LECCIÓN 36
Tukuy imapi allinta purina
Tukuypis munanchej amigosninchej mana llullakunawanchejta, nitaj chʼaukiyanawanchejta. Jehová Diospis chayllatataj suyan amigosninmanta. Jinapis chʼaukiyaj runas chaupipi tiyakusqanchejrayku mana chayta ruwayta atillanchejchu. ¿Imaspitaj yanapawanchej tukuy imapi allinta puriy? Chayta kaypi yachakusun.
1. ¿Imajtintaj mana llullakunachu, nitaj chʼaukiyanachu?
Jehovata munakusqanchejrayku, jatunpajtaj qhawasqanchejrayku mana llullakunchejchu, nitaj chʼaukiyanchejchu. Biblia nin: “Jehová Diosqa sajra imasta ruwajkunata chejnikun. Cheqan runastataj amigosninpaj qhawan”, nispa (Proverbios 3:32). Jehovaqa yachan imatachus yuyasqanchejta, imatachus ruwasqanchejtapis (Hebreos 4:13). Chantapis payqa tukuy imapi allintachus manachus purishasqanchejta qhawamushan, mana llullakojtinchej, nitaj chʼaukiyajtinchejtaj mayta kusikun.
2. Tukuy imapi allinta purisqanchejrayku, ¿imastá mana ruwanchejchu?
Jehovaqa mana munanchu ‘llullasta willanakunanchejta’ (Zacarías 8:16, 17). Chayrayku mana llullakunchejchu familiaresninchejman, trabajomanta compañerosninchejman, hermanosninchejman, nitaj autoridadesmanpis. Chantapis mana suwakunchejchu, nitaj autoridadestapis engañanchejchu (Proverbios 24:28; Efesios 4:28 leey). Impuestostapis maychus kajta paganchej (Romanos 13:5-7). Noqanchejqa ‘tukuy imapi allintapuni puriyta munanchej’ (Hebreos 13:18).
3. ¿Imaraykutaj may allin mana llullakunanchej, nitaj chʼaukiyananchej?
Mana llullakunchejchu, nitaj chʼaukiyanchejchu chayqa wajkuna astawan confiawanchej. Chantá atienekunapaj jina kasunchej, hermanoswanpis uj familia jina kausakusunchej, nitaj sonqonchejpis juchachawasunchu. Mana llullakuspa, nitaj chʼaukiyaspaqa, “Salvawajninchej Diospa yachachiyninta tukuy imapi jatunpaj” qhawachinchej. Chayrayku ichá waj runaspis noqanchejwan khuska Jehová Diosta sirviyta munanqanku (Tito 2:10).
ASTAWAN YACHAKUNA
Kaypi yachakusun Jehová Diospa amigosnin kanapajqa, tukuy imapi allinta purina kasqanta, mana llullakuspa, nitaj chʼaukiyaspa.
4. Mana llullakojtinchej, nitaj chʼaukiyajtinchej Jehová kusikun
Salmo 44:21; Malaquías 3:16 leeriychej, chantá yachakojta tapuriy:
¿Imatapis Jehová Diosmanta pakayta atisunmanchu? ¿Imaraykú chayta ninki?
¿Jehová Dios kusikunchu mana llullakuspa parlajtinchej?
Wawas mana llullakunkuchu chayqa, tatasninkuta kusichinku. Noqanchejpis mana llullakuspaqa Jehovata kusichinchej.
5. Amapuni llullakunachu, nitaj chʼaukiyanachu
Wakin runasqa ninku uj chhikitanta llullakuy chayri chʼaukiyayqa mana juchachu kasqanta. Jinapis noqanchejqa yachanchej mana chayta ruwananchejchu kasqanta. VIDEOTA qhawariychej.
Hebreos 13:18 leeriychej, chantá yachakojta tapuriy:
¿Imaraykutaj familianchejman mana llullakunachu, nitaj chʼaukiyanachu?
¿Imaraykutaj trabajopi chayri colegiopi mana llullakunachu, nitaj chʼaukiyanachu?
¿Ima kutispiwantaj mana llullakunachu, nitaj chʼaukiyanachu kanman?
6. Mana llullakuy, nitaj chʼaukiyayqa allinninchejpaj
Mana llullakojtinchej, nitaj chʼaukiyajtinchej ichapis wakin kuteqa problemaspi rikukusunman. Jinapis tiempowanqa chayta ruwasqanchej allinninchejpaj kasqanta reparasun. Salmo 34:12-16 leeriychej, chantá yachakojta tapuriy:
Mana llullakuy, nitaj chʼaukiyay, ¿imaspitaj yanapawasunman?
Qhariwarmi kausaypi mana llullakunkuchu, nitaj chʼaukiyanakunkuchu chayqa, aswan sumajta kausakunku.
Trabajonchejpi mana llullakusunchu, nitaj chʼaukiyasunchu chayqa, patronninchejpis confiallawasun.
Mana llullakusunchu, nitaj chʼaukiyasunchu chayqa, autoridadespis allinpaj qhawawasun.
WAKIN RUNAS NINKU: “Uj chhikitanta llullakoyqa mana juchachu”, nispa.
Jehová Diosrí, ¿ajinallatatajchu yuyanman, imatá qan niwaj?
¿IMASTÁ YACHAKUNCHEJ?
Kaypi yachakunchej Jehová Diospa amigosnenqa mana llullakunankuchu, nitaj chʼaukiyanankuchu kasqanta.
Yuyarikunapaj
¿Imaspitaj mana llullakunachu, nitaj chʼaukiyanachu?
¿Jehová Diosmanta imatapis pakayta atisunmanchu?
¿Imaraykutaj may allin mana llullakunanchej, nitaj chʼaukiyananchej?
ASTAWAN YACHAKUNAYKIPAJ
¿Imaynatá tatas wawasninkuman yachachinkuman mana llullakuyta? Chayta yachanaykipaj kay videota qhawariy.
¿Nisqankuta juntʼajkuna ima bendicionesta japʼenqanku? Chayta yachanaykipaj kay videota qhawariy.
¿Qolqenchejta mana allinta apaykachajtinkupis impuestosta paganapunichu? Chayta yachanaykipaj kayta leeriy.
“¿Impuestosta paganachu tiyan?” (La Atalaya, 1 de septiembre de 2011)
Uj chʼaukiyaj runata, ¿imataj cambiananpaj yanaparqa? Chayta yachanaykipaj kayta leeriy.
“Jehovaqa khuyakuyniyoj, perdonaj ima” (Torremanta Qhawaj, 1 de mayo de 2015)