“Corderoj qhepanta rinku”

“[Paykunaqa] Corderoj qhepanta rinku mayllamampis rejtin.” (APO. 14:4)

 1. Jesuspa chiqa discipulosnin, ¿imaynatá qhipanta riyta munasqankutapuni rikuchirqanku?

ISKAY wata khuskanniyuqña karqa Jesús Reinomanta willayta qallarisqanmantapacha. “Capernaumpi kaj sinagogapi” Jesús yachachisqan, achkha discipulosninpaq ancha sinchi kasqanrayku, paykunaqa “ñawpa kawsayninkuman kutiporqanku, manañataj Jesuswanchu purerqanku”. Chayrayku Jesús chunka iskayniyuq apostolesninta ripuytachus manachus munasqankuta tapurqa, Simón Pedrotaq kutichirqa: “Pimantaj riykumanri? Qampallata tiyapusunki wiñay kawsay palabra. Noqayku creeykuña, yachaykutaj Diospa ajllakusqan kasqaykita”, nispa (Juan 6:48, 59, 60, 66-69). Jesuspa chiqa discipulosninqa, mana ripunankuta nirqanku. Aswan qhipamantaq, espíritu santowan akllasqas kaspa, paykunaqa Jesuspa qhipanta richkallarqankupuni (Hech. 16:7-10).

 2. a) ¿Pitaq ‘allin kamachi yuyayniyuq’, “juntʼaj mayordomo” ima? b) ¿Imatataq tukuynin akllasqa cristianos ruwanku?

² Kunan tiempopi akllasqa cristianosmanta, ¿imatá nisunman? Jesusqa, ‘kutimunanmanta, kay pachap tukukuyninmantawan’, ima señalchus kananmanta parlasqanpi, kay Pachapi tukuynin akllasqa cristianosta, “allin kamachi yuyayniyoj”, “juntʼaj mayordomo[taq]” nispa suticharqa (Mat. 24:3, 45; Luc. 12:42). Paykunaqa, mana saqispa “Corderoj qhepanta rinku[puni] mayllamanpis rejtin” (Apocalipsis 14:4, 5, ñawiriy). Chantapis, ‘Jatun Babiloniap’ ruwasqanwan, nisunman Pachantinpi llulla religionespa ruwasqankuwan mana chhapukusqankurayku, Diosta yupaychaypi mana qharip nitaq warmip chayasqanpis kankumanjina, llimphu kanku (Apo. 17:5). ‘Siminkupipis mana ima llullakuy kanchu’, Bibliamanta mana pantasqatachu yachachisqankurayku, chantá kay saqra pachapipis ‘mana kʼamina kanku’ (Juan 15:19). Astawan qhipamantaq, kay Pachapiraq akllasqa cristianos kaqkunaqa, Corderop ‘qhipanta rinqanku’ janaqpachakama (Juan 13:36).

 3. ¿Imaraykutaq allin kamachipi atienekunanchik tiyan?

³ Jesusqa, allin kamachi yuyayniyuqta churarqa, “kamachi masisninman”, nisunman sapa akllasqa cristianoman, “horampi mikhunata jaywanampaj”; jinallataq “tukuy kapuyninta qhawanampaj[pis]” (Mat. 24:45-47). Chay ‘kapuyninpiqa’, “waj ovejas” kaqkunamanta, ‘may chhika runas’ kachkallankutaq (Apo. 7:9; Juan 10:16). Chayrayku, ¿manachu sapa juk akllasqa cristiano, “waj ovejas” ima, allin kamachi yuyayniyuqpi atienekunanku kanman? Arí, kay allin kamachi yuyayniyuqpi mana iskaychakuspa atienekunanchik tiyan, imaraykuchus: 1) Jehovaqa allin kamachipi atienekun, chantá 2) Jesuspis paykunapi atienekullantaq. ¿Imaynatá Jehová, Jesucristo ima, allin kamachi yuyayniyuqpi atienekusqankuta rikuchinku? Chaymanta kunan parlarisunchik.

Jehová allin kamachipi atienekun

 4. ¿Imaraykutaq allin kamachi yuyayniyuq yuyaychawasqanchikpi atienekuyta atinchik?

⁴ ¿Pitaq allin kamachi yuyayniyuqta, sumaq yuyaychayta, yachayta ima mikhunatajina horanpi qunanpaq yanapan? Jehová nin: “Ñawisneyqa qanllapi kashan, yachachisqayki, yuyaychasqaykitaj mayqen ñantachus rinaykita”, nispa (Sal. 32:8). Kay pʼiti nisqanmanjina, Jehová allin kamachita yanapan. Chayrayku, allin kamachi Bibliap nisqanmanjina yuyaychawasqanchikpi, yachachiwasqanchikpi ima, atienekuyta atinchik.

 5. ¿Imapi reparanchik allin kamachita Dios espiritunwan yanapasqanta?

⁵ Chantapis Jehovaqa, allin kamachi yuyayniyuqta espíritu santonwan yanapan. Diospa espíritu santon mana rikukuptinpis, imaynatachus runasta yanapasqanpi sutʼita rikukun. Kay allin kamachi yuyayniyuq, Jehovamanta, Churinmanta, Reinonmanta ima willasqanpi tʼukurina. Jehovap kamachisninqa, iskay pachak kimsa chunkayuqmanta astawan achkha suyuspi, Reinomanta willachkanku. ¿Manachu allin kamachi kay Pachantinpi willasqan sutʼita rikuchin, Jehová paykunata espiritunwan yanapachkasqanta? (Hechos 1:8, ñawiriy.) Allin kamachiqa, Jehovap llaqtanman horanpi mikhunata qunanpaq, imatachus ruwananta allinta akllanan tiyan. Chaytataq, munakuywan, llampʼu sunquwan, espiritup wak kʼacha kaykunasninwan ima, akllanku, juntʼachinkutaq (Gál. 5:22, 23).

6, 7. ¿Imapi reparanchik Jehová allin kamachipi mayta atienekusqanta?

⁶ Jehová allin kamachipi mayta atienekusqanta astawan sutʼita reparananchikpaqqa, imatachus sapa jukninkuman qunanpi tʼukurina. Apóstol Pablo qillqarqa: “Corneta waqajtin kawsarimponqanku mana ismoj cuerposniyoj. Chantá noqanchejpis uj jinaman tukuchisqa kasunchej. Kay ismoj cuerpoqa tukupunan tiyan mana ismoj cuerpoman. Kay wañoj cuerpotaj tukupunan tiyan mana jaykʼaj wañoj cuerpoman”, nispa (1 Cor. 15:52, 53). Akllasqa cristianosqa, Diosta chiqa sunquwan yupaychachkaspa wañupuspaqa, janaqpachapi espiritusjina kawsanankupaq kawsarimunqanku. Ni jaykʼaq wañuq cuerpotataq japʼinqanku, nisunman mana chinkachiy atina kawsayta. Chaytaq wiñay kawsaymanta nisqaqa, astawan sumaq. Chantapis mana chinkaq, mana ismuq cuerpota japʼinqanku, chayrayku kawsayninkuqa, paykunallamantaña kanqa, manaña Jehovamantachu. Apocalipsis 4:4 pʼiti, akllasqa cristianosta tiyanaspi tiyasqasta, umankupi quri pillusniyuqta ima rikuchin, jinamanta, jatunpaq qhawasqa kamachiqkuna kay, paykunapaq kasqanta rikuchin. Chaywanpis, mana chayllachu.

⁷ Apocalipsis 19:7, 8 pʼitikuna sutʼinchan: “Corderoj casamienton chayamunña, noviantaj wakichisqaña. Chay warmimantaj Dios atiyta qorqa, yuraj lliphipej sumaj awasqa linowan pʼachallikunampaj. Chay sumaj awasqa linoqa ninakun Diospa ajllakusqasnimpa cheqan ruwasqasninkuwan”. Jehovaqa, akllasqa cristianosta akllarqa, astawan qhipaman Churinpa novian kanankupaq. Kaykama rikunchikjina, akllasqa cristianosqa mana chinkachiyta atina kawsayta, mana ismuq cuerpota ima japʼinqanku, chantá kamachiqkuna, Corderop novian ima kanqanku. Kaykunataq sutʼita rikuchiwanchik Dios akllasqa cristianospi atienekusqanta, pikunachus “corderoj qhepanta rinku mayllamampis rejtin”.

Jesús allin kamachipi atienekun

 8. ¿Imaynatá Jesús akllasqa cristianospi atienekusqanta rikuchin?

⁸ ¿Imapi reparanchik Jesús akllasqa cristianospi atienekusqanta? Jesusqa, wañunan pʼunchaymanta ñawpa chʼisin, chiqa sunqu 11 apostolesninta nirqa: “Qankunaqa ñakʼarishajtiypis, noqallawampuni karqankichej”, nispa. Chantá paykunata nirqa: “Chayrayku qoykichej uj reinota, imaynatachus Tatay qowarqa, ajinata reinoypi noqawan mikhunaykichejpaj, ujyanaykichejpaj ima. Ajinallatataj kamachina tiyanaspi tiyaykunkichej Israelpa chunka iskayniyoj ayllusninta juzganaykichejpaj”, nispa (Luc. 22:28-30). Jesús 11 apostolesninwan tratota ruwasqanqa, 144.000 akllasqa cristianosnintinpaq karqa (Luc. 12:32; Apo. 5:9, 10; 14:1). Juk chhikanta tʼukurina: Jesús paykunapi mana atienekuspaqa, ¿ninmanchu karqa Reinoypi ñuqawan khuska kankichik nispa?

 9. ¿Imastaq Cristop kapuykunasnin?

⁹ Jesucristoqa, allin yuyayniyuq kamachita churan “tukuy kapuyninta qhawanampaj”, nisunman, kay Pachapi Reinonmanta kapuykunasninta qhawananpaq (Mat. 24:47). Kaykunataq kanku, may oficinasmantachus Jehovap llaqtanta kamachikun chay, Jallpʼantinpi tukuynin sucursales, tukuynin Jatun Tantakuykunapaq Wasis, Tantakunapaq Wasis ima, jinallataq Reinomanta willay, discipulosta ruway ima. ¿Pitaq, pipichus mana atienekusqanpi may sumaq kapuykunasninta saqinman?

10. ¿Imapiwantaq reparanchik Jesucristo akllasqa yachachisqasninta yanapachkasqanta?

¹⁰ Jesusqa, janaqpachaman kutipunanpaqjinaña kachkaspa, chiqa sunqu discipulosninman rikhurirqa, nirqataq: “Yachaychej, noqa qankunawan tuta pʼunchay kasqayta, kay pacha tukukunankama”, nispa (Mat. 28:19, 20). ¿Jesús chay nisqanta juntʼanchu? Arí. Imaraykuchus pasaq chunka phichqayuq wataspi, Jehovamanta sutʼinchaqkunap qutuchakuykunasninku, qanchis chunka waranqamanta, pachak waranqa kuraqman chayan. Chantá, ¿machkhataq Diospa llaqtanman yaykurqanku? Chay 15 watasllapitaq, tawa junu khuskanniyuqjina runas, nisunman sapa pʼunchay pusaq pachak runasmanta astawan, bautizakurqanku. Tukuy kaykunaqa, sutʼita rikuchin, Cristo akllasqa yachachisqasninta qutuchakuykunasninkupi yanapachkasqanta, runasman willamunankupaqpis.

Allin kamachi yuyayniyuqtaq

11, 12. ¿Imaynatataq allin kamachi, chiqan sunqu, yuyayniyuqtaq kasqanta rikuchin?

¹¹ Rikunchikjina Jehová Dios, Jesucristo ima, allin kamachipi atienekunku, ¿ñuqanchikri? ¿Paykunapi atienekusunmanchu? Kay kamachiqa, chiqa sunquwan ruwananta juntʼachkan. Chaytaq La Atalaya revistata, pachak kimsa chunka watastaña urqhusqanpi rikukun. Jinallataq tantakuykunata, jatun tantakuykunata ima, iñiyninchikta kallpachanapaqjina wakichipuwasqanchikpipis.

¹² Chantapis allin kamachiqa, Jehovap munayninmanjina imachus ruwanan kasqanta sutʼita yachaytawankama, chaymanjina usqhayta ruwan, manataq imatapis yuyasqanmanjinallachu ruwan, jinamanta yuyayniyuq kasqanta rikuchin. Sutʼinchanapaq; llulla religionesta kamachiqkunaqa, runas aychap munayninmanjinalla kawsasqankuta mana juchapaqchu qhawanku. Chaywanpis allin kamachiqa, Jehovap yanapayninwan, Jesucristop yanapayninwan ima kasqankurayku, allin yuyaywan, maychus tiemponpitaq, Satanaspa tuqllasninpi mana urmananchikpaq sutʼita yuyaychawanchik. Chayrayku, paypi atienekunanchik tiyan. Chaywanpis, ¿imaynatá paypi atienekusqanchikta rikuchisunman?

Corderop qhipanta richkaptinku akllasqa cristianoswan rina

13. Profeta Zacarías nisqanmanjina, ¿imaynamantá allin kamachi yuyayniyuqpi atienekusqanchikta rikuchisunman?

¹³ Zacarías libroqa, ‘chunka runasmanta’ parlan, pikunachus ‘juk judío runaman’ qayllaykuspa ninku: “Qankunawan riyta munayku”, nispa (Zacarías 8:23, ñawiriy). Kay nisqankutaq rikuchiwanchik kay ‘judío runaqa’, achkha runas kasqankuta. Kunan tiempopi chay ‘runaqa’, Diospa akllasqa cristianoswan ninakun, paykunataq ‘Diospa nacionnin Israel’ kanku (Gál. 6:16). Chantapis, “waj llajtasmanta chunka runas” kaqkunaqa, wak ovejasmanta kaqkuna may chhika runaswan ninakun. Imaynatachus akllasqa cristianos Jesuspa qhipanta rinku mayllamanpis riptin, kikillantataq may chhika runaspis allin kamachip qhipanta rinku. May chhika runasmanta kaqkunaqa, “janaj pachapi tiyakunapaj wajyasqa” kaqkunawan khuskachakusqankumanta, ni jaykʼaq pʼinqakunankuchu tiyan (Heb. 3:1). Ama qunqanachu, Jesús mana pʼinqakuspa espirituwan akllasqa cristianosta ‘hermanosniy’, nispa sutichasqanta (Heb. 2:11).

14. Cristop hermanosninta, ¿imaynamantá chiqa sunquwan yanapasunman?

¹⁴ Jesucristo nirqa, pillapis Paypa hermanosninta yanapaqqa, paytapis yanapachkanmanjina kasqanta (Mateo 25:40, ñawiriy). ¿Imaynamantá kay Pachapi kawsayta suyakuqkuna, Cristop hermanosninta yanapayta atinkuman? Paykunawan khuska Diospa Reinomanta willaspa (Mat. 24:14; Juan 14:12). Kay Pachapi akllasqa cristianosqa pisiyachkanku, wak ovejasmanta kaqkunarí, watas pasasqanmanjina astawan achkhayachkanku. May chhika runasmanta kaqkuna Reinomanta willaspaqa, akllasqa cristianosta yanapachkanku, discipulosta ruway kamachiyta juntʼanankupaq. Astawanpis wakinkunaqa precursoresjina llamkʼayta qallarinku (Mat. 28:19, 20). Chantá Jallpʼantinpi willakunanpaq, qullqinchikwan tukuy imaymanamanta yanapayta atillanchiktaq.

15. Allin kamachi publicacionesta wakichipuwasqanchikta, imaynatachus Diospa llaqtanta kamachichkasqanta ima, ¿imaynatá qhawananchik tiyan?

¹⁵ Allin kamachi yuyayniyuq, Bibliap yuyaychasqanmanjina publicacionesta, tantakuykunata ima mikhunatajina horanpi wakichipuwasqanchikmanta, ¿imatá sapa jukninchik yuyanchik? ¿Kusisqachu japʼikunchik? ¿Yachakusqanchikmanjinachu kawsakunchik? Diospa llaqtanpi imallatapis wakjinamanta ruwakunanta kamachiptinku, ¿imatá yuyanchik? Tukuy sunqu allin kamachi yuyaychawasqanchikmanjina ruwaspaqa, Jehovapi, imaynatachus kamachichkawasqanchikpi ima, atienekusqanchikta rikuchinchik (Sant. 3:17).

16. ¿Imaptintaq tukuy cristianos Cristop hermanosninta uyarinanku tiyan?

¹⁶ Jesús nirqa: “Noqaqa ovejasniyta rejsini, paykunataj parlasqayta uyariwanku, qhepaytataj jamunku”, nispa (Juan 10:27). Chiqamanta akllasqa cristianosqa, kay rimaykunata juntʼanku. Wak ovejasrí, ¿imatá ruwananku tiyan? Jesusta, paypa hermanosninta ima uyarinanku tiyan, imaraykuchus Diosqa, llaqtanta apaykachanankupaq paykunata churarqa. Chaywanpis, paykunap parlasqankuta kasukunapaq, ¿imatá ruwananchik tiyan?

17. Allin kamachita kasukunapaq, ¿imatá ruwananchik tiyan?

¹⁷ Kay tiempopi allin kamachi yuyayniyuqkunamanta, Diospa Llaqtanta Kamachiqkunaqa, Pachantinpi Diospa Reinonmanta willakunanpaq llamkʼachkanku. Paykunaqa Diospa espiritunwan akllasqa kanku, ancianosjinataq unayña llamkʼanku. Chiqamanta paykunaqa, Diospa llaqtanta “ñawpajman” apachkanku (Heb. 13:7). Chantapis “Señorpa ruwaynimpi” achkha ruwanasniyuq kanku, imaptinchus, kay Pachantinpi qanchis junujina publicadores pachak waranqa kuraq qutuchakuykunapi kachkanku (1 Cor. 15:58). Chayrayku, allin kamachita kasukunapaq, Diospa Llaqtanta Kamachiqkunata kasukunanchik tiyan.

Allin kamachita kasukuymanta sumaq bendiciones

18, 19. a) Allin kamachi yuyayniyuqta kasukuqkuna, ¿ima bendicionestataq japʼinqanku? b) ¿Imatataq ruwanapuni tiyan?

¹⁸ Allin kamachi yuyayniyuqqa, sutichasqa kasqanmantapacha, ‘achkha runasta chiqan kaqman’ pusamun (Dan. 12:3). Kay runasmanta wakinkunataq kay pacha chinkachisqa kachkaptin, mana wañuspa musuq pachaman yaykuyta suyakuchkanku. Diospa ñawpaqinpi chiqan runapaq qhawasqa kayqa, ¡may jatun tʼinka!

¹⁹ Astawan qhipaman, ‘santo kaq llaqta, musuq Jerusalenqa’, nisunman tukuynin 144.000 akllasqa cristianosqa, “janaj pachamanta”, nisunman Diosmanta, ‘noviajina novionpaq kʼachanchasqa’ uraykamunqa. Jina kaptin, ¿ima bendicionestataq japʼinqanku allin kamachita kasukuqkuna? Biblia kutichin: “Diostaj paykunaj Diosninku kanqa. Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu”, nispa (Apo. 21:2-4). Chayrayku, ama Cristollatachu kasukuna, manaqa, akllasqa hermanosnintapis, imaraykuchus paykunaqa atienekunapaqjina kanku.

¿Imatá yachakunki?

• ¿Imaspi reparanchik Jehová allin kamachi yuyayniyuqpi atienekusqanta?

• ¿Imapi reparanchik Jesucristo allin kamachipi atienekusqanta?

• ¿Imaptintaq allin kamachi atienekunapaqjina?

• ¿Imaynamantá allin kamachipi atienekusqanchikta rikuchinchik?

[25 paginapi dibujo/foto]

¿Yachankichu pikunatachus Jehová aswan qhipaman Churinpa novian kanankupaq akllasqanta?

[26 paginapi dibujos/fotos]

Jesucristoqa allin kamachi yuyayniyuqta churarqa, “tukuy kapuyninta qhawanampaj”

[27 paginapi dibujo/foto]

Reinomanta willaspaqa, espirituwan akllasqa cristianosta yanapanchik