Warmis, ¿maykʼaqtaq umankuta imawanpis qhatakunanku tiyan, imaraykutaq?

Dios yuyaychasqanmanjina, apóstol Pablo sutʼincharqa, cristianas Jehovapaq llamkʼachkaspa wakin kuti imawanpis umankuta qhatakunankuta. ¿Maykʼaqtaq umankuta imawanpis qhatakunanku tiyan, imaraykutaq? Qhawarina apóstol Pablo kay 1 Corintios 11:3-16 pʼitikunapi nisqanta, yachanapaq maykʼaqchus umankuta imawanpis qhatakunankumanta, Jehovata jatunchanankupaq. Pablo kimsa kaqmanta sutʼincharqa: 1) imata ruwachkaspataq umanta imawanpis qhatakunan tiyan; 2) maypi kachkaspataq umanta imawanpis qhatakunan tiyan 3) imaraykutaq nisqanmanjina ruwananku tiyan.

Imata ruwachkaspataq. Pablo nirqa: Diosmanta mañakuchkaspa chantá Diospa Palabranmanta sutʼinchachkaspa (4, 5 pʼitikuna). Yachanchikjina tukuypis Diosta yupaychanchik paymanta mañakuspa, chantá Bibliamanta runasman yachachispa Palabranta sutʼinchanchik. Chaywanpis, ¿Pablo nichkarqachu cristianas umankuta imawanpis qhatakunankutapuni, Diosmanta mañakuchkaspa chantá Palabranmanta sutʼinchachkaspa? Mana. Astawan sutʼita entiendenapaqqa qhawarina maypichus, imata ruwachkaspachus umankuta qhatakunankumanta.

Maypi kachkaspa. Apóstol Pablo sutʼincharqa: familiapi qutuchakuypi ima. Pay jinata qillqarqa: “Qharitaj warmimpajqa kamachej uman jina, [...] Pi warmillapis mana uman sukʼumpasqa [qhatasqa] Diosmanta mañakunman, chayri Diospa Palabranta sutʼinchanman chayqa, umanta pʼenqaypi rikhurichin”, nispa (3, 5 pʼitikuna). Jehovaqa familiapi qusata, warminpaq kamachiq umatajina churan. Chayrayku, ¿warmi qusanpa ruwananta ruwachkaptin, ¿imatá ruwanan tiyan? Imawanpis umanta qhatakunan tiyan, mana chayta ruwanman chayqa qusanta kamachiq umatajina pʼinqaypi rikhurichinman. Qhawarina wakin cristianas imatachus ruwasqankumanta. Juk cristiana qusanwan khuska kachkan, yachakuqman Bibliamanta yachachinanpaq. Qusanta jatunpaq qhawasqanrayku umanta imawanpis qhatakunan tiyan, qusan mana bautizasqa kaptinpis, imaraykuchus qusanqa familianmanta kamachiq uma.a Juk cristiana; Diosmanta mañakunan chayri yachachinan kaptin, bautizasqa qhari wawanwan kachkaspa, ¿imatá ruwanan tiyan? Wawan familiamanta mana kamachiq uma kaptinpis, mamanqa umanta imawanpis qhatakunallantaq tiyan. ¿Imaraykú? Qutuchakuymanta bautizasqa hermanosta jatunpaq qhawasqanrayku.

Pablo, qutuchakuy ukhupi ruwanasmantañataq parlaspa jinata nin: “Sichus pipis kay imasmanta churanakuspa, siminakuyta munanman chayqa, noqaykoqa mana waj usuta rejsiykuchu nitaj Diospa iglesiasnimpis”, nispa (16 pʼiti). Jehová bautizasqa hermanosta churan qutuchakuypi kamachinankupaq (1 Timoteo 2:11-14; Hebreos 13:17). Chayrayku hermanosllata churan ancianos, chayri siervo ministeriales kanankupaq, qutuchakuypi kaqkunatataq jarkʼanankupaq (Hechos 20:28). Chaywanpis wakin kuti juk cristianaqa, necesitakusqanrayku juk hermanop ruwananta qutuchakuypi ruwayta atinman. Chantapis ichá runaman willamunapaq tantakuypi kamachillanmantaq, juk bautizasqa hermano mana kasqanrayku. Chay tantakuypiqa hermanosta yachachikullantaq Tantakunapaq Wasipijina, chaytataq juk hermanolla ruwayta atinman. Kikillantaq juk bautizasqa hermanowan Bibliamanta runaman yachachichkaspapis.b Chayraykutaq, qharip ruwananta ruwachkaspaqa umanta imawanpis qhatakunan tiyan.

Chaywanpis juk cristianaqa mana umanta imawanpis qhatakunanchu tiyan, tantakuypi tapuykunaman kutichinanpaq, chayri wasimanta wasi willaq rinanpaq (cristiano qusanwan chayri wak cristianowan kachkaspapis), chantá mana bautizasqa wawasninwan Diosmanta mañakuchkaspa chayri paykunaman Bibliamanta yachachichkaspa ima. ¿Imatá ruwanman maykʼaqpis umanta imawanpis qhatakunanmanta iskaychakuspa? Ñawpaqtaqa astawan yachayta maskʼanan tiyan.c Chaywanpis iskaychasqallapuni kanman chayqa conciencian nisqanmanjina umanta imawanpis qhatakusqanqa, mana juchachu kanman, imaynatachus kay dibujopi rikukunjina.

Imaraykutaq ruwananku tiyan. Chunka pʼitipi rikuchiwanchik, imaschus juk cristianata tanqananta kay Pablop nisqanta juntʼananpaq: “Chayrayku, warmeqa umanta sukʼumpakunan tiyan angelesrayku”. Ñawpaqtaqa nichkan ‘warmi umanta sukʼumpakunanta’ chayri qhatakunanta. Chayta ruwaspataq qutuchakuy ukhupi kamachinankupaq, Jehová hermanosta churasqanta jatunpaq qhawasqanta rikuchin. Chantapis jinata ruwaspaqa Diosta munakusqanta, mana wasanchaspa yupaychachkasqanta ima rikuchin. ¿Chantá imaraykutaq umanta imawanpis qhatakunallantaq tiyan? Chay pʼiti ninjina “angelesrayku”. ¿Imaraykutaq angelesrayku juk cristiana umanta imawanpis qhatakunan tiyan?

Imaraykuchus angelesqa allinta qhawachkanku imaynatachus Diosta yupaychaqkuna (kay Jallpʼapi, janaqpachapi ima) paypa kamachiykunasninta kasukuchkasqankuta. Chantapis angelesqa juchasapa runas kasukusqankuta rikuspa astawan kasukuyta yachakunku. Chayqa allinninkupaq imaptinchus paykunapis Jehovap kamachisqanta kʼumuykukuq sunquwan kasukunanku tiyan, chaytataq mana tukuy angeleschu ruwarqanku (Judas 6). Chayrayku kunan tiempopi juk cristiana may yachayniyuq kaspapis bautizasqa hermanota kʼumuykukuq sunquwan kasukusqanqa, may sumaq angelespaqqa. Astawanraq juk cristiana Diospa akllasqan kaptinqa. ¿Imarayku? Imaraykuchus chay cristianaqa aswan qhipaman Jesucristowan, wak akllasqaswan ima kamachimunqanku, astawan atiyniyuqtaq kanqanku, angelesmanta nisqaqa. Rikunchikjina cristianasqa Diosta mana wasanchaspa, kʼumuykukuq sunquwantaq kamachiykunasninta kasukuspaqa may allinta ruwanku, imaptinchus angelespis paykunamanta yachakunkuman.