LECCIÓN 54
¿Pitaj “allin kamachi yuyayniyoj”, chanta imatataj ruwan?
Jesusqa “congregacionpa uman” (Efesios 5:23). Kay tiempopitaj Jesusqa ‘allin kamachi yuyayniyojnejta’ kay jallpʼapi yachachisqasninta yanapashan (Mateo 24:45 leey). Chay allin kamachitaqa Jesuspuni churarqa. Chayrayku kamachinanpaj atiyniyoj. Jinapis Cristoj kamachillanpuni, Cristoj hermanosnintataj sirvin. Kaypi yachakusun pichus chay allin kamachi kasqanta, cuidanawanchejpaj imatachus ruwasqantapis.
1. ¿Pitaj “allin kamachi yuyayniyoj”?
Jehová Diosqa llajtanta ñaupajman pusaj uj runanejta chayri uj grupo runasnejta (Malaquías 2:7; Hebreos 1:1). Jesús wañupusqanmanta qhepaman, apóstoles, Jerusalenmanta ancianos ima congregacionta ñaupajman pusarqanku (Hechos 15:2). Kay tiempopipis, ñaupa tiempopi jinallataj Jehová Diosqa llajtanman yachachiykunata mikhunata jina qon. Chantapis Jehovaqa predicacionta ñaupajman pusan uj grupo ancianosnejta, nisunman Diospa Llajtanta Kamachejkunanejta. Chayrayku Biblia nin: “Allin kamachi yuyayniyoj, pitachus [Jesús] churarqa”, nispa (Mateo 24:45). Diospa Llajtanta Kamachejkunaqa espíritu santowan ajllasqa cristianos kanku, suyakushankutaj Cristowan khuska cielomantapacha kamachimuyta. Paykunaqa kay jallpʼapi wañupuytawan cieloman ripunku.
2. ¿Imaynatá allin kamachi yuyayniyoj yachachiykunata qowanchej?
Jesusqa allin kamachi yuyayniyojta churarqa “kamachisninman tiemponpi mikhunata qonanpaj” (Mateo 24:45). Mikhunaqa kallpachasqa kanapaj, sanitos kanapaj yanapawanchej. Ajinallatataj Bibliaj yachachiykunasninpis yanapawanchej Jehová Diosta mana wasanchanapaj, Jesús kamachiwasqanchejtapis juntʼanapaj (1 Timoteo 4:6). Bibliamanta yachachiykunataqa mikhunata jina japʼinchej tantakuykunanejta, jatun tantakuykunanejta, publicacionesnejta, videosnejta ima. Tukuy chaykunaqa yanapawanchej imachus Diospa munaynin kasqanta yachanapaj, yanapallawanchejtaj payman astawan qayllaykunapaj.
ASTAWAN YACHAKUNA
Kaypi yachakusun imaraykuchus ‘allin kamachi yuyayniyojpa’ yanapayninta necesitasqanchejta.
Diospa Llajtanta Kamachejkunaqa, yachachiykunata mikhunata jina qowanchej, kamachiwanchej, yanapawanchej ima.
3. Diospa llajtanqa imatapis sumajta wakichin
Jesusqa Diospa Llajtanta Kamachejkunata churan Jehovaj testigosninta ñaupajman pusananpaj. Ñaupa tiempomanta cristianoswanpis ajinallataj karqa. VIDEOTA qhawariychej.
1 Corintios 14:33, 40 leeriychej, chantá yachakojta tapuriy:
Kay versiculospi leerisqanchejman jina, ¿imaynataj Diospa llajtan kanan tiyan?
4. Allin kamachi yuyayniyojqa predicacionta ñaupajman apan
Ñaupa tiempomanta cristianosqa runasman Diosmanta willajpuni kanku. Hechos 8:14, 25 leeriychej, chantá yachakojta tapuriy:
Ñaupa tiempopi, ¿pikunataj predicacionta ñaupajman apaj kanku?
Pedrowan Juanwan, ¿imatataj ruwarqanku apóstoles nisqankuman jina?
Diospa Llajtanta Kamachejkunaqa predicanallapajpuni tukuy imata wakichinku. VIDEOTA qhawariychej.
Jesusqa predicanapuni kasqanta nerqa. Marcos 13:10 leeriychej, chantá yachakojta tapuriy:
¿Imaraykutaj Diospa Llajtanta Kamachejkuna tukuy imata ruwanku predicakunanpaj?
¿Imaraykutaj ‘allin kamachi yuyayniyojpa’ yanapayninta necesitanchej mundontinpi predicanapaj?
5. Allin kamachi yuyayniyojqa yanapawanchej
Diospa Llajtanta Kamachejkunaqa mundontinmanta cristianosta yanapanku. Paykunaqa ñaupa tiempomanta Diospa llajtanta kamachejkuna jina ruwanku niraj ima kamachiytapis qoshaspa. Hechos 15:1, 2 leeriychej, chantá yachakojta tapuriy:
Ñaupa tiempomanta cristianos, ¿imapitaj mana uj yuyayllachu karqanku?
Pablowan, Bernabewan, waj cristianoswan ima, ¿pikunamantaj rerqanku chay problemamanta parlarej?
Hechos 15:12-18, 23-29 leeriychej, chantá yachakojta tapuriy:
Ñaupa tiempomanta apostoleswan ancianoswan, ¿imastataj ruwarqanku uj problemata allinchanankupaj? (12, 15, 28 versiculosta qhawariy).
Hechos 15:30, 31; 16:4, 5 leeriychej, chantá yachakojta tapuriy:
Ñaupa tiempomanta cristianos, ¿imaynatá japʼikorqanku ancianoswan apostoleswan kamachisqankuta?
¿Kasukusqankurayku Jehová bendicerqachu?
2 Timoteo 3:16; Santiago 1:5 leeriychej, chantá yachakojta tapuriy:
Kay tiempomanta Diospa Llajtanta Kamachejkuna, ¿imatá ruwanku Jehovawan yanapachikunankupaj?
WAKIN RUNAS NINKU: “Diospa Llajtanta Kamachejkunata kasukoyqa runasta qhatiy jinallataj”, nispa.
¿Ajinachu kanman, imatá qan yuyanki?
¿IMASTÁ YACHAKUNCHEJ?
Kaypi yachakunchej Diospa Llajtanta Kamachejkuna “allin kamachi yuyayniyoj” kasqanta, Cristotaj ajllasqanta. Paykunaqa tukuy cristianosman kamachiykunata, yachachiykunata ima mikhunata jina qonku.
Yuyarikunapaj
¿Pitaj ajllarqa ‘allin kamachi yuyayniyojta’?
Diospa Llajtanta Kamachejkuna, ¿imaynatá cuidawanchej?
¿Creenkichu Diospa Llajtanta Kamachejkuna “allin kamachi yuyayniyoj” kasqanta?
ASTAWAN YACHAKUNAYKIPAJ
Diospa Llajtanta Kamachejkuna, ¿imastataj ruwanku? Chayta yachanaykipaj kayta leeriy.
Diospa Llajtanta Kamachejkuna sumaj yachachiykunata mikhunata jina qowasqanchejmanta yachanaykipaj kay videota qhawariy.
Diospa Llajtanta Kamachejkuna, ¿imatataj ninku Jesús chay llankʼayta qosqanmanta? Chayta yachanaykipaj kay videota qhawariy.
Reunionespi, jatuchaj tantakuykunapipis sutʼita reparanchej Jehovaqa llajtanta kamachejkunata yanapashasqanta. Chaymanta yachanaykipaj kay videota qhawariy.