Leejkunaj tapuyninku

Mana. Ni Bibliapis, ni chay tiempomanta parlaj librospis ninchu, ñaupa cristianos wañusqasrayku bautizakusqankuta.

Ashkha Bibliaspi 1 Corintios 15:29 nin: “Manachus jina kanman chayqa, imata ruwanqanku wañusqasrayku bautizakojkuna, wañusqas mana imaynamanta kawsarimpojtinkuri?”, nispa (Diosmanta Qhelqasqa). Kay jina Bibliasta leespa, ashkha runas yuyanku apóstol Pabloj tiemponmanta cristianos, wañusqaspa sutinpi bautizakusqankuta.

Jinapis qhawarina imatachus Bibliamanta yachaj runas nisqankuta. Gregory Lockwood nin: ‘Ni Bibliapis, ni ñaupa tiempomanta librospis ninchu, ñaupa cristianos wañusqasrayku bautizakusqankuta’, nispa. Gordon Fee sutiyoj profesorpis chayman rijchʼakojllatataj nin. Payqa qhelqarqa:·“Ni ñaupa tiempomanta librospis, ni Bibliapis ninchu, ñaupa cristianos wañusqaspa sutinpi bautizakusqankuta. Mosoj Testamentopis mana chay jina bautismomanta parlanchu. Nitaj imapis rikuchinchu, ñaupa cristianos wañusqasrayku bautizakusqankuta. Apóstoles wañupusqankutawan rikhurej iglesiaspis, nillataj chayta ruwarqankuchu”, nispa.

Biblia nisqanman jina, Jesusqa discipulosninman nerqa: “Tukuy laya runasta yachachisqasniyman tukuchimuychej, bautizaspa [...]. Yachachimuychej paykunaman imastachus noqa kamacherqaykichej, chayta paykunapis kasukunankupaj”, nispa (Mat. 28:19, 20). Chayrayku bautizakuyta munaj runaqa, Jehová Diosta, Wawantawan ñaupajta rejsinan tiyan, paykunapitaj creenan tiyan. Chantá paykunata kasukunan tiyan. Wañusqa runatajrí, jallpʼa ukhupiña kasqanrayku, mana chay imasta ruwayta atinmanchu. Nitaj kausashaj cristiano, wañusqa runapaj chayta ruwapuyta atinmanchu (Ecl. 9:5, 10; Juan 4:1; 1 Cor. 1:14-16).

Entonces, ¿imamantataj Pablo parlasharqa?

Corinto llajtamanta wakin cristianosqa, wañusqas mana kausarimunankuta nisharqanku (1 Cor. 15:12). Pablotajrí paykunaman pantasqa kasqankuta nisharqa. Paykunaman nerqa: “Sapa pʼunchay wañuy patapi kani”, nispa. Pabloqa sinchʼi llakiykunapi kaspapis, yacharqa wañupojtin Jesús jina cielopaj cuerpoyoj kausarichisqa kananta (1 Cor. 15:30-32, 42-44).

Corintomanta cristianosqa, cieloman rinankupaj ajllasqa karqanku. Chayrayku mana qonqanankuchu karqa, sapa día llakiykunapi kanankuta, wañupunankukamataj cheqa sonqo kananku kasqanta. Ajinamanta cieloman rinankupaj kausarichisqa kanankupaj. Paykunaqa “Cristo Jesuspi bautizasqa” kasqankurayku, “wañuyninpipis bautizasqa” kallarqankutaj (Rom. 6:3). Chayrayku paykunapis Jesús jinallataj ñakʼarinanku karqa, wañuspataj cieloman rinankupaj kausarichisqa kananku karqa.

Jesusqa bautizakusqanmanta iskay watanman jina, iskay apostolesninman nerqa: “Ima bautismowanchus bautizakushani, chayllawantaj qankunapis bautizasqa kankichej”, nispa (Mar. 10:38, 39). Jesusqa chayta nishaspa, mana bautizakusharqachu. Payqa chaywan nisharqa, Diosta tukuy imapi kasukusqanrayku wañuchisqa kananta. Pabloqa ajllasqa cristianosman nerqa: “Cristo jina ñakʼarisun chayqa, paywan khuskallataj jatunchasqa kasunchej”, nispa (Rom. 8:16, 17; 2 Cor. 4:17). Chaywan nisharqa, ajllasqa cristianos cieloman rinankupajqa, wañunankupuni kasqanta.

Chayrayku Pabloqa, 1 Corintios 15:29 versiculopi kay jinata nisharqa: “Manachus wañusqas kausarichisqa kanqanku chayqa, ¿imataj kanqa wañunankupaj bautizakojkunamanta? ¿Imapajtaj wañunankupaj bautizakushankuri?”, nispa.