Diospis Supaypis angelesniyoj kanku

 1. ¿Angelesmanta yachakunachu kasqa?

¹ JEHOVÁ DIOSQA munan familianta rejsinanchejta. Angelestaj Diospa familian kanku. Bibliapi nin, angelesqa Diospa ‘wawasnin kasqankuta’ (Job 38:6, 7). Chayrayku yachana tiyan imatachus ángeles ruwasqankuta, imaynatachus ñaupa tiempo runasta yanapasqankuta, imaynatachus yanapawasqanchejtapis (“Ángeles” nisqata leeriy).

 2. 1) ¿Pitaj angelesta ruwasqa? 2) ¿Mashkha angelestataj Diosninchej ruwasqa?

² Ñaupajtaqa yachananchej tiyan, pichus angelesta ruwasqanta. Bibliaqa nin, Jehová Diosqa Jesustaraj ñaupajta ruwasqanta, chaymantataj “cielopi, jinallataj kay jallpʼapi tukuy ima” kajta (Colosenses 1:16). Chayrayku angelespis, Diospa ruwasqallantaj kanku. Diostaj may chhika angelesta ruwarqa (Salmo 103:20; Apocalipsis 5:11).

 3. ¿Imaynataj ángeles kasharqanku kay jallpʼata rikuspa?

³ Bibliaqa niwanchej, Jehová Diosqa niraj kay jallpʼanchejta ruwashaspa angelestaraj ruwasqanta. ¿Imaynataj ángeles kasharqanku kay jallpʼata rikuspa? Bibliaqa mayta kusikusqankuta nin. Paykunaqa uj familia jina Diosta ujchasqa yupaycharqanku (Job 38:4-7).

 4. ¿Ángeles runasta yanapayta munankuchu?

⁴ Angelesqa runasta mayta yanapayta munanku, maytataj yachayta munanku imaynatachus Diospa munaynin kay jallpʼapi juntʼakunanta (Proverbios 8:30, 31; 1 Pedro 1:11, 12). Angelesqa imatachus llakikorqankupis, Adanwan Evawan Diosta mana kasukusqankumanta. Kunanpis kikillantatajchá llakikunku, may chhika runas Jehová Diosta mana kasukusqankuta rikuspa. Jinapis uj runa juchanmanta pesachikuspa Diosman kutirikojtenqa, mayta kusikunku (Lucas 15:10). Angelesqa Diosta yupaychajkunata yanapanankupaj wakichisqa kashanku. Diosqa angelesninta kamachin, kamachisninta cuidanankuta, yanapanankuta ima (Hebreos 1:7, 14). Kunan chayta yachakusunchej.

 5. 1) ¿Imaynatataj ángeles Lotta yanapasqanku? 2) ¿Imaynatataj ángeles Danielta yanapasqanku? 3) ¿Imaynatataj ángeles Pedrota yanapasqanku?

⁵ Diosninchejqa Sodoma, Gomorra llajtasta chinkachinan karqa. Lotwan familianwan mana wañunankupajtaj, iskay angelesta kacharqa paykunata orqhomunankupaj (Génesis 19:15, 16). Aswan unayninmantaj, profeta Danielqa leonespa tʼoqonman wijchʼuykusqa karqa. Leonestaj paytaqa mana imanarqankuchu. Imaraykuchus Diosninchejqa “angelninta kachamorqa, paytaj leonespa siminkuta wisqʼaykurarqa” (Daniel 6:22). Chaymanta unayninmantaj, apóstol Pedroqa carcelpi wisqʼasqa kasharqa. Diostajrí ujnin angelninta kacharqa, payta carcelmanta orqhonanpaj (Hechos 12:6-11). Angelesqa Jesustapis yanapallarqankutaj. Uj kuteqa bautizakusqantawan “yanaparqanku” (Marcos 1:13). Waj kutipitaj, niraj wañuchisqa kashajtin “uj ángel rikhurimuspa payta kallpacharqa” (Lucas 22:43).

 6. 1) ¿Runasta ángeles yanapashallankupunichu? 2) ¿Imatataj qhepan parrafospi yachakusunchej?

⁶ Kay tiempopi, angelesqa manaña runasman rikhurinkuchu. Jinapis Diosqa angelesninwan kamachisninta yanapashallanpuni. Bibliaqa nin: “Diospa angelnenqa Diosta manchachikojkunaj muyuyninkupi jaraykukuspa, paykunata jarkʼakun”, nispa (Salmo 34:7). Ángeles yanapanawanchejta necesitanchej. Imaraykuchus sinchʼi atiyniyoj enemigos kapuwanchej, ñakʼarichiytataj munawanchej. Qhepan parrafospi yachakusun pikunachus chay enemigosninchej kasqankuta. Yachakullasuntaj imaynapichus enemigosninchejman tukusqankuta, imaynatachus ñakʼarichiyta munawasqanchejtapis.

 7. Supay, ¿munanchu runas Diosta sirvinankuta?

⁷ Adanwan Evawan ruwasqa kasqankumanta pisi tiemponman, uj ángel Diospa contranta oqharikorqa, munarqataj wajkunata gobernayta. Chaytataj yachakorqanchejña. Bibliaqa chay angelta sutichan, Kuraj Supay Satanás nispa (Apocalipsis 12:9). Supayqa munallarqataj, runaspis Diospa contranta oqharikunankuta. Payqa Evata engañarqa. Chaymantapachataj ashkha runasta engañallanpuni. Jinapis wakin runasqa Diosta kasukorqanku. Paykunataj karqanku: Abel, Enoc, Noé ima (Hebreos 11:4, 5, 7).

 8. 1) ¿Imaynamantataj wakin ángeles sajraman tukusqanku? 2) ¿Imatataj sajra ángeles ruwasqanku Jatun Parapi mana wañunankupaj?

⁸ Noej tiemponpi wakin angelesqa, Diospa contranta oqharikorqanku. Paykunaqa jallpʼaman uraykamorqanku runa jina kausanankupaj. Bibliaqa niwanchej, warmiswan casarakunankupaj uraykamusqankuta (Génesis 6:2 leey). Chayta ruwasqankutaj mana allinchu karqa (Judas 6). Chay tiempomanta runaspis, chay ángeles jinallataj millay kausayniyoj karqanku, machu machustaj. Chayrayku Jehová Diosqa sajra runasta Jatun Parapi chinkacherqa, payta kasukojkunatarí salvarqa (Génesis 7:17, 23). Chay sajra angelestaj, Jatun Parapi mana wañunankupaj cieloman kutiporqanku. Paykunaqa Supaywan khuska Diospa contranta oqharikorqanku. Ajinamantataj Supayqa chay sajra angelespa cabecillankuman chayri mayorninkuman tukorqa. Bibliaqa chay sajra angelesta supaykuna nispa sutichan (Mateo 9:34). Runastaj paykunata “demonios”, “diablos” nispa nillankutaj.

 9. 1) Juchallikoj angelesta, ¿Diosninchej wawasnillanpajpunichu qhawasqa? 2) ¿Imatataj kunan yachakusunchej?

⁹ Jehová Diosqa chay juchallikoj angelesta manaña wawasninpajchu qhawarqa (2 Pedro 2:4). Paykunaqa manaña runasman tukuyta atinkuchu, jinapis “jallpʼapi kaj tukuy runasta” pantachishallankupuni (Apocalipsis 12:9; 1 Juan 5:19). Kunantaj yachakusunchej, imaynatachus may chhika runasta pantachisqankuta (2 Corintios 2:11 leey).

10. ¿Imaynamantataj Supaywan diablosninwan runasta pantachishanku?

¹⁰ Supaywan diablosninwanqa tukuy imaymanamanta runasta engañashanku. Ashkha runasqa rinku jampirisman, yatirisman, layqasman, aysirisman. Chaykunataj Supaywan diablosninwan imalla parlanku. Bibliatajrí niwanchej layqerío ruwaykunawanqa, amapuni ima ruwananchejpis kananta (Gálatas 5:19-21). Imaynatachus uj runa trampata churaspa animalesta japʼin, ajinallatataj Supaywan diablosninwanpis, imaymana engañoswan uj animalta jina japʼiwasunman (“Layqeríos” nisqata leeriy).

11. 1) ¿Imaswantaj Supaywan diablosninwan runasta engañashanku? 2) ¿Chaykunata ruway allillanchu kanman?

¹¹ Runasqa suerteta qhawachikamunku adivinoswan, cocata qhawajkunawan, naipesta qhawajkunawan, makita qhawajkunawan ima. Wakintaj pampa jampirisman chayri yatirisman rinku. Supaywan diablosninwantaj, chaykunawan runasta engañashanku. Ashkha runasqa yuyanku, chayta ruwachikamoyqa allillan kasqanta. Jinapis chayqa mana allinchu. Bibliaqa niwanchej, adivinosqa Supaywan khuska trabajasqankuta. Apostolespa tiemponkupi, uj sipasqa “supayniyoj kaspa” “runaspa suertenkuta” qhawaj. Apóstol Pablo chay supayta sipasmanta qharqojtintaj, sipasqa manaña suerteta qhawayta aterqachu (Hechos 16:16-18).

12. 1) ¿Aysirisman rinachu kasqa? 2) ¿Ima costumbrestataj mana ruwananchejchu kasqa?

¹² Supaywan sajra angelesninwanqa, waj jinamanta engañallawasunmantaj. Paykunaqa creechiyta munawanchej, uj runa wañupojtin alman llojsisqanta, chay almawantaj parlayta atisqanchejta. Chantapis creechiyta munawanchej, almaqa castigayta atiwasqanchejta. Chayta creespa, wakin runasqa aysirisman rinku. Aysiristaj runasta ninku, wañusqaj animonta wajyasqankuta. Chantapis “alma parlashan” nispa thutuykachanku. Chaywantaj runata yuyachinku alma kausakushasqanta. Jinapis aysirisqa Supaypa sajra angelesnillanwan parlanku (1 Samuel 28:3-19). Mana chayllachu, runasqa “almapaj” nispa ruwanku: veloriota, lavatoriota, nueve diasta, todo santosta ima. Chantapis lutukunku, misasta churachinku, waj imastawan ruwanku. Cristianostajrí yachanchej almaqa mana kasqanta, wañusqaswan mana parlayta atisqanchejta, nitaj alma castigopis kasqanta. Chayrayku chay costumbresta qonqapunchej. Jinapis ichá wakin familianchej chayri llajta masisninchej imaymanasta niwasun, chejnikuwasuntaj (Salmo 115:17). Ajina kanman chaypis, amapuni wañusqaspaj ima costumbretapis ruwanachu, nitaj aysirista tapukojpis rinachu (Deuteronomio 18:10, 11 leey; Isaías 8:19).

13. ¿Imatataj unay tiempomanta ashkha runas atipasqanku?

¹³ Sajra angelesqa mana pantachillaytachu munawanchej, manachayqa manchachiyta munawanchej. Supaywan sajra angelesninwanqa, yachanku pisimantawan chinkachisqa kanankuta. Chayrayku aswan phiñasqa kashanku, tukuy imatataj ruwashanku (Apocalipsis 12:12, 17). Unay tiempoqa ashkha runas sajra angelesta mayta manchachikoj kanku. Jinapis chay manchikuyninkuta atiparqanku. Qhepan parrafospitaj yachakusun, imastachus chaypaj ruwasqankuta.

14. ¿Imatataj ruwasunman Supaymanta, diablosninmantawan kacharichikunanchejpaj?

¹⁴ Bibliaqa niwanchej, imaynatachus Supaypa sajra angelesninman sinchʼita sayaykunata, imaynatachus makinkumanta kacharichikunatapis. Éfeso llajtamanta wakin runasqa, niraj Diosta rejsishaspa layqas karqanku. ¿Imatataj ruwarqanku chayta qonqanankupaj? Bibliaqa nin: “Layqeriosta ruwaj kanku chaykunamanta ashkhas, librosninkuta tantaykuspa tukuypa ñaupaqenpi ruphaykucherqanku”, nispa (Hechos 19:19). Paykunaqa Diosta yupaychayta munaspa, layqa librosninkuta ruphaykucherqanku. Kunanpis kikillantataj ruwananchej tiyan. Wakin libros, revistas, películas, takiykuna chayri waj imas, layqerío imaswan chajrusqa kanku. Chaykunataj qhawanapaj jina, uyarinapaj jinataj kanman. Jinapis chaykunaqa Supaymanta, diablosninmantawan jamun. Chayrayku chay imas kapuwanchej chayqa, ruphaykuchinanchej chayri chinkachinanchej tiyan. Chantapis sajramanta jarkʼakunapaj imapis kapuwanchej chayqa, chaykunatapis chinkachinallataj tiyan. Chayta ruwaspaqa, Jehová Diosta kusichisun (1 Corintios 10:21).

15. ¿Pitaj yanapawasunman Supayta, sajra angelesnintawan mana manchachikunapaj?

¹⁵ Nerqanchej jina, Éfeso llajtamanta cristianosqa layqerío librosninkuta ruphaykucherqanku. Jinapis watasninmanqa, apóstol Pablo paykunaman nerqa “cielopi kaj supaykunawan” maqanakunankuraj kasqanta (Efesios 6:12). Supaypa sajra angelesnenqa paykunata manchachiyta munallarqankupuni. Chayrayku apóstol Pabloqa paykunaman nerqa: “Creeyniykichej uj jatun jarkʼakuna escudo jina kachun. Chaywanqa Kuraj Supaypa laurashaj tukuy flechasninta thasnuyta atinkichej”, nispa (Efesios 6:16). Ñaupa tiempomanta soldadospataqa, maqanakupi jarkʼakunankupaj uj jatun manka tapa jina tiyapoj. Chaytaqa escudo nej kanku. Imaynatachus chay escudo uj soldadota jarkʼaj, ajinallatataj creeyninchejpis jarkʼawasunman.  Jehová  Dios  yanapanawanchejpi creesun chayqa, Supayta, sajra angelesnintawan manaña manchachikusunchu (Mateo 17:20).

16. ¿Imatataj ruwananchej kasqa creeyninchej aswan sinchʼi kananpaj?

¹⁶ Creeyninchej aswan sinchʼi kananpajqa, sapa día Bibliata leena tiyan. Chantapis Diosninchej yanapanawanchejpi tukuy sonqo creenanchej tiyan. Chayta ruwasun chayqa, Supaywan, sajra angelesninwanqa ni imanayta atiwasunchu (1 Juan 5:5).

17. ¿Imatataj ruwananchej kasqa Supayta, sajra angelesnintawan mana manchachikunapaj?

¹⁷ Éfeso llajtaqa layqerío ruwaykunawan juntʼa karqa. Chayrayku Pabloqa chay llajtapi tiyakoj cristianosman nerqa: “Sapa pʼunchay Diosmanta mañakuychej atiyninwan yanapachikuspa, tukuy laya mañakuywan, rogakuywantaj”, nispa (Efesios 6:18). Efesomanta cristianosqa mana llajta masisninku jina kanankupaj, Diosmanta mana saykʼuspa mañakunanku karqa. Kay tiempopipis casi tukuy ima layqerío ruwaykunawan chajrusqa kashan. Supayta mana manchachikunapajqa, Jehová Diosmanta yanapata mañakuna tiyan, mañakushaspataj sutinta oqharinanchej tiyan (Proverbios 18:10 leey). Ajinata mañakojtinchej, Jehová Diosqa uyariwasunpuni (Salmo 145:19; Mateo 6:13).

18, 19. 1) ¿Pejpa yanapayninwantaj sajra angelesta atipayta atisun? 2) ¿Imatataj qhepan capitulopi yachakusun?

¹⁸ Supaypa sajra angelesninman sayaykunapajqa, layqerío imasninchejta ruphaykuchinanchej chayri chinkachinanchej tiyan, Diospitaj sinchʼita creena tiyan. Chantapis sajra angelesta mana manchachikunachu tiyan (Santiago 4:7, 8 leey). Jehová Diosqa paykunamanta nisqa aswan atiyniyoj. Payqa Noej tiemponpi sajra angelesta castigarqa, tumpamantawantaj paykunata chinkachenqa (Judas 6). Mana sapallanchejchu sajra angeleswan maqanakushanchej. Jehová Diosninchejqa angelesninwan yanapashawanchej (2 Reyes 6:15-17). Paypa yanapayninwanqa Supayta, sajra angelesnintapis atipayta atisunchej (1 Pedro 5:6, 7; 2 Pedro 2:9).

¹⁹ Jinapis Supaywan sajra angelesninwanqa, runasta ñakʼarichishallankupuni. Qhepan capitulopi yachakusunchej, imaraykuchus Diosninchej paykunata manaraj chinkachisqanta.