Chay kikin espiritullataj testigo jina sutʼinchan

1-3. ¿Imaraykutaj 33 watapi Pentecostés fiesta may sumaj karqa, ima profeciataj chay pʼunchaypi juntʼakorqa? (Patapi kaj dibujota qhawariy.)

KAY 33 watapi Jerusalenpi domingo paqarin imaschus ruwakusqanpi tʼukurina. Chay pʼunchayqa may sumajpuni karqa, Pentecostés fiestata runas ruwashasqankurayku. Chay fiestataj sapa wata trigo cosecha tiempo qallariyta ruwakoj. Chay paqarenqa kuraj kaj sacerdote, templopi Jehovaman jaywanasta jaywasharqa. Chantá las nueveta jina mosoj trigomanta chayri ñaupaj poqoymanta levadurayoj ruwasqa iskay tʼantasta Jehovaman ikhaspa nisunman kuyuchispa jaywarqa (Lev. 23:15-20).

² Chaytataj kuraj kaj sacerdoteqa sapa wata ruwaj, may chhika watasta. Chay jaywanaqa Pentecostés 33 watapi uj tʼukuna ima rikukunanwan kikinchakorqa. Chaytaj karqa Jerusalenpi uj wasi alto patapi Jesuspa 120 yachachisqasnin uj sonqolla Diosmanta mañakushajtinku (Hech. 1:13-15). Chay imasmantataj profeta Joelqa 800 watas ñaupajta qhelqarqa (Joel 2:28-32; Hech. 2:16-21). ¿Imataj chay pʼunchay karqa?

³ (Hechos 2:2-4 leey.) Pentecostés 33 watapi Jehová, chay cristianosta espíritu santonwan ajllarqa (Hech. 1:8). Chantá paykunaman ashkha runas qayllaykorqanku, chay cristianostaj imatachus rikusqankumanta, uyarisqankumanta ima parlayta qallarerqanku. Apóstol Pedroqa chay runasman imachus kasqanmanta, imaraykuchus chay imas may sumaj kasqanmanta ima sutʼincharqa. Nerqataj: “Diosman kutiriychej sapa ujniykichej; bautizachikuychejtaj Jesuspa sutimpi, juchasniykichej pampachasqas kanampaj. Diostaj Santo Espirituta qhasilla qosonqachej”, nispa. Chay pʼunchayqa 3.000 runas jina bautizakorqanku, paykunamanpis Dios espíritu santonta qorqa (Hech. 2:37, 38, 41).

 4. 1) ¿Imaraykú imachus Pentecostés 33 watapi ruwakusqanmanta yachakunanchej tiyan? 2) ¿Imataj chay kikin pʼunchayllapitaj ashkha watas ñaupajta karqa? (Sutʼinchayninta qhawariy.)

⁴ ¿Piwantaj kuraj kaj sacerdote ninakun? ¿Ima ninayantaj Pentecostespi iskay tʼantasta jaywakusqan? Kuraj kaj sacerdoteqa, Jesuswan ninakun. Tʼantastaj Jesuspa ajllasqa yachachisqasninwan ninakun. Chay yachachisqasqa pantaj runas ukhumanta ajllasqas karqanku. Bibliaqa paykunamanta parlaspa “ñaupaj poqoy” kasqankuta nin (Sant. 1:18). Jehovaqa paykunata wawasninpaj rejsikapun, Reinonpi Jesuswan khuska kamachimunankupajtaj ajllan (1 Ped. 2:9). Jehovaqa chay Reinonnejta kasukoj runasta bendecenqa. Janaj pachapi chayri kay Jallpʼapi tiyakuyta suyakuspapis, imachus Pentecostés 33 watapi kasqanqa tukuyta yanapawanchej.^[1]

 5. ¿Imaynasmantataj Jehová espíritu santonnejta wakin cristianosta ajllarqa?

⁵ Jesuspa 120 yachachisqasnenqa, Pentecostés 33 watapi Jehová espíritu santonwan paykunata ajllasqanta ni jaykʼaj qonqanqankuchu. Imaraykuchus sapa ujpa umankuman “nina larway rakʼisqa qallus jina” tiyaykorqa. Jehová atiyta qosqanraykutaj waj parlaykunapi parlayta qallarerqanku (Hech. 2:6-12). Chaywanpis chay tʼukuna imasqa mana Jehová sapa uj cristianota espíritu santonwan ajllashajtinpunichu rikukun. Sutʼincharinapaj, chay kikin pʼunchayllapitaj Jehová ashkha runasta ajllarqa, chaywanpis Bibliaqa mana ninchu chay runaspa umasninkuman nina lauray qallus jina tiyaykusqanta. Jehovaqa chay runasta bautizakushajtinku ajllarqa (Hech. 2:38). Chaywanpis mana tukuy ajllasqa cristianostachu bautizakushajtinku ajllarqa. Samariamanta cristianostaqa bautizakusqankumanta pisi tiemponman ajllarqa (Hech. 8:14-17). Corneliota, wasinpi kajkunata imataj, niraj bautizakushajtinku ajllarqa (Hech. 10:44-48).

 6. ¿Imatataj ajllasqa cristianos japʼinku, imata reparanankupajtaj chay yanapan?

⁶ Ajllasqa cristianosqa ajllasqas kasqankuta imaymanamanta sutʼita reparanku. Wakenqa usqhayllata reparanku Jehová ajllasqanta, wakintaj unayninmanraj. Chaywanpis apóstol Pabloqa imachus sapa ujwan kasqanta sutʼincharqa. Pay nerqa: “Chay creesqaykichejmantapacha, Diosqa qosaj nisqanman jina Espíritu Santowan sellasorqachej. Espíritu Santoqa herencianchejpa señan”, nispa (Efe. 1:13, 14). Jehovaqa tukuy ajllasqa kajkunaman espíritu santonta qon. Chay espíritu santotaj janaj pachaman rinankupaj ajllasqa kasqankuta sutʼita reparanankupaj yanapan. Chayrayku Pablo nerqa Diospa espíritu santonqa “herencian[koj] señan” chayri garantía kasqanta, aswan qhepaman janaj pachapi wiñaypaj kausakunankupaj, manataj kay pachapichu (2 Corintios 1:21, 22; 5:5 leey).

 7. ¿Imatá sapa ajllasqa cristiano janaj pachaman rinanpaj ruwanan tiyan?

⁷ Uj cristiano ajllasqa kajtin, ¿nisunmanchu “kawsay pilluta” japʼisqantaña? Mana. Chay cristianoqa janaj pachaman rinanpaj wajyasqa kasqanta sutʼita yachan. Chaywanpis Jehovaman cheqa sonqo kajtillan “kawsay pilluta” japʼenqa. Pedro nerqa: “Chayrayku hermanos, may kʼuchi kaychej wajyasqas, ajllasqastaj kasqaykichejpi sumajta sayanaykichejpaj. Sichus chay imasta ruwankichej chayqa, mana jaykʼajpis urmankichejchu. Chay jinamanta, Señor Jesucristo Salvawajninchejpa wiñay reinonman may kusiypi pusaykusqa kankichej”, nispa (2 Ped. 1:10, 11). Chayrayku sapa uj ajllasqa cristiano Jehovata yupaychanallanpajpuni kallpachakunan tiyan. Janaj pachapi tiyakunanpaj wajyasqa kajtinpis, cheqa sonqo kajtillan janaj pachaman renqa (Heb. 3:1; Apo. 2:10).

8, 9. 1) ¿Imaraykú Diospa ashkha kamachisnin mana entiendeyta atillankuchu imaynachus uj cristiano ajllasqa kaspa sientekusqanta? 2) ¿Imaynatá uj cristiano yachan janaj pachaman rinanpaj ajllasqa kasqanta?

⁸ Diospa ashkha kamachisnin mana ajllasqas kasqankurayku, imaynachus uj cristiano Jehová ajllajtin sientekusqanta mana entiendeyta atillankuchu. Jehovaqa runasta kay Jallpʼapi wiñaypaj kausakunankupaj ruwarqa, manataj janaj pachapi kausakunankupajchu (Gén. 1:28; Sal. 37:29). Chaywanpis Jehovaqa wakin runasta janaj pachapi reyestaj, sacerdotestaj kanankupaj ajllan. Chayrayku espíritu santonwan ajllajtin paykunaj yuyayninku, suyakuyninku, imaynachus sientekusqanku ima tijrakun, chaymantapachataj janaj pachapi tiyakuyta suyakunku (Efesios 1:18 leey).

⁹ ¿Imaynatá uj cristiano yachan janaj pachaman rinanpaj ajllasqa kasqanta? Imatachus Pablo Romapi kaj ajllasqa cristianosman nisunman “Diospaj tʼaqasqa” kajkunaman nisqanta qhawarina. Pay nerqa: “Mana wata runa kay sonqochu qankunaman qosqa karqa, ujtawan manchasqalla kanaykichejpaj, astawanqa Diospa Espiritun qankunaman qosqa karqa Diospa wawasnin kanaykichejpaj. Chayrayku Diosmanta mañakunchej: Tatáy, Tatáy, nispa. Chay kikin Espiritullataj espiritunchejwan khuska testigo jina sutʼinchan Diospa wawasnin kasqanchejta”, nispa (Rom. 1:7; 8:15, 16). Jehovaqa espíritu santonnejta pitachus ajllan chayman sutʼita rikuchin, Reinonpi Jesuswan khuska kamachimunanpaj ajllasqa kasqanta (1 Tes. 2:12).

10. ¿Imamantataj 1 Juan 2:27 versículo parlashan ajllasqa cristianos mana pejpa yachachinanrajchu kasqankuta nispa?

¹⁰ Ajllasqa cristianosqa mana necesitankuchu ni pi sutʼinchananta paykunata Dios ajllasqanta. Imaraykuchus Jehová yanapan chayta yachanankupaj. Apóstol Juan ajllasqa cristianosman nerqa: “Diosqa Espíritu Santota qosorqachej, tukuyniykichejtaj yachayniyoj kankichej”, nispa. Chantapis nillarqataj: “Qankunamanrí Diosqa Espíritu Santota qosorqachej, paytaj qankunapi tiyakushan. Chayrayku mana pejpa yachachinanrajchu kanaykichej tiyan. Espíritu Santoqa tukuy imata yachachisunkichej. Paypa yachachisqanqa cheqa, manataj llullachu. Chayrayku qankunaqa paywan ujchasqapuni kakuychej, imaynatachá Espíritu Santo yachachisorqachej, ajinata”, nispa (1 Juan 2:20, 27). Ajllasqa cristianosqa Diospa tukuy kamachisnin jinallataj Jehová yachachinanta necesitanku. Chaywanpis mana necesitankuchu pillapis ajllasqas kankichej ninankuta. Imaraykuchus Jehovaqa espíritu santonnejta ajllasqa kasqankuta sutʼita rikuchin.

11, 12. 1) ¿Imatataj uj ajllasqa cristiano ichá tapurikunman? 2) ¿Imatataj ajllasqa cristianos sutʼita yachanku?

¹¹ Cristianos espíritu santowan ajllasqa kajtinkoqa, kausayninku tijran, chayrayku Jesús “watejmanta nacen[ku]”, nispa nerqa^[2] (Juan 3:3, 5). Chantá sutʼincharqa: “Ama tʼukuychu nisusqaymanta: Watejmanta nacenayki tiyan, nispa. Wayraqa maymantachus munasqanmanta wayramun, sonasqantataj uyarinki, manataj yachankichu maymantachus jamusqanta, nillataj maymanchus risqantapis. Chay kikinmin Espiritumanta nacesqa kajqa”, nispa (Juan 3:7, 8). Rikunchej jina, mana ajllasqa cristianoman, imaynachus uj ajllasqa cristiano sientekusqanmanta mana sutʼinchayta atikullanchu.

¹² Ichapis uj ajllasqa cristianoqa tapurikun imaraykuchus payta Jehová ajllasqanta, manataj waj cristianotachu. Chantapis ichá tapurikullantaj chay llankʼayta ruwananpaj jinachus manachus kasqanta. Chaywanpis chay cristianoqa mana iskayrayanchu payta Jehová ajllasqanmanta. Astawanpis mayta kusikun, Jehovamanpis mayta agradecekun. Ajllasqa cristianosqa apóstol Pedro jina sientekunku, Pedro nerqa: “Yupaychasqa kachun Dios, Señorninchej Jesucristoj Tatan. Payqa jatun khuyakuyninrayku watejmanta nacechiwarqanchej, Jesucristota wañusqakunamanta kawsarichisqannejta, wiñay kusiy kawsayta suyananchejpaj. Payqa churallawanchejtaj mana ismoj, mana chʼichichasqa, nitaj chinkapoj herenciata japʼinanchejpaj. Chayqa janaj pachapi qankunapaj waqaychasqa kashan”, nispa (1 Ped. 1:3, 4). Ajllasqa cristianos kayta leespaqa, Jehová paykunaman parlashasqanta sutʼita yachanku.

13. 1) Jehová uj cristianota ajllajtin, ¿imaynatá yuyasqan manaña kikinchu? 2) ¿Imaraykú uj jinata yuyayta qallarerqanku?

¹³ Jehová kay cristianosta niraj janaj pachaman rinankupaj wajyarishajtin, ichapis paykunaqa kay Jallpʼapi wiñaypaj kausakuyta suyakusharqanku. Ichapis mayta suyakusharqanku Jehová kay Jallpʼata uj paraisoman tukuchinanta, sajra kausayta chinkachinanta ima. Chantá ichapis wañuymanta kausarimoj familiankuwan chayri uj amigonkuwan tinkushasqankupi yuyaj kanku. Ichapis tʼukurillajtaj kanku paraisopi uj wasita ruwakuspa tiyakunankupi, chayri imaymana poqoyniyoj sachʼasta churaspa poqoyninta mikhunankupi (Isa. 65:21-23). ¿Imaraykú uj jinata yuyayta qallarerqanku? ¿Llakisqa kasqankuraykuchu chayri mayta ñakʼarisqankuraykuchu? ¿Kay Jallpʼapi wiñaypaj kausaspa mana kusisqachu kanankuta yuyasqankuraykuchu? Chayri, ¿imaynachus janaj pachapi kausay kasqanta yachayta munasqankuraykuchu? Mana. Chay cristianosqa waj jinata yuyayta qallarinku Jehová chay yuyayta qosqanrayku. Jehová uj cristianota janaj pachaman rinanpaj ajllajtin, espíritu santonwan yanapan uj jinata yuyananpaj, janaj pachapi kausayta suyakunanpaj ima.

14. ¿Imatataj ajllasqa cristianos kay Jallpʼapi kausakushasqankumanta yuyanku?

¹⁴ Kayqa mana ninayanchu ajllasqa cristianos janaj pachaman rinankupaj wañupullaytaña munasqankuta. Pabloqa imaynachus ajllasqa cristianos sientekusqankuta sutʼinchan, pay nerqa: “Kay wasipi kashaspa, chayri kay cuerponchejpi mayta ayqonchej jatun llakiywan, mana aycha cuerponchej qhechusqa kanampaj munaspachu, astawanqa janaj pacha cuerpowan pʼachallisqa kayta munaspa. Ajinamanta wañoj cuerpoqa atipasqa kanqa mosoj kawsaywan”, nispa (2 Cor. 5:4). Kay versiculopi Pabloqa ajllasqa cristianospa aycha cuerponkuta uj wasiwan kikincharqa. Mana qhechusqa kananta munankuchu nispaqa, ajllasqa cristianos mana wañuyta munasqankuta nisharqa. Paykunaqa mayta kusikunku, familiankuwan amigosninkuwan khuskataj Diosta sirviyta munanku. Kay Jallpʼapi imata ruwashaspapis, imatachus paykunaman Dios nisqanta mana qonqankuchu (1 Cor. 15:53; 2 Ped. 1:4; 1 Juan 3:2, 3; Apo. 20:6).

15. ¿Imastaj rikuchin uj cristiano mana ajllasqachu kasqanta?

¹⁵ Ichapis tapurikushanki janaj pachaman rinaykipaj Jehová ajllasusqantachus manachus. Ajllasusqanta reparanki chayqa, kay tapuykunapi tʼukuriy: ¿Sonqo kʼajaywan willasqaykita reparankichu? ¿Gustasunkichu Bibliata ukhunchay, “taripay mana atina Diospa yachaynintapis” yachakuy? (1 Cor. 2:10.) ¿Willayniykipi Jehová tʼukunaykipaj jina yanapasusqanta reparankichu? ¿Tukuy kallpaykiwanchu Diospa munayninta ruwayta munanki? ¿Hermanosta maytachu munakunki, Jehovata sirvinallankupajpuni yanapayta munankichu? ¿Kausayniykipi Jehová mayta yanapasusqanta rikunkichu? Kay tapuykunaman “arí” nispa kutichinki chayqa, ¿ajllasqa kasqaykitachu chaykuna rikuchin? Mana, imaraykuchus Diospa tukuy kamachisnin ajina sientekuyta atisunman, ajllasqa kajtinchejpis chayri manapis. Jehovaqa espíritu santonnejta ajllasqa kajkunaman chayri mana ajllasqa kajkunaman kallpata qoyta atin. Ajllasqa kasqaykimanta iskayrayanki chayqa, mana ajllasqachu kanki. Imaraykuchus ajllasqa cristianosqa mana tapukunkuchu ajllasqachus manachus kasqankuta. Paykunaqa sutʼita yachanku ajllasqaspuni kasqankuta.

16. ¿Diospa espíritu santonta tukuy japʼejkunachu janaj pachaman renqanku? Sutʼinchay.

¹⁶ Bibliaqa Diospa ashkha cheqa sonqo kamachisnin espíritu santonta japʼisqankumanta parlan, chaywanpis chay cristianosqa mana janaj pachaman rerqankuchu. Chay cristianosmanta ujnenqa Juan Bautista karqa. Jesusqa paymanta may sumajta parlarqa, jinapis janaj pachaman rey jina kamachimunanpaj mana renqachu nerqa (Mat. 11:10, 11). Davidpis espíritu santoj yanapayninta japʼerqa (1 Sam. 16:13). Chayraykutaj payqa “taripay mana atina Diospa yachayninta[...]” entienderqa, Bibliaj wakin versiculosnintapis qhelqarqa (Mar. 12:36). Chaywanpis apóstol Pedro nerqa: “[David] janaj pachaman mana wicharerqachu”, nispa (Hech. 2:34, 35). Jehovaqa espíritu santonta chay kamachisninman qorqa tʼukuna imasta ruwanankupaj, manataj janaj pachaman rinankupajchu. Chantapis chayqa mana ninayanchu chay cristianos mana cheqa sonqoschu kasqankuta, nitaj ninayanchu janaj pachaman mana rinankupaj jinachu kasqankuta. Astawanpis paykunata Jehová kausarichimonqa kay Jallpʼapi kausakunankupaj (Juan 5:28, 29; Hech. 24:15).

17, 18. 1) ¿Maypitaj kay tiempomanta Diospa ashkha kamachisnin tiyakuyta suyakushanku? 2) ¿Ima tapuykunamantaj qhepan yachaqanapi tukuchisunchej?

¹⁷ Kay tiempomanta Diospa ashkha kamachisnin mana janaj pachaman renqankuchu. Paykunaqa ñaupa tiempomanta Abraham, David, Juan Bautista, waj cheqa sonqo cristianos jinallataj, Diospa Reinon kamachimushajtin kay Jallpʼapi kausakuyta suyakushanku (Heb. 11:10). Janaj pachamanta Jesucristowan khuska kamachimojkunaqa 144.000 reyes kanku. Chaywanpis Bibliaqa chay 144.000 ajllasqa cristianosmanta kay qhepa pʼunchaykunapi pisillaña kay Jallpʼapi kashasqankuta nin (Apo. 12:17). Chayrayku nisunman 144.000 ajllasqa cristianosmanta ashkhaña wañupusqankuta, janaj pachapiña kashasqankuta ima.

¹⁸ Pillapis ajllasqa kasqanta niwajtinchej, ¿imatataj ruwasunman? Qotuchakuyninchejmanta uj hermano Señorpa Cenanpi tʼantata mikhuyta, vinota ujyayta ima qallarejtin, ¿imaynatá chay hermanota qhawananchej tiyan? ¿Ajllasqa cristiano kani nejkuna astawan yapakushasqankumanta llakikunanchejchu tiyan? Qhepan yachaqanapi chay tapuykunaj kutichiyninta yachakusunchej.