Kʼachamanta parlayqa may sumaj

1, 2. ¿Imaraykutaj Biblia nin parlayta atisqanchej uj nina jina kasqanta?

KAY 1871 watapi Estados Unidos suyoj Wisconsin llajtanpi uj montepi nina japʼiykukorqa. Chay nina manchayta japʼiykukusqanrayku iskay millones sachʼasta ruphaykorqa. Chantapis 1.200 runasmanta astawan wañorqanku. ¿Imaynatá chay nina japʼiykukorqa? Chay montesnejtaqa trenkuna pasaj, ichapis chay trenkunaj chispasninrayku japʼiykukorqa. Chaytaj imatachus Santiago 3:5 versículo nisqanta yuyarichiwanchej, chay versiculopi nin: “Uj chhikan ninaqa may jatun sachʼa montetapis ruphaykuyta atin”, nispa. ¿Imaraykutaj Santiago chayta nerqa?

² Pay sutʼincharqa: “Qallurí uj nina jina”, nispa (Sant. 3:6). Kay versiculoqa parlayta atisqanchejmanta parlashan. Imaynatachus nina runasta ñakʼarichin, ajinallatataj parlasqanchejpis wajkunata ñakʼarichinman. Chaywanpis mana chayraykuchu manaña parlananchej kanqa. Ninawanqa wajkunata ñakʼarichisunman, chaywanpis mana chayraykuchu ninata manaña japʼichinanchej kanqa. Imaraykuchus ninaqa waykʼunapaj, qʼoñikunapaj, tutanpi kʼanchakunapaj ima yanapawanchej. Ajinallatataj Bibliapis niwanchej: “Wañuywan, kawsaywanqa runaj simimpi kashan”, nispa (Pro. 18:21). Chayrayku sumajta qhawarikunanchej tiyan imaynatachus parlasqanchejta. Sutʼincharinapaj, parlayninchejwanqa Jehovata jatunchayta, wajkunata yanapayta ima atinchej (Sal. 19:14).

 3. Wajkunata kallpachayta munanchej chayqa, ¿imatataj yachananchej tiyan?

³ Jehovaqa imatachus yuyasqanchejta, sonqonchejpi imachus kasqanta willakuyta atinapaj jina ruwawarqanchej. Chaytataj señas parlaypipis ruwayta atisunman. ¿Imaynatataj parlayninchejwan wajkunata kallpachasunman? (Santiago 3:9, 10 leey.) Yachananchej tiyan maykʼajchus, imatachus, imaynatachus ninanchejta.

 4. ¿Maykʼajtaj mana parlananchejchu tiyan?

⁴ Bibliaqa ‘uj tiempo tiyan chʼinyanapaj’ nin (Ecl. 3:7). Kayqa niyta munan wakin kutis chʼinlla kananchej kasqanta. Sutʼincharinapaj, wajkuna parlashajtinku paykunata jatunpaj qhawasqanchejrayku uyarinanchej tiyan (Job 6:24). Nitaj imallatapis yachaspaqa wajkunaman willarqonachu (Pro. 20:19). Pillapis sonqonchejta nanachinawanchejpaj jina imatapis nejtenqa, mana phiñakunachu, astawanqa chʼinlla kakunanchej tiyan (Sal. 4:4).

 5. ¿Imaynatataj Jehová Diosman agradecekunchej parlayta atinanchejpaj jina ruwawasqanchejmanta?

⁵ Chaywanpis Bibliaqa ‘uj tiempo tiyan parlanapajʼ, nispa nin (Ecl. 3:7). Amigonchej may valorniyoj regalota qowajtinchej, mana pakaykusunmanchu, ¿icharí? Astawanqa chay regalota allinta apaykachaspa jatunpaj qhawasqanchejta rikuchisunman. Ajinallatataj Jehovaman may agradecesqa kasqanchejta rikuchisunman allin yuyaywan parlaspa, imaraykuchus pay parlayta atinanchejpaj jina ruwawarqanchej. Sutʼincharinapaj, parlayninchejwanqa Diosta jatunchasunman, wajkunata kallpachasunman, imatachus yuyasqanchejta, imatachus necesitasqanchejtapis willakuyta atisunman (Sal. 51:15). ¿Imaynatataj yachasunman maykʼajchus parlananchejta?

 6. ¿Imaraykutaj sumajta yachananchej tiyan maykʼajchus parlananchejta?

⁶ ¿Imaraykutaj sumajta yachananchej tiyan maykʼajchus parlananchejta? Proverbios 25:11 versículo nin: “Maychus tiempompi uj palabrata nisqaqa qolqewan tʼikanchasqa qori manzana jina”, nispa. ¿Ima niyta munan kay versículo? Qori manzanasqa kʼachitus kanku. Chaywanpis platamanta ruwasqa imasman chay qori manzanasta churaykojtinchej astawan kʼachitusraj rikukunku. Ajinallataj sumajta yachasunchej pillawanpis maykʼajchus parlananchejta chayqa, parlayninchejqa kallpachanqa, sonqonmantaj chayanqa. ¿Imaynatataj chayta ruwasunman?

7, 8. ¿Imaynatataj Japonmanta hermanosninchej Jesús jina ruwarqanku?

⁷ Mana tiemponpi parlarejtinchejqa, ichapis runasqa mana entiendeyta atiwasunchu nitaj nisqanchejtapis japʼikonqankuchu (Proverbios 15:23 leey). Sutʼincharinapaj, marzo de 2011 watapi jallpʼa ikhakuy, pʼampaj yakus (tsunamis) ima Japón suyoj wakin llajtasninta chinkacherqa. Wañorqankutaj 15.000 runasmanta astawan. Ashkha testigospa familiaresninku, amigosninku ima wañupullarqankutaj. Chaywanpis chay hermanosninchejqa vecinosninkuta Bibliaj nisqanwan sonqocharqanku. Chay runasmanta ashkhas budistas kanku, Bibliamantataj pisillata yachanku. Hermanosninchejqa chayta reparaspa mana willarqankupachachu wañupojkuna kausarimunankumanta. Astawanpis sonqocharqanku, imaraykuchus llakiykuna kasqanmantapis sutʼincharqanku.

⁸ Chay hermanosqa Jesús jina ruwarqanku. Jesusqa sumajta yacharqa maykʼajchus parlananta, maykʼajchus chʼinlla qhepakunanta (Juan 18:33-37; 19:8-11). Sutʼincharinapaj, payqa sumajta yacharqa maykʼajchus yachachisqasninman imatapis yachachinanta (Juan 16:12). Japonmanta hermanosqa sumajta yacharqanku maykʼajchus chay runasman wañupojkuna kausarimunankumanta willayta. Chay llakiymanta iskay wata khuskanninmantaj, chay runasman ¿Wañusqas kausarimuyta atinkumanchu?, nisqa tratadomanta parlarerqanku. Chay runasmanta ashkhastaj japʼikorqanku, willayninwantaj sonqochakorqanku. Willanchej chaypi runas imapichus creesqankupi, ima costumbresniyojchus kasqankupi ima tʼukurisunchej chayqa, maykʼajchus paykunawan parlariyta yachasunchej.

 9. ¿Ima kutispitaj maykʼajchus parlananchejta yachanallanchejtaj tiyan?

⁹ ¿Ima kutispitaj maykʼajchus parlananchejta yachanallanchejtaj tiyan? Pillapis phiñachinawanchejpaj jina parlawajtinchej, usqhayllata imatapis nirparisun chayqa, ichapis pesachikusunman. Chayrayku niraj imatapis nishaspa allin kanman tapurikunanchej: “¿Phiñachiyta munawasqanraykupunichu chayta niwarqa?”, nispa. Mana jinachu kajtenqa, ichapis chʼinlla qhepakunanchej kanman. Chantapis parlananchej kajtenqa, phiñakuyninchej pasananta suyananchej tiyan (Proverbios 15:28 leey). Chantapis yachananchej tiyan maykʼajchus mana creente familiaresninchejwan Diosmanta parlariyta. Manaraj paykunawan parlarishaspaqa, pacienciakuna, imatachus ninanchejpitaj tʼukurina, maykʼajchus uyarinawanchejpaj jina kashasqankutataj yachana.

10. 1) ¿Imaraykutaj sumajta tʼukurinanchej tiyan imatachus ninanchejpi? 2) ¿Imastataj mana parlananchejchu tiyan?

¹⁰ Imatachus nisqanchejqa runasta sonqochanman chayri astawan llakichinman. Chayrayku sumajta tʼukurinanchej tiyan imatachus ninanchejpi (Proverbios 12:18 leey). Kay pachapi ashkha runasqa wajkunaj sonqonkuta nanachinankupaj jina parlanku, espadata jina qallunkuta filoyachinku, jaya parlasqankuta venenoyoj flechasta jina kachaykunku (Sal. 64:3). Chaytataj telenejta, peliculasnejta yachakunku. Chaywanpis Diosta yupaychajkunaqa ni chanzallapipis runaj sonqonta nanachinapaj jina imatapis parlanchejchu. Asirikunapaj jina parlayqa mana juchachu, astawanpis sumajta parlarikunapaj yanapawanchej. Chaywanpis ni jaykʼaj imatapis wajkunaj sonqonkuta nanachinapaj jina parlanachu, nitaj pitapis pʼenqaypi rikhurichinapaj jina parlanachu, wajkunata asichinanchejraykullaqa. Biblia nin: “Simiykichejmantapis ama ima sajra parlaykuna llojsichunchu, manachayqa maychus kajta parlaychej, uyarisojkuna chaywan yanapasqa kaspa, Diospi wiñanankupaj”, nispa (Efe. 4:29, 31).

11. ¿Imataj yanapawasunchej kʼacha palabraswan kallpachanapaj jina parlananchejpaj?

¹¹ Jesusqa “sonqopi imachus juntʼa kashan, chaymanta simeqa parlan” nispa nerqa (Mat. 12:34). Arí, sonqonchejpi imachus kasqanman jinapuni parlanchej. Parlasqanchejqa imatachus wajkunamanta yuyasqanchejta rikuchin. Sonqomantapacha wajkunata munakusunchej, khuyakusunchej chayqa, kʼacha palabraswan kallpachanapaj jina parlasunchej.

12. ¿Imastaj yanapawasunchej kʼacha palabraswan parlanapaj?

¹² Rey Salomonqa may yachayniyoj karqa, qhelqananpajtaj cheqa, kʼacha palabrasta sumajta maskʼarqa (Ecl. 12:9, 10). Salomón ruwasqanmanta yachakunchej parlanapaj kʼacha palabrasta ajllana kasqanta. Chayta ruwanapajtaj Bibliata, publicacionesninchejtawan leey yanapawasun. Wakin palabrasta mana rejsispaqa imachus ninayasqanta ukhunchananchej tiyan. Chantapis Jesusmanta yachakusunman pay jina ruwanapaj, wajkunata kallpachanapaj jina parlanapaj ima. Jesusqa imatachus ninanta yacharqa, Jehová ‘saykʼusqasman kallpachananpaj jina parlananta’ yachachisqanrayku (Isa. 50:4). Niraj imatapis parlashaspa tʼukurejtinchejqa, kallpachanapaj jina kʼacha palabraswan parlasunchej (Sant. 1:19, 20). Tapurikunataj: “¿Kayta pimanpis nejtiy, imatataj entiendenqa? ¿Imaynataj sientekonqa?”, nispa.

13. ¿Imaraykutaj entiendenawanchejpaj jina parlananchej tiyan?

¹³ Parlayninchejqa wajkuna entiendenawanchejpaj jinapuni kanan tiyan. Imaraykuchus chayta ruwana kasqanta qhawarina. Israelitasqa imasta ruwanankupajpis cornetasta waqachej kanku. Sutʼincharinapaj, llajta uj cheqapi tantakunanpaj cornetata waqachej kanku. Chantapis waqachillajtaj kanku israelita soldados enemigosninkuwan maqanakoj rinankupaj. Cornetata mana sutʼita waqachejtinkoqa, israelita soldados mana sutʼita yachankumanchu karqa imatachus ruwanankuta. Parlasqanchejwanpis ajinallataj kanman. Bibliaqa wajkuna entiendenawanchejpaj jina parlananchejta nin. Mana sutʼita parlajtinchejqa runasqa mana entiendewasunchu. Entiendenawanchejpaj jina parlaspapis mana wajkunata phiñachinapaj jina parlanachu, manaqa jatunpaj qhawana (1 Corintios 14:8, 9 leey).

14. ¿Imaynatá yachanchej Jesús sutʼita entiendenapaj jinapuni parlasqanta?

¹⁴ Jesusqa sutʼita entiendenapaj jinapuni parlaj. Imaynatachus umallirichiyninpi parlasqanta qhawarina, chaytaj Mateo 5, 6, 7 capitulospi kashan. Jesusqa runas entiendenankupaj jina parlaj, nitaj runaspa sonqonkuta nanachinanpaj jinachu. Astawanpis uyarejkunaj sonqonkuman chayananpaj jina sutʼita entiendeyta atinankupaj jina parlarqa. Sutʼincharinapaj, chay umallirichiyninpi yachachisqasninman imatachus mikhunankumanta mana llakikunankuta yachacherqa. Nisqanta mana qonqanankupajtaj, imaynatachus pʼisqetusman Jehová mikhuchisqanpi tʼukurinankuta nerqa. Chantá tapurerqa: “Manachu qankunaqa aswan munasqa kankichej pʼisqosmanta nisqaqa?”, nispa (Mat. 6:26). Ajinamanta sumajta kallpacharqa, sumajtataj yachacherqa.

15. ¿Imaraykutaj kʼachamanta parlananchej tiyan?

¹⁵ Chantapis wajkunawan imaynatachus parlasqanchejpi tʼukurinanchej may sumaj. Runasqa Jesusta uyariyta munaj kanku, kʼachamanta parlasqanrayku (Luc. 4:22). Noqanchejtapis kʼachamanta parlajtinchej, runasqa uyariyta munallawasun, nisqanchejtapis japʼikullanqanku (Pro. 25:15). Kʼachamanta parlarinapajqa wajkunata, imatachus yuyasqankutapis jatunpaj qhaway yanapawasunchej. Jesusqa chayta ruwaj. Sutʼincharinapaj, payqa ashkha runasta rikorqa uyarinankupaj kallpachakusqankuta, khuyakuywan qhawaspataj chay runasman “tukuy imata yachachiyta qallarerqa” (Mar. 6:34). Enemigosnin maldicejtinkupis, payqa mana maldecillarqatajchu (1 Ped. 2:23).

16, 17. 1) Familiaresninchejwan, amigosninchejwan ima parlarishaspa, ¿imaynatataj Jesús jina ruwasunman? (18 paginapi dibujota qhawariy.) 2) ¿Imatataj uj mama kʼacha simiwan parlananpaj ruwarqa?

¹⁶ Familiaresninchejta, amigosninchejta ima munakuspapis, ichá paykunata sumajta rejsisqanchejrayku sonqonkuta nanachinapaj jina imatapis parlarparillasunman. Ichapis paykunawan parlashaspaqa imatachus parlashasqanchejta mana qhawarikunanchejchu kasqanta yuyasunman. Chaywanpis Jesús parlasqanpi tʼukurina. Payqa amigosninta jatunpaj qhawaj. Mayqenninkuchus kurajpaj qhawasqa kananmanta siminakushajtinkutaj, munakuywan kʼamerqa. Manaña jinata yuyanankupajtaj uj wawita jina llampʼu sonqo kanankuta yachacherqa (Mar. 9:33-37). Qotuchakuymanta ancianosqa pi hermanollatapis yuyaychashaspa Jesús jina kʼachamanta yuyaychananku tiyan (Gál. 6:1).

¹⁷ Pillapis sonqonchejta nanachinawanchejpaj jina imatapis niwajtinchejqa, aswan allin kanman miskʼi simiwan kutichinanchej (Pro. 15:1). Kunantaj imapichus uj mama rikukusqanta qhawarinachej. Payqa wawanta sapallan uywasharqa. Wawanqa pakayllamanta sajra imasta ruwasharqa. Uj pʼunchaytaj uj hermana chayta yachaytawan, chay mamata kallpachariyta munaspa, nerqa: “Wawaykita mana allintachu yachachisqaykeqa, ¡llakikunapaj jinapuni!”, nispa. Chay mamaqa niraj imatapis kutichishaspa sumajta tʼukurerqa, phiñakuynintataj ñitʼiykukorqa. Nerqataj: “Wawayta yachachinaypaj tiempo kanraj. Chaypajtaj mayta kallpachakusaj. Armagedón pasaytarajchá yachasunchej allintachus manachus yachachisqayta”, nispa. Ajinata ruwasqanraykutaj iskayninku amigasllapuni kanku. Chayta uyarispa wawanpis manaña sajra imasta ruwarqachu, astawanpis bautizakorqa, Betel wasipitaj llankʼarqa. ¿Imatataj chaymanta yachakunchej? Familiaresninchejwan, hermanoswan, mana rejsisqa runaswan parlashaspaqa, kʼacha simiwan, kachiwan kachinchasqata jina parlananchej kasqanta. Nisunman jatunpaj qhawaspa parlananchej kasqanta (Col. 4:6).

18. ¿Imaynatataj Jesús jina ruwasunman?

¹⁸ Jehová imatachus yuyasqanchejta, sonqonchejpi imachus kasqanta wajkunaman willakuyta atinapaj jina ruwawasqanchejqa may sumajpuni. Chayrayku Jesús jina ruwanallapuni, chantapis maykʼajchus, imatachus, imaynatachus ninanchejtataj ajllananchej tiyan. Chayrayku mayta kallpachakuna kʼacha kanapaj, wajkunata parlayninchejwan kallpachanapaj, Jehovata kusichinapaj ima.