Wajkunawan allinta apanakunapaj sumaj yuyaychaykuna

‘Wajkuna contraykichejpi imata ruwajtinkupis, tukuy sonqo perdonanakullaychejpuni’ (COLOSENSES 3:13).

Tukuy pantanchejpuni, chayrayku maykʼajllapis pejpa sonqonta nanachisunman chayri pipis sonqonchejta nanachiwasunman. Jina kajtin, wajkunata perdonayta, wajkunapis perdonanawanchejta necesitanchej. Perdonajtinchejqa sonqonchejta nanacherqa chay runata niña sajra ñawiwanchu qhawanchej. Mana “sajramanta sajrallawantaj” kutichinchejchu, nitaj pantasqasninta uyanpi nipunchejchu (Romanos 12:17). Chaywanpis imatachus ruwawasqanchejta mana qonqayta atillanchejchu chayqa, allin kanman sapallanchejpi paywan parlananchej, respetowantaj. Parlaspataj mana atipaytapunichu munana, astawanpis paywan allinyakuyta maskʼana (Romanos 12:18).

“Kʼumuykukoj sonqo kaspa, wajkunata qankunamanta aswan kurajta jina qhawaychej” (FILIPENSES 2:3).

Kʼumuykukoj sonqo kasun, wajkunata respetasun ima chayqa, noqanchejwan kayta munanqanku. Paykuna reparanqanku kʼachas kasqanchejta, paykunamanta interesakusqanchejta ima. Chantapis reparanqanku ni jaykʼaj munaspapuni imatapis contrankupi ruwananchejta. Chaywanpis sichus jatunchakunchej, munasqallanchejtataj ruwakunanta maskʼanchej chayqa, chʼajwasta rikhurichisunchej. Chayta ruwasun chayqa wajkuna mana noqanchejwan kayta munanqankuchu, pisi amigosniyoj chayri sapallanchej rikhurisun.

‘Diosqa tukuy runasta uj rejllata qhawan. Payqa allinpaj qhawan mayqen nacionllamantapis payta manchachikojta, cheqa kajtataj ruwajta’ (HECHOS 10:34, 35).

Diosninchejqa ima suyumanta kajtinchejpis, ima parlayniyoj kajtinchejpis, qhapaj chayri wajchas kajtinchejpis, imayna rijchʼayniyoj kajtinchejpis, tukuyta uj rejllata qhawawanchej. Diosqa “uj runallamanta tukuy laya runasta miracherqa” (Hechos 17:26). Chayrayku nisunman tukuypis uj familia jina kasqanchejta. Tukuy runasta uj rejllata qhawasun chayqa, paykunawantaj kʼachas kasun chayqa paykuna kusikonqanku, noqanchejpis kusikusun, Diostapis kusichisun.

‘Llampʼu sonqoyoj kaywan pʼachallikuychej’ (COLOSENSES 3:12).

Llampʼu sonqo kajtinchej, mana usqhayta phiñakojtinchej ima wajkuna noqanchejwan kaspa kusikonqanku, imatapis willariwasun. Chantapis mana phiñakunanchejta yachasqankurayku wakin kutis yuyaychariwasun. Pillapis noqanchejpaj phiñakunman chayqa allillanmanta kutichejtinchej phiñakuyninta thasnonqa. Proverbios 15:1 nin: “Miskʼi simiwan kuticheyqa phiñakuyta thasnun; sinchʼi palabraswan kutichiyrí astawan phiñarichin”, nispa.

“Aswan kusiy wajman qoriy, qorichikunamanta nisqaqa” (HECHOS 20:35).

Ashkha runasqa paykunallapi chantá ashkha imasniyoj kayllapi yuyanku. Jinapis qorikoj runas kasun chayqa aswan kusisqa kasun (Lucas 6:38). Qorikoj runasqa aswan kusisqa kanku, imaraykuchus waj imasmanta nisqaqa runa masinkuta astawan munakunku. Wajkuna paykunaman imatapis qorejtinkutaj agradecekunku (Colosenses 3:15). Kaypi piensariy: ¿Piwan astawan kayta munawaj? ¿Payllapi yuyaj, mana agradecekoj runawanchu? Chayri, ¿qorikoj, agradecekoj runawanchu? Chayrayku imaynachus runas noqanchejwan kanankuta munanchej, ajinallataj noqanchejpis paykunawan kana (Mateo 7:12).