▪ Kay 2 Corintios 2:14-16 versiculospi apóstol Pablo nerqa: ‘Diosqa Cristowan khuskata pusawanchej, maqanakupi atipaytawan kutimoj soldadosta jina. Chantapis yachayninta noqanchejnejta tukuynejpi rejsichin. Chay yachaynintaj uj sumaj qʼapay jina’, nispa. Chantá nillarqataj: “Diospajqa Cristoj sumaj qʼapaynin jina kanchej, pikunachus salvakonqanku chaykuna ukhupi, jinallataj chinkayman rejkuna ukhupipis. Chinkayman rejkunapajqa wañuypa qʼapaynin jina kanchej, chaytaj wañuyman apan. Chay ujkunapajtajrí kausaypa sumaj qʼapaynin jina kanchej, chaytaj kausayman apan”, nispa.

Chantá apóstol Pabloqa ‘Cristoj sumaj qʼapayninmanta’ parlarqa, mayqenchus wakinkunapajqa wañuypa qʼapaynin jina karqa, wakinkunapajtaj kausaypa sumaj qʼapaynin jina. ¿Imamantataj “Cristoj sumaj qʼapaynin” nispa parlasharqa? Chaymanta parlaspa uj libro nin: “Romanosqa desfilespi inciensota qʼoshñichej kanku. Ichapis [Pabloqa] chaywan kikinchasharqa. Chay qʼapayqa soldadosta yuyarichej guerrapi atipasqankuta. Presostaj chay qʼapayta sientespa piensaj kanku wañuchisqa kanankupi”, nispa (The International Standard Bible Encyclopedia).