqa 400.000 runasmanta astawanña escribimuwarqanchej Bibliata estudiayta munaspa. Sapa diataj escribimushallankupuni. Chayrayku chay tarjetitasta apaykachanapuni. Ajinamanta ima ratollapis chay tarjetitasta runasman jaywanapaj.

 7. ¿Imapajtaj invitaciones wakichisqa kashan?

⁷ Invitaciones. Reunionesman jamunankupaj invitacionpi nin: “Jehovaj Testigosninwan Bibliamanta yachakuwaj”, nispa. Nillantaj tantakuykunapi chayri munasqanman jina noqanchejwan Bibliata estudiayta atisqanta. Reparanchej jina chay invitacionqa, wakichisqallataj kashan “Diosmanta yachakuyta munasqankuta” reparakojkuna noqanchejwan Bibliata estudianankupaj (Mat. 5:3). Bibliata estudiayta munajtinkupis, manapis reunionesninchejman jamojkunata chunka makiwan japʼikunanchej tiyan. Reunionesninchejman jamojkunaqa reparanqanku Bibliamanta yachachisqanchejta.

 8. ¿Imajtintaj munanchej runas uj kutillapis reunionesninchejman jamunankuta?

⁸ Runastaqa invitanallapuni reunionesninchejman uj kutillatapis jamunankupaj. Imaraykuchus jamuspaqa reparanqanku mana llulla iglesiaspi jinachu yachachisqanchejta. Reparallanqankutaj runasta Diosman qayllaykunankupaj Bibliawanpuni yanapasqanchejta (Isa. 65:13). Chaymanta parlaspa uj qhariwarmimanta parlarina. Paykunaqa Estados Unidosmanta kanku. Pasaj wataspitaj, Diosmanta astawan yachakuyta munasqankurayku ninakusqanku llajtankupi kaj tukuy iglesiasta visitanankuta. Ninakullasqankutaj: “Uj iglesiapi qhepakunapajqa, chay iglesiapi imallatapis yachakunanchej tiyan. Chay iglesiaman rejkunapis maychus kajta vestikunanku tiyan”, nispa. Jinamanta ashkha wataspi tukuy iglesiasta visitasqanku. Reparasqankutaj chay iglesiaspeqa ni imata yachakusqankuta, chay iglesiasman rejkunapis mana allintachu vestikusqankuta. Chayrayku última iglesiata visitaytawan señoranqa trabajaj ripusqa, qosantaj wasinman kutipusqa. Qosanqa wasinman kutipushaspa Salón punkuta pasasqa. Sonqonpitaj nikusqa: “¿Imatachus kaypi ruwanku í? A ver qhawaykurisaj”, nispa. Jinapi salonman yaykusqa. Reparasqataj hermanos paywan kʼachas kasqankuta, maychus kajtataj vestikusqankuta. Ñaupajsitupitaj tiyakusqa. Kusikusqataj mayta yachakusqanmanta. Payqa apóstol Pablo nisqanman jina, kaytapis nishanman jina karqa: “Cheqamantapuni Diosqa qankunawan kashan”, nispa (1 Cor. 14:23-25). Chaymantataj payqa sapa domingo reunionesman risqa. Chantá chaupi semanapi kaj reunionesmanpis riyta qallarillasqataj. Jinamanta señoranpis reunionesman rillasqataj. Chantá iskayninku Bibliata estudiaytawan bautizakusqanku setenta kurajniyojña kaspapis.

 9. ¿Tratadoswan predicayta atikullanchu?

⁹ Tratados. Pusaj tratados tiyapuwanchej. Chay tratadoswanqa facilta predicayta qallarisunman. 2013 watamantapacha kunankamaqa, cinco mil millones jinaña imprimikun. Chay tratadosqa tukuy imapi rijchʼakunku, waj imasmanta parlanku chaylla. Chayrayku uj tratadowan predicayta yachasun chayqa, chay ujkunawanpis predicayta atillasun. Kunantaj qhawarinachej imaynatachus chay tratadoswan predicayta atisqanchejta.

10. ¿Imaynatataj predicasunman ¿Imataj Diospa Reinonrí? nisqa tratadowan?

¹⁰ ¿Imataj Diospa Reinonrí? nisqa tratadowan predicanapajqa, runasman chay tratadoj ñaupaj paginanta rikuchispa, tapurisunman: “¿Imataj Diospa Reinon kanman? ¿Niwajchu sonqollanchejpi kasqanta, cielopi uj lugarlla kasqanta chayri cielopi uj gobierno kasqanta?”, nispa. Chantá allintapis manapis kutichiwajtinchejqa, iskay paginapi “Bibliaqa niwanchej” nisqata rikuchisunman. Chaymantataj Daniel 2:44; Isaías 9:6 versiculosta leepusunman. Chay versiculosqa chay tratadopi qhelqasqaña kashan. Predicayta tukunapajtaj qhepa kaj paginapi rikhurej tapuyta tapurisunman. Chay tapuy nin: “Diospa Reinon kamachimojtin, ¿imaynataj kausay kanqa?”, nispa. Qhepanpi kutejtinchejtaj chaymanta parlarinanchejta nisunman. Kutispataj ¡Diosmanta jamoj sumaj willaykuna! nisqa folletowan chay tapuyman kutichisunman. Chaypajqa chay folletoj 7 yachaqananta ukhuncharisunman. Chay folletoqa estudiosta qallarinapaj ujnin yanapa kashan.

11. ¿Imatataj revistasninchejmanta sumajta yachananchej kasqa?

¹¹ Revistas. Torremanta Qhawaj revista, ¡Rijchʼariy! revistawan mundontinpi waj revistasmanta nisqaqa astawan ruwakun, ashkha parlaykunamantaj traducikun. Chay revistas ashkha suyuspi leekusqanrayku, tapanpi titulosqa tukuy runas Diosmanta yachakuyta munanankupaj jina ruwasqa kashan. Chay revistaswanqa runasta yanapasunman Jehová Diosta kausayninkupi ñaupajman churanankupaj. Chayrayku sumajta yachananchej tiyan sapa revista pikunapajchus ruwasqa kashasqanta.

12. 1) ¿Pikunapajtaj ¡Rijchʼariy! revista ruwasqa kashan? 2) ¿Ima experienciastaj kapusunkichej ¡Rijchʼariy! revistawan predicasqaykichejmanta?

¹² ¡Rijchʼariy! revistaqa ruwasqa kashan Diosmanta pisillata yachaj runaspaj chayri mana Bibliamanta yachaj runaspaj. Ichapis chay runasqa ni imata Bibliamanta yachankuchu chayri mana religionpi confiankuchu manachayri mana reparankuchu Biblia kausayninkupi yanapananta. Chayrayku ¡Rijchʼariy! revistaqa ruwasqa kashan runas Diospi creenankupaj (Rom. 1:20; Heb. 11:6). Chantapis chay revista runasta yanapallantaj Bibliata “Diospa palabranta jina” qhawanankupaj (1 Tes. 2:13). Kay watapaj ¡Rijchʼariy! revistaj titulosnenqa kaykuna kanku: “¿Kusisqa kausakuyta munawajchu?”, “Familiaykipaj 12 yuyaychaykuna”, “Familianchejpi pillapis wañupojtin”.

13. 1) ¿Pikunapajtaj Torremanta Qhawaj revista ruwasqa kashan? 2) ¿Ima experienciastaj kapusunkichej Torremanta Qhawaj revistawan predicasqaykichejmanta?

¹³ Tukuypaj Torremanta Qhawaj revistaqa, ruwasqa kashan Diospi creejkunapaj, Bibliata leejkunapaj ima. Ichapis chay runasqa tumpata Bibliamanta yachankuña, chaywanpis mana sutʼitachu entiendenku. Chayrayku chay revistaqa Bibliaj nisqasninta sutʼinchashan (Rom. 10:2; 1 Tim. 2:3, 4). Kay watapaj tukuypaj Torremanta Qhawaj revistaj titulosnenqa kaykuna kanku: “¿Biblia kay tiempopi yanapawasunmanchu?”, “¿Kausay jamoj tiempopi allinyanmanchu?”, “¿Dios runamanta llakikunchu?”.

14. 1) ¿Imapajtaj chay tawa videos wakichisqa kasqanku? 2) ¿Ima experienciastaj kapusunkichej videosta rikuchisqaykichejmanta?

¹⁴ Videos. Jesuspa tiemponpi carpinterospa herramientasninkoqa, mana kay tiempomanta jinachu karqa. Imajtinchus kay tiempopeqa ashkha herramientas corrientewan funcionan. Por ejemplo, sierra mecánica, taladro, lijadora imaqa, corrientewan funcionan. Noqanchejpatapis mana publicacionesllachu kapuwanchej, manaqa videospis tiyapuwanchej. Tawa videosqa runaswan Bibliata estudianapaj yanapas kanku. Chay videospa sutisninkoqa kaykuna kanku: “¿Imaraykutaj Bibliamanta yachakuna?”, “¿Imaynatá Bibliamanta yachachiyku?”, “¿Imaynataj tantakuykunasniyku?”, “¿Imastataj Jehovaj testigosnin ruwayku?”. Juchʼuy videostaqa predicashaspa runasman rikuchisunman. Chay videosqa ancha kaspa iskay minutosta duran. Aswan jatun videostaqa revisitasninchejman chayri aswan tiempoyojkunaman qhawachisunman. Kay videosqa sumaj wakichisqas kasqankurayku runasta moqʼerichin Bibliamanta astawan yachakunankupaj, tantakuykunamanpis rinankupaj.

15. ¿Runasta yanapanchu parlayninkupi videosta qhaway?

¹⁵ Uj hermanamanta parlarina. Payqa uj señoraman ¿Imaraykutaj Bibliamanta yachakuna? nisqa videota qhawachisqa, yapés parlaypi. Chay señoraqa Micronesia suyumanta kasqa. Videota qhawaytawantaj nisqa: “Mana creeymanchu kay video parlayniypi kasqanta. Llajta masisniypuni kanku”, nispa. Chantá chay señoraqa, hermanaman nisqa: “Internetpi jw.org nisqaman yaykuspa parlayniypi kaj publicacionesta leesaj”, nispa (Hechos 2:8, 11, kikinchay). Estados Unidosmanta hermanamantañataj parlarina. Payqa waj suyupi tiyakoj sobrinonman ¿Imaraykutaj Bibliamanta yachakuna? nisqa videota qhawananpaj apachisqa. Sobrinontaj videota parlayninpi qhawaytawan uj correopi nisqa: “Chay videopeqa repararqani kay sajra mundo Kuraj Supaypa atiyninpi kasqanta. Chaytaqa mana yacharqanichu. Chayrayku hermanosman Bibliamanta yachachinawankuta nerqani”, nispa. Chayta uyareyqa may sumajpuni. Imajtinchus hermanaj sobrinonqa Diosmanta mana willajta saqewanchejchu chaypi tiyakun.

16. 1) ¿Imapajtaj Diosta uyariy wiñay wiñaypajtaj kausanki nisqa folleto wakichisqa kashan? 2) ¿Imapajtaj ¡Diosmanta jamoj sumaj willaykuna! nisqa folleto wakichisqa kashan? 3) ¿Imapajtaj ¿Pikunataj Jehovaj munayninta ruwashanku? nisqa folleto wakichisqa kashan?

¹⁶ Folletos. Diosta uyariy wiñay wiñaypajtaj kausanki nisqa folletoqa, wakichisqa kashan pisillata leeyta yachajkunawan Bibliata estudianapaj.b Chay folletowan runasta estudiachillasunmantaj parlayninkupi mana waj publicaciones kajtin. ¡Diosmanta jamoj sumaj willaykuna! nisqa folletowanpis runasta estudiachillasunmantaj. Chay folletowan Bibliata estudiachiyta qallarinapajqa, runasman 32 paginapi rikhurej yachaqanasta rikuchisunman. Mayqenmantachus astawan yachakuyta munasqankutataj tapurisunman. Chantá ajllasqan yachaqanawan estudiayta qallarisunman. Allin kanman chay jinamanta runasman yachachinapaj kallpachakunanchej. ¿Pikunataj Jehovaj munayninta ruwashanku? nisqa folletoqa, wakichisqa kashan estudiosninchej Diospa llajtanta sumajta rejsinankupaj. Imaynatachus kay folletowan estudiosninchejwan estudiana kasqanta yachanapajqa, marzo de 2017 watamanta Cristiano Kausayninchej tantakuypaj nisqata qhawarisunman.

17. 1) ¿Imapajtaj ¿Imastá Biblia yachachiwanchej? nisqa libro wakichisqa kashan? 2) ¿Imapajtaj ‘Diospa munakuyninpi kallaychikpuni’ nisqa libro wakichisqa kashan? 3) ¿Imajtintaj estudiosninchej iskaynin librosta estudiayta tukunankupuni kasqa?

¹⁷ Libros. Uj runaman uj folletowan Bibliata estudiachishaspaqa, ¿Imastá Biblia yachachiwanchej? nisqa libroman ima ratopis cambiallasunman. Chay libroqa wakichisqa kashan estudiosninchej Bibliata astawan entiendenankupaj. Estudiosninchejwan chay librota estudiayta tukuspa, ñauparillajtinkupunitaj ‘Diospa munakuyninpi kallaychikpuni’ nisqa librowan estudiayta qallarisunman. Chay libroqa wakichisqa kashan estudiosninchej Bibliaj yuyaychaykunasninman jina kausakunankupaj. Estudiosninchejqa, bautizakuspañapis chay iskay librosta estudiayta tukunankupuni tiyan. Ajinamanta estudiosninchejqa creeypi sinchʼita sayanqanku, Diostapis kasukullanqankupuni (Colosenses 2:6, 7 leey).

18. 1) ¿Imastaj tiyapuwanchej sumaj willaykunata yachachimunapaj? 2) ¿Imajtintaj publicacionesta mana runasman jaywaranallachu kasqa?

¹⁸ Jehovaj testigosnenqa sumaj willaykunata runasman yachachinanchejpuni tiyan, wiñay kausayta japʼinankupaj (Col. 1:5; 1 Timoteo 4:16 leey). Chay sumaj willaykunata yachachinapajtaj ashkha yanapas tiyapuwanchej (“Bibliata estudiachinapaj yanapas” nisqata qhawariy). Chay yanapasta sumajta rejsinanchej tiyan. Sapa ujninchej yachananchej tiyan mayqen yanapawanchus runasman yachachinata. Yachanallanchejtaj tiyan maykʼajchus chay yanapawan runasman yachachinata. Chantapis publicacionesta mana pimanpis jaywaranallanchejchu tiyan. Manaqa yachakuyta munajkunallaman jaywananchej tiyan. Imajtinchus “wiñay kausayta japʼinankupaj allin sonqoyoj” kajkunata Jesuspa yachachisqasninman tukuchina kashan. Bibliamanta yachachimunallanchejtaj kashan llampʼu sonqoyojkunaman, Diosmanta yachakuyta munajkunaman ima (Hech. 13:48; Mat. 28:19, 20).