Pisi kallpayojkunata Jehová jina qhawana

1, 2. ¿Imaraykutaj Pablo pisi kallpayojkunamanta llakikorqa?

GRIPEWAN chayri imallawanpis onqosqa kashajtinchej kallpanchej pisiyan, ¿icharí? Ajinapi kashajtinchej sapa pʼunchay ruwanasninchejta mana ruwayta atillanchejchu. Kunantaj mana uj chayri iskay semanasllatachu pisi kallpayoj kashasqaykipi tʼukuriy, manaqa killasta. Ajinapi kashajtiyki wajkuna munakuyninkuta rikuchisojtinku kusikuwaj, ¿icharí?

² Apóstol Pabloqa, qotuchakuymanta jawapi chayri qotuchakuypi chʼampaykuna kasqanrayku wakin kutis pisi kallpayoj karqa. Nitaj uj kutillatachu ajinapi rikukorqa (2 Cor. 1:8; 7:5). Chʼampaykunata atipasqanpi, kausayninpi ima tʼukurispa, pay nerqa: “Sichus mayqen llawchʼiyan chayqa, noqapis llawchʼiyallanitaj”, nispa (2 Cor. 11:29). Qotuchakuymanta hermanosta cuerpoj imasninwan kikinchashaspa nerqa: “Pisi kallpayojman rijchʼakojkunaraj astawan yanapawanchej”, nispa (1 Cor. 12:22). Chaywan, ¿ima niyta munasharqa? ¿Imaynatá pisi kallpayojman rijchʼakojkunata Jehová qhawan? ¿Imaraykutaj Jehová jina qhawananchej tiyan? ¿Imaynatá chayta ruway yanapawanchej?

 3. ¿Imaraykutaj wakin hermanosmanta mana allintachu yuyasunman?

³ Kay tiempomanta runasqa, kallpayoj runasta, waynasta imalla allinpaj qhawanku. Munaynillankuta ruwayta munaj runastaj pisi kallpayojkunata mayta ñakʼarichinku. Noqanchejtaj mana chay runas jinachu yuyanchej, chaywanpis ichá mana reparakuspalla pisi kallpayoj hermanosninchejmanta mana allintachu yuyasunman. ¿Imaynatá Jehová jina paykunata qhawasunman?

4, 5. 1) ¿Imatataj 1 Corintios 12:21-23 yachachiwanchej Jehová imaynatachus pisi kallpayojkunata qhawasqanmanta? 2) Pisi kallpayojkunata yanapay, ¿imapí yanapawanchej?

⁴ Jehovaqa kamachisninta may allinpaj qhawan. Pabloqa Corinto llajtapi tiyakoj cristianosman qhelqashaspa ñaupaj kaj cartanpi nerqa: “Cuerpoj imasnin pisi kallpayojman rijchʼakojkunaraj astawan yanapawanchej”, nispa (1 Corintios 12:12, 18, 21-23 leey). Kausay jinallamanta rikhurisqanpi creejkunaqa, cuerpoj wakin imasnin ni imapi yanapawasqanchejta nerqanku.a Sutʼincharinapaj chakisninchejmanta uña deditosninchej ni imapi yanapawasqanchejta creerqanku. Kunallanraj yachakusqanman jinataj, uña deditosninchejqa sumajta sayanapaj yanapawanchej.

⁵ Pablo qotuchakuyta uj cuerpowan kikinchasqanmanta, sapa ujninchej qotuchakuypi yanapakuyta atisqanchejta yachakunchej. Satanasqa ni imapaj valesqanchejta creechiyta munawanchej, Jehovatajrí tukuy kamachisninta pisi kallpayojman rijchʼakojtinkupis may valorniyojpaj qhawan (Job 4:18, 19). Chayta yachaytaj qotuchakuypi imastachus ruwasqanchejwan, Diospa llajtanpi kaspa ima kusisqa kanapaj yanapawanchej. Uj machitu hermanota chayri hermanata makinmanta aysashasqaykipi tʼukuriy. Paywan rishasqaykiraykutaj calmallawan rinki. Chaytaj machuyasqa hermanota kusichin, qantapis kusichillasunkitaj. Imaraykuchus necesitajkunata yanapaspa kusiyta tarinchej, astawantaj munakuyta, pacienciata ima rikuchinchej, wiñay tukusqa runa jinataj imatapis ruwanchej (Efe. 4:15, 16). Jehovaqa yachan uj qotuchakuy ujchasqa kananpajqa tukuy hermanos munakuyta rikuchinanku kasqanta.

 6. ¿Imapajtaj Pablo ‘kallpayojkuna’, “pisi kallpayoj” rimaykunata oqharerqa?

⁶ ¿Imapaj Pablo “mana callpayoj”, “pisi kallpayoj” rimaykunata oqharerqa? Mana creyente kajkuna imatachus wakin cristianosmanta yuyasqankuta ninanpaj, wakin kutis imaynachus pay sientekusqanta ninanpaj ima (1 Cor. 1:26, 27, Dios Parlapawanchej; 2:3). ‘Kallpayojkuna’ rimaytataj wakin cristianosmanta parlananpaj oqharerqa, chayta oqharispataj mana nisharqachu chay cristianos wajkunamanta aswan jatunpaj qhawasqa kasqankuta (Rom. 15:1). Astawanpis chay cristianos pisi kallpayojkunaman pacienciata rikuchinankumanta parlasharqa.

 7. ¿Imaraykú wakin kutis yanapata necesitajta mana yanapayta atillasunmanchu?

⁷ Jehová “mana kallpayoj[kunata]” yanapan, kikinta ruwajtinchejtaj kusikun (Sal. 41:1; Efe. 5:1). Chayta ruwaytaj wakin kutis mana atikullanchu. ¿Imaraykú? Wakin kutis ichá yuyasunman hermanolla chʼampaykunasninta allinchanan kasqanta. Chayri ni imata niyta atispa hermanosta ni parlapallaytapis munasunmanchu. Sutʼincharinapaj, qosan saqerparejtin imapichus hermana Rosab rikukusqanta qhawarinachej, pay nin: “Sonqonchej mayta nanawanchej hermanosninchej llakiypi kashajtinchej mana parlapayawajtinchej, nitaj ni imata yanapanawanchejpaj ruwajtinku. Llakiypi kashaspaqa amigosninchej yanapanawanchejta munanchej”, nispa. Rey Davidpis ajinapi rikukorqa, llakiypi kashajtin amigosnin saqerparejtinku (Sal. 31:12).

 8. ¿Imataj hermanosninchejta llakiypi kajtinku yanapanapaj tanqawasun?

⁸ Ichapis wakin hermanosninchej onqoyrayku, sinchʼi llakisqas kashasqankurayku chayri tʼaqanasqa familiayoj kasqankurayku pisi kallpayoj kashanku, chayta yachaytaj paykunata yanapanapaj tanqawasun. Ichá noqanchejpis wakin kutis ajinallapitaj rikukusunman. Jehovaqa israelitasman niraj Sumaj Jallpʼaman yaykushajtinku yuyaricherqa paykunapis Egiptopi pisi kallpas, wajchas ima kasqankuta, chayraykutaj hermanosninkuta ñakʼarishajta rikuspa sonqonkuta mana rumiyachinankuta nerqa. Paykuna ukhupi wajchasta pisi kallpasta yanapanankutataj munarqa (Deu. 15:7, 11; Lev. 25:35-38).

 9. Uj hermano llauchʼiyajtin, ¿imatá ruwananchej tiyan? Sutʼinchay.

⁹ Llakiypi rikukoj hermanosninchejta mana juchachanachu, nitaj yuyanachu paykunamanta aswan sumaj kasqanchejta. Astawanpis Dioswan allinpi kanallankupajpuni yanapana (Job 33:6, 7; Mat. 7:1). Sutʼincharinapaj, motota apaykachaj accidentakuspa hospitalman yaykojtin, ¿pichus juchayoj kasqantarajchu doctor tapun? Mana. Astawanpis usqhayllata jampin. Noqanchejpis kikillantataj hermanosninchej chʼampaykunasninkurayku llauchʼiyajtinku, usqhayllata creeypi sinchʼita sayanankupaj yanapananchej tiyan (1 Tesalonicenses 5:14 leey).

10. ¿Imaraykutaj pisi kallpayojman rijchʼakojkuna “creeypi qhapaj” kanku?

¹⁰ Hermanosninchejpa llakiyninpi tʼukurisunchej chayqa, ichá mana yuyasunchu pisi kallpas kasqankuta. Sutʼincharinapaj, uj hermana mana creyente qosan payman churanakusqanta unaytaña aguantan. Uj mamataj wawasnillanwan tantakuykunaman rin. Waynas sipaskuna imataj yachaywasipi sajra ruwaykunaman tanqasqas kaspapis cheqa kajmanta japʼikullankupuni. Paykunaqa Jehovata munakunku, Paymantaj cheqa sonqollapuni kayta munanku. Paykuna Jehovata sirvinankupaj tukuy imata ruwashasqankupi tʼukureyqa, yanapawasunchej paykuna “creeypi qhapaj” kasqankuta reparanapaj, pisi kallpayojman rijchʼakojtinkupis (Sant. 2:5).

11, 12. 1) ¿Imataj yanapawasunchej Jehová jina pisi kallpayojkunata qhawanapaj? 2) ¿Imaraykú Jehová Aaronta perdonarqa, imatá chaymanta yachakunchej?

¹¹ Ñaupa tiempopi Jehová cheqa sonqo kamachisninta yanapasqanpi tʼukurispaqa, pisi kallpayojman rijchʼakoj hermanosta Pay jina qhawasun (Salmo 130:3 leey). Sutʼincharinapaj, Moiseswan kashasunman karqa chay, ¿imatá yuyasunman karqa Aarón imaraykuchus waka uñaman rijchʼakoj qori lantita ruwasqanta nishajtin? (Éxo.32:21-24.) Chayri, ¿imatá yuyasunman karqa Aarón hermanan Mariata uyariytawan, Moisés waj llajtayoj warmiwan casarakusqanmanta rimayta qallarejtin? (Núm. 12:1, 2.) Meribapi Aaronwan Moiseswan ima kashasunman karqa chay, ¿imatá nisunman karqa Jehovaj atiyninwan chhankamanta yakuta orqhospa Jehovata mana jatunchajtinku? (Núm. 20:10-13.)

¹² Jehovaqa Aaronta pantasqasninmanta chinkarpachinman karqa, chaywanpis mana chayta ruwarqachu kʼacha runa kasqanta yachasqanrayku. Aaronqa wajkuna tanqasqankurayku pantarqa. Pantasqasninta reparachejtinkutaj, pantaykusqanta nerqa, Diospa yuyaychaynintataj tukuy sonqo japʼikorqa (Éxo. 32:26; Núm. 12:11; 20:23-27). Aaronqa Jehovata munakusqanrayku pantasqasninmanta pesachikorqa. Chayraykutaj Jehová payta perdonarqa. Aswan qhepamantaj Aaronmanta, familianmanta ima cheqa sonqo runasmanta jina yuyarikullarqankupuni (Sal. 115:10-12; 135:19, 20).

13. Jehová jina ruwanapaj, ¿imatá ruwananchej tiyan?

¹³ Jehová jina ruwanapajqa, sumajta qhawarikunanchej tiyan imaynatachus pisi kallpayojman rijchʼakojkunata qhawasqanchejta (1 Sam. 16:7). Sutʼincharinapaj, uj wayna sonqonta kusirichinanpaj imallatapis mana allintachu ajllajtin chayri llakikunapaj jina imatapis ruwajtin, ¿imaynatá chay waynata qhawanchej? Qhawaranamantaqa, ¿manachu wiñay tukusqa runa kananpaj yanaparisunman? Wajkunata yanaparinapaj kallpachakuspaqa, munakuyta, pacienciata ima astawan rikuchisunchej.

14, 15. 1) ¿Imatá Jehová yuyarqa Elías manchachikusqanmanta? 2) ¿Imatá yachakusunman Eliasta Jehová yanapasqanmanta?

¹⁴ ¿Imatá Jehová yuyan sinchʼi llakisqa kajkunamanta? Qhawarinachej Jehová profetan Eliasta sinchʼi llakiypi kashajtin imaynatachus yanapasqanta. Eliasqa, mana manchachikuspa Baalpa 450 profetasninman sayaykorqa. Reina Jezabel wañuchiyta munasqanta yachaspataj mayta manchachikorqa, chayraykutaj 150 kilometrosta jina Beerseba llajtaman ayqeytawan chʼin pampaman riporqa. Sinchʼi ruphaypi risqanraykutaj mayta saykʼorqa, uj sachʼa urapi samarikuspataj wañuyllataña Diosmanta mañakorqa (1 Rey. 18:19; 19:1-4).

¹⁵ ¿Imatá Jehová Eliasmanta yuyarqa? ¿Manchachikusqanrayku sinchʼi llakiypi kasqanmanta qhesacharqachu? Mana. Jehovaqa Elías runalla kasqanta yacharqa, chayraykutaj uj angelnejta kallpacharqa. Chay angeltaj karuraj rinan kasqanrayku iskay kutipi “jatarikuspa mikhuy” nispa nerqa (1 Reyes 19:5-8 leey). Rikunchej jina, Jehovaqa niraj ni imata kamachishaspa profetanta yanapananpaj llakiykunasnintaraj uyarerqa.

16, 17. ¿Imaynatá hermanosninchejta Jehová jina yanapasunman?

¹⁶ ¿Imaynatá hermanosninchejta Jehová jina yanapasunman? Ñaupajtaqa, sumajta uyarinanchej tiyan niraj imatapis yuyaychashaspa (Pro. 18:13). Chantapis “mana allinpaj” qhawakojkunata, ni imapaj valesqankuta yuyajkunata sumajta uyarinapaj, entiendenapaj ima tiempochakuna tiyan (1 Cor. 12:23). Ajinamanta yachasunchej imatachus necesitasqankuta, imaynatachus yanapanata ima.

¹⁷ Rosapi tʼukurina, qosanqa payta iskay wawasnintawan saqerparerqa. Hermanostaj Rosata yanaparerqanku. Pay nin: “Qosay saqerpariwasqanta hermanosman telefononejta willarejtiy, usqhayllata wasiyman waqay ñawislla chamorqanku. Iskay chayri kinsa pʼunchayta jinataj noqaykuwan qhepakorqanku”, nispa. Paykuna may llakisqas kashasqankurayku ni mikhuypis chayarqachu, chayraykutaj hermanos wasinkuman wajyarerqanku paykunawan qhepakunankupaj. Chaytaj Biblia Santiago libropi nisqanta yuyarichiwanchej. Chaypi nin: “Chayta reparanapaj nisunman uj hermano, chayri hermanapis, mana pʼachayoj kanman, sapa pʼunchay mikhunamanta pisichikuspa. Chantá ujniykichej ninman: Walejlla risuchun; chirimanta qʼoñikamuy, sajsakamuytaj, nispalla, manataj imatapis payman jaywanmanchu. Chay nisqallanqa ni imapi chay pisichikojta yanapanchu. Ajinallataj creeypis: Sichus runaqa ruwasqasninwan mana rikuchin creesqanta chayqa, chay creesqanqa wañusqa”, nispa (Sant. 2:15-17). Hermanosqa Rosata, wawasnintawan yanapata necesitashajtinkupuni yanaparqanku. Sojta killasninman jinataj Rosa, wawasnin ima precursores auxiliares jinaña llankʼasharqanku (2 Cor. 12:10).

18, 19. 1) ¿Imaynatá pisi kallpayojkunata yanapasunman? 2) Pisi kallpayojkunata yanapay, ¿imaynatá noqanchejta, qotuchakuytapis yanapanman?

¹⁸ Tukuypis yachanchej uj onqoymanta mana usqhayllatachu sanoyakuyta atisqanchejta. Ajinallatataj uj cristianopis pantasqasninrayku, chʼampaykunasninrayku Diosta yupaychaypi llauchʼiyajtin, mana usqhayllata creeypi sinchʼita sayayta atinmanchu. Chayrayku creeyninta kallpachananpajqa Bibliata ukhunchanan tiyan, Diosmanta mañakunan tiyan, cristiano ruwanasninta juntʼanan tiyan. ¿Paykunawan pacienciakusunchu? Creeypi sinchʼita sayanankukama paykunaman munakuyninchejta, ¿rikuchisunchu? Mayta kallpachakuna paykunaman munakuyta rikuchinallapajpuni, qotuchakuypaj uj sumaj yanapa kasqankuta rikuchinapaj ima (2 Cor. 8:8).

¹⁹ Hermanosninchejta yanapaspaqa mana kusiyllatachu tarinchej, manaqa pacienciata, munakuyta ima rikuchinchej. Chayta ruwaytaj mana noqallanchejtachu yanapawanchej, manaqa qotuchakuytapis munakuyta rikuchinanpaj yanapallantaj. Chantapis pisi kallpayojkunata yanapaspaqa Jehová jina ruwashanchej, pichus sapa uj hermanota may valorniyojpaj qhawan (Hech. 20:35).