Dios sumaj regalota qowasqanchej. ¿Imaraykutaj mana waj regalowan kikinchakunchu?

Uj regalotaqa sumajpaj qhawasunman uj autoridad runa chayri jatunpaj qhawasqanchej runa qowasqanchejrayku. Wakin regalostataj, mana ancha valesqachu kajtinpis, may valorniyojpaj qhawanchej uj munasqa familiarninchej chayri munasqa amigonchej qowasqanchejrayku. Ajina regalota qorqa Russell Jordanman, pimantachus ñaupaj kaj yachaqanapi parlarerqanchej. ¿Imaraykú juchamanta kacharichisqa kasqanchej sumaj regalo jina?

Ñaupajtaqa Biblia nin “Diosqa kʼata Wawanta kay mundoman kachamorqa paynejta kausayta japʼinanchejpaj” (1 Juan 4:9). Chayrayku chay regaloqa may valorniyoj, imajtinchus Dios jinaqa mana pipis aswan atiyniyoj kanchu. Uj salmista nerqa: “Yachachuncu kan, Jehová sutiyoj, Kanlla Altísimo caskayquita tucuy caypacha patapi”, nispa (Salmo 83:18, Biblia Quechua de Cuzce). Diosmanta jinaqa mana waj regalota japʼisunmanchu.

Chantapis, Diosqa Tatanchej (Isaías 63:16). ¿Imaraykutaj chayta ninchej? Pay kausayta qowasqanchejrayku. Chantapis, uj kʼacha tata jina qhawawanchej, noqanchejmantataj llakikun. Diosqa, ñaupa tiempopi ujnin ayllunmanta parlaspa, mayqentachus Efraín suticharqa, jinata nerqa: “Efraínqa noqapaj munasqa waway jina, aswan munasqa kaj churiy jina. [...] Mayta paymanta khuyakuni”, nispa (Jeremías 31:20). Kunanpis, Diosqa kikillantataj payta yupaychajkunata munakun. Payqa mana ruwawajninchej Diosllachu, manaqa kʼacha Tatanchej, Amigonchejtaj. Chayrayku tukuy regalosnin may valorniyoj kanku.

Wakin regalostaqa may valorniyojpaj qhawanchej munakuywan qowasqanchejrayku, nitaj juntʼananraykullachu. Munakuywan regalajqa mana suyanchu regalanallankutataj.

Diosqa, Wawanta qorqa munakuwasqanchejrayku. Biblia nin: “Kay jinamanta Diosqa munakuyninta rikuchiwarqanchej: Diosqa kʼata Wawanta kay mundoman kachamorqa paynejta kausayta japʼinanchejpaj”, nispa (1 Juan 4:9). Diosqa mana chayta ruwananpunichu karqa. “Cristo Jesusnejta juchamanta kacharichisqa” kasqanchejqa Diospa “jatun khuyakuyninrayku” (Romanos 3:24).

¿Imaraykutaj Diospa regalon jatun khuyakuyninta rikuchin? Biblia nin: “Cristorí juchasapasllaraj kashajtinchej noqanchejrayku wañorqa. Ajinamanta Diosqa munakuyninta rikuchiwanchej”, nispa (Romanos 5:8). Diosqa juchasapa runasta munakusqanrayku chayta ruwarqa. Mana chayta japʼinanchejpaj jinachu karqanchej, chaymantataj ni jaykʼaj juntʼayta atisunmanchu. Diospa regalonqa, ni pi jina munakuwasqanchejta rikuchin.

Wakin regalosqa may valorniyoj kanku, imajtinchus chay regalota qojpajqa mana atinanpaj jinallachu karqa. Pillapis imatachus astawan munakusqanta regalawajtinchejqa, may valorniyojpaj qhawanchej chay regalota.

Diosqa “uj kʼata Wawanta qorqa” (Juan 3:16). Aswan munasqa Wawanta qowarqanchej. Dios tukuy imata may chhika wataspi ruwashajtin, Jesusqa Tatanwan khuska llankʼasharqa. Ajinamanta “sapa pʼunchay paypa kusikunan” karqa (Proverbios 8:30). Jesustaj chay munasqa Wawan karqa, “mana rikukoj Diospa rijchʼaynin” (Colosenses 1:13-15). Jehovawan Jesuswanqa may ujchasqapuni kausakorqanku.

Jehovaqa, Wawanta tukuy sonqo runasrayku qoyta munarqa (Romanos 8:32). Arí, Payqa aswan munasqa Wawanta qowarqanchej. Chayta ruwasqantaj mana atinanpaj jinallachu karqa.

Wakin regalosqa may valorniyoj kanku, chaytapuni necesitashasqanchejrayku. Kaypi tʼukuriy, onqosqa kashajtiyki uj tratamientopaj qolqesitu faltasojtin, uj amigoyki chay tratamientomanta pagapusunanta nisojtin mayta agradecekuwaj, ¿icharí?

“Adannejta tukuy wañushanku, ajinallatataj Cristonejta tukuy kausarichisqa kanqanku” (1 Corintios 15:22). Adanpa mirayninmanta kasqanchejrayku tukuy wañushanchej, mana onqoymanta, wañuymanta ima kacharichikuyta atinchejchu, nillataj Dioswanpis allinyakuyta atinchejchu, ñaupaqenpitaj mana juchayoj kayta. Runaslla kasqanchejrayku ni pitapis kausarichiyta atinchejchu. Biblia nin jinataj “mana pipis pagaspa wawqenta salvayta atinmanchu, nitaj Diosman pagayta atinmanchu kawsayninta salvanampajqa” imajtinchus mana chayta ruwananchejpaj jinachu kanchej (Salmo 49:7, 8). Usqhayllata yanapata necesitanchej, imajtinchus juchamanta preciowan kacharichisqa kasqanchejmantaqa mana pagayta atisunmanchu. Arí, noqallanchejmantaqa ni imata ruwayta atisunmanchu.

Jehovaqa mayta munakuwasqanchejrayku, tukuy sonqo pagarqa salvasqa kananchejpaj, chaytataj ruwarqa Jesusnejta. ¿Imaynatá juchamanta, wañuymanta ima kacharichisqa kanchej? Jesuspa yawarnin “tukuy juchamanta llimphuchawanchej”. Arí, Jesucristoj wañuyninpi creespaqa juchanchejmanta perdonasqa kayta atinchej, wiñay kausaytataj japʼiyta (1 Juan 1:7; 5:13). Jesuspa wañuynenqa wañupoj familiaresninchejtapis yanapallanqataj, imajtinchus Bibliaqa nin: “Imaynatachus wañoyqa uj runanejta rikhurerqa, ajinallatataj wañuymanta kausarimuypis uj runanejllatataj [Jesusnejta] kanqa”, nispa (1 Corintios 15:21).a

Jesuspa wañuynenqa may valorniyoj regalopuni, tukuy imata ruwaj Dios munakuywan qowasqanchejrayku. Ni pi Jehová Dios jinaqa imatapis qowarqanchejchu. Chantapis chay regaloqa juchamanta, wañuymanta ima kacharichiwanchej. Chayrayku chayqa ni mayqen regalowan kikinchakunchu.