Diospa qhasilla kʼacha yanapayninrayku kacharichisqa kanchej

1, 2. ¿Imaynatá Romanos 5:12 yanapawasunman?

ROMANOS 5:12 nin: “Uj runanejta jucha kay pachaman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku”, nispa. Chay versiculotaqa sumajta rejsinchej, runasman Bibliamanta yachachishaspapis oqharinchejpuni.

² Chay versiculoqa, ¿Imatapunitaq Biblia yachachin? chantá ¿Imatá Biblia yachachin? nisqa librospi ashkha kutista rikhurin. Chay librospa 3, 5, 6 yachaqanasninta wawasninchejwan chayri waj runaswan estudiashaspa, ichá Romanos 5:12 versiculota leeripunchejpuni. Chay versiculowan sutʼinchasunman: imaraykuchus Jallpʼa mana uj paraisochu kasqanta, imaraykuchus Jesús wañunanta necesitasqanchejta chayri imaraykuchus wañuy kasqanta. Chaywanpis chay versiculoqa yanapallawasunmantaj, Jehovaman qayllaykusqanchejmanta astawan agradecekunapaj, payta astawan kusichinapaj, imatachus qonawanchejta nisqanta suyakunapajpis.

 3. ¿Imatá tukuyninchej yuyarikunanchej tiyan?

³ Tukuyninchej juchasapas kanchej, chayraykutaj sapa día pantanchej. Jinapis Jehovaqa khuyakoj Dios. Payqa yachan pantaj runas kasqanchejta, perdonanawanchejpajtaj wakichisqa kashan (Sal. 103:13, 14). Jesusqa nerqa, Diosmanta mañakunata juchasninchejta pampachananpaj (Luc. 11:2-4). Jehová juchasninchejta perdonan chayqa, manaña chay juchaspi yuyanachu tiyan. Qhawarina imatachus Jehová perdonanawanchejpaj ruwasqanta.

4, 5. 1) ¿Imataj Romanos 5:12 entiendenapaj yanapawanchej? 2) ¿Ima niyta munan “qhasilla kʼacha yanapay”?

⁴ Romanos libroqa, astawanqa capítulo 6, Romanos 5:12 versiculota entiendenapaj yanapawanchej. Chayta entiendespaqa, imaynatachus Jehová juchasninchejta perdonawasqanchejta yachasun. Kinsa kaj capituloqa ‘tukuy runas juchallikusqankuta’ nin. Chayrayku Pablo nerqa: “Diospa qhasilla kʼacha yanapayninrayku runasqa cheqan runaspaj qhawasqa kanku, Cristo Jesusnejta juchamanta kacharichisqa kasqankurayku”, nispa (Rom. 3:23, 24). “Qhasilla kʼacha yanapay” ninapaj, griegopi uj palabrata oqharikorqa. Chay palabrataj niyta munan, imallatapis may kʼacha sonqowan ruway, mana imata suyaspallataj.

⁵ Uj yachayniyoj runa nisqanman jina, chay palabraqa oqharikun, imatachus Dioswan Cristowan runasta wañuymanta, juchamanta ima salvanankupaj ruwasqankumanta. Kunanqa imatachus Dios noqanchejrayku ruwasqanta yachakusun. Yachakullasuntaj imaynatachus Diospa qhasilla kʼacha yanapaynin kay tiempopi yanapawasqanchejta, jinallataj aswan qhepapaj suyakuyta qowasqanchejtapis.

 6. ¿Pikunataj Diospa qhasilla kʼacha yanapayninwan yanapachikunkuman, chantá imatá suyakuyta atinku?

⁶ Adán juchallikusqanrayku, tukuyninchej juchasapas kanchej, wañunchejtaj. Chayrayku Biblia nin: “Uj runaj juchanraykulla wañuy atiyniyoj karqa”, nispa. Jinapis Jehová Diosqa qhasilla kʼacha yanapayninta qowarqanchej. Chayrayku tukuy runasta salvananpaj uj runata kachamorqa, “chaytaj Jesucristo” (Rom. 5:12, 15, 17). “Ajinallatataj uj runa kasukusqanrayku ashkhas cheqan runapaj qhawasqa kanqanku”. Paykunataj wiñay kausayta suyakuyta atinku “Señorninchej Jesucristonejta”.

 7. ¿Imaraykú Jesús noqanchejrayku wañusqanmanta may agradecesqa kashanchej?

⁷ Kaypi tʼukurina: Jehovaqa mana Wawanta noqanchejrayku wañunanpaj qonanchu karqa. Jinapis Jehovaqa may kʼacha kasqanrayku, juchamanta, wañuymanta ima salvanawanchejpaj Wawanta kachamorqa. Jehovawan Jesuswan imatachus noqanchejrayku ruwasqankutaqa, qhasillamanta japʼishanchej. Mayta agradecekunchej Dios perdonawasqanchejmanta, wiñaypaj kausakuyta atisqanchejmanta ima, ¿icharí? Chayrayku Diosman agradecesqa kasqanchejta kausayninchejwan rikuchina.

 8. ¿Imatataj mana yuyananchejchu tiyan?

⁸ Jehovaqa tukuy juchasninchejta perdonayta atin. Jinapis ni jaykʼaj Diospa qhasilla kʼacha yanapayninta tijraspa sajra kajta ruwanachu, nitaj “Jehovaqa perdonallawanqa”, nispa juchallikunachu. Ñaupa tiempopi wakin apóstoles kausashajtinkupis, wakin cristianosqa ajinata yuyarqanku (Judas 4 leey). Kay tiempopipis pisimanta pisi paykuna jina pantasqata yuyayta qallarisunman. Chayrayku sumajta qhawarikunanchej tiyan, mana wajkuna jina yuyanapaj.

9, 10. ¿Imaynatá Pablo, waj cristianos ima juchamanta kacharichisqa karqanku?

⁹ Ñaupa tiempomanta wakin cristianosqa “Jehová perdonallawanqa”, nispa juchallikushallarqankupuni. Pablotaj, ajinata yuyaspa pantashasqankuta nerqa. Chantapis chay jina yuyayta qhesachanankuta nerqa. ¿Imaraykú? Pablo nerqa: “Juchapajqa wañorqanchejña”, nispa (Romanos 6:1, 2 leey). ¿Imatá chaywan niyta munasharqa?

¹⁰ Jesuspa wañuyninrayku, Diosqa Pablota, tiemponmanta cristianostawan juchasninkumanta perdonarqa. Jehovaqa paykunata atiyninwan ajllarqa wawasninta jina rejsikapunanpaj. Cheqa sonqollapuni kajtinkoqa, cielopi kausakunanku karqa, Jesuswan khuskataj kamachinkuman karqa. Jinapis paykunaqa Jallpʼapiraj kausakusharqanku. Chantá, ¿imaraykutaj Pablo “juchapajqa wañorqanchejña” nispa nerqa? Pabloqa uj kikinchaywan sutʼincharqa, kausayninku manaña ñaupajta jinachu kasqanta. Chantá nerqa Jesús wañusqantawan, mana rikukoj cuerpoyoj, ni jaykʼaj wañunanpajtaj kausarichisqa kasqanta. Chayrayku “wañoyqa paypaj manaña atiyniyojchu”. Ajinallataj cristianoswanpis karqa, paykunaqa wañusqa jinaña karqanku. Imaraykuchus niña sajra munayninkuman jinachu ruwasharqanku. Chayrayku kausayninkoqa niña ñaupajta jinachu karqa. Chaymantapachataj Diospa munayninman jina kausakunankupaj kallpachakorqanku. Paykunaqa “juchapaj wañusqa” kasharqanku, Diospajtaj kausasharqanku “Cristo Jesús Señorninchejpi” (Rom. 6:9, 11).

11. ¿Imaynatá kay tiempomanta cristianos juchapaj wañusqa kanchej?

¹¹ Noqanchejrí, ¿juchapaj wañusqallatajchu kanchej? Ichapis ñaupajtaqa juchallikorqanchej, imatachus Jehová yuyasqanta mana reparaspalla. Arí, qokorqanchej “millay kajman, sajra kajmampis”, nisunman “juchaj wata runasnin” karqanchej (Rom. 6:19, 20). Bibliata estudiasparí, imaynatachus Jehová kausananchejta munasqanta yachakorqanchej. Chayrayku ñaupa kausayninchejta saqespa, Diosman kausayninchejta jaywarqanchej, bautizakorqanchejtaj. Mayta munarqanchej Jehovata kasukuyta, munasqanman jina kausakuytapis. Ajinapi “juchamanta kacharichisqa” karqanchej, “cheqan kajpa kamachisninman[taj]” tukunchej (Rom. 6:17, 18).

12. ¿Imatataj sapa uj ajllananchej tiyan?

¹² Sapa ujninchej uj imatawanraj ruwananchej tiyan. Pablo nerqa: “Amaña saqeychejchu juchata wañoj cuerpoykichejpi munayninta ruwajta, chayta kasunaykichejpaj”, nispa (Rom. 6:12). Noqanchejmanta kashan aychaj sajra munayninchejwan atipachikunanchej chayri mana atipachikunanchejqa. Tapurikunachej: “¿Saqenichu sajra munayniy wiñananta atipanawankama? Chayri, ¿chay ratochu chinkachini?”, nispa. Diospa qhasilla kʼacha yanapayninta tukuy sonqo agradecekunchej chayqa, tukuy imata Payta kusichinapaj jina ruwasunchej.

13. ¿Imaynatá yachanchej cheqan kajta ruwayta atisqanchejta?

¹³ Ñaupa tiempopi, Corintomanta wakin runasqa kay jina karqanku: suwas, qharipura jinanakojkuna, qhenchachakojkuna, llulla diosesta yupaychajkuna, machajkuna ima. Jinapis Jehovata rejsispa, payta munakusqankurayku ñaupa kausayninkuta saqerqanku. Sajra imasta ruwasqankumantataj pʼenqakorqanku (Rom. 6:21; 1 Cor. 6:9-11). Romamanta cristianospis kikillantataj ruwananku karqa. Pablo paykunaman nerqa: “Amallataj cuerpoykichejta juchaman jaywaychejchu chaynejta sajra imasta ruwanapajqa. Astawanqa qankunaqa wañusqasmanta kausarimusqa jina cuerpoykichejta Diosman jaywaychej, chaynejta cheqan kajta ruwanapaj”, nispa (Rom. 6:13). Pabloqa yacharqa Romamanta cristianos cheqan kajta ruwanankuta. Ajinamantataj Diospa qhasilla kʼacha yanapayninta japʼinallankutapuni.

14, 15. ¿Imastá tapurikusunman?

¹⁴ Kay tiempopipis, ichá wakin hermanosninchejqa Corintomanta runas jinallataj kausarqanku. Jinapis Jehovata rejsiytawan, ñaupa kausayninkuta saqerqanku, “llimphuchasqa[taj]” karqanku. Jehovata kusichinapajqa tukuyninchej chayta ruwarqanchej. Kunanpis rikuchillaytapuni munanchej Diospa qhasilla kʼacha yanapayninta agradecekusqanchejta. Chayrayku sajra munayninchejta atipanapaj kallpachakuna, tukuy kausayninchejwantaj Jehovata sirvina.

¹⁵ Corintopi wakin runasqa jatun juchasta ruwarqanku, chaykunatataj noqanchejqa mana ruwasunchu. Imaraykuchus chay imasta ruwaspaqa, mana suyasunmanchu Jehová qhasilla kʼacha yanapayninwan yanapanawanchejta, perdonanawanchejta ima. Jinapis runasqa wakin ruwaykunata mana juchapajchu qhawanku. ¿Imatá chay ruwaykunamanta nisunman? ¿Tukuy atisqanchejtachu kallpachakusun Jehovata tukuy imapi kasukunapaj? (Rom. 6:14, 17).

16. 1) ¿Kay 1 Corintios 6:9-11 parlasqan juchasllatachu mana ruwana tiyan? 2) ¿Imaynatá chayta yachanchej?

¹⁶ Apóstol Pablopi tʼukurina. Pay qhelqarqa: “Noqarí aychamanta kaspa, juchaman qosqa kani. Imatachus ruwasqayta mana entiendenichu, imaraykuchus mana ruwanichu imatachus munasqayta. Astawanqa imatachus chejnini, chayta ruwani”, nispa (Rom. 7:14, 15). Pabloqa 1 Corintios 6:9-11 parlasqan juchasta manaña ruwasharqachu. Jinapis pantasqallantapuni nerqa. Payqa Jehovata kusichiyta munarqa, chayrayku sajra imasta mana ruwananpaj, mayta kallpachakorqa (Romanos 7:21-23 leey). Noqanchejpis Pablo jina ruwanachej, tukuy atisqanchejtataj kallpachakuna Jehovata kasukunapaj.

17. ¿Imaraykú cheqan kajta ruwayta munanchej?

¹⁷ Jehovata yupaychanapajqa cheqan kajta ruwananchej tiyan (Proverbios 14:5; Efesios 4:25 leey). Mana Satanás jinachu kayta munanchej. “Payqa llulla, llullakuypa tatantaj”. Yuyarikuna, Ananiaswan warminwanqa llullakusqankurayku wañorqanku. Chayrayku noqanchejqa mana llullakunchejchu (Juan 8:44; Hech. 5:1-11). Jinapis, ¿llullakuyllamantachu jarkʼakunanchej tiyan? Mana. Diospa qhasilla kʼacha yanapayninta tukuy sonqo agradecekunchej chayqa, tukuy imapi cheqan kajta ruwasunchej.

18, 19. ¿Imaynatá cheqan kajta ruwasqanchejta rikuchinchej?

¹⁸ Uj runaqa mana llullakuspapis, mana cheqan kajtachu ruwashanman. Jehovaqa israelitasta nerqa: “Ama suwaychejchu. Ama llullakuychejchu, nitaj chʼawkiyanakuychejchu”, nispa. ¿Imaraykú chayta ruwananku karqa? Jehová nerqa: “Qankunaqa juchamanta tʼaqasqa may santos kaychej, imaraykuchus noqa Señorniykichej Tata Diosqa may santomin kani”, nispa (Lev. 19:1, 2, 11). Mana llullakuspapis, wajkunata pantasqata yuyachinchej chayqa, mana cheqan kajtachu ruwashanchej.

¹⁹ Kaypi tʼukurina. Uj runaqa patronninta chayri compañerosninta nin, doctorman rinanrayku aswan ñaupajta llankʼayninmanta ripunanta. Jinapis chay runaqa mana chayraykuchu ripushan. Payqa astawan chayta ruwashan waj ladoman rinanrayku. Payqa jampita rantikojlla chayri doctorman pagajlla rishan. Chay runa, ¿cheqan kajtachu ruwashan chayri llullakushanchu? Chay runaqa wajkunata pantasqata yuyacherqa. Wakin kuti runasqa llullakunku imallatapis japʼinankupaj chayri mana jasutʼisqa kanankupaj. Chaywanpis noqanchejqa Jehovata kasukunchej. Pay nerqa: “Ama llullakuychejchu”, nispa. Arí, Jehovapaj tʼaqasqa kasqanchejrayku cheqan kajta ruwayta munanchej (Rom. 6:19).

20, 21. Diospa qhasilla kʼacha yanapayninta agradecekunchej chay, ¿imastawan mana ruwasunchu?

²⁰ Noqanchejqa mana qhenchachakunchejchu, nitaj machanchejchu, nillataj waj jatuchaj juchastapis ruwanchejchu. Mana chayllachu, imastachus Jehová chejnisqantaqa, nillataj ruwayta munanchejchu. Chayrayku mana khuchichakuyllatachu qhesachanchej, manaqa millay imaswan sonqonchejta kusirichiytapis. Jinallataj mana machayllatachu sajrapaj qhawanchej, manaqa yuyayninchejta chinkachinakama tomaytapis. Ichapis chay sajra ruwaykunata saqenapaj, mayta kallpachakunanchej kanqa. Jinapis atipayta atisunman.

²¹ Pablo nerqa: “Amaña saqeychejchu juchata wañoj cuerpoykichejpi munayninta ruwajta, chayta kasunaykichejpaj”, nispa. Chay nisqanman jina ruwanapaj kallpachakuna (Rom. 6:12; 7:18-20). Arí, imapipis pantasunpuni. Jinapis sajra imasta mana ruwanapaj kallpachakuyta atisunman. Ajinamanta Jehovaman, Jesusman ima agradecekusqanchejta rikuchisunchej, qhasilla kʼacha yanapayninkuta qowasqanchejmanta.

22. ¿Ima bendiciontataj japʼisunchej, Diospa qhasilla kʼacha yanapayninmanta agradecekusqanchejta rikuchejtinchej?

²² Jehovaqa qhasilla kʼacha yanapayninrayku juchasninchejta perdonawarqanchej, perdonallawasunpunitaj. Chayrayku, ¡may agradecesqas kashanchej! Mayta kallpachakunallapuni chejnisqan imasta qhesachanapaj, wajkuna mana juchapajchu qhawajtinkupis. Chayta ruwasun chay, ¿ima bendiciontataj japʼisunchej? Pablo nerqa: “Juchaj kamachiyninmanta kacharisqas kaspaqa, Diospa kamachisninña kankichej. Chaynejtataj, llimphu kausayta poqoyta jina tarinkichej; chaypa tukukuynintaj wiñay kausay”, nispa (Rom. 6:22, Qheshwa Biblia).