Jehovamanta Jesusmantawan yuyarikuna

UJ SUMAJ regalota pillapis regalasojtin, ¿maytacharí kusikuwaj?... ¿“Gracias” niytawan paymanta qonqakapuwajchu? Chayrí, ¿yuyarikuwajpunichu?...

Diosqa uj sumaj regalota qowarqanchej. Payqa Wawanta Jallpʼaman kachamorqa, noqanchejrayku wañunanpaj. ¿Imaraykú Jesús noqanchejrayku wañunan karqa?... Chayta sumajta entiendenapaj, ukhuncharina.

Kay libroj 23 yachaqananpi yachakorqanchej jina, Adanqa Diospa leyninta mana kasuspa juchallikorqa. Noqanchejtaj Adanmanta juchata herenciata jina japʼinchej. Chayrayku, ¿imatá necesitanchej?... Uj mosoj tatata. Paytaj mana pantaj, kay Jallpʼapi kausakojtaj kanan tiyan. ¿Pitaj kanman?... Jesús.

Jehovaqa Jesusta kachamorqa, Adanpa cuentanmanta tatanchej kananpaj. Biblia nin: ‘Ñaupaj kaj runa Adanqa kausaj runa ruwasqa karqa. Qhepa kaj Adanrí kausayta qoj espíritu’, nispa. ¿Pitaj ñaupaj kaj Adán?... Dios jallpʼamanta ruwarqa chay runa. Chantá, ¿pitaj qhepa kaj Adán?... Jesús. Chayrayku Biblia nin: “Ñawpaj kaj runa [Adanqa] kay pachamanta karqa, jallpʼamanta ruwasqa; qhepan kaj runarí [Jesús] janaj pachamanta jamorqa”, nispa (1 Corintios 15:45, 47; Génesis 2:7).

Diosqa Jesuspa kausayninta Mariaj wijsanman churarqa. Chayrayku Jesusqa mana juchayoj nacekorqa (Lucas 1:30-35). Chayraykutaj Jesús nacekojtin, uj ángel michejkunaman nerqa: ‘Kunan qankunapaj nacekun uj Salvaj’, nispa (Lucas 2:11). Wawitallaraj kashaspa, ¿Salvawajninchej kayta atinmanchu karqa?... Mana. Wiñananraj karqa, Adán jina wiñay tukusqa kananpaj. Chantá ‘qhepa kaj Adán’ kayta atinman karqa.

Salvawajninchej Jesusqa ‘Wiñaypaj Tatanchej’ kanqa, ajinata Biblia sutichan (Isaías 9:6, 7). Jesusqa mana juchayoj kasqanrayku, Adanpa cuentanmanta tatanchej kayta atinman. Adanqa juchallikuspa pantaj runaman tukorqa. Chayrayku ‘qhepa kaj Adanta’ tatanchej kananpaj ajllayta atinchej. Jesuspis tatayojllataj, Tatanqa Jehová.

Jesusmanta yachakuspaqa, Salvadorninchejta jina qhawanchej. ¿Imamantá salvasqa kananchej tiyan? ¿Yuyarikunkichu?... Juchamanta, wañuymanta ima. Chaytaqa Adanmanta herenciata jina japʼerqanchej. Jesusqa kausayninta qospa rantiwarqanchej. Jehovaqa Jesusta kachamorqa, juchasninchej perdonasqa kananpaj (Mateo 20:28; Romanos 5:8; 6:23).

Dios, Wawan ima noqanchejrayku ruwasqankuta ni jaykʼaj qonqayta munanchejchu, ¿icharí?... Jesusqa imaynatachus yuyarikunata yachachisqasninman nerqa. Chayta qhawarina.

Kaypi tʼukuriy. Jerusalén llajtapi uj wasej altosninpi kashanki. Tutaña kashan. Jesuswan apostolesninwanqa mesaj munuyninpi tiyasqas kashanku. Mesapeqa cordero kanka, pʼalta tʼantas, vino ima tiyan. Uj sumaj mikhuypi kashanku. ¿Yachankichu imaraykuchus?...

Chaytaqa ruwaj kanku, Jehová imatachus israelitasrayku ashkha watas ñaupajta ruwasqanta yuyarinapaj. Israelitasqa egipciospa esclavosnin karqanku. Chaypacha Jehová nerqa: ‘Sapa familiapi ñakʼankichej uj corderota. Yawarnintataj punku sayanta kʼaspisman chʼajchunkichej. Chantá wasisniykichejman yaykuspa, cordero aychata mikhunkichej’, nispa.

Israelitasqa chayta ruwarqanku. Diospa angelnintaj chay chʼisipacha Egiptoman rerqa. Casi tukuy wasispitaj kuraj kaj wawasta wañuracherqa. Corderoj yawarninwan chʼajchusqa wasistarí pasallarqa, ni mayqen wawata wañuchispa. Egiptomanta rey faraonqa Jehovaj angelnin imatachus ruwasqanmanta, mayta mancharikorqa. Chayrayku israelitasta nerqa: ‘Llojsiychej Egiptomanta’, nispa. Ajinapi israelitasqa tukuy imasninkuta camellosninkuman, burrosninkuman chajnaykuspa riporqanku.

Ajinata Jehovaqa llajtanta kacharicherqa. Chayta mana qonqanankupajtaj paykunaman nerqa: ‘Watapi uj kutita kay jina mikhuyta wakichinkichej’, nispa. Chaytataj Pascua nerqanku. Chaypi yuyarikunanku karqa, chay chʼisipi Diospa angelnin yawarwan chʼajchusqa wasista ‘pasallasqanta’ (Éxodo 12:1-13, 24-27, 31).

Jesuswan apostolesninwanqa Pascua mikhuypi chayta yuyarikorqanku. Mikhuytawan, Jesusqa uj mosoj ruwayta qallaricherqa. Jesusta wasanchaj Judastaj niraj chayta qallarishajtin riporqa. Chantá Jesusqa ujnin puchoj tʼantata oqharerqa. Graciasta qoytawantaj, chay tʼantata partispa apostolesninman jaywarqa. Nerqataj: ‘Kayta mikhuychej. Kayqa cuerpoywan ninakun. Wañojtiy qankunarayku qosqa kanqa’, nispa.

Chantá Jesusqa vinoyoj copatañataj oqharerqa. Watejmanta graciasta qospataj paykunaman jaywarqa, nerqataj: ‘Kaymanta tukuyniykichej ujyaychej. Kayqa yawarniywan ninakun. Chaytaj jichʼasqa kanqa juchasniykichej pampachasqa kananpaj. Kaytaqa ruwallaychejpuni noqamanta yuyarikunaykichejpaj’, nispa (Mateo 26:26-28; 1 Corintios 11:23-26).

Jesusqa yachachisqasninman chayta ruwanallankutapuni nerqa, paymanta yuyarikunankupaj, ¿icharí?... Chay kutimantapacha, Pascuaj cuentanmantaqa chay cenata ruwananku karqa, Jesusta, wañuyninta ima yuyarikunankupaj. Chaytaj ‘Señorpa cenan’ nisqa. Kunanqa Jesuspa Wañuyninta Yuyarinapaj tantakuy nillanchejtaj. ¿Imaraykú?... Imaraykuchus Jesús, Tatan Jehovawan imatachus noqanchejrayku ruwasqankuta yuyarikunchej.

Tʼantaqa Jesuspa mana juchayoj cuerponta yuyarichiwanchej. Payqa noqanchejrayku wañorqa wiñaypaj kausananchejpaj. Vinorí, ¿imatá yuyarichiwanchej?... Jesuspa yawarnin may valorniyoj kasqanta. Yawarnenqa Pascua corderoj yawarninmanta aswan valorniyoj. ¿Imaraykú?... Biblia nisqanman jina, Jesuspa yawarninrayku juchasninchej perdonasqa. Jucha manaña kajtintaj onqoy, machuyay, wañuy ima manaña kanqachu. Jesuspa Wañuyninta Yuyarinapaj tantakuypeqa, chaypi tʼukurina.

¿Chay tantakuypi tukuychu tʼantata mikhunanku, vinotapis ujyananku tiyan?... Jesusqa chay tantakuypi tʼantata mikhojkunaman, vinotapis ujyajkunaman nerqa: ‘Gobiernoypi noqawan kankichej, kamachina tiyanaspitaj tiyaykunkichej’, nispa (Lucas 22:19, 20, 29, 30). Chayta nispaqa cieloman rispa paywan reyes kanankuta, niyta munarqa. Chayrayku Jesuswan cielomanta kamachimonqanku, chaykunalla tʼantata mikhunanku, vinotapis ujyananku tiyan.

Cieloman rinankupaj mana ajllasqa kajkunapis, chay tantakuyman rinanku tiyan. ¿Imaraykú?... Jesusqa tukuy runasrayku wañorqa. Jesuspa Wañuyninta Yuyarinapaj tantakuyman rispataj, paymanta yuyarikusqanchejta rikuchinchej. Chantapis yuyarikunchej Jehová uj sumaj regalota qowasqanchejta.