“Rispa, tukuy laya runasta yachachisqasniyman tukuchimuychej”

1, 2. 1) Mateo 28:18-20 nisqanman jina, ¿imatataj Jesús kamachiwanchej? 2) ¿Ima tapuykunamantaj kay yachaqanapi kutichisunchej?

JESUSQA kausarimuytawan apostolesninman nerqa, Galilea orqopi tantakunankuta. Chay orqopi kashaspa, apostolesqa maytachá yachayta munarqanku imatachus Jesús paykunaman ninanta (Mat. 28:16). Ichapis chay kutipi Jesusqa “500 kuraj tantasqa hermanosman” rikhurerqa (1 Cor. 15:6). ¿Imapajtaj Jesús apostolesninta tantacherqa? Kay kamachiyta qonanpaj: “Rispa, tukuy laya runasta yachachisqasniyman tukuchimuychej” (Mateo 28:18-20 leey).

² Jesuspa kamachisqanta uyarejkunaqa, ñaupa tiempomanta cristiana congregacionman yaykorqanku. Paykunaqa runasta Cristoj discipulosninb kanankupaj yanapananku karqa. Kay tiempopeqa mundontinpi may chhika congregaciones tiyan. Chay congregacionespi kajkunataj, Jesuspa kamachisqanta kasukushallankutaj. Kay yachaqanapi, kay tawa tapuykunaman kutichisun: ¿Imaraykutaj runasta Jesuspa discipulosninman tukunankupaj yanapananchej tiyan? ¿Imastataj chaypaj ruwananchej tiyan? ¿Imaynatataj sapa cristiano chay llankʼaypi yanapakusunman? ¿Imaraykutaj chayta ruwanapaj pacienciayoj kananchej tiyan?

 3. Juan 14:6; 17:3 nisqanman jina, ¿imaraykutaj runasta Jesuspa discipulosninman tukunankupaj yanapananchej tiyan?

³ ¿Imaraykutaj runasta Jesuspa discipulosninman tukunankupaj yanapananchej tiyan? Imaraykuchus Cristoj yachachisqanta ruwajkunalla, Diosman qayllaykuyta atinku. Chantapis kay tiempopiña sumajta kausakuyta atinku, aswan qhepamantaj wiñay kausayta japʼenqanku (Juan 14:6; 17:3 leey). Jesusqa uj jatun llankʼayta qowanchej. Jinapis mana sapanchejtachu saqerpariwanchej. Apóstol Pabloqa, paypis waj cristianospis “Dioswan khuska” llankʼasqankuta nerqa (1 Cor. 3:9). Juchasapas kajtinchejpis, Jehová Dioswan Cristowanqa uj sumaj llankʼayta qowanchej.

 4. ¿Imatá yachakunchej Ivanmantawan Matildemantawan?

⁴ Runasta Jesuspa discipulosninman tukucheyqa, mayta kusichiwanchej. Ivanmanta Matildemantawan parlarina. Paykunaqa Colombia suyumanta kanku, Davier sutiyoj jovenmantaj predicasqanku. Chay jovenqa paykunaman nisqa: “Kausayniyta cambiayta munayman, pero nisina atiymanchu”, nispa. Davierqa qolqerayku maqanakoj, drogakoj, anchatataj machaj. Chantapis novian Erikawan tantalla tiyakoj kanku. Iván nin: “Davierqa karu ranchitopi tiyakorqa. Payta visitarej rinaykupajqa, tʼuru ñankunasninta bicicletapi karuta rej kayku. Davier kausayninta cambiayta qallarejtin, novian Erikapis Bibliata estudiayta qallarerqa”, nispa. Tiempo pasasqantawan, Davierqa manaña qolqerayku maqanakojchu, niña drogakojchu, niñataj machajchu. Chantapis novian Erikawan casarakorqa. Matilde nin: “Davierwan Erikawan 2016 watapi bautizakushajtinku, qosaywan yuyarikorqayku Davierpa nisqanta. Pay nerqa: ‘Kausayniyta cambiayta munayman, pero nisina atiymanchu’, nispa. Chayta yuyarispa waqarikorqayku”, nispa. Runasta Cristoj discipulosnin kanankupaj yanapaspaqa, mayta kusikunchej.

 5. Runasta Jesuspa yachachisqasninman tukuchinapaj, ¿imatá ruwananchej kasqa?

⁵ Runasta Jesuspa yachachisqasninman tukuchinapajqa, allin sonqoyoj runasta maskʼananchej tiyan (Mat. 10:11). Jesús kamachiwasqanchejman jina tukuy runasman predicasun chayqa, Jehovaj testigosnin, cheqa cristianos ima kasqanchejta rikuchisunchej.

 6. ¿Imatataj ruwasunman runas Bibliamanta yachakuyta munanankupaj?

⁶ Wakin runasqa Bibliamanta mayta yachayta munanku. Wakintajrí mana yachayta munallankuchu, noqanchejtaj yachayta munanankupaj yanapananchej tiyan. Runas Bibliamanta yachakuyta munanankupajqa, imamantachus parlananchejta sumajta yuyaychakunanchej tiyan. Imastachus runas yachayta munasqankupi piensarina. Chantá imaynatachus chaymanta parlarinanchejpi tʼukurina.

 7. 1) Predicacionpi, ¿imaynatá runaswan parlarisunman? 2) ¿Imaraykutaj predicanchej chay runasta respetowan uyarinanchej tiyan?

⁷ Predicacionpeqa wasiyojta saludariytawan nisunman: “Kay tiempopi tukuypis ashkha problemasniyoj kanchej. Wakin runasqa uj sumaj gobiernolla chay problemasta allinchananta ninku. Qan, ¿imatá niwaj?”, nispa. Chantá Daniel 2:44 versiculota leeripusunman, sutʼincharisunmantaj. Manachayrí runasman nisunman: “Tukuypis wawasninchej allin runas kanankuta munanchej. ¿Imataj wawasninchejta sumajta uywanapaj yanapawasunman?”, nispa. Chantá Deuteronomio 6:6, 7 versiculosta leeripusunman, sutʼincharisunmantaj. Runasman predicanapajqa, paykunapi tʼukurinanchej tiyan. Imaynatachus Bibliaj yachachisqan paykunata yanapananpi piensarina. Chantapis paykunawan parlarishaspaqa, parlasqankuta sumajta uyarina, imatachus nisqankutataj respetana. Ajinamanta imatachus yuyasqankuta entiendesun, uyariytataj munallawasun.

 8. ¿Imaraykutaj runasta visitarispa mana saykʼunanchejchu tiyan?

⁸ Uj runa Bibliata estudiayta qallarinanpajqa, ichapis ashkha kutista wasinman kutinanchej kanqa. Chaypajtaj kallpachakunanchej, tiempochakunanchejtaj kanqa. ¿Imaraykutaj chayta ninchej? Ichapis kutejtinchej wasiyojta mana taripasunchu, chayri atiendenawanchejpaj mana tiempoyojchu kanman. Chantapis wakenqa rejsiwanchej chaypacharaj Bibliamanta yachakuyta munanku. Chaykamataj ichá ashkha kutistaraj visitarinanchej kanqa. Imaynatachus uj plantita wiñananpaj sapa kuti qarparinchej, ajinallatataj runas Jehovata Cristotawan munakunankupaj, sapa kuti Bibliamanta parlarinanchej tiyan.

9, 10. ¿Tukuy cristianoschu yanapakoj kasqanchej sumaj sonqoyoj runasta tarinapaj?

⁹ Sumaj sonqoyoj runasta tarinapajqa, tukuy cristianos yanapakunchej. Llankʼayninchejqa chinkasqa wawata maskʼay jina. Uj pacha, kinsa watitayoj wawita chinkasqa. Chay wawitata maskʼanankupajqa, 500 runas jina yanapakusqanku. 20 horasninman jinataj, uj runa chay wawitata sara chajrapi tarisqa. Chay runaqa wawitata paylla tarisqanta ninanmantaqa, jinata nerqa: “Ashkhas yanapakusqaykurayku, chay wawitata tariyku”, nispa.

¹⁰ Ashkha runasqa chay chinkasqa wawita jina kashanku. Paykunaqa mana suyakuyniyoj kanku, yanapachikuytataj munanku (Efe. 2:12). Chay runastataj 8 millonesmanta astawan hermanos maskʼashanchej. Ichá noqanchejqa, ni uj runallatapis Bibliamanta yachachinapaj tarinchejchu. Chaywanpis noqanchejwan khuska predicajkunaqa, yachakuyta munajkunata tarinku. Uj hermanonchej chay jina runata tarejtin, chay runataj Jesuspa discipulonman tukojtin, tukuyninchej kusikunchej.

11. Niraj uj runata Bibliamanta yachachishanchejchu chay, ¿imaynatá runasta Jesuspa discipulosnin kanankupaj yanapakusunman?

¹¹ Niraj uj runata Bibliamanta yachachishanchejchu chayqa, ¿imaynatá runasta Jesuspa discipulosnin kanankupaj yanapakusunman? Pillapis tantakuyninchejman ñaupaj kutillataraj jamun chayqa, “walejta jamunki” nisunman, yanaparisunmantaj. Ajinamanta payqa reparanqa purajmanta munanakusqanchejta, cheqa cristianostaj kasqanchejta (Juan 13:34, 35). Reunionpi pisi parlayllapi kutichisqanchejpis, paypis kikinta ruwananpaj yanapanqa. Chantapis mosoj willajwan predicaj llojsisunman, yanaparisunmantaj runasta Bibliawan yachachinanpaj. Chayta ruwaspaqa, Cristo jina ruwananpaj yanapasun (Luc. 10:25-28).

12. Uj runata Bibliamanta yachachinapaj, ¿sumaj yachayniyojchu kananchej tiyan? Hermananchej Faustinamantawan parlariy.

¹² Uj runata Jesuspa discipulonman tukuchinapajqa, mana sumaj yachayniyojpunichu kananchej tiyan. ¿Imaraykutaj chayta ninchej? Hermananchej Faustinamanta parlarina, payqa Boliviamanta. Bibliata estudiayta qallarishajtin, payqa mana leeyta yacharqachu. Jinapis kunanqa hermananchejña, paytaj tumpitata leeriyta atinña. Payqa runasman Bibliamanta mayta yachachiyta munan. Sapa semana phishqa runasman Bibliamanta yachachin. Hermananchej Faustinaqa mana estudiosnin jinapunichu allinta leen. Jinapis sojta runastaña bautizakunankupaj yanapan (Luc. 10:21).

13. Mana tiempoyoj kajtinchejpis, ¿ima bendicionestataj japʼisunchej runasman yachachispa?

¹³ Ashkha hermanosninchejqa, ashkha ruwanasniyoj kasqankurayku mana tiempoyojchu kanku. Jinapis runasman Bibliamanta yachachinankupaj tiempochakunku, chayta ruwaspataj mayta kusikunku. Hermananchej Melaniemanta parlarina. Payqa pusaj watitayoj warmi wawitanta sapallan uywakun. Chantapis cáncer onqoyniyoj tatanta qhawaysikun, diantintataj trabajan. Payqa Alaskaj ujnin juchʼuy llajtitanpi tiyakun. Chay karu llajtitapeqa manchayta chirin, payllataj testigo karqa. Hermananchej Melanieqa Bibliamanta yachakuyta munajta tariyta munarqa. Chayrayku ajina chiripi predicaj llojsinanpaj, kutin kutita Diosmanta kallpata mañakorqa. Ajinapi Sara sutiyoj warmita tarisqa. Chay warmeqa Diosninchej sutiyoj kasqanta yachaspa, mayta kusikusqa. Tiemponmantaj Bibliamanta yachakuyta qallarisqa. Hermananchej Melanie nin: “Viernes tardesqa manchay saykʼusqa kaj kani. Ajina saykʼusqa kaspapis, imillitaywan khuska Saraman Bibliata estudiachej rej kayku. Chayta ruwayqa imillitaytapis noqatapis, mayta yanapawarqayku. Saraqa tukuy imamanta tapuwaj kayku. Noqaykutaj payman kutichinaykupaj, publicacionespi kusiywan maskʼaj kayku. Sarata Jehová Diosman chimpaykojta rikuspa, mayta kusikorqayku”, nispa. Saraqa familiasnin, rejsisqasnin ima churanakojtinkupis, iglesianmanta llojsiporqa, bautizakorqataj.

14. 1) ¿Imaraykutaj runasman Diosmanta willay pescadota japʼiyman rijchʼakun? 2) Kay 2 Timoteo 4:1, 2 nisqanman jina, ¿imatataj ruwasunman?

¹⁴ Jesuspa discipulosninman tukuyta munaj runasta mana tarispapis, maskʼanallapuni. Jesusqa Diosmanta willayta, pescadota japʼiywan kikincharqa. Pescajkunaqa unayta yakupi kankuman, nitaj uj pescadollatapis japʼinkumanchu. Paykunaqa tutantin chayri sutʼiyayta pescadota japʼej rinku, wakin kutistaj astawan ukhuman yaykunku (Luc. 5:5). Wakin hermanosninchejqa ajinallatataj ruwanku. Paykunaqa yachakuyta munaj runasta pacienciawan maskʼananku tiyan, tukuynejpitaj. Chayta ruwanku astawan runasta tarinankupaj. Ajinata predicaj hermanosqa, Diosmanta uyariyta munaj runasta tariyta yachanku. Noqanchejpis ima horastachus runasta tarisunman, chay horasta predicasunman. Chayrí maypichus runasta tarisunman, chaypi willasunman (2 Timoteo 4:1, 2 leey).

15. ¿Imaraykutaj runasman Bibliamanta yachachinapaj pacienciayoj kananchej tiyan?

¹⁵ ¿Imaraykutaj runasman Bibliamanta yachachinapaj pacienciayoj kananchej tiyan? Imaraykuchus mana Bibliaj nisqallantachu paykunaman rejsichinanchej tiyan, manaqa sonqonkuman chayananpajpis yanapanallanchejtaj tiyan. Chantapis Jehovata rejsinankupaj, munakunankupaj ima yanapananchej tiyan. Imaraykuchus Bibliata qhelqachejqa Jehová Diosninchej. Mana chayllachu, paykunaman Jesús imatachus kamachisqanta yachachispapis, chay kamachiykunaman jina kausakunankupaj yanapanallanchejtaj tiyan. Chay runas Bibliaj nisqanta ruwanankupaj kallpachakushajtinku, pacienciawan yanaparinanchej tiyan. Wakin runasqa sajra yuyayninkuta, ruwasqasninkutapis chay rato cambianku. Wakintajrí unaypi cambianku.

16. ¿Imatá Raulpa kausayninmanta yachakunchej?

¹⁶ Perú suyumanta misioneroj ujnin estudionwan imachus kasqanta qhawarina. Misionero hermanonchej nin: “Raulqa iskay librostaña estudiaspa tukorqa. Jinapis payqa ashkha problemasniyojllapuni karqa. Payqa señoranwan mana allintachu kausakoj, millay parlaykunatataj parlaj, nitaj wawasninpis respetajchu kanku. Jinapis Raulqa tantakuykunaman jamullajpuni. Chayrayku payta, familiantawan visitarillajpuni kani. Estudiachiyta qallarisqaymanta kinsa watasninmanraj bautizakuyta aterqa”, nispa. Raulpa kausaynenqa, estudiosninchejwan pacienciakunanchej kasqanta yachachiwanchej.

17. ¿Imatá qhepan yachaqanapi yachakusun?

¹⁷ Jesusqa kamachiwarqanchej: “Tukuy laya runasta yachachisqasniyman tukuchimuychej”, nispa. Chay kamachiyta juntʼanapajqa, tukuy laya runasman predicananchej tiyan, nisunman waj creenciasniyoj kajkunaman, ni mayqen iglesiaman rejkunaman, mana Diospi creejkunamanpis. Qhepan yachaqanapeqa, yachakusunchej imaynatachus chay runasman Diosmanta willana kasqanta.