“Mosqoykunapi jina rikuchiwarqa”

1-3. 1) ¿Imastataj Ezequiel rikusqa, uyarisqa ima? (Qallariypi kaj dibujota qhawariy). 2) ¿Ima atiywantaj chay imas kasqa? 3) ¿Imaynataj Ezequiel kasharqa?

EZEQUIELQA chʼin pampapi kashaspa imatachá karupi rikusqa. Ñawisninta chʼirmiykurispa qhawarisqa. Chantá ujllata ñawisninta jatunta kicharisqa, rikusqataj uj sinchʼi wayra oqharikushasqanta, manataj mayqen wayra jinallachu kasqa. Norte ladomanta sinchʼi wayrataj manchayta ropanta chujchantawan phukurishasqa. Chayllapi uj yana phuyuta rikusqa. Chay chaupimantataj uj kʼachitu valorniyoj rumi jina kʼancharimushasqa.a Phuyu usqhayllata qayllaykamusqanman jinataj Ezequielqa uyarisqa uj sinchʼi sonayta, ashkha soldadospis purishankuman jinata (Eze. 1:4, 24).

² Ezequielqa chay jina tʼukunata chay kutillaraj rikusharqa. Payqa uj 30 watasniyoj jinallaraj kasharqa, ‘Jehová Diospa atiynintataj japʼerqa’, espíritu santoj jatun atiyninta. Chay espiritoj atiyninwan Ezequielqa tʼukuna imasta rikorqa, uyarerqataj. Chay jina tʼukunastaqa ni peliculaspipis rikunchejchu. Ezequielqa chay imasta rikuspa pampakamapuni kʼumuykukorqa (Eze. 1:3, 28).

³ Jehovaqa mana Ezequielta tʼukuchiyta munaspallachu chay imasta rikucherqa. Ezequiel tʼukuna imasta rikusqanqa mana payllata yanapananpajchu karqa, manachayqa noqanchejtapis yanapanawanchejpaj. Chayrayku sumajta yachakunachej imatachus Ezequiel rikusqanmanta, uyarisqanmantawan.

4, 5. ¿Ezequiel mosqoypi jina rikorqa chay tiempo imastaj pasasharqa?

⁴ (Ezequiel 1:1-3 leey). Imachus chay tiempo pasasqanta qhawarina. Ezequielqa 613 watapi Jesús niraj jamushajtin Babiloniapi kasharqa, preso apasqa judioswan khuska. Payqa Kebar mayu qayllapi kaj llajtitapi tiyakoj. Chay mayoqa Éufrates mayumanta llojsisharqa, chantá chay mayullamantaj kutiykapusharqa. Kebar mayutaqa runasllasina ruwasqanku chayninta barcospi purinankupaj.

⁵ Jerusalén llajtankoqa 800 kilometrospi jina kasharqa.b Ezequielpa tatan sacerdote jina sirvej chay templopis, santoswan juntʼa kasharqa, chaypitaj waj diosesta yupaychasharqanku. Rey Davidwan, rey Salomonwan kamacherqanku chay llajtaqa pʼenqaypi rikhurerqa. Diosta wasanchaj rey Joaquinpis, Babiloniapi kasharqa, presos apasqa kajkunawan khuska. Paypa cuentanmanta yaykoj rey Sedequiastaj sajra runa karqa, waj reyespa mandonpitaj kasharqa (2 Rey. 24:8-12, 17, 19).

6, 7. ¿Imaraykú Ezequiel llakiy tiempopi kashasqanta yuyanman karqa?

⁶ Chay imas pasasqanqa Ezequielta maytachá llakicherqa. Presos apasqa karqanku chay judiosmanta wakenqa ichapis yuyarqanku Jehová Dios paykunamanta qonqapusqanta. Ichapis yuyarqanku manchay sajra Babilonia nacionqa Diosllata yupaychayta chinkachinanta, Diospa churasqan reyestapis chinkachinanta, paykunaj santosnillankuñataj quedakunanta.

⁷ Kunanqa Ezequiel mosqoypi jina rikusqanta estudiaypacha (Eze. 1:4-28). Estudiashaspaqa chaypipis kashawaj jina qhaway, uyariy ima.

 8. 1) ¿Imatataj Ezequiel mosqoypi jina rikorqa? 2) ¿Imawantaj chay rikusqan ninakun?

⁸ Chay carretaqa karqa tawa jatuchaj ruedasniyoj. Ruedaspa ladosninpitaj kasharqanku tawa kausajkunaman rijchʼakojkuna, chaykunataj querubines karqanku (Eze. 10:1). Chaykunaj patankupitaj uj pampa kasharqa chhullunka jina kʼancharishaj. Chaypa patanpitaj Diospa kamachina tiyanan kasharqa, chaypitaj Jehová Diospuni tiyasqa kasharqa. ¿Imawantaj chay carreta ninakun? Chay carretaqa ninakun cielopi kashaj Jehová Diospa llajtanwan. Imaraykuchus chayta nisqanchejta yachanapaj kinsa imasta qhawarina.

 9. ¿Ima niyta munan Jehová querubinespa patanpi kashasqan?

⁹ Jehovaqa tukuy angelesmanta aswan patapi kashan. Ezequielqa mosqoypi jina rikorqa Jehová Diospa kamachina tiyananta querubinespa patankupi. Bibliamanta waj versiculospis nillantaj, Jehová Diospa kamachina tiyananqa querubinespa patanpi chayri chaupinkupi kashasqanta (2 Reyes 19:15 leey; Éxo. 25:22; Sal. 80:1). Jehovaqa mana querubines patapipunichu tiyasqa kashan, querubinespis apaykachanankuta necesitanman jina, nitaj purinanpajpis uj carretata necesitanchu. Astawanpis chayqa niyta munan querubines kamachejninkuta jina qhawasqankuta, Dios kamachisqanraykutaj maymanpis riyta atisqankuta, munayninta juntʼanankupaj. Querubinesqa ángeles jinallataj Diospa kamachisnin kanku, nisqasnintataj juntʼanku (Sal. 104:4). Chayrayku nisunman Jehovaqa tukuy angelespa patankupi kamachej jina kashasqanta. Ajinamanta tukuyninku uj jatun carretapis kankuman jina kanku.

10. ¿Imajtintaj ninchej cielopi kaj Diospa llajtan mana tawa querubinesnillayojchu kasqanta?

¹⁰ Chay carretaqa mana querubinesllawanchu ninakun. Ezequielqa tawa querubinesta rikorqa. Bibliapi tawa numeroqa niyta munan: tukuynin, chhikankamalla, cabal. Ezequiel tawa querubinesta rikusqanqa ninakun Diospa tukuy wawasninwan, nisunman cielopi kashaj wawasninwan. Chantapis ruedaswan querubineswanqa ñawiswan juntʼa kasharqanku. Chaytaj niyta munan tukuynin cielopi kausajkuna kay jallpʼapi imachus kashasqanta qhawamushasqankuta, manataj chay tawa querubinesllachu. Ezequielqa chay carretamanta parlaspa jatun kasqanta nerqa. Querubinespis ladonpeqa juchʼuysitus karqanku (Eze. 1:18, 22; 10:12). Ajinallataj cielopi kaj Jehovaj llajtanpis, may jina jatun, mana tawa querubinesnillayojchu.

11. 1) ¿Imatataj Daniel mosqoypi jina rikusqa? 2) Ezequielpa rikusqanpis Danielpa rikusqanpis, ¿imawantaj ninakun?

¹¹ Danielpis Ezequiel jinallataj mosqoypi jina rikorqa. Profeta Danielqa Babiloniapi tiyakorqa judíos presos apasqa kashajtinku, paypis mosqoypi jina imachus cielopi kasqanta rikullarqataj. Payqa Jehovaj kamachina tiyananta rikorqa, chay kamachina tiyanapis ruedasniyojllataj karqa. Daniel rikusqanqa astawan rikuchin Jehovaqa cielopi uj jatun familiayoj kasqanta. Profeta Danielqa rikorqa may chhika angelesta Jehovaj ñaupaqenpi sayashajta. Chayrayku nerqa: “Waranqa waranqas sirvisharqanku [...] chunka waranqa kutismanta chunka waranqas”, nispa. Juzgana Tribunalmanta kasqankuraykutaj sapa ujninku tiyanasninkuman tiyaykorqanku (Dan. 7:9, 10, 13-18). Chayrayku ninchej Ezequielpa rikusqanpis Danielpa rikusqanpis cielopi kausajkunawan ninakusqanta.

12. ¿Imaynatá yanapawanchej mana rikukoj imasmanta yachakuy?

¹² Jehovaqa yachan ‘mana rikukoj imaspi’ yuyayninchejta churajtinchejqa yuyayninchej jarkʼasqa kananta. Noqanchejqa pantaj runas kasqanchejrayku ‘rikukoj imasllapi’ piensayta munanchej, nisunman imastachus necesitanchej chayri imaschus llakichiwanchej chaykunallapi, chaykunataj uj tiempollapaj kanku (2 Corintios 4:18 leey). Satanasqa chay imasmanta valekuspa chay imasllapi yuyachiyta munawanchej, munaynillanchejta ruwananchejpaj. Jehovatajrí munakuwasqanchejrayku yanapawanchej aguantanapaj. Ezequielpa rikusqanta qhelqachispaqa yachachiwanchej cielopi familianqa may jina jatun kasqanta. ¡Ezequielpa rikusqanqa may tʼukunapuni!

13, 14. 1) ¿Imayna ruedastataj Ezequiel rikusqa? 2) ¿Imaraykutaj Jehovaj kamachina tiyanan ruedasniyoj kasqa?

¹³ Ezequielqa querubinesta rikusqanmanta ñaupajta parlarqa. Chaykunamantataj kay libroj tawa kaj capitulonpi yachakusun, imaynachus kasqankumanta, imatachus Jehovamanta yachachiwasqanchejmantapis. Chantá Ezequielqa rikullarqataj tawa ruedasta querubinespa ladonkupi, chay ruedasqa sapa esquinapi kasharqanku (Ezequiel 1:16-18 leey). Chay ruedasqa crisólito rumimantapis ruwasqa kankuman jina kʼancharisharqanku, chay rumeqa qʼomer cristal jina karqa, tumpa qʼelluman aysasqa.

¹⁴ Ezequielqa mosqoypi jina rikorqa Diospa kamachina tiyananta ruedasniyojta. ¡Chaytaj tʼukunapaj jinapuni! Kay jallpʼapi reyespa kamachina tiyanasninkoqa uj lugarllapi kashan. Imaraykuchus paykunaqa uj lugarllata kamachinku. Jehová Diostajrí mana kay jallpʼamanta gobiernos jinachu. Ezequielqa mosqoypi jina rikusqanpi repararqa Jehovaqa tukuynejta kamachiyta atisqanta (Neh. 9:6). Arí, Jehovaqa tukuynejtapuni kamachiyta atin.

15. ¿Imastawantaj Ezequiel nerqa ruedasmanta?

¹⁵ Ezequielqa chay ruedasta rikuspa mayta tʼukorqa. Chayrayku nerqa: “Ruedasninpa sayaynenqa tʼukunapaj jina karqa”, nispa. Ezequielqa patatachá qhawarerqa chay jatuchaj ruedasta qhawananpaj, chay kʼancharishaj ruedasta qhawananpaj. Ezequielqa kayta nillarqataj chay ruedasmanta: “Chay tawantin ruedaspa muyuynintaj ñawiswan juntʼa karqa”, nispa. Jinapis aswan tʼukunapajqa karqa imaynachus chay ruedas kasqan. Ezequiel nerqa: “Chay ruedasqa, uj ruedapis waj ruedaj ukhunpi ruwasqa kashanman jina karqa”, nispa. ¿Imawan ninakun chay?

16, 17. 1) ¿Ima niyta munan uj ruedaj chaupinpi, waj rueda kasqan? 2) ¿Imatá yachakunchej Jehovaj carretan may ladollamanpis riyta atisqanmanta?

¹⁶ Ezequielpa rikusqan ruedaspa chaupinkupeqa waj ruedasina kallarqataj. Chayrayku Ezequiel nerqa: “Rishaspataj tawantin ladosman rillajpuni kanku mana kutirispa”, nispa. ¿Imatataj chay reparachiwanchej Ezequielpa rikusqan carretamanta?

¹⁷ Chay jina jatuchaj ruedasqa ujta muyurispalla karuta rinkuman. Chayrayku chay carretaqa rayo jinapuni rejtaj jamojtaj (Eze. 1:14). Chantapis chay ruedasqa may ladollamanpis rinman. Autosta ruwajkunaqa chay jina ruedasta mayta ruwayta munanku. Chay carretaqa mana frenaspalla may ladollamanpis riyta atin, mana kutirinallanpischu tiyan. Jinapis maymanchus risqanta sumajta qhawan. Ruedasnin ñawiswan juntʼa kasqanrayku tukuy ladosta qhawayta atin.

18. ¿Imatá yachakunchej Jehovaj carretan jatuchaj ruedasniyoj, may chhika ñawisniyojtaj kasqanmanta?

¹⁸ Jehová Diosqa munarqa Ezequielpis, payta kasukoj kamachisninpis cielopi kaj llajtanmanta yachakunankuta. Kunankamaqa yachakunchejña jatun kasqanta, tʼukunataj kasqanta. Chaytataj sutʼita reparanchej manchay jatun, kʼancharishaj ruedasninpi. Diospa carretanqa tukuy imata qhawashan, ruedasninpi may chhika ñawisniyoj kasqanrayku. Jehová Diospa ñawisnenqa tukuy imatapuni qhawashan (Pro. 15:3; Jer. 23:24). Chantapis Jehová Diospataqa may chhika waranqa waranqaspuni angelesnin tiyan, paykunatataj kachayta atinman mayllamanpis rerqonankupaj, chaymanta kutimuspataj imatachus rikusqankuta payman willanankupaj (Hebreos 1:13, 14 leey).

19. Diospa carretan mayllamanpis risqanmanta, usqhayllata risqanmantapis, ¿imatá yachakunchej?

¹⁹ Chantá yachakullarqanchejtaj Diospa carretanqa mayllamanpis riyta atisqanta, usqhayllata risqantapis. Jehová Diospa cielopi kaj llajtanqa mana kay mundomanta gobiernos jinachu, nitaj kay mundomanta instituciones jinachu, nitaj organizaciones jinachu. Chaykunataj imatapis mana qhawarikuspa ruwallanku. Chayrayku ima kajtinpis ni imanayta atinkuchu, ajinamanta chinkapunku chayri qonqasqa kanku. Jehová Diospa carretantajrí mana ajinachu, chaytaj sutʼita rikuchin Jehovaqa kʼacha kasqanta, nitaj munasqallanta ruwasqanta, astawanqa imachus sutin niyta munasqanman jina ruwasqanta. Payqa imachus necesitakusqanman tukuyta atin munayninta juntʼananpaj (Éxo. 3:13, 14). Payqa llajtanta jarkʼakunanpaj chay rato kallpasapa soldadoman tukuyta atin. Chantapis chay ratollataj tukuyta atin khuyakoj Diosman juchasta perdonananpaj, juchasninkumanta pesachikojkunata kallpachananpaj, cuidananpaj ima (Sal. 30:5; Isa. 66:13).

20. ¿Imajtintaj Jehovaj carretan mayta tʼukuchiwanchej?

²⁰ Allin kanman sapa ujninchej tapurikunanchej: “¿Jehovaj carretanmanta yachakuy noqatapis tʼukuchillawantajchu?”, nispa. Amapuni qonqanachu imawanchus Diospa carretan ninakusqanta. Yuyarikunataj Jehovawan, wawanwan, angeleswanqa imaschus llakichiwasqanchejta qhawamushasqankutapuni. Ama yuyanachu Diosninchej imatachus necesitasqanchejta mana qonawanchejta. Nillataj yuyanachu Diospa llajtan ima cambio kajtinpis ni imata ruwayta atinanta. Allin kanman yuyarikunanchej Jehovaj llajtanqa ñaupajmanpuni rishasqanta. Ezequielqa uj parlayta uyarerqa “ruedas, muyuychej” nispa nejta. Chaytaj ichapis uj kamachiy karqa ruedas purinankupaj (Eze. 10:13). Jehovaqa tʼukunata llajtanta apaykachan. Jinapis imaynachus Jehová kasqanta yachay astawan tʼukuchiwanchej.

21, 22. Imachus carretata purichisqanta sutʼinchay.

²¹ Chaymanta Ezequielqa imachus ruedaspa patanpi kashasqanmanta parlarqa, pay nerqa: “Uj pampa kasharqa chhullunka jina kʼancharishaj, tʼukunataj karqa”, nispa (Eze. 1:22). Querubinespa patankupeqa uj pampa kasharqa cristal jina kʼancharishaj. Ichapis mecanicosqa ninkuman: “¿Imataj chay pampaj patanpi kashanri? ¿Imaynatataj chay ruedas khuska purinku, ni ima japʼishajtinri?”, nispa. Jinapis Diospa carretanqa mana uj carretapunichu, nitaj uj carreta jinapunichu tukuy imasnin japʼisqa kanan tiyan purinanpaj, astawanpis chay carretaqa cielopi kaj imaswan ninakun. Chantapis Ezequiel nillarqataj: “Chay kausajkunapi kaj espiritullataj chay ruedaspipis kasharqa”, nispa (Eze. 1:20, 21). ¿Ima espiritumantataj Ezequiel parlasharqa?

²² Chay espiritoqa Jehová Diospa espíritu santon, chay jina kallpataj ni maypi kanchu. Chay kallpawan Diospa carretanqa sumaj ujchasqa purin, chay kallpallawantaj chay carretaj sapa parten japʼisqa kashan. Chantá Ezequielqa chay carretata purichejmantañataj parlan. Kunantaj imatachus rikusqanmanta parlarina.

23. 1) ¿Ima palabrasta Ezequiel oqharin mosqoypi jina rikusqanmanta parlananpaj? 2) ¿Imaraykutaj chay palabrasta ashkhata oqharin?

²³ (Ezequiel 1:26-28 leey). Ezequielqa mosqoypi jina rikusqanmanta parlaspa ashkha kutista oqharin ‘rijchʼakoj’, ‘rijchʼakorqa’, ‘jina’ palabrasta. Jinapis kay versiculospeqa astawanraj chay palabrasta oqharin. Chaypi reparanchej Ezequielqa imastachus rikushasqanta ni imaynamanta niyta atishasqanta. Payqa rikusqanmanta nerqa: “Uj ima kasharqa, zafiro rumi jina, kamachina tiyanaman rijchʼakojtaj”, nispa. Chay kamachina tiyanaqa yana azul zafiro rumimanta ruwasqa kasharqa, jatun zafiro rumimanta. Kamachina tiyanapitaj “uj runaman rijchʼakoj tiyasqa kasharqa”.

24, 25. 1) Jehovaj kamachina tiyananpa muyuyninpi kaj arcoíris, ¿imatá yuyarichiwanchej? 2) Mosqoypi jina rikusqanku, ¿imaynatá profetasta yanaparqa?

²⁴ Ezequielqa imatachus rikusqanta mana sutʼita rikuyta atillarqachu. Imaraykuchus Jehovaj jatun kaynenqa kʼancharisharqa cinturanmanta uraman, cinturanmanta patamanpis. Manchayta kʼancharishasqanrayku ichapis Ezequielqa ñawisninta tumpata chʼirmiykurispa, makisninwan tapakuspa qhawasharqa imatachus rikusqanta. Ezequielqa mosqoypi jina rikusqanta kayta nispa tukuchan: “Payqa kʼanchaywan muyurisqa kasharqa. Chay kʼanchayqa para diapi phuyuspi rikhurej kʼuychi jina karqa”, nispa. Arcoirista rikuspaqa mayta tʼukunchej. Chayqa yuyarichiwanchej Ruwawajninchej Diospa jatun kayninta. Imaymana coloresniyoj arcoirisqa sonqonchejta tiyaykuchin. Yuyarichiwanchejtaj Jatun Para pasayta Jehová runaswan allinyakuy tratota ruwasqanta (Gén. 9:11-16). Arí, Aswan Patapi Kaj Diosqa manchay atiyniyoj, sonqo tiyaykuyta qoj Diostaj (Heb. 13:20). Payqa sonqo tiyasqallapuni, tukuy sonqo payta yupaychajkunamantaj sonqo tiyayta qon.

²⁵ Jehová Diospa jatun kayninta rikuspa, ¿imatataj Ezequiel ruwarqa? Pay nin: “Chayta rikuspa pampakama kʼumuykukorqani”, nispa. Ezequielqa Diosta manchachikuspa pampakama kʼumuykukorqa. Waj profetaspis paykunaman Jehová uj mosqoypi jina rikuchejtin, Ezequiel jinallataj ruwarqanku. Chay jina tʼukuna imasta rikuspaqa tukuypis mancharisunman, ni ima kasqanchejtataj yuyasunman (Isa. 6:1-5; Dan. 10:8, 9; Apo. 1:12-17). Tukuy chay profetasqa may kallpachasqa kasharqanku chay imasta rikuspa, Ezequielpis ajinallatajchá kasharqa. Noqanchejrí chay imasta Bibliapi leespa, ¿tʼukullanchejtajchu?

26. ¿Imaynapí yachanchej mosqoypi jina rikusqan Ezequielta kallpachasqanta?

²⁶ Ichapis Ezequielqa llakisqa kasharqa Diospa llajtan Babiloniaman preso apasqa kasqanmanta, jinapis chay mosqoypi jina rikusqanqa mayta kallpacharqa. Jehová Diospa llajtan Jerusalenpi chayri Babiloniapi kajtinpis, Jehovawan cielopi kaj llajtanwanqa paykunata cuidallankumanpuni karqa, Jehovapis qayllallankupipuni kanman karqa. Ni Diablopis sayaykuyta atinchu chay jatun carretata apaj Diosmanqa (Salmo 118:6 leey). Chantapis Ezequiel rikorqa Diospa carretanqa runaspa qayllankupi kashasqanta, pampakamapuni chayasqanta (Eze. 1:19). Jehovaqa Babiloniaman preso apasqa kamachisninta qhawamushallarqapuni. Munakoj tatankoqa paykunata cuidallanmanpuni karqa.

27. ¿Imaynatá Ezequielpa rikusqan yanapawanchej?

²⁷ Ezequiel mosqoypi jina rikusqan, ¿yanapawanchejchu? Arí. Satanasqa Diosllata yupaychayta chinkachiytapuni munaspa tukuy imata ruwashan. Payqa yuyachiyta munawanchej sapallanchej kashasqanchejta, cielopi kaj tatanchej, llajtanpis karupi kashasqankuta. Amapuni chay llulleriosta sonqonchejpi, yuyayninchejpipis japʼikunachu (Sal. 139:7-12). Ezequiel jinallataj noqanchejpis Diospa llajtanmanta yachakuspa tʼukunchej, jatunpajtaj qhawanchej. Mana Ezequiel jinachu pampakama kʼumuykukojtinchejpis, Jehová Diospa llajtanmanta yachayqa mayta tʼukuchiwanchej. Sutʼita reparanchej jatun kayninta, atiyninta, usqhayta risqanta, ima ladollamanpis riyta atisqanta, chantá ima kajtinpis rillasqantapuni.

28, 29. Kay pasaj pachaj wataspi, ¿imastaj rikuchin Diospa llajtan ñaupajman rishasqanta?

²⁸ Jehová Diospataqa kay jallpʼapi llajtan kallantaj. Chay llajtanpi kajkunaqa pantaj runas kanku. Ajinapis yachakunachej imatachus Jehová paykunanejta ruwashasqanta. Jehovaqa chay pantaj runasta yanaparqa tʼukuna imasta ruwanankupaj (Juan 14:12). Chaymanta astawan yachanapajqa Diospa Reinonqa kamachishanña nisqa librota leerisunman. Chay librota leespa yuyarikusun ima lugarespiñachus predicakusqanta pasaj pachaj wataspi. Chantapis reparallasuntaj Jehovaj llajtanqa sumajta ñauparishasqanta Bibliamanta yachachiypi, willanapaj derechosninchejta valechiypi, rikhurimoj mosoj aparatoswan yanapachikuypi ima. Tukuy chaytataj ruwakushan Diospa munayninta juntʼanapaj.

²⁹ Kay sajra mundoj tukukuynin tiempopi Diosllata yupaychayqa watejmanta sayarichisqa kashan. Chaywan sutʼita reparanchej Jehovaj carretanqa siga purishasqanta. Mayta kusikunchej Diospa llajtanwan khuska Tukuyta Kamachej Diosta sirvisqanchejmanta (Sal. 84:10).

30. ¿Imamantataj qhepan capitulopi yachakusun?

³⁰ Ezequiel mosqoypi jina rikusqanmantaqa astawanraj yachakusunman. Qhepan capitulopi yachakusun chay ‘tawa kausajkunamanta’, nisunman querubinesmanta. ¿Imatataj chay querubines yachachiwanchej Tukuyta Kamachej Jehová Diosninchejmanta?