Nisqaykita ¿juntʼashankichu?

Kunantaj kaypiñataj tʼukurina. Uj qhariwarmi uj mamata wasinkuman wajyarin mikhurikunankupaj, kusirikunankupaj ima, chay mamaqa sapallan iskay wawitasninta uywakun. Pay wawitasninman chayta willajtintaj, wawitasnenqa mayta kusirikunku. Chay pʼunchay chayamunantataj mayta suyakushanku. Chaywanpis uj pʼunchay faltashajtin, chay qhariwarmeqa, chay mamaman wasinkuman manaña jamunanta nin. Chaymantataj chay mamaqa, imaraykuchus chayta nisqankuta yachan. Mamata wajyarisqankutawan chay qhariwarmiman, amigosninku chay chʼisillapajtaj wajyarisqanku, chay qhariwarmitaj rinankuta nisqanku.

Maykʼajllapis imatachus nisqaykita, ¿manachu juntʼayta atillarqanki? Cheqamanta cristianosqa, imatachus nisqanchejta juntʼananchejpuni tiyan. “Arí”, nispaqa, ni jaykʼaj ninachu tiyan “mana”, nispaqa (2 Cor. 1:18). Kay iskay ñaupaj parrafospi parlarisqanchejman jina wakin kuteqa, nisqanchejta munaspapis mana juntʼayta atillasunchu. Apóstol Pablopis ajinapi uj kuti tarikorqa.

Kay 55 watapi Pablo misionero jina kinsa kutirayku viajashaspa Éfeso llajtapi kasharqa. Corinto llajtaman riyta munarqa Egeo qochanejta, chay cheqamantataj Macedoniaman rinanpaj. Jerusalenman kutishaspataj, Corinto qotuchakuyta watejmanta waturiyta yuyarqa, qolqeta tantasqankuta Jerusalenmanta hermanosman ichá wajkunawan khuska apananpaj (1 Cor. 16:3). ¿Imaraykutaj chayta ninchej? Kay 2 Corintios 1:15, 16, nin: “Chayrayku, ajinata yuyasqaykichejta yachaspa, ñawpajta qankunaman jamuyta munarqani, kusikunaykichejpaj iskay kutita watukojtiy. Munarqani Macedoniaman rej jina qankunata waturikuyta, Macedoniamanta kutimuspataj, yuyarqani ujtawan qankunata waturikuyta, ajinamanta Judeaman rejtiy, qankuna yanapanawaykichejpaj”, nispa.

Pabloqa, ñaupaj cartanpi, imatachus ruwayta munashasqanta Corinto llajtapi tiyakoj hermanosman willarqasina (1 Cor. 5:9). Chaywanpis chay cartata qhelqasqanmanta pisi tiemponman, Cloej familian Corinto qotuchakuypi churanakuykuna rikhurisqanta willarqanku (1 Cor. 1:10, 11). Chayraykutaj Pabloqa, manaraj Corintoman rerqachu, ñaupaj kaj cartantataj qhelqarqa. Chay cartanejtataj munakuywan Corintomanta hermanosta yuyaycharqa, kʼamerqa ima. Chantapis willallarqataj Macedoniamanraj rinanta, chantaraj Corintoman (1 Cor. 16:5, 6).a

Corintomanta hermanos Pabloj cartanta japʼejtinku, chay qotuchakuymanta “may sumachaj apostoles[qa]” Pablota mana juntʼaj runa kasqanta nerqanku. Chayrayku Pablo nerqa: “Chayta ruwayta yuyaspaqa, parlallarqanichu mana allinta unanchaspalla? Aychaj munayninman jinallachu chayta ruwayta yuyarqani, uj rato: Arí, arí, nispa ninaypaj, waj ratotaj: Mana, mana, nispa ninaypaj?”, nispa (2 Cor. 1:17; 11:5).

Chay kutipi Pabloqa mana parlallarqachu. “Parlallarqanichu”, nisqa rimayqa oqharikun nisqanta mana juntʼaj runamanta parlanapaj. Pablo nerqa: “Aychaj munayninman jinallachu chayta ruwayta yuyarqani”, nispa. Chayta nispaqa, Corinto hermanosman rikuchisharqa, nisqanta mana munasqanraykuchu mana juntʼasqanta.

Chantapis Pabloqa kaytawan nerqa: “Astawanqa Dios yachan: Parlasqaykoqa qankunapaj mana qhasichu karqa, arí, nispa; chantá, mana”, nispa (2 Cor. 1:18). Arí, Pabloqa, Corinto llajtaman manaraj rerqachu, hermanospa allinninkuta maskʼasqanrayku. Kay 2 Corintios 1:23 versiculopi nin: “Qankunata khuyakuyta munasqayrayku manaraj Corintoman jamunichu”, nispa. Ajinamanta yanaparqa chay hermanosta nisqanman jina yuyasqankuta tijranankupaj, niraj waturikoj rishajtin. Macedoniapi kashaspataj mayta kusikorqa, qhelqasqan hermanosta pesachikunankupaj yanapasqanta yachaspa, mayqentachus Tito payman willarqa (2 Cor. 6:11; 7:5-7).

Pabloj nisqan mana atienekunapaj jinachu kanman karqa chayqa, Jesucristomanta willasqanpis manallataj atienekunapaj jinachu kanman karqa. Pabloqa Corintomanta hermanosman yuyaricherqa Jesusmanta paykunaman willasqanta. Pay nerqa: “Diospa Churin Jesucristoqa, pimantachus willarqayku qankuna ukhupi noqa, Silvano, Timoteo ima, paypeqa mana kanchu uj rato, arí niy, nitaj, mana niy; astawanqa paypi arí niyllapuni tiyan”, nispa (2 Cor. 1:19). ¿Mana atienekunapaj jina runachu Jesús karqa? ¡Ni imarayku! Astawanpis payqa kausayninpi, willayninpi cheqatapuni parlarqa (Juan 14:6; 18:37). Willayninpis cheqapuni karqa, Pablopis chayllamantataj willarqa, chayrayku Pabloj willasqanqa atienekunapaj jina karqa.

Jehovaqa, “cheqa” kajmanta Dios (Sal. 31:5). Chayta rikuchin Pabloj qhelqasqan. Pay nerqa: “Imatachus Dios qoyta munawasqanchejtaj Cristo Jesuspi arí kashan”, nispa. Jesús Jallpʼapi kashasqa cheqa sonqo kasqanqa, Jehová nisqanta juntʼasqantapuni rikuchin. Pablo nillarqataj: “Paynejtataj noqanchejpis, ajina kachun, nispa ninchej, Dios jatunchasqa kanampaj noqanchejnejta”, nispa (2 Cor. 1:20). Arí, Diosqa Jesusnejta tukuy ima nisqanta juntʼanqa.

Pabloqa, Jesucristo jina, Jehová jina nisqanta juntʼarqapuni (2 Cor. 1:19). Pabloqa, atienekunapaj jina karqa, nitaj imatapis “aychaj munayninman jinallachu” ruwarqa (2 Cor. 1:17). Astawanpis, “espirituman jina” purerqa (Gál. 5:16). Tukuy ima ruwasqanqa, wajkunaj allinninta maskʼasqanta rikucherqa. Arí nisqanqa arí karqa.

Kay tiempopi, Diosta mana yupaychaj runasqa, nisqankuta ima kajtillanpis mana juntʼankuchu. Ima contratota ruwajtinkupis imatachus nisqankuta mana juntʼankuchu, papelpi qhelqasqa kajtinpis. Casarasqa kausayqa uj contrato jina, imaraykuchus iskay runas chayta ruwanku. Ashkha runas divorciakusqankoqa, rikuchin casarasqa kausayta pisipaj qhawasqankuta (2 Tim. 3:1-4).

Qanrí, ¿nisqaykita juntʼashankichu? Kay yachaqanaj qallariyninpi rikorqanchej jina, ichá wakin kuti nisqaykita mana juntʼayta atillankichu, uj jatun llakiy rikhurisqanrayku. Chaywanpis uj contratota ruwarqanki chayqa, kallpachakunayki tiyan juntʼanaykipaj (Sal. 15:4; Mat. 5:37). Chayta ruwanki chayqa, atienekunapaj jina runa kasqaykita, nisqaykita juntʼaj runa kasqaykita, cheqata parlasqaykita ima rikuchinki (Efe. 4:15, 25; Sant. 5:12). Atienekunapaj jina runa kasqaykita kausayniykipi rikuchinki chayqa, Diospa Reinonmanta willajtiykipis runasqa uyarisuyta munallanqanku. Chayrayku “arí” nisqayki “arí” kananpaj mayta kallpachakuy.