Ashkhas Jesusta rikunku Pentecostés fiesta qayllata

Jesusqa kausarimuytawan 11 apostolesninta nerqa, Galileaj ujnin orqonman rinankuta. Chaypitaj paykunawan tinkorqa. Chaypeqa waj yachachisqasnin kashallarqankutaj. Paykunataj 500 jina karqanku. Paykunamanta wakenqa Jesús kausarimusqanta manapuni creerqankuchu (Mateo 28:17; 1 Corintios 15:6). Jinapis Jesús paykunawan parlajtinraj creerqanku.

Jesusqa paykunaman nerqa: “Diosqa tukuy atiyta qowan cielopi, jinallataj kay jallpʼapipis. Chayrayku rispa, tukuy laya runasta yachachisqasniyman tukuchimuychej, bautizaspa Tata Diospa sutinpi, Wawanpa sutinpi, atiyninpa sutinpiwan. Yachachimuychej paykunaman imastachus noqa kamacherqaykichej, chayta paykunapis kasukunankupaj”, nispa (Mateo 28:18-20). Arí, Jesusqa Diospa Gobiernonmanta sumaj willaykuna willakunallantapuni munarqa.

Chay kamachiytataj Jesuspa tukuy yachachisqasnin juntʼananku tiyan. Jesús nerqa: “Diosqa tukuy atiyta qowan cielopi, jinallataj kay jallpʼapipis”, nispa. Chaywanqa yachachisqasninta kallpachasharqa, qhatiykachasqa kaspapis willanallankupajpuni, yachachinallankupajpuni. Jesusqa nerqa yachachisqasnin Diospa atiyninta japʼinankuta, manataj milagrosta ruwanankutachu. Chantapis yachachisqasninta nillarqataj: “Ama qonqaychejchu, noqaqa qankunawan tuta pʼunchay kasaj, kay mundoj imasnin tukukunankama”, nispa.

Jesusqa kausarimuytawan 40 diaspi ashkha kutista yachachisqasninman imaymana cuerposniyoj rikhurerqa. Ajinamanta ‘kausarinpusqanta yachanankupaj’. Chantapis Jesusqa ‘Diospa Gobiernonmanta’ paykunaman parlarqa (Hechos 1:3; 1 Corintios 15:7).

Jesusqa ichapis apostolesnin Galileallapiraj kashajtinku Jerusalenman kutinankuta nerqa. Jerusalenpitaj paykunaman nerqa: “Ama Jerusalenmanta ripunkichejchu. Suyallaychejpuni imatachus Tatay qosaj nerqa chayta juntʼananta, mayqentachus noqamanta uyarerqankichej, chayta. Juanqa yakuwan bautizarqa, kaymanta pisi pʼunchaykunamantaj qankunaqa Diospa atiyninwan bautizasqa kankichej”, nispa (Hechos 1:4, 5).

Chantá Jesusqa apostolesninman rikhurillarqataj. Chantá “paykunata pusarqa llajtamanta jawaman Betaniakama”, mayqenchus Olivos orqo kʼuchupi kasharqa, chayman (Lucas 24:50). Apostolesqa Jesús Israelpi gobiernonta sayarichinanta yuyashallarqankupuni, Jesús cieloman kutipunanta paykunaman willajtinñapis (Lucas 22:16, 18, 30; Juan 14:2, 3).

Chayrayku Jesusta taporqanku: “Señor, ¿kunanchu watejmanta Israelpa gobiernonta sayarichishanki?”, nispa. Jesustaj nerqa: “Maykʼajchus chayri ima horachus imapis kanantaqa Tatallay niyta atin, qankunaqa mana chayta yachanaykichejpunichu tiyan. [...] Diospa atiynin qankunaman jamojtin atiyta japʼinkichej, noqamantataj testigos jina willamunkichej Jerusalenpi, tukuy Judeapi, Samariapi, jinallataj kay jallpʼaj tukuy kʼuchusnintinpi”, nispa (Hechos 1:6-8).

Jesusqa Olivos orqopi apostolesnin qhawashajtinku oqharisqa karqa, phuyu pʼampaykojtintaj manaña payta rikorqankuchu. Jesusqa kausarimusqanmantapacha uj día uj cuerpoyoj waj diataj waj cuerpoyoj yachachisqasninman rikhurerqa. Jinapis cielomanqa mana rikukoj cuerpoyoj riporqa. Yachachisqasninman ima cuerpowanchus Olivos orqopi rikhurerqa, chay cuerpontataj chinkacherqa (1 Corintios 15:44, 50; 1 Pedro 3:18). Apostolestajrí Jesús ripushajtin cielota qhawaspallapuni kasharqanku. Jinallapitaj “iskay runas yuraj ropasniyoj qayllankupi rikhurerqanku”. Paykunaqa ángeles karqanku, nerqankutaj: “Galileamanta runas, ¿imaraykutaj cielota qhawashankichejri? Jesusqa qankuna ukhumanta cielomanña ripun. Payqa imaynatachus cieloman ripojta rikorqankichej, ajinallatataj jamonqa”, nispa (Hechos 1:10, 11).

Jesusqa mana tukuypa rikunantachu riporqa. Manaqa yachachisqasnillan ripushajta rikorqanku. “Ajinallatataj” pay kutimojtinpis, yachachisqasnillan cuentata qokunanku karqa Jesús Reyña kasqanmanta.

Chantá apostolesqa Jerusalenman kutiporqanku. Chaypitaj qhepan días tukuyninku tantakorqanku mana saykʼuspa orakunankupaj. Paykunawan khuska “kashallarqankutaj, Jesuspa hermanosninpis, maman Mariapis” (Hechos 1:14). Paykunaqa Diosmanta mañakorqanku Judas Iscariotej cuentanmanta uj apostolta ajllanankupaj. Ajinamanta 12 apostolesllapuni kanankupaj (Mateo 19:28). Chaypajqa sumajta qhawarerqanku pichus Jesuspa tukuy ruwasqasninta, kausarimusqantapis rikusqanta. Chantá suerteta choqarqanku (Salmo 109:8; Proverbios 16:33). Suertetaj Matiaspaj llojserqa, paytaj 11 apostolesman yapakorqa. Matiasqa ichapis Galileapi willanankupaj kachasqa 70 yachachisqasmanta ujnin karqa (Hechos 1:26). Bibliaqa chay kutimantapacha manaña suerteta choqanamanta parlanchu.

Jesús cieloman ripusqanmanta 10 diasninman, Jerusalenpi 33 watamanta Pentecostés fiesta karqa. Chay diaqa, Jesuspa yachachisqasnin 120 jina, Jerusalenpi uj wasej altos patanpi tantasqa kasharqanku. Jinallapitaj sinchʼi wayraj sonaynin jina sonamorqa, chaytaj wasi ukhuman juntʼaykorqa. Nina lauray qallus jinataj rikhurerqa, chaytaj sapa ujpa patanman tiyaykorqa, tukuyninkutaj waj parlaykunapi parlayta qallarerqanku. Ajinamanta Jesuspa nisqan juntʼakorqa. Pay nerqa: “Diospa atiynintaj [...] yanapasonqachej”, nispa (Juan 14:26).