“Espíritoj munaynimpi yuyayrí kausayman pusan, sonqo tiyaykuymantaj”

1, 2. ¿Imaraykú ajllasqa cristianos Romanos 8 capitulomanta yachayta munanku?

JESUSPA Wañuyninta Yuyarinapaj tiempopi, ichapis Romanos 8:15-17 versiculosta leerqanchej. Chay versiculospi sutʼinchakun, imaynatachus uj cristiano yachan cielopi kausananpaj ajllasqa kasqanta. Romanos 8:1 nin, ajllasqa cristianos “Cristo Jesuspi” ujchasqa kasqankuta. Jinapis Romanos capítulo 8, ¿ajllasqa cristianosllapajchu qhelqakorqa? Chayri, ¿Jallpʼapi kausakuyta suyakojkunatapis yanapanmanchu?

² Romanos 8 capituloqa, ajllasqa cristianospajpuni qhelqakorqa. Paykunaqa “Espirituta” japʼinku, suyakunkutaj “Diospa wawasnimpaj rejsisqa kayta”, cuerponkumanta “kacharichisqa” kaytapis (Rom. 8:23). Aswan qhepamanqa cielopi Diospa wawasnin kanqanku. Jesuspa wañuyninraykutaj, Jehovaqa juchasninkuta perdonarqa. Chantapis wawasnin kanankupaj, paykunata cheqan runaspaj qhawarqa (Rom. 3:23-26; 4:25; 8:30).

 3. Jallpʼapi kausakuyta suyakojkuna, ¿imaraykú Romanos 8 capitulomanta yachakunallankutaj tiyan?

³ Apóstol Pabloqa, Romanos libroj qallariyninpi uj runamanta qhelqarqa. Chay runa cielopi kausakunanpaj mana ajllasqachu kajtinpis, Jehovaqa payta cheqan runapaj qhawarqa. Chay runaqa Abraham karqa. Payqa sinchʼi creeyniyoj karqa, Jesús niraj kausayninta qoshajtintaj kausakorqa (Romanos 4:20-22 leey). Kunanpis Jehovaqa creeyniyoj cristianosta cheqan runapaj qhawayta atillantaj. Paykunaqa Jallpʼapi wiñaypaj kausakuyta suyakushanku. Romanos 8 capitulopi nisqanqa, paykunatapis yanapallanmantaj.

 4. Romanos 8:21 versiculota leespa, ¿imatá tapurikuna tiyan?

⁴ Romanos 8:21 versículo rikuchiwanchej, Jehovaqa paraisota sayarichinantapuni, runastapis juchamanta, wañuymanta ima kacharichinanta. Chay versículo nisqanman jina, runasqa “Diospa kacharichisqa wawasninwan khuska jatun kusiypi” kanqanku. Chayrayku sapa uj tapurikuna: “¿Paraisopi kausakusajchu?”, nispa. Qhawarina imatachus chaypaj ruwananchej kasqanta.

 5. ¿Imamantataj Pablo parlan Romanos 8:3-13 versiculospi?

⁵ (Romanos 8:3-13 leey). Pabloqa Romanos 8 capitulopi iskay laya runasmanta parlarqa. Uj laya runasqa “espirituman jina” kausaj kanku, ujkunataj “aychaman jina”. Wakin runasqa yuyanku, Pablo cristianosmanta, mana cristiano kajkunamantawan parlashasqanta. Jinapis payqa cristianosman qhelqasharqa, pikunachus ‘Diospaj tʼaqasqa kanankupaj wajyasqa karqanku’, chaykunaman (Rom. 1:7). Chayrayku aychaman jina kausajkuna, espirituman jina kausajkunapis, cristianos karqanku. Jinapis, ¿imapitaj mana kikinchu karqanku?

6, 7. 1) ¿Imasmanta parlanapajtaj Biblia “aycha” palabrata oqharin? 2) Romanos 8:3-13 versiculospi, ¿imamanta parlanapajtaj “aycha” palabrata oqharikun?

⁶ Bibliaqa “aycha” palabrata ashkha imasmanta parlanapaj oqharin. Wakin kutisqa aycha cuerponchejmanta parlashan (Rom. 2:28; 1 Cor. 15:39, 50). Wakin kutistaj familiaresmanta parlanapaj oqharin. Chayrayku Jesusmanta parlaspa nin: “Payqa aychaman jina Davidpa mirayninmanta karqa”, nispa. Pablopis judiosmanta nerqa: “Aychaman jina ayllusniy kanku”, nispa (Rom. 1:3; 9:3).

⁷ Pabloqa Romanos 8:3-13 versiculospi “aychaman jina” kausaymanta parlarqa. ¿Imatá chaywan niyta munarqa? Chayta entiendenapaj Romanos 7:5 versiculota ukhuncharina. Pablo chaypi qhelqarqa: “Aychanchejpa munaynimpi kashaspaqa, leyqa cuerponchejpi sajra munayta rijchʼaricherqa, chaytaj wañuyta apamun”, nispa. Chay versículo sutʼinchasqanman jina, “aychaman jina” kausajkunaqa sajra munaynillankupi yuyanku, chayllatataj ruwanku.

 8. ¿Imaraykutaj Pablo cristianosta nerqa, ama “aychaman jina” kausanankuta?

⁸ ¿Imaraykú Pablo ajllasqa cristianosta nerqa, ama “aychaman jina” kausanankuta? Chantá, ¿imaraykutaj kay tiempomanta tukuy cristianos chay yuyaychayta kasukunanchej tiyan? Imaraykuchus Diospa kamachisninmanta pillapis, munayninta ñaupajman churayta qallarinman. Pabloqa Romapi wakin hermanosmanta nerqa: “Quiquin munaynincuta sajsachincu”, nispa (Rom. 16:17, 18, Dios Parlapawanchej). Chaywanqa niyta munasharqa, wakenqa qhariwarmi jina puñuykuyta, mikhunata chayri waj imasta aswan ñaupajman kausayninkupi churashasqankuta (Fili. 3:18, 19; Jud. 4, 8, 12). Sutʼincharinapaj, Corintomanta uj cristianoqa “madrastranwan tantaykukuspa kawsashasqa” (1 Cor. 5:1). Chayrayku Pabloqa ñaupa tiempomanta cristianosman yuyaycharqa, ama “aychaman jina” kausanankuta (Rom. 8:5, 6).

 9. ¿Imatataj Romanos 8:6 versículo mana juchachanchu?

⁹ Pabloj yuyaychasqanqa, kay tiempopipis yanapallawanchejtaj. Uj cristianoqa Diosta unaytaña sirvispapis, “aychaman jina” kausayta qallarinman. Pablo imatachus Romanos 8:6 versiculopi nisqanman jina, ¿juchachu mikhunapi, trabajopi, kusirikuypi chayri munanakuypi yuyay? Mana. Chay imastaqa ruwanchejpuni. Jesuspis mikhurikorqa, wajkunatapis mikhucherqa. Chantapis samarikunan kasqanta yacharqa. Pablotaj casarasqasta yuyaycharqa, qhariwarmi jina puñuykunankutapuni.

10. Pablo “aychaj munaynimpi yuyayqa” nisqan, ¿ima niyta munan?

¹⁰ Pablo “aychaj munaynimpi yuyayqa” nisqan, ¿ima niyta munan? Pablo griegopi oqharisqan palabraqa, niyta munan uj imapi manchayta yuyay. Uj yachayniyoj runa sutʼinchasqanman jina, chayta ruwaj runaqa “munaynillanpi yuyan, chayllamanta parlan”, chayman jinataj kausan.

11. ¿Imastataj kausayninchejpi ñaupajman churayta qallarisunman?

¹¹ Roma llajtamanta cristianosqa reparakunanku karqa, imaspichus astawan yuyasqankuta. ¿‘Aychaj imasnillanpichu’ yuyasharqanku? Kunanpis imastachus aswan ñaupajman churasqanchejpi tʼukurinanchej tiyan. ¿Imamantataj astawan parlanchej? ¿Imastataj astawan ruwayta munanchej? Wakin runasqa kay imasllapi yuyanku: imaymana vinosta llamiypi, wasisninkuta kʼachanchaypi, mosoj ropata rantikuypi, qolqeta mirachiypi, waj lugaresta rejsimuypi ima. Chay ruwaykunaqa mana juchachu, chaykunatataj ruwanchejpuni. Uj kuti Jesuspis casarakupi yakuta vinoman tukucherqa. Apóstol Pablotaj Timoteoman onqoyninmanta sanoyapunanpaj, “uj chhika vinota ujya[nanta]” nerqa (1 Tim. 5:23; Juan 2:3-11). Chaywanpis mana vinotachu kausayninkupi ñaupajman churarqanku. ¿Noqanchejrí? ¿Imatá kausayninchejpi ñaupajman churanchej?

12, 13. ¿Imaraykutaj reparakunanchej tiyan imaspichus yuyasqanchejta?

¹² Pablo nerqa: “Aychaj munaynimpi yuyayqa wañuyman pusan”, nispa (Rom. 8:6). ¿Imatá chaywan niyta munarqa? “Aychaman jina” kausaspaqa, Jehovamanta karunchakusunman, wiñay kausaytataj niña japʼisunmanchu. Chaywanpis mana ajinapi rikukunapaj, kausayninchejta cheqanyachiyta atisunman. ¿Corintopi khuchichakoj runamanta yuyarikunkichu, pichus congregacionmanta qharqochikorqa chaymanta? Payqa kausayninta cheqancharqa, sajra munaynintataj niña kasorqachu. Chantá watejmanta Jehovata llimphu sonqowan yupaycharqa (2 Cor. 2:6-8).

¹³ Chay runaqa ancha millaytapuni kausarqa, aychaj sajra munayninta ruwaspa. Jinapis kausayninta cheqancharqa. Chayrayku kay tiempopi, pillapis Diosta kasukunanmanta sajra munayninta kasuyta qallarishan chayqa, kausayninta cheqanchayta atinman. Pabloj yuyaychasqanqa noqanchejtapis yanapawasunman, kausayninchejpi imallatapis cheqanchanapaj.

14, 15. 1) ¿Imapi yuyananchejtataj Pablo niwanchej? 2) ¿Imataj mana niyta munanchu “espíritoj munaynimpi” yuyay?

¹⁴ Pablo “aychaj munayninpi” yuyaspa imapichus rikukunanchejmanta parlaytawan, nerqa: “Espíritoj munaynimpi yuyayrí kausayman pusan, sonqo tiyaykuymantaj”, nispa. Chayqa uj sumaj tʼinka, ¿icharí?

¹⁵ “Espíritoj munaynimpi yuyay[qa]”, mana niyta munanchu Jehovallamanta chayri Bibliallamanta parlay, nitaj chaykunallapi yuyaychu. Ñaupa tiempomanta cristianospis, tukuy runas jinallataj kausakorqanku. Paykunaqa mikhoj, ujyaj kanku. Chantapis casarakoj kanku, familiayoj, llankʼayniyoj ima karqanku (Mar. 6:3; 1 Tes. 2:9).

16. ¿Imatataj Pablo kausayninpi aswan ñaupajman churarqa?

¹⁶ Pablowan ñaupa tiempomanta cristianoswanqa, mana ruwanasninkutachu kausayninkupi ñaupajman churarqanku. Yachanchej jina, Pabloqa toldosta ruwaspa kausakoj. Jinapis mana trabajontachu aswan ñaupajman churarqa, manaqa Jehová Diosta sirviyta. Chayrayku Diosmanta runasman willay, yachachiy ima, kausayninpi aswan ñaupajpi karqa (Hechos 18:2-4; 20:20, 21, 34, 35 leey). Romamanta hermanosqa Pablo jina ruwananku karqa. Noqanchejpis pay jinallataj ruwananchej tiyan (Rom. 15:15, 16).

17. “Espíritoj munaynimpi yuya[sun]” chay, ¿imastá Jehová qowasun?

¹⁷ Jehovata sirviyta ñaupajman churasunchej chay, ¿imaynataj kausayninchej kanqa? Romanos 8:6 nin: “Espíritoj munaynimpi yuyayrí kausayman pusan, sonqo tiyaykuymantaj”, nispa. Chayqa niyta munan, Jehovaj atiyninwan yanapachikunata pay jina yuyanapaj. Jehovaqa kay tiempopi kusisqa, sonqo juntʼasqataj kausakunanchejta niwanchej, aswan qhepamantaj wiñay kausayta qonawanchejta.

18. “Espíritoj munaynimpi” yuyay, ¿imaynatá sonqo tiyasqa kanapaj yanapawanchej?

¹⁸ ¿Imatá Pablo niyta munasharqa, ‘espiritoj munayninpi yuyay’ sonqo tiyaykuyman pusasqanta nispa? Tukuypis sonqo tiyasqa kausakuyta munanku, jinapis pisi runaslla ajinata kausakunku. Chaywanpis noqanchejqa Jehová yanapawasqanchejrayku, sonqo tiyasqas kausakunchej. Chayrayku familianchejwan, hermanoswanpis allinta kausakuyta atinchej. Jinapis pantaj runas kasqanchejrayku, wakin kutisqa hermanosninchejwan phiñanakusunman. Ajinapi rikukuspaqa, Jesuspa kamachisqanta kasukuna. Pay nerqa: “Wawqeykiwanraj allinyakamuy”, nispa (Mat. 5:23, 24). Ama qonqanachu, hermanosninchejpis “sonqo tiyaykuyta qoj” Diosllatataj sirvisqankuta (Rom. 15:33; 16:20).

19. “Espíritoj munaynimpi” yuyaspa, ¿piwantaj allinpi kausakullasuntaj?

¹⁹ “Espíritoj munaynimpi” yuyaspaqa, Dioswanpis allinpi kausakullasuntaj. Profeta Isaías nerqa: “Pichus qampi sonqonta churajtaqa sonqo tiyaykuypi waqaychanki, imaraykuchus payqa qampipuni atienekun”, nispa (Isa. 26:3; Romanos 5:1 leey).

20. ¿Imaraykutaj Romanos 8 capitulopi yuyaychakusqanta agradecekunchej?

²⁰ Cielopi chayri Jallpʼapi kausakuyta suyakuspapis, tukuyninchej imatachus Romanos capítulo 8 nisqanwan yanapachikuyta atinchej. Bibliaqa Jehová Diosta sirviyta kausayninchejpi ñaupajman churanapaj yanapawanchej, nitaj munayninchejtachu. Chaymanta, ¡mayta agradecekunchej! ¿Imatá japʼisun “espíritoj munaynimpi” yuyasun chay? Pablo nerqa: “Diospa regalonrí wiñay kausay Cristo Jesús Señorninchejpi”, nispa (Rom. 6:23).